پرۆژێ چێكرنا به‌رهه‌مێن گه‌نمی ل سێمێلێ دێ هێته‌ ڤه‌كرن

پرۆژێ چێكرنا به‌رهه‌مێن گه‌نمی ل سێمێلێ دێ هێته‌ ڤه‌كرن

14

ئه‌ڤرۆ، زنار تۆڤی:

پڕۆژه‌كێ مه‌زن یێ چێكرنا به‌رهه‌مێن خوارنێ ژ گه‌نمێ ناڤخوه‌ ل سنوورێ پارێزگه‌ها دهۆكێ دێ هێته‌ دانان و سه‌رۆكێ حوكمه‌تا هه‌رێمێ مه‌سرۆر بارزانی دێ به‌رێ بنیاتێ وی پرۆژه‌ی دانیت، ئه‌و پرۆژه‌ ل سه‌ر رووبه‌رێ 500 دۆنه‌مێن ئه‌ردی ل پشت باتێلێ ل سنوورێ قه‌زا سێمێلێ دێ هێته‌ چێكرن، كو ژ سایلۆ و كارگه‌هان پێك دهێت، ئه‌و به‌رهه‌مێن ژ گه‌نمی چێدبن وه‌كو ئاری و ساڤاری و مه‌عكه‌روونا و دانقۆتێ و پسكێتان، هه‌موو دێ ژ وی گه‌نمی هێنه‌ چێكرن و دێ ل بازاری هێنه‌ فرۆتن.

ئه‌حمه‌د جه‌میل، رێڤه‌به‌رێ گشتی یێ چاندنێ ل پارێزگه‌ها دهۆكێ بۆ رۆژناما ئه‌ڤرۆ دیار كر، دوهی ژڤانێ وه‌رگرتنا گه‌نمی ژ ئالیێ دو كۆمپانیێن هه‌رێما كوردستانێ ڤه‌ ده‌ست پێكریه‌، لێ هێشتا چو جۆتیاران گه‌نمێ خوه‌ نه‌ئینایه‌، دیسا باشترین بژارده‌ بۆ جۆتیارێن پارێزگه‌ها دهۆكێ فرۆتنا گه‌نمی یه‌ ب رێیا كاش، چونكی حوكمه‌تا عیراقێ پارێ جۆتیاران ب سالان گیرۆ دكه‌ت و كۆمپانیێن هه‌رێمێ ئێكسه‌ر دێ پاره‌ی ل ده‌مێ راده‌ستكرنا گه‌نمی ده‌نه‌ جۆتیارین هه‌رێمێ و گۆت: “هه‌موو به‌رهه‌ڤی بۆ وه‌رگرتنا گه‌نمێ جۆتیارێن پارێزگه‌ها دهۆكێ هاتینه‌ كرن و جۆتیار هه‌ر ژ نوكه‌ دشێن گه‌نمێ خوه‌ راده‌ست بكه‌ن و پارێ خوه‌ كاش وه‌ربگرن”.

ناڤهاتی گۆت: “ئه‌ڤ ساله‌ ته‌نا گه‌نمێ پله‌ ئێك ل عیراقێ ب 560 هزار دینارانه‌، ل هه‌رێمێ ب 475 هزار دینارانه‌، دیسا گه‌نمێ پله‌ دو ل عیراقێ ب 480 هزار دینارانه‌ ل هه‌رێمێ ب 400 هزار دینارانه‌، گه‌نمێ پله‌ سێ ل عیراقێ ب 420 هزار دینارانه‌ و ل هه‌رێمێ ب 325 هزار دینارانه‌ و ئه‌و جۆتیارێن گه‌نمێ خوه‌ د فرۆشنه‌ كۆمپانیێن هه‌رێمێ دێ پارێ خوه‌ كاش وه‌رگرن و پارێ وان گیرۆ نابیت”.

رێڤه‌به‌رێ گشتی یێ چاندنێ ل دهۆكێ گۆتژی: “ل عیراقێ وه‌رگرتنا گه‌نمی ب لێبڕینا 3% یه‌، لێ ل كۆمپانیێن هه‌رێما كوردستانێ لێبڕین 2% یه‌، ئه‌ڤه‌ ژی د به‌رژه‌وه‌ندا جۆتیارێن هه‌رێما كوردستانێ دایه‌”.

کۆمێنتا تە