چاڤدێره‌كێ سیاسی یێ رۆژهه‌لاتێ كوردستانێ:هه‌ر دانوستاندنه‌ك ل گه‌ل ئه‌مریكا د به‌رژه‌وه‌ندیا ئیرانێ...

چاڤدێره‌كێ سیاسی یێ رۆژهه‌لاتێ كوردستانێ:هه‌ر دانوستاندنه‌ك ل گه‌ل ئه‌مریكا د به‌رژه‌وه‌ندیا ئیرانێ دایه‌

چاڤدێره‌كێ سیاسی یێ رۆژهه‌لاتێ كوردستانێ راگه‌هاند كو ره‌وشا ناڤخوه‌یی یا ئیرانێ گه‌له‌ك خرابه‌، ب تایبه‌تی ژی ره‌وشا ئابووری گه‌له‌ك خرابه‌ و به‌رپرسێن ئیرانێ دخوازن ب رێیا دانوستاندنێن ل گه‌ل ئه‌مریكا ره‌وشا ئابووری باش بكه‌ن، ژ به‌ر هندێ ژی هه‌ر دانوستاندنه‌ك ل گه‌ل ئه‌مریكا نها د به‌رژه‌وه‌ندیا ئیرانێ دایه‌.

ئه‌حمه‌د موسالو چاڤدێرێ سیاسی یێ رۆژهه‌لاتێ كوردستانێ بۆ ئه‌ڤرۆ دیار كر كو ره‌وشا ناڤخوه‌یی یا ئیرانێ گه‌له‌ك خرابه‌، رێژا بێكاری و هه‌ژاریێ گه‌له‌ك زێده‌ بوویه‌ خه‌لك ب گشتی نها ژ سیسته‌مێ ژیانا خوه‌ رازی نینن، د چه‌ندین سالێن بۆری دا خوه‌نیشادان ل دژی ده‌ستهه‌لاتێ هاتنه‌ كرن و نها ژ به‌ر ره‌وشا كۆرۆنایێ و پێرابوونێن زێده‌ یێن هێزێن ئێمناهیێ وه‌لاتی بێده‌نگ بووینه‌ لێ به‌رپرسێن ئیرانێ ژی باش دزانن هه‌كه‌ ره‌وشا وه‌كو نها به‌رده‌وام بیت دێ جاره‌كا دی خه‌لك ده‌ست ب خوه‌نیشادانان كه‌ن و ژ به‌ر هندێ ژی ئیرانێ دڤێت ب رێیا هنده‌ك گوهۆرینان د سیاسه‌تا ده‌رڤه‌ دا ره‌وشا ناڤخوه‌یی ئارام بكه‌ت و گۆت: (ئارمانجا سه‌ره‌كی یا ئیرانێ ژ دانوستاندنێن ل گه‌ل وه‌لاتێن ئورۆپا و ئه‌مریكا بۆ هندێ یه‌ دا ره‌وشا ناڤخوه‌یی ئارام ببیت، ب تایبه‌تی ژی نها به‌حسێ هندێ دهێته‌ كرن كو دێ ئه‌مریكا ٧ ملیار دۆلار پارێن ئیرانێ بۆ ڤه‌گه‌رینیت كو ئه‌و یه‌ك دێ كارتێكرنا خوه‌ ل بارێ ئابووری كه‌ت، ئانكۆ ب كورتی دیار دبیت هه‌ر دانوستاندنه‌ك ل گه‌ل ئه‌مریكا د به‌رژوه‌ندیا ده‌ستهه‌لاتا نها یا ئیرانێ دایه‌).

ناڤهاتی ئه‌و یه‌ك ژی دیار كر كو ئه‌مریكا و وه‌لاتێن ئێكه‌تیا ئورۆپا ژی دخوازن ب رێیا دانوستاندنان رێگریێ ل ئیرانێ بكه‌ن دا كو چه‌كێن ئه‌تۆمی دروست نه‌كه‌ت، ئه‌و یه‌ك د ده‌مه‌كێ دایه‌ كو رۆژانه‌ ل ئیرانێ چالاكڤانێن سیاسی و مه‌ده‌نێ تووشی ئه‌شكه‌نجه‌دانێ دبن و رژێما نها لاوێن كورد ل سێداره‌ دده‌ت لێ دیاره‌ ئه‌و یه‌ك بۆ ئه‌مریكا و ئورۆپا گرنگ نینه‌ و وان تنێ به‌رژه‌وندیێن خوه‌ دڤێت و گۆت: (ترسا هه‌ری مه‌زن یا وه‌لاتیێن ئیرانێ ژ هندێ یه‌ كو هه‌كه‌ رێككه‌فتنه‌كا نوو د ناڤبه‌را ئیرانێ و ئه‌مریكا دا بهێته‌ كرن وی ده‌می ده‌ستهه‌لاتا نها دێ پتر پێگه‌هێ خوه‌ ب هێز كه‌ت و وه‌سا ساناهی ژناڤ ناچیت، چونكو نها ل ئیرانێ كه‌س ژ ده‌ستهه‌لاتێ رازی نینه‌ و خه‌لكی دڤێت ده‌ستهه‌لاتا نها ژناڤ بچیت، لێ مخابن دیاره‌ ئه‌مریكا و وه‌لاتێن ئێكه‌تیا ئورۆپا دخوازن جاره‌كا دی ب رێیا دانوستاندنان و رێككه‌فتنه‌كا نوو یا ئه‌تۆمی ببنه‌ ئه‌گه‌رێ هندێ كو ده‌ستهه‌لات پێگه‌هێ خوه‌ ب هێز بكه‌ت).

چاڤدێرێ سیاسی یێ رۆژهه‌لاتێ كوردستانێ ئه‌و یه‌ك ژی دیار كر كو سالا ٢٠١٥ ده‌مێ رێككه‌فتنا ئه‌تۆمی ل گه‌ل ئیرانێ هاته‌ ئیمزا كرن وی ده‌می پتر ژ ٣٠٠ ملیار دۆلار پاره‌ كه‌فته‌ ده‌ستێ رژێمێ و رژێما ئیرانێ ئه‌و پاره‌ هه‌موو ل عیراقێ، لوبنانێ و یه‌مه‌نێ بۆ تێكدانا ره‌وشا ده‌ڤه‌رێ مه‌زاختن و ئه‌و پاره‌ بۆ خزمه‌تگوزاریێ و باشتركرنا ره‌وشا ژیانا وه‌لاتیان نه‌هاته‌ مه‌زاختن و دیاره‌ دێ دیسان ئیران هه‌مان سیاسه‌تێ دوباره‌ كه‌ت، بێگومان هه‌كه‌ هه‌لویستێ ئه‌مریكا وه‌كو سالا ٢٠١٥ بیت دێ ئه‌و یه‌ك بیته‌ ئه‌گه‌رێ هندێ كو پێگه‌هێ ئیرانێ ل رۆژهه‌لاتا ناڤین ژی ب هێزتر لێ هێت و گۆت: (ئیرانێ ده‌ست ب بزاڤه‌كا نوو كریه‌ و دڤێت په‌یوه‌ندیێن خوه‌ ل گه‌ل سعوودیێ ژی ئاسایی بكه‌ت، حه‌سه‌ن رۆحانی به‌ری چه‌ند رۆژان دیار كر هه‌كه‌ مه‌ بڤێت ره‌وشا ئابووری باش بكه‌ین دڤێت په‌یوه‌ندیێن خوه‌ ل گه‌ل هه‌موو وه‌لاتێن جیهانێ باشتر لێ بكه‌ین).

 

 

 

 

کۆمێنتا تە