په‌رله‌مانتاره‌ك: ڤه‌گوهاستنا خێزانێن داعشێ ژ كه‌مپا هۆل بۆ نه‌ینه‌وا هاته‌ پاشخستن

په‌رله‌مانتاره‌ك: ڤه‌گوهاستنا خێزانێن داعشێ ژ كه‌مپا هۆل بۆ نه‌ینه‌وا هاته‌ پاشخستن

ئه‌ندامه‌كێ جڤاتا نوونه‌رێن عیراقێ راگه‌هاند، پرۆسا ڤه‌گوهاستنا خێزان و كه‌سوكارێن داعشێ ژ كه‌مپا هۆلێ ل پارێزگه‌ها حه‌سه‌كه‌ یا سووری بۆ كه‌مپه‌كا پارێزگه‌ها نه‌ینه‌وا هاته‌ پاشخستن.

شیروان دوبه‌ردانی، ئه‌ندامێ لژنا هه‌رێم و پارێزگه‌هان ل جڤاتا نوونه‌رێن عیراقێ ژ فراكسیۆنا پارتی دیموكراتی كوردستان گۆت ” بریار ئه‌وبوو ل رۆژا ئێكشه‌مبیا بۆری ده‌ست ب ڤه‌گوهاستنا گه‌را ئێكێ یا خێزانێن داعش یێن عیراقی كو هژمارا وان 100 خێزان بوون ژ كه‌مپا هۆل ل سووریێ بۆ كه‌مپا جه‌دعه‌ ل باشوورێ مووسلێ بهێته‌ كرن، به‌لێ ژ ئه‌گه‌رێن فشارا راگه‌هاندنێ و هنده‌ك رێگریێن ئه‌منی، پرۆسا ڤه‌گه‌هاستنا وان خێزانان هاته‌ پاشخستن”.

دوبه‌ردانی، ل دووڤ رۆژناما مه‌دا یا عیراقی، دیاركر ژی ” پرۆسا ڤه‌گوهاستنا وان خێزانان نه‌هاتیه‌ هه‌لوه‌شاندن، به‌لكو هاتیه‌ پاشخستن بۆ ده‌مه‌كی دی، و ئه‌و پرۆسه‌یه‌ ژی ب هه‌ڤكاری یه‌ د ناڤبه‌را حوكمه‌تا عیراقێ و لایه‌نێ به‌رامبه‌ر ب چاڤدێریا نه‌ته‌وێن ئێكگرتی”.

ئاماژه‌ كر” ئێك ژ ئه‌گه‌رێن پاشخستنا ڤه‌گوهاستنا گه‌را ئێكێ ژ وان خێزانان ئه‌وه‌ كو هه‌تا نوكه‌ كه‌مپا جه‌دعه‌ ب دروستی نه‌هاتیه‌ به‌رهه‌ڤكرن بۆ پێشوازیێ ل وان خێزانان كو ئه‌و كه‌مپه‌ تنێ ژ 500 چادران پێك دهێت و یا تایبه‌ته‌ ب پێشوازیا هه‌موو خێزانێن عیراقی ئه‌وێن ل كه‌مپا هۆل یا سووری د ئاكنجی”.

هژمارا ئاوارێن عیراقی ئه‌وێن كه‌مپا هۆل یا سووری د ئاكنجی كو بریاره‌ بهێنه‌ ڤه‌گوهاستن بۆ كه‌مپا جه‌دعه‌ ل باشوورێ مووسلێ دگه‌هیته‌ 30 هزار كه‌سان كو 95% ژ وان خێزانێن داعشێ نه‌.

کۆمێنتا تە