هه‌ماهه‌نگی د ناڤبه‌را پێشمه‌رگه‌ی و هێزێن عیراقی دا دێ هێته‌ كرن

هه‌ماهه‌نگی د ناڤبه‌را پێشمه‌رگه‌ی و هێزێن عیراقی دا دێ هێته‌ كرن

بۆ به‌رهنگاریا لڤینێن تیرۆرستێن داعشێ، هێزێن عیراقی دێ هه‌ماهه‌نگیێ ل گه‌ل هێزێن پێشمه‌رگێ كوردستانێ كه‌ن، ب تایبه‌تی ل ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ.

د كۆمبوونه‌كێ دا ل گه‌ل فه‌رماندێن له‌شكری و ب به‌رهه‌ڤبوونا فه‌ریق (جه‌بار یاوه‌ر) ئه‌میندارێ گشتیێ وه‌زاره‌تا پێشمه‌رگه‌ ل هه‌رێما كوردستانێ و فه‌ریق ( جه‌مال ئێمینكی) سوپاسالارێ پێشمه‌رگه‌ی، مسته‌فا كازمی سه‌رۆك وه‌زیرێن عیراقێ و فه‌رماندێ گشتیێ هێزێن چه‌كدار ل عیراقێ، ده‌زگه‌هێن هه‌والگیری و هێزێن له‌شكری و ئه‌منی یێن عیراقی راسپاردن هه‌موو بزاڤێن خوه‌ بۆ به‌رهنگاریا تیرۆرستێن داعشێ بكاربینن.

مسته‌فا كازمی، سه‌رۆك وه‌زیرێن عیراقێ و فه‌رماندێ گشتیێ هێزێن چه‌كدار دووپاتی ل هه‌ماهه‌نگیێ د ناڤبه‌را هێزێن عیراقی و هێزێن پێشمه‌رگێ كوردستانێ دا ب تایبه‌تی ل ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ كر.

فه‌ریق (جه‌بار یاوه‌ر)، ئه‌میندارێ گتشیێ وه‌زاره‌تا پێشمه‌رگه‌ د به‌یاننامه‌كێ دا ئاشكراكر” كۆمبوون یا تایبه‌ت بوو ب وان گه‌فێن جدی یێن تیرۆرستێن داعشێ كو د ده‌مێ بۆری دا ژ ئه‌گه‌رێ ڤالاهیا ئه‌منی و له‌شكری دروست كربوو، كو بوویه‌ ئه‌گه‌رێ شه‌هیدبوونا هژماره‌كا پێشمه‌رگێن لیوا 10 یا وه‌زاره‌تا پێشمه‌رگه‌ و سه‌ربازێن وه‌زاره‌تا به‌رگریێ ل حوكمه‌تا فیدرال، له‌وما بریار هاته‌ دان ب زێده‌تر چالاككرنا هه‌ماهه‌نگیێ و كارێن هه‌ڤپشك یێن لژنێن هه‌ڤپشك و تیمێن هه‌ڤپشك د ناڤبه‌را له‌شكرێ عیراقێ و هێزێن پێشمه‌رگه‌ی دا ل سه‌نته‌رێن هه‌ڤپشك د ناڤبه‌را مه‌دا و پركرنا ڤالاهیان و ئالوگۆركرنا پێزانینێن هه‌والگیری، تاكو رێگریێ ل دووباره‌بوونا كارێن تیرۆرستی یێن ژ وی جۆری بكه‌ین و ب هێزكرنا سه‌نگه‌ران و زێده‌كرنا ئۆپه‌راسیۆنێن هه‌ڤپشك د ناڤبه‌را پێشمه‌رگه‌ی و هێزێن عیراقێ داد ژی تیرۆرستێن داعشێ”.

ئه‌میندارێ گشتیێ وه‌زاره‌تا پێشمه‌رگه‌ ئاماژه‌ ب وێ چه‌ندێ ژی كر كو مسته‌فا كازمی سه‌رۆكێ وه‌زیران و فه‌رماندێ گشتیێ هێزێن چه‌كدار ل عیراقێ سه‌رپه‌رشتیا وێ كۆمبوونێ كر و هه‌ر ئێك ژ وه‌زیرێن به‌رگریێ و ناڤخوه‌ و دارایی ل حوكمه‌تا عیراقا فیدرال پشكدار بوون.

ژلایێ خوه‌ڤه‌، نوری حه‌مه‌ عه‌لی، به‌رپرسێ میحوه‌رێ رۆژئاڤایێ كه‌ركووكێ یێ هێزا پێشمه‌رگێ كوردستانێ ل دۆر مه‌زنترین گرفتێن بۆ هێزێن پێشمه‌رگه‌ی دروست بووین ژ ئه‌نجامێن بجه نه‌ئینانا رێككه‌فتنێن كه‌ركووك و شنگالێ گۆت” ڤالاهیا ئه‌منی د ناڤبه‌را هێزا پێشمه‌رگه‌ی و له‌شكرێ عیراقێ داد روست بوویه‌، ئه‌ڤه‌ گرفته‌ و تیرۆرستێن داعشێ مفایه‌كێ مه‌زن ژ وێ ڤالاهیێ وه‌رگرتیه‌، هه‌كه‌ ئه‌و ڤالاهیه‌ نه‌هێته‌ پركرن، تیرۆرستێن داعشێ دێ بنه‌ مه‌ترسی ل سه‌ر وان ده‌ڤه‌ران”.

وی فه‌رماندێ پێشمه‌رگه‌ی گۆت ژی” مخابن ژلایێ حوكمه‌تا عیراقێ خه‌مساری ل دۆر بجهئینانا رێككه‌فتنێن ئه‌منی یا هه‌ی و ئه‌ڤه‌ ژی بۆ وان ده‌ڤه‌رێن كو هێلێن هه‌ڤپشك د ناڤبه‌را هێزا پێشمه‌رگه‌ی و له‌شكرێ عیراقێ زیان به‌خشه‌، هه‌كه‌ ئه‌و رێككه‌فتنه‌ هاتبانه‌ بجهئینان ره‌وش نه‌ دگه‌هشته‌ ڤێ قۆناغا نوكه‌ هه‌ی”.

به‌رپرسێ میحوه‌رێ رۆژئاڤایێ كه‌ركووكێ یێ پێشمه‌رگێ كوردستانێ ب پێدڤی زانی هه‌ولێر و به‌غدا میكانیزمه‌كا بله‌ز دانن بۆ وێ چه‌ندێ ئه‌و ده‌ڤه‌ر بهێنه‌ ب رێڤه‌برن و رێ ب داعشێ نه‌هێته‌ دان ل وان ده‌ڤه‌ران لڤینان بكه‌ت، چونكی نوكه‌ مه‌ترسی تنێ ل سه‌ر ده‌وروبه‌رێن كه‌ركووكێ نینه‌، به‌لكو ل سه‌ر كه‌ركووكێ و سنورێن دی ژی یا هه‌ی”.

دیاركر ژی” گرنگه‌ هێزێن هه‌ڤپه‌یمانان ب هووری پێگه‌هێن داعشێ بكه‌نه‌ ئارمانج و هاریكاری و هه‌ماهه‌نگیا خوه‌ ل گه‌ل پێشمه‌رگه‌ی زێده‌تر بكه‌ن بۆ به‌رهنگاریا تیرۆرێ”.

کۆمێنتا تە