هه‌رێما كوردستانێ ل سه‌ر 12 بازنێن هه‌لبژارتنان دا هاتیه‌ دابه‌شكرن

هه‌رێما كوردستانێ ل سه‌ر 12 بازنێن هه‌لبژارتنان دا هاتیه‌ دابه‌شكرن

رێڤه‌به‌رێ ده‌سته‌یا هه‌لبژارتنێن هه‌رێما كوردستانێ ل كۆمسیۆنا بلند یا هه‌لبژارتنان ل عیراقێ، راگه‌هاند، رۆژا شه‌مبیێ دووماهی رۆژا تۆماركرنا لیستێن هه‌ڤپه‌یمانی و به‌ربژاران بوو، ب گشتی 267 حزب هاتینه‌ تۆماركرن ل كۆمسیۆنا بلند یا هه‌لبژارتنێن عیراقێ؟، هه‌روه‌سا ل هه‌رێما كوردستانێ بۆ جڤاتا نوونه‌رێن عیراقێ 46 كورسی یێن هه‌ین كو 16 ل هه‌ولێرێ و 18 ل سلێمانیێ و 12 ل دهۆكێ، ژ وێ هژمارێ ژی دوو كورسی بۆ پێكهاتێ مه‌سیحیانه‌ و هه‌لبژارتنێن ڤێ جارێ ب شێوێ بازنه‌ دێ هێنه‌ ئه‌نجامدان.

ل دۆر شێوێ بازنان و چاوانیا ئه‌نجامدانا هه‌لبژارتنان، حسێن شێخ ره‌قیب، رێڤه‌به‌رێ ده‌سته‌یا هه‌لبژارتنێن هه‌رێما كوردستانێ ل كۆمسیۆنا بلند یا هه‌لبژارتنان، گۆت” هه‌رێما كوردستانێ ب سه‌ر 12 بازنان دا هاتیه‌ دابه‌شكرن كو هه‌ولێر چار بازنه‌ و دهۆك سێ بازنه‌ و سلێمانی پێنج بازنه‌”.

ناڤبری دیاركر ژی كو  53  ل هه‌ولێرێ خوه‌ به‌ربژاركریه‌ بۆ هه‌لبژارتنێن جڤاتا نوونه‌ران، ژ وان 33 كه‌س به‌ربژارێن حزبانه‌ و 12 كه‌س به‌ربژارێن هه‌ڤپه‌یمانیانه‌ و 8 كه‌س ژی به‌ربژارێن سه‌ربخوه‌ نه‌ و 10 كه‌س به‌ربژارێن مه‌سیحیانه‌ و ل پارێزگه‌ها دهۆكێ 28 به‌ربژار یێن هه‌ین ژ وان  18 كه‌س به‌ربژارێن حزبانه‌ و دو كه‌س به‌ربژارێن هه‌ڤپه‌یمانیانه‌ و 8 كه‌س به‌ربژارێن سه‌ربخوه‌ نه‌ و دو كه‌س به‌ربژارێن مه‌سیحیانه‌، ل پارێزگه‌ها سلێمانیێ ژی 65 به‌ربژار یێن هه‌ین  كو 33 به‌ربژارێن حزبانه‌ و 17 به‌ربژارێن سه‌ربخوه‌ نه‌ و 15 كه‌س به‌ربژارێن هه‌ڤپه‌یمانیانه‌”.

رێڤه‌به‌رێ ده‌سته‌یا هه‌لبژارتنێن هه‌رێمێ ل كۆمسیۆنا بلند یا هه‌لبژارتنێن عیراقێ، ئاشكراكر ژی” رێژا  69،5% ژ وه‌لاتیێن هه‌رێما كوردستانێ كارتا بایۆمه‌تری یا تایبه‌ت ب هه‌لبژارتنان ڤه‌ وه‌رگرتیه‌ كو ل پارێزگه‌ها هه‌ولێرێ 64% یه‌ و ل پارێزگه‌ها سلێمانیێ 70% یه‌ و ل پارێزگه‌ها دهۆكێ 74% یه‌”.

ژلایێ خوه‌ڤه‌، بۆتان شێركۆ، هاریكارێ رێڤه‌به‌رێته‌كنیكی ل ده‌سته‌یا هه‌لبژارتنێن هه‌رێمێ گۆت” پرۆسا تۆمارا بایۆمه‌تری ل 15 نیسانا بۆری هه‌تا ئێكێ ئه‌یارێ هاتبوو راگرتن، ئه‌وێن د وی ده‌می دا بایۆمه‌تری ئه‌نجامدای، كارتێن وان دێ هێن، هه‌روه‌سا هه‌ر كێشه‌یه‌ك ل بنگه‌هێن وه‌رگرتنا كارتا بایۆمه‌تری هه‌بیت، ب پشتراستی ڤه‌ دێ چاره‌سه‌ر كه‌ین بۆ وێ چه‌ندێ وه‌لاتی بشێن د ئێكه‌م سه‌ره‌دان دا كارتێن خوه‌ یێن بایۆمه‌تری وه‌ربگرن”.

کۆمێنتا تە