هشكه‌سالی چو كارتێكرنێ‌ ل سه‌ر گرانبوونا به‌رهه‌مێن خۆمالی ناكه‌ت

هشكه‌سالی چو كارتێكرنێ‌ ل سه‌ر گرانبوونا به‌رهه‌مێن خۆمالی ناكه‌ت

11

هه‌رهین محه‌مه‌د:

به‌رپرسێ‌ پشكا پلان دانانێ‌ و دووڤچوونێ‌ ل رێڤه‌به‌ریا گشتی یا چاندنێ‌ ئاشكه‌را كر، نه‌ هاتنا به‌فر و بارانان ئه‌ڤ ساله‌ چو كارتێكرنێ‌ ل گرانبوونا وان به‌روبومان ناكه‌ت ئه‌وێن ژ گه‌نمی دهێنه‌ چێكرن، چونكو پتریا وان به‌رهه‌مان ژ وه‌لاتێن بیانی دهێنه‌ دناڤ بازارێ‌ دهۆكێ‌ دا و ئه‌و جوتیارێن گه‌نمی دچینن ژی هه‌ر وی به‌رهه‌می بیانی بۆ خوه‌ دكرن و ب تنێ‌ ئه‌ڤ گه‌نمه‌ دچیته‌ د سایلۆیان دا و دكه‌نه‌ ئار.

 

خدر برجینی به‌رپرسێ‌ پشكا پلان دانانێ‌ و دووڤچوونێ‌ ل رێڤه‌به‌ریا گشتی یا چاندنێ‌ ل پارێزگه‌ها دهۆكێ‌ گۆت: ئه‌ڤ ساله‌ نه‌هاتنا به‌فر و بارانا كارتێكرن ل ده‌خل و دانی و جوتیاران كر و ئه‌ڤ ساله‌ ژی رێژه‌كا مه‌زن یا ده‌خل و دانی پارێزگه‌ها دهۆكێ‌ دهێته‌ چاندن، ب تایبه‌ت ل ده‌شتا سلێڤانه‌یا و به‌رده‌ره‌ش و شێخان و ئاكرێ‌ و زاخۆ، ئانكۆ پتری نه‌ه سه‌د هزار دونه‌مێن ئه‌ردی گه‌نم لێ‌ دهێته‌ چاندن. دیسان چه‌ندین به‌روبوومێن دی یێن كێلگه‌یی مه‌ هه‌نه‌.

زێده‌تر گۆت: نه‌هاتنا بارانا كارتێكرنا مه‌ زن ل سه‌ر كر وه‌كو چه‌روان و پاوانا، به‌لێ‌ یێ‌ هه‌ری زه‌ره‌رمه‌ند جوتیاره‌ و ل سنورێ‌ پارێزگه‌ها دهۆكێ‌ پتری پێنچ هزار جوتیاران مه‌ هه‌نه‌ كو رادبن ب كارێ‌ چاندنا گه‌نمی، ژ به‌ر كو ده‌ڤه‌را مه‌ ده‌ڤه‌ره‌كا زه‌نگینه‌ ب بارانا و سالانه‌ نێزیكی 350 ملیمێن بارانان لێ‌ دهێن و ته‌كه‌زا وان به‌روبومێن زڤستانان چێدبن هه‌موو ل سه‌ر بارانایه‌ ب تایبه‌ت گه‌نمی.

گۆت ژی: هه‌كه‌ ته‌ماشه‌ی بازارێن مه‌ بكه‌ین ئه‌و به‌روبومێن ژ گه‌نمی دهێنه‌ چێكرن وه‌كو ساڤار و دانهێرك و دانقوت و ئارێ‌ سفر و مه‌عكه‌رون هه‌موو ژ ده‌رڤه‌ دهێن و هه‌ر جوتیارێ‌ مه‌ یێ‌ گه‌نمی دچینیت و ئه‌و ب خوه‌ دچیت وی به‌روبومێ‌ ئاماده‌ ل بازاری دكریت و یێ‌ بیانیه‌ ئه‌و به‌روبوومه‌ و هه‌روه‌سان نه‌بوونا كارگه‌هان وه‌كو پێدڤی و نه‌بوونا هشیاریا خه‌لكێ‌ مه‌ كرینا به‌رهه‌مێ‌ خومالی وه‌لێكریه‌ به‌رهه‌مێ‌ مه‌ یێ‌ بیانی بازارێ‌ مه‌ تژی كریه‌.

گۆتیشی: هشكه‌سالی ل هه‌رێما كوردستانێ‌ رێژه‌یی یه‌ و هه‌كه‌ ته‌ماشه‌ی ناڤه‌راستا ئیراقێ‌ بكه‌ین هشكه‌سالی یه‌ و یا ب دروستی یه‌ باكوورێ‌ عیراقێ‌ هه‌كه‌ گه‌نمی بچینن ژی، پتریا گه‌نمێ‌ وان یێ‌ ئاڤیه‌.

کۆمێنتا تە