هێشتا ب تنێ‌ سه‌دێ‌ 20 كریستیانێن ده‌شتا نه‌ینه‌وا ڤه‌گه‌ریاینه‌ سه‌ر مالێن خوه‌ 

هێشتا ب تنێ‌ سه‌دێ‌ 20 كریستیانێن ده‌شتا نه‌ینه‌وا ڤه‌گه‌ریاینه‌ سه‌ر مالێن خوه‌ 

بارزان مزووری:

ل دووڤ ئامارا كومسیونا هه‌لبژارتنان یا عێراقێ‌ ل سنورێ‌ قه‌زا شێخان و ده‌شتا مووسل رێژا 60% وه‌لاتیان بایومه‌تری ئه‌نجام دایه‌، ل گۆره‌ی وێ‌ رێژێ‌ مه‌ترسی ل سه‌ر ده‌نگده‌رێن ده‌شتا مووسل دروست بوویه‌.

ژلایه‌كێ‌ ڤه‌ ژبه‌ر دروستكرنا كێشه‌یا ژلایێ‌ هێزێن چه‌كدارڤه‌ یێن ده‌ستهه‌لاتداریێ‌ لێ‌ دكه‌ن كۆ هه‌مان سیناریوا هه‌لبژارتنێن بوری دروست كه‌ن ده‌نگێن وان ب سوزن، مه‌ترسیا هه‌ره‌ مه‌زن ژی ل سه‌ر ده‌نگێن وان مه‌سیحیا هه‌یه‌ ئه‌وێن ل ده‌شتا موسل دژین ژبه‌ركۆ هه‌تا نوكه‌ رێژا 20% ژی خه‌لك نه‌ڤه‌گه‌ریایه‌ سه‌ر جهێن خۆ.

كلارا عودیشۆ، په‌رله‌مانتارا مه‌سیحی یا په‌رله‌مانێ‌ كوردستانێ‌ بۆ رۆژناما ئه‌ڤرۆ دیار كر، ره‌وشا كریستیانێن ده‌شتا مووسل گه‌له‌ك ب خرابی دبینین نه‌خاسمه‌ به‌ری هه‌لبژارتنێن عێراقێ‌ كۆ نوكه‌ ره‌وشا ده‌شتا مووسل نه‌یا ئارامه‌، ئه‌من و ئاسایشا وێ‌ ده‌ڤه‌رێ‌ نه‌زڤریه‌، وه‌كۆ به‌رێ‌ چه‌كدارێن میلیشیاتێن حه‌شدا شه‌عبی وان باژێرێن مه‌زن یێن كریستیانا ماینه‌ دناڤ دا وان باژێرێن پتریا كریستیانا وان باژێرا دژین.

زێده‌تر گۆت: جهێ‌ داخێ‌ یه‌ هه‌تا نوكه‌ 20% خه‌لكێ‌ ده‌شتا مووسل یێن كریستیان نه‌زڤرینه‌ سه‌ر جهێن خۆ و نوكه‌ ئه‌م یێ هزرا وێ‌ چه‌ندێ‌ دكه‌ین دێ‌ چاوا مه‌سیحی نوونه‌رێ‌ خۆ ده‌ست نیشان كه‌ن د حكومه‌تا عێراقێ‌ و دێ‌ زیانێن مه‌زن ب نوونه‌راتیا مه‌ كه‌ڤن ل عێراقێ‌، ئه‌وا نوكه‌ رووده‌ت ده‌شتا مووسل گه‌له‌ك ب خرابی دبینین داخاز ژ حكومه‌تا عێراقێ‌ دكه‌ین وه‌ك به‌رپرسیانه‌ پێداچوونێ‌ ره‌وشا وێ‌ ده‌شتێ‌ بكه‌ت.

عه‌لی خه‌لیل، به‌رپرسێ‌ لقا 14 مووسل بۆ رۆژناما ئه‌ڤرۆ دیار كر، ل پارێزگه‌ها مووسل وه‌كۆ هه‌موو پارتێن دی یێن سیاسی یێن كوردی و عێراقێ‌ به‌رهه‌ڤیێن باشكرینه‌ بۆ هه‌لبژارتنێن بهێت نوكه‌ مژوولی به‌ربژێرێن خۆینه‌ هه‌تا نوكه‌ ئه‌م یێ‌ ل سه‌ر كار دكه‌ن كۆ هنده‌ك به‌ربژێرێن بهێز هه‌ر بازنه‌كێ‌ هه‌لبژارتنان دانین ژلایێ‌ دی ڤه‌ وه‌كۆ كومسیونا هه‌لبژارتنێن عێراقێ‌ ل دووڤ رێنمایا ئه‌م یێ‌ هاندانا خه‌لكی دكه‌ین وه‌كۆ لایه‌نێن سیاسی كۆ بچن بایومه‌تری بكه‌ن نه‌هێلین كۆ ده‌نگێن وان ب هه‌روه‌ نه‌چن.

به‌یار حازم، سه‌رپه‌رشتێ‌ بنگه‌هێ‌ كۆمسیونا هه‌لبژارتنان ل شێخان بۆ رۆژناما ئه‌ڤرۆ دیار كر، سه‌رجه‌مێ‌ ده‌نگده‌رێن قه‌زا شێخان پێك دهێت ژ 53 هزارۆ 32 ده‌نگان و سه‌رجه‌مێ‌ ده‌نگده‌رێن بازنه‌یێ‌ قه‌زا شێخان دگه‌ل ناحیا باشیك و قه‌زا تلكێف 295 هزارۆ 732 ده‌نگده‌ران، داخاز ژ ده‌نگده‌رێن خۆ دكه‌ین سه‌ره‌دانا بنگه‌هێن بایومه‌تری بكه‌ن بۆ توماركرنا ناڤێن خۆ ل ئامیرێ‌ بایومه‌تری، ژ به‌ر كۆ هه‌تا نوكه‌ نێزیكی 60% بایومه‌تری هاتیه‌ ئه‌نجام دان ژلایێ‌ خه‌لكی ڤه‌ داخاز دكه‌ین ئه‌وێن بایومه‌تری نه‌كری سه‌ره‌دانا بنگه‌هان بكه‌ن ژبه‌ركۆ ئه‌ڤ رێژه‌ بۆ قه‌زا شێخان گه‌له‌ك كێمه‌.

سه‌ردار یه‌حیا عه‌بدولعه‌زیز، قائیمقامێ‌ قه‌زا شێخان بۆ رۆژناما ئه‌ڤرۆ دیار كر، بۆ سه‌ركه‌فتنا پرۆسه‌یا هه‌لبژارتنێن بهێت یێن عێراقێ‌ پێتڤیه‌ هه‌موو به‌رهه‌ڤی بهێن كرن كۆ ده‌نگده‌ر ب ئازادانه‌ ده‌نگێ‌ خۆ بده‌ت ئه‌م وه‌كۆ ئیدارا قه‌زا شێخان ل وی سنورێ‌ شێخان و ئه‌لقۆش دگریت ل رویێ‌ ئه‌منی ڤه‌ لژێر كونترۆلێ‌ قه‌زا شێخان دایه‌ زێده‌تری 50 هزار ده‌نگده‌را مافێ‌ ده‌نگدانێ‌ هه‌یه‌ به‌لێ‌ ئه‌و كه‌سێن خه‌لكێ‌ سنورێن ده‌شتا مووسلن  ئاواره‌نه‌ ل قه‌زا شێخان ئاكنجینه‌ پێشبینا وێ‌ چه‌ندێ‌ هه‌یه‌ كو ده‌نگێن وان وه‌كۆ هه‌مان ده‌نگدانێن چار سالێن بوری مه‌ترسی ل سه‌ر هه‌یه‌ ترسین هه‌مان سیناریو دوباره‌ بیت كۆ ده‌نگێن وان بهێن سوتن دترسن ژلایێ‌ هێزێن نه‌فه‌رمی ڤه‌ ل ده‌ڤه‌رێن وان كێشه‌یا بۆ دروست كه‌ت كۆ ده‌وباره‌ ده‌نگێن وان بهێن سوتن.

کۆمێنتا تە