پارێزگه‌رێ هه‌له‌بجه‌ بۆ ئه‌ڤرۆ: سه‌ره‌رای قه‌یرانان حوكمه‌تێ به‌رده‌وام هاریكاریا هه‌له‌بجه‌ كریه‌

پارێزگه‌رێ هه‌له‌بجه‌ بۆ ئه‌ڤرۆ: سه‌ره‌رای قه‌یرانان حوكمه‌تێ به‌رده‌وام هاریكاریا هه‌له‌بجه‌ كریه‌

عه‌زیز هه‌ورامی

پارێزگه‌رێ هه‌له‌بجه‌ بۆ رۆژناما (ئه‌ڤرۆ) راگه‌هاند، حوكمه‌تا هه‌رێما كوردستانێ 30 ملیار دۆلار بۆ پارێزگه‌ها هه‌له‌بجه‌ ته‌رخان كرینه‌ و دئه‌ڤ ساله‌ دا چه‌ندین پرۆژێن گرنگ دێ چنه‌ د بوارێ بجهئینانێ دا، ئاماژه‌ كر ژی د ڤێ قه‌یرانا دارایی دا، حوكمه‌ت دشێت هاریكاریا پارێزگه‌هان بكه‌ت، ل هه‌له‌بجه‌ پشكه‌ك ژ پرۆژان تایبه‌تن ب په‌روه‌ردێ، ساخله‌میێ، زانكۆ، رێ و پران و ژ سه‌رجه‌مێ پرۆژێن مه‌ هنارتین 30 ملیار دینار یێن هاتینه‌ دابینكرن.

ئازاد ته‌وفیق، پارێزگه‌رێ هه‌له‌بجه‌ زێده‌تر گۆت” هه‌له‌بجه‌ ب 30 ملیار دیناران و هه‌تا ب 30 ملیار دۆلاران ژی كارێن وێ ناهێنه‌ ب رێڤه‌برن ب تایبه‌تی پرۆژێن خزمه‌تگوزاری، چونكه‌ پارێزگه‌هه‌كا نوویه‌ و نه‌هامه‌تی و كاڤلكرنا تووشبوویێ ل سه‌ر ده‌مێ رژێما به‌عس، ب چه‌ندین ملیار دۆلاران ژی ناهێته‌ قه‌ره‌بووكرن، به‌لێ ئه‌وا نوكه‌ حوكمه‌تا هه‌رێما كوردستانێ دكه‌ت ده‌ستپێكه‌كا باشه‌ و هیڤیدارم یا به‌رده‌وام بیت”.

گۆت ژی” كابینێن حوكمه‌تا هه‌رێمێ گرنگیێ ب پارێزگه‌هان وه‌كو ئێك دده‌ن، كابینا نوكه‌ یا حوكمه‌تا هه‌رێمێ ده‌مێ ل سالا 2019 هاتیه‌ پێكئینان، ل ده‌ستپێكێ د ره‌وشه‌كا باش دا بووین، به‌لێ ل سالا 2020 ل گه‌ل قه‌یرانا دارایی و برینا بودجه‌ی ژلایێ به‌غدا ڤه‌ و هاتنا خوار یا بهایێ په‌ترۆلێ و هاتنا ڤایرۆسێ كورۆنا، هه‌موو جیهان ژ وێ چه‌ندێ نالی، ئه‌م ژی دگه‌لدا، به‌لێ نوكه‌ گاڤ یێن هاتینه‌ هاڤێتن د پرسا ئاڤه‌دانكرنێ دا و حوكمه‌تا هه‌رێمێ دخوازیت زێده‌تر گرنگیێ ب پارێزگه‌ها هه‌له‌بجه‌ بده‌ت”.

پارێزگه‌رێ هه‌له‌بجه‌ خویاكر” دروستبوونا جڤاتا پارێزگه‌ها هه‌له‌بجه‌ كه‌یسه‌كێ سیاسی یه‌، نه‌كو ئیداری، نه‌ پارێزگه‌ر و نه‌ جێگرێ پارێزگه‌رێ و نه‌ قایمقام به‌رپرس نینن، به‌رپرسێن پارتی و ئێكه‌تیێ و گۆران و ئێكگرتوو و كۆمه‌ل و حزبا شیوعی و سوشیالیست، به‌رپرسن، چونكه‌ ل هه‌له‌بجه‌ هه‌لبژارتنه‌كا ئاسایی نه‌هاتیه‌ كرن، تاكو هه‌ر لایه‌نه‌كێ سیاسی بزانیت ده‌نگێن وی چه‌ندن، ئانكو پێدڤیه‌ ب ته‌وافق بهێته‌ پێكئینان و لایه‌نێن سیاسی ل سه‌ر پۆستان رێكبكه‌ڤن، هیڤیدارین بگه‌هنه‌ رێككه‌فتنه‌كێ ل دۆر ڤی بابه‌تی”.

 

کۆمێنتا تە