په‌رله‌مانێ ئورۆپا ل دۆر كوردان داخوازه‌كێ ژ توركیا دكه‌ت

په‌رله‌مانێ ئورۆپا ل دۆر كوردان داخوازه‌كێ ژ توركیا دكه‌ت

12

ئه‌ڤرۆ:

هژماره‌كا زێده‌ ژ ئه‌ندامێن په‌رله‌مانێ ئورۆپا دیار كرن كو دڤێت توركیا سیاسه‌تمه‌دارێن كورد ل زیندانان ئازاد بكه‌ت و ده‌ست ب چاكسازیێن بكه‌ت وی ده‌می دێ ده‌رگه‌هێ ئورۆپا ژی بۆ توركیا هێته‌ ڤه‌كرن لێ ره‌وشا نها یا ل توركیا وی وه‌لاتی پتر ژ جاران ژ ئورۆپا دوور دكه‌ت.

هژماره‌كا به‌رچاڤ ژ ئه‌ندامێن په‌رله‌مانێ ئورۆپا دیار كرن كو ره‌وشا نها یا توركیا گه‌له‌ك خرابه‌، توركیا سیاسه‌تمه‌دارێن كورد و كه‌سێن دی یێن كو ل دژی حوكمه‌تێ نه‌ ده‌سته‌سه‌ر دكه‌ت و زۆرداریا ل سه‌ر رۆژنامه‌ڤانان و هێزێن ئۆپۆزسیۆنێ ژی هه‌ر كو دچیت زێده‌تر لێ دهێت، ئه‌و یه‌ك دێ توركیا به‌ر ب ره‌وشه‌كا گه‌له‌ك خراب ڤه‌ به‌ت و ژ به‌ر هندێ ژی دڤێت حوكمه‌تا توركیا ده‌ست ب چاكسازیان بكه‌ت.

په‌رله‌مانتارێن ئورۆپا داخواز دكه‌ن كو توركیا سیاسه‌تمه‌دارێن كورد، نڤیسه‌ر و رۆژنامه‌ڤانان ئازاد بكه‌ت و ده‌ست ب قۆناغه‌كا نوو بكه‌ت، وی ده‌می دێ توركیا پتر نێزیكی ئورۆپا بیت، لێ مخابن بزاڤێن نها یێن حوكمه‌تێ وی وه‌لاتی پتر ژ جاران ژ ئورۆپا دوور دكه‌ت و ئه‌و یه‌ك د به‌رژه‌وه‌ندیا توركیا دا نینه‌.

په‌رله‌مانتارێن په‌رله‌مانێ ئێكه‌تیا ئورۆپا داخواز ژ توركیا ژی كرن كو ده‌ستان ژ داخستنا هه‌ده‌پێ به‌رده‌ت، چونكو داخستنا پارته‌كا سیاسی كو خوه‌دان چه‌ند ملیۆن ده‌نگانه‌ ب ته‌مامی ل دژی دیموكراسیێ یه‌ و ئه‌و یه‌ك د به‌رژه‌وه‌ندیا توركیا دا نینه‌، ب داخستنا هه‌ده‌پێ دێ قه‌یرانا نها یا ل توركیا دژوارتر لێ هێت و دڤێت توركیا ب جهێ داخستنا هه‌ده‌پێ كار بۆ چاره‌سه‌ركرنا پرسا كوردی بكه‌ت، چونكو بۆ توركیا ژی ئاشكرا بوویه‌ هه‌تا پرسا كوردی ب رێیێن سیاسی و ئاشتیانه‌ نه‌هێته‌ چاره‌سه‌ركرن دێ ره‌وشا ئالۆز یا ل وی وه‌لاتی هه‌ر یا به‌رده‌وام بیت.

ئه‌ندامێن په‌رله‌مانێ ئورۆپا ئه‌و یه‌ك ژی دیار كرن كو دڤێت ده‌وله‌تا توركیا رێزێ ل بریارا دادگه‌ها مافێن مرۆڤی یا ئورۆپا بگریت و سه‌لاحه‌دین ده‌میرتاشی ئازاد بكه‌ت، چونكو هه‌تا نها چه‌ند جاران دادگه‌ها مافێن مرۆڤی یا ئورۆپا داخوازا ئازادكرنا ده‌میرتاشی كریه‌ و ده‌وله‌تا توركیا هه‌تا نها بریارا دادگه‌ها مافێن مرۆڤی یا ئورۆپا بجه نه‌ئینایه‌، دڤێت به‌رپرسێن توركیا ژبیر نه‌كه‌ن ئه‌و ژی ئه‌ندامن د دادگه‌ها مافێن مرۆڤی یا ئورۆپا دا و ژ به‌ر هندێ ژی دڤێت ده‌میرتاش و هه‌موو گرتیێن دی یێن سیاسی ل توركیا بهێنه‌ ئازادكرن.

چاڤدێرێن سیاسی ژی دیار دكه‌ن كو ژ به‌ر پرسا كوردی و هه‌لویستێ حوكمه‌تێ ل دژی ئورۆپا نها په‌یوه‌ندیێن توركیا ل گه‌ل ئه‌مریكا و ئورۆپا گه‌له‌ك خراب بووینه‌، ئه‌و یه‌ك ژی وه‌سا كریه‌ كو رۆژ ب رۆژێ توركیا ژ ئورۆپا دوور بكه‌ڤیت، به‌ری نها ئه‌ردۆگانی دیار كربوو كو ئه‌و خوه‌ پشكه‌ك ژ ئورۆپا دبینن و دێ كار كه‌ن دا هه‌موو ئاریشێن هه‌ی ل گه‌ل ئێكه‌تیا ئورۆپا چاره‌سه‌ر كه‌ن، لێ مخابن كریارێن حوكمه‌تا ئه‌ردۆگانی وه‌سا كرینه‌ كو په‌یوه‌ندیێن توركیا و ئێكه‌تیا ئورۆپا رۆژ ب رۆژێ پتر خراب ببن، ب تایبه‌تی ژی ژ به‌ر پرسا كوردی و زۆرداریا ل سه‌ر سیاسه‌تمه‌دارێن كورد وه‌سا كریه‌ كو وه‌لاتێن ئێكه‌تیا ئورۆپا رۆژانه‌ نه‌رازیبوونا خوه‌ ل دژی توركیا دیار بكه‌ن.

ئه‌و یه‌ك د ده‌مه‌كێ دایه‌ كو به‌ری نها سه‌رۆك كۆمارێ توركیا ره‌جه‌ب ته‌یب ئه‌ردۆگانی دیار كربوو كو دڤێت وه‌لاتێن ئورۆپا ده‌ستێوه‌ردانێ د كاروبارێن دادگه‌هێن توركیا دا نه‌كه‌ن، چونكو هه‌ر بریاره‌كا دادگه‌هێن توركیا بده‌ن دڤێت هه‌موو ئالی رێزێ لێ بگرن.

کۆمێنتا تە