74% ده‌نگده‌رێن دهۆكێ‌ ب كارتا بایۆمه‌تری دێ‌ ده‌نگێ خوه‌ ده‌ن

74% ده‌نگده‌رێن دهۆكێ‌ ب كارتا بایۆمه‌تری دێ‌ ده‌نگێ خوه‌ ده‌ن

دهۆك، له‌زگین جوقی:

رێڤه‌به‌رێ‌ ئوفیسا دهۆك یا كۆمسیۆنا بلندا سه‌ربخوه‌ یا هه‌لبژارتنان ل عیراقێ‌ دیار كر كو ل پارێزگه‌ها دهۆكێ‌ ب رێژا 74% وه‌لاتی بۆ ده‌نگدانێ‌ هاتینه‌ تۆماركرن و دبێژیت: هێشتا 60 هزار كارتێن ده‌نگدانێ‌ ماینه‌ و نه‌هاتینه‌ به‌لاڤكرن و ئه‌م داخوازێ‌ ژ ده‌نگده‌رێن دهۆكێ‌ دكه‌ین بهێن وه‌ربگرن.

خالد عه‌باس، رێڤه‌به‌رێ‌ ئوفیسا دهۆك یا كۆمسیۆنا بلندا سه‌ربخوه‌ یا هه‌لبژارتنان بۆ رۆژناما ئه‌ڤرۆ خویا كر، نوكه‌ 60 هزار كارتێن بایۆمه‌تری د ناڤ 41 بنگه‌هێن تۆمارا بایۆمه‌تری دا هه‌نه‌ و هه‌تا نوكه‌ ده‌نگده‌ر نه‌چووینه‌ كارتێن خوه‌ یێن ده‌نگدانێ‌ وه‌ربگرن و گۆت: “ئه‌م داخوازێ‌ ژ ده‌نگده‌رێن پارێزگه‌ها دهۆكێ‌ دكه‌ین، قه‌ستا بنگه‌هێن تۆمارا بایۆمه‌تری بكه‌ن بۆ وه‌رگرتنا كارتێن خوه‌ دا ل رۆژا ده‌نگدانێ‌ بشێن ب سه‌ناهی ده‌نگێ خوه‌ بده‌ن”.

گۆتژی: “ئه‌ڤ كارتێن بایۆمه‌تری یێن وان ده‌نگده‌رانه‌ یێن ل سالێن 2018ێ‌ و 2019ێ‌ ناڤێن خوه‌ تۆماركرین، له‌و پێدڤیه‌ ئه‌و كه‌س سه‌ره‌دانا بنگه‌هان بكه‌ن و كارتێن خوه‌ یێن بایۆمه‌تری وه‌ربگرن”.

خالد عه‌باس ئاشكرا ژی كر، ئه‌ڤ 74% ژ وه‌لاتیێن بۆ ده‌نگدانێ‌ ل دهۆكێ‌ هاتینه‌ تۆماركرن، ل رۆژا ده‌نگدانێ‌ ب رێیا كارتا بایۆمه‌تری دێ‌ ده‌نگێ‌ خوه‌ ده‌ن و ئه‌و 26% یێن نه‌هاتینه‌ تۆماركرن ژی دشێن ده‌نگێن خوه‌ بده‌ن ئه‌و دێ‌ ب رێیا كارتا ئه‌لكترۆنی ئه‌وا بێ‌ وێنه‌ ده‌ن و گۆت: “827 هزار ده‌نگده‌ر ل پارێزگه‌ها دهۆكێ‌ هه‌نه‌”.

کۆمێنتا تە