چیرۆکا جه‌ژنا نه‌ورۆزێ د ناڤ کوردێن ڕۆژاڤا ده‌

چیرۆکا جه‌ژنا نه‌ورۆزێ د ناڤ کوردێن ڕۆژاڤا ده‌

10
کۆنێ ڕه‌ش
جه‌ژنا نه‌ورۆزێ؛ ئه‌ڤ جه‌ژن ژی وه‌ک جه‌ژنا نیسانێ ئان نووزانێ یه‌. ئه‌گه‌ر نیسان نووزان به‌، نه‌ورۆز نوورۆژه‌‌، ئانکو ده‌ستپێکا ڕۆژه‌که‌ نوو، ژ ساله‌که‌ نوویه‌. ئه‌ڤ ڕۆژا نوو، د ۲۱ێ هه‌یڤا ئادارێ، ده‌ستپێ دکه‌. د ڤێ ڕۆژێ ده‌؛ گه‌را شه‌ڤ و ڕۆژێ دبن وه‌ک هه‌ڤ و کوردان ژ مێژ ڤه‌ گۆتیه‌: (۲۱ێ ئادارێ شه‌ڤ و ڕۆژ هات قرارێ). ژ بیست و یه‌کێ ئادارێ و ب شوون ڤه‌، خاک ده‌ست ب خه‌مل و خێزا خوه‌ یا بووکانی دکه‌ و ب ڕه‌نگێن که‌سکه‌سۆرێ خوه‌ دخه‌ملینه‌.. ل گۆر کو ئه‌ز سه‌روه‌ختی ته‌ڤگه‌ر و ڕه‌وشا کوردێن ڕۆژاڤا مه‌، مه‌ کوردێن ڕۆژاڤایێ کوردستانێ ل به‌ریا مێردینێ د سالا ۱۹٥٦ و ۱۹٥۷ ده‌ پێشوازیا جه‌ژنا نه‌ورۆزێ کریه‌. به‌ری هنگێ هایێ که‌سی ژ خه‌لکێن ڕۆژاڤا ژ جه‌ژنا نه‌ورۆزێ نه‌بوو.. ئه‌و ئاگهاداری و پێشوازی ژی، ب خێرا هه‌لبه‌ستڤانێ نه‌ته‌وی هه‌ژارێ موکریانی ده‌ستپێ کر.. پشتی هه‌رفاندنا کۆمارا ده‌مۆکرات ل مه‌هابادێ، هه‌لبه‌ستڤان هه‌ژار موکریانی وه‌ک په‌نابه‌ره‌کی سیاسی د سالا ۱۹٥٦ ده‌ هاتیه‌ ناڤ کوردێن سووریێ. پێله‌کێ مالا وی ل تربه‌سپیێ مایه‌، پاشێ چوویه‌ شامێ. ل شامێ، چاڤ ب وه‌لاتپارێز و ڕۆناکبیرێن کوردان که‌تیه‌ وه‌ک: قه‌دری به‌گ جه‌میل پاشا، ئه‌کرم به‌گ جه‌میل پاشا، مه‌مدووح سه‌لیم به‌گ، د. نووری دێرسمی، ڕه‌وشه‌ن خانم به‌درخان، د. نووره‌دین زازا، ئۆسمان سه‌بری، قه‌دری جان دگه‌ل مالدار و وه‌لاتپارێزان ژ کوردێن شامێ و قوتابیێن کو وێ هنگێ ل شامێ دخوه‌ندن.. ژ وان ڕه‌ چیرۆکا نه‌ورۆزێ گۆتیه‌ و خوه‌ستیه‌ کو ئه‌و ژی وه‌ک برایێن خوه‌ کوردێن ئیرانێ و ئیراقێ، ۲۱ ئادارێ، جه‌ژنا گه‌لێ ئاری، نه‌ورۆزێ ب ئاهه‌نگ و کێف و شاهی پێشوازی بکن، ده‌رکه‌ڤن سه‌یرانان و ڤه‌ژینن. ل گۆر کو من ژ گه‌له‌ک که‌سان بهیستیه‌؛ دۆستانیا وی و د. نووره‌دین زازا گه‌له‌کی خوه‌ش بوو، د ۱۹٥٦ ئان ۱۹٥۷ده‌ بره‌ک ژ وان وه‌لاتپارێزێن کورد یێن کو من ئه‌و ب ناڤ کرن، د سه‌رێ وان ده‌ د. نووره‌دین ب خوارن و ڤه‌خوارن چوونه‌ (خووتا ل شامێغوطة دمشق/)، ب مه‌به‌ستا ڤه‌ژاندنا جه‌ژنا نه‌ورۆزێ. ئه‌ڤ چوونا وان یه‌که‌مین جاره‌‌ کو کوردێن سووریێ پێشوازیا جه‌ژنا نه‌ورۆزێ کرنه‌. به‌لێ ژ سالا ۱۹٥۷و ڤرده‌، پشتی دامه‌زراندنا (ئال-پارتی)، د ناڤ کوردێن سووریێ ده‌، وێ پارتیێ ئه‌ندامێن خوه‌ سه‌روه‌ختی جه‌ژنا نه‌ورۆزێ کریه‌. ژ وێ سالێ و پێ ڤه‌، جه‌ژنا نه‌ورۆزێ د ناڤ کوردان ده‌ هاتیه‌ پێشوازیکرن. به‌لێ د واره‌کی گه‌له‌کی ته‌نگ ده‌ بوو و ب ڕه‌نگه‌کی گه‌له‌کی ڤه‌شارتی بوو.. ڤێ پاشیێ، هن ب هن ناڤێ نه‌ورۆزێ د ناڤ گه‌ل ده‌ به‌لاڤ بوویه‌ و گه‌له‌ک که‌سان ناڤێ نه‌ورۆزێ ل زارۆکێن خوه‌ کرنه‌. بێگوومان ڕۆلا د. نووره‌دین زازا سه‌رۆکێ ئال-پارتی د شیارکرنا هه‌ستێ نه‌ته‌وی و به‌لاڤکرنا جه‌ژنا نه‌ورۆزێ، د ناڤ کوردێن شامێ ده‌ زۆر مه‌زن بوو. هه‌م ژی، د ناڤ کوردێن ئه‌فرین، کۆبانی و جزیرێ ده‌. نه‌خاسم پشتی کو ئال-پارتی د سالا ۱۹٥۷ده‌ هات دامه‌زراندن و بریارا جه‌ژنا نه‌ورۆزێ ب ڕه‌نگه‌کی فه‌رمی ژ ڕه‌خ ئال-پارتی ڤه‌، ب سه‌رۆکاتیا د. نووره‌دین زازا هات ستاندن و ده‌ست ب ڤه‌ژاندنا جه‌ژنا نه‌ورۆزێ د ناڤ کوردێن ڕۆژاڤا ده‌ هات کرن. لێ د سالا ۱۹۸٦ده‌، ده‌ما کو کوردێن شامێ دڤیبوون ده‌رکه‌ڤن ده‌رڤی شامێ، نه‌ورۆزا خوه‌ پێک بینن، ئه‌ندامێن ئه‌منیه‌تا سووریێ ئه‌و قه‌ده‌خه‌ کرن و د ئه‌نجامێ ده‌، سلێمان ئادی هات کوشتن. ژ وێ هنگێ ڤه‌، سه‌رۆکۆمارێ سووریێ حافز ئه‌له‌سه‌د، ڕۆژا ۲۱ ئادارێ ب ناڤێ (جه‌ژنا دایکێ)، وه‌ک ڕۆژه‌که‌ بێهنڤه‌دانێ بناڤ کر. ژ وێ سالێ ڤه‌ کوردێن سووریێ جه‌ژنا نه‌ورۆزێ ب سه‌ربه‌ستی، د ته‌ڤ باژار و گوندێن کوردێن ڕۆژاڤا ده‌ پێشوازی دکن.

 

کۆمێنتا تە