هه‌لبژارتنێن پێشوه‌خت د رۆژه‌ڤا ئاكپارتی و ئه‌ردۆگانی دا نینه‌

هه‌لبژارتنێن پێشوه‌خت د رۆژه‌ڤا ئاكپارتی و ئه‌ردۆگانی دا نینه‌

6

ئه‌ڤرۆ:

كۆمپانیێن راپرسیان ل توركیا د ماوه‌یێ چه‌ند مه‌هێن بۆری دا چه‌ندین راپرسی ئه‌نجام داینه‌ و ئه‌نجامێن راپرسیێن خوه‌ ژی بۆ رایا گشتی ئاشكرا كرینه‌ و هه‌ری دووماهیێ كۆمپانیا ئاڤراسیا یا راپرسیان ئه‌نجاما راپرسیا خوه‌ یا كو ل پرانیا باژێرێن توركیا و باكورێ كوردستانێ ئه‌نجام دایه‌ بۆ رایا گشتی ئاشكرا كر و دیار دبیت كو ل گۆر ئه‌نجامێ راپرسیان ده‌نگێ ئاكپارتیێ گه‌له‌ك كێم بوویه‌.

ده‌زگه‌هێن راگه‌هاندنا توركیا دیار دكه‌ن كو ئه‌ردۆگان و ئاكپارتی ژ ئه‌نجامێن راپرسیان دلگرانن و نها دخوازن ب هه‌ر رێیا هه‌ی كار بۆ زێده‌كرنا ده‌نگێن خوه‌ بكه‌ن، ئۆپه‌راسیۆنا ل دژی په‌كه‌كێ، گرتنا سیاسه‌تمه‌دارێن هه‌ده‌پێ و بزاڤێن بۆ باشكرنا په‌یوه‌ندیان ل گه‌ل ئه‌مریكا و ئورۆپا هه‌موو بۆ ڤێ مه‌ره‌مێ نه‌، چونكو ده‌ستهه‌لاتێ دڤێت ب هه‌ر ره‌نگێ هه‌ی ژیێ خوه‌ درێژ بكه‌ت و ئه‌ردۆگان ل سه‌ر چه‌ندین سیناریۆیێن جودا جودا كار دكه‌ت، لێ ڤێجارێ پارتێن ئۆپۆزسیۆنێ به‌رۆڤاژی سالێن بۆری شیاینه‌ پێگه‌هێ خوه‌ د ناڤ خه‌لكی دا ب هێز بكه‌ن و ئه‌و یه‌ك دێ كارتێكرنا خوه‌ ل ئه‌نجامێن هه‌لبژارتنان كه‌ت.

عه‌بدولقادر سه‌لڤی كه‌سایه‌تیێ سیاسی یێ نێزیكی ئاكپارتیێ د دووماهی بابه‌تێ خوه‌ دا دیار دكه‌ت كو دیاره‌ جارێ هه‌لبژارتن د به‌رژه‌وه‌ندیا ئاكپارتیێ و مه‌هه‌پێ دا نینن و ژ به‌ر هندێ ژی هه‌تا نها بابه‌تێ هه‌لبژارتنێن پێشوه‌خت د رۆژه‌ڤا ده‌ستهه‌لاتێ دا نینه‌، لێ تشتێ كو سه‌ركردایه‌تیا ئاكپارتێ ژێ دلگرانه‌ ئه‌نجامێن وان راپرسیانه‌ كو د ده‌مێن بۆری دا به‌لاڤ بووینه‌ كو تێدا دیار دیت ده‌نگێ ئاكپارتیێ ژ ٣٢% نابوریت و ئه‌و یه‌ك بوویه‌ ئه‌گه‌رێ دلگرانیا ئه‌ردۆگانی و سه‌ركردێن ئاكپارتیێ.

چاڤدێرێن سیاسی دیار دكه‌ن كو ئه‌ردۆگانی چه‌ندین كه‌سایه‌تێن كورد كرنه‌ ئه‌ندامێن سه‌ركردایه‌تیا ئاكپارتیێ دا بشێت جاره‌كا دی ده‌نگێن كوردان بده‌ستڤه‌ بینیت و نها كار ل سه‌ر گه‌له‌ك خالێن دی دكه‌ت دا بشێت جاره‌كا دی ده‌نگێ پارتا خوه‌ زێده‌ بكه‌ت لێ ره‌وشا نها و پێشڤه‌چوونێن ناڤخوه‌یی د به‌رژه‌وندیا ئه‌ردۆگانی و پارتا وی دا نینن، ژ به‌ر هندێ‌ ژی ئه‌ردۆگان ل هه‌مبه‌ر داخوازا پارتێن ئۆپۆزسیۆنێ یا بۆ هه‌لبژارتێن پێشوه‌خت خوه‌ بێده‌نگ كریه‌.

ل گۆر نێرینا چاڤدێرێن سیاسی هه‌ر دو پارتێن نوو ب سه‌رۆكاتیا ئه‌حمه‌د داوود ئوگلۆ و عه‌لی باباجان دشێن رێژه‌كا باش ژ ده‌نگێن ئاكپارتێ بۆ خوه‌ ببه‌ن، ژ به‌ر هندێ ژی نها ئاكپارتیێ دڤێت ل گه‌ل هنده‌ك پارتێن دی هه‌ڤپه‌یمانیه‌كا نوو ئاڤا بكه‌ت، لێ هه‌تا نها ئاكپارتی د بزاڤێن خوه‌ یێن بۆ ئاڤاكرنا هه‌ڤپه‌یمانیه‌كا نوو دا سه‌ركه‌فتی نه‌بوویه‌.

کۆمێنتا تە