NO IORG
Authors Posts by عادل حه‌سه‌ن ره‌شید مزیرى

عادل حه‌سه‌ن ره‌شید مزیرى

عادل حه‌سه‌ن ره‌شید مزیرى
2 POSTS 0 COMMENTS

20

عادل حه‌سه‌ن
هه‌ر ژ دامه‌زراندنا پارتی دیمۆكراتی كوردستان ل سالێن 40 دا سه‌د سالیا چه‌رخێ نوو دا ل 16 ئوگێستێ 1946، ب مه‌به‌ستا لێكدانا بزاڤا پارتێن كوردی به‌ر ب دروستكرنا پارته‌كا بهێز ل ژێر ناڤێ (پارتی دیمۆكراتی كوردستان) پێخه‌مه‌ت دروستكرنا پرۆگرامه‌كێ سیاسی بۆ دیاركرنا كه‌ساتی و جڤاكێ كوردی د ناڤ جڤاكێن نێڤده‌ولی دا. وه‌ك خواندنه‌كا ئه‌كادیمی بۆ تێگه‌هێ ئایدۆلۆژیا ڤێ پارتێ د ناڤ ئه‌ده‌بیات و خواندنێن سیاسی و مێژووی دا، گه‌له‌ك جار هاتیه‌ تۆماركرن وه‌ك پارته‌كا شۆره‌شگێر بۆ پاراستنا جڤاك و نشتیمانى، هه‌روه‌سا ئه‌ڤ پارته‌ دهێته‌ نیاسین وه‌ك پارته‌كا سیاسی دیمۆكراسی ئانكو وه‌ك تێگه‌هێ ئایدولوژیا نه‌ته‌وایه‌تی كۆمه‌كا هزرێن دیرۆكی و مافێ مرۆڤایه‌تی بنیاتێ ڤێ بزاڤێ بووینه‌ هه‌ولدانا مه‌له‌ڤانیا سیاسی و چه‌سپاندنا مافێن نشتیمانی یه‌. تێگه‌هێ ئایدۆلۆژیا پارتی دیمۆكراتی كوردستان، ره‌نگڤه‌دانه‌ك بوو ژ كاره‌ساتێن مێژووی ل هه‌مبه‌ر ملله‌تێ كورد، نه‌ تنێ دانپێدان ب مافێ مرۆڤی و دادپه‌روه‌ری و كه‌ساتیا هزری، هه‌روه‌سا بۆ مافێ ملله‌تێ كورد بۆ چاره‌نڤیسێ خوه‌، وه‌ك گه‌له‌ك ملله‌ت و گه‌لێن جیهانێ ناسناما خوه‌ هه‌بیت. د ناڤ دیباجه‌یا دامه‌زراندنا ڤێ پارتێ ئارمانجێن نه‌ته‌وه‌ی و نشتیمانی و نێڤده‌ولی، گرنگیا خوه‌ هه‌یه‌ پێخه‌مه‌ت كاودانێن سیاسی و ژ ئه‌گه‌رێن مێژووی ل رۆژهه‌لاتا ناڤین كورد وه‌ك نه‌ته‌وه‌ بوویه‌ قوربانی. لێ خه‌باتا به‌رده‌وام یا ڤێ پارتێ ل باكۆرێ عیراقێ ئه‌ڤ پارته‌ ژ ئه‌نجامێ دانپێنه‌دانا ب مافێن ملله‌تێ كورد ئه‌ڤ ئایدۆلۆژیه‌ شیایه‌ شۆره‌شێن چه‌كداری دروست بكه‌ت و به‌ره‌ڤانیا ملله‌تێ كورد بۆ پاراستنا (جڤاك، نشتیمان، نه‌ته‌وه‌، كه‌لچه‌ر، زمان) ل سه‌ر ئاستێ نه‌ته‌وه‌ی و هه‌رێمی و نێڤده‌وله‌تی. د لاپه‌رێن مێژووی دا، هه‌ر ژ په‌یمانا سیڤه‌ر 1920 و دامه‌زراندنا ده‌وله‌تا عیراقێ ل 1921 كورد به‌ری ڤێ مێژوویێ ب هزاران سالان ل رۆژهه‌لاتا ناڤین ئاكنجیێن جوگرافی یا خوه‌ یا دروست بوون ل وه‌لاتێ عیراق و ئیران و توركیا و سووریا. نێزیكی 40 ملیۆن كه‌س خودان ئێك سروشت و كه‌لچه‌ر و زمان بووینه‌، لێ خودانێن خوه‌ ئێك وه‌لات نه‌بووینه‌.
له‌ورا ئێك ژ گرنگترین ئارمانجێن ئایدۆلۆژیا پارتی دیمۆكراتی كوردستان، جێبه‌جێكرنا هزرا نه‌ته‌وایه‌تی و گێران و دروستكرنا شۆره‌شێن چه‌كداری پێخه‌مه‌ت قه‌له‌مدانا چاره‌نڤیسێ ملله‌تێ كورد. ئایدۆلۆژیه‌تا ڤێ پارتێ حه‌زا نه‌ته‌وایه‌تی یا كوردی ل نك هزاران گه‌نجێن كورد دروست كریه‌، ئه‌و هزر و ئایدۆلۆژیه‌ت بووینه‌ بنیاتێ دروستكرنا شۆره‌شگێرێن هزری و چه‌كداری بۆ به‌ره‌ڤانیا گه‌لێ كورد و خۆراگریا له‌شكری و سیاسی دژی حوكمرانیێن جودا ل وه‌لاتێ عیراقێ هه‌ر ژ سه‌رده‌مێ شاهێن عیراقێ د سالێن 20 دا حه‌تا روخاندنا دووماهی رژێما توندره‌و ل سالا 2003. ژ ئه‌نجامێ ئایدۆلۆژیه‌تا ڤێ پارتێ ده‌ستكه‌فتێن نه‌ته‌وایه‌تی سه‌ر ئاستێ ناڤخوه‌ی و هه‌رێمی و نیڤده‌وله‌تی هه‌بووینه‌. شۆره‌شێن ڤێ پارتێ ل سالێن 70 حوكمه‌تا عیراقێ نه‌چاركریه‌ رازی ببن سه‌ربه‌خوه‌یا كوردستانی هه‌بیت، ئانكو ئۆتۆنۆمى و ده‌ڤه‌رێن كوردستانێ سه‌ربخوه‌ ببن ژ لایێ حوكمرانی ڤه‌، لێ ئه‌و ژی خاپاندنه‌كا سیاسی بوو ژ لایێ رژێما به‌عس و چه‌ندین وه‌لاتێن شۆفێنی و خیانه‌تكار. شۆره‌شا كوردی به‌رده‌وام بۆ ب خه‌باتا چه‌كداری و سیاسی، لێ ب مخابنی ڤه‌ كورد تووشی گه‌له‌ك كاودانێن دژواربوون بۆ نموونه‌ ل سالێن (1980 ـ 1988) جه‌نگێن عیراقێ و ئیرانێ، هه‌ر ل ماوێ ڤی شه‌ڕی دا حوكمه‌تا عیراقێ چه‌كێ كیمیای بكارئینایه‌، ب مه‌به‌ستا ژناڤبرنا شۆره‌شێن كوردی و قڕكرنا ملله‌تێ كورد. د ماوێ ڤی شه‌ڕی دا حوكمه‌تا عیراقێ و ئۆمێدێن وان به‌رفره‌هتربوون و كارێن نه‌ مرۆڤایه‌تی ب تۆماركرنا:
(جینۆسایدا كوردێن بارزانی ل سالا 1983 ب هه‌بوونا هه‌شت هزار قوربانیان، كیمیا بارانكرنا هه‌له‌بچه‌ ل سالا 1988 ب هه‌بوونا چار هزار قوربانیان، جینۆسایدا ئۆپه‌راسیۆنێن ئه‌نفالێ ل سالا 1988 ب هه‌بوونا 182 هزار قوربانیان). ژ ئه‌نجامێ كاودانێن سیاسی ل رۆژهه‌لاتا ناڤین و ئاریشا عیراق و كۆێتێ سالێن (1990 ـ 1991) دو راپه‌رین ل عیراقێ دروست بوون:
یا ئێكێ/ ڕاپه‌رینا ملله‌تێ كورد ل باكۆرێ عیراقێ.
یا دووێ/ راپه‌رینا شیعه‌یان ل باشۆرێ عیراقێ.
جیاوازی ئه‌وبوویه‌ سیاسه‌تمه‌ندارێن كورد و ژ ئه‌نجامێن سه‌ربۆرێن چه‌كداری و هزری و سیاسی كورد شیاینه‌ زۆنه‌كا سه‌ربخوه‌ ل باكۆرێ عیراقێ دروست بكه‌ن و پشكداری كۆنگره‌ و په‌یوه‌ندیێن نیڤده‌وله‌تی ببن، هه‌روه‌سا دانانا په‌رله‌مان و سازێن ئه‌كادیمی و پشكداربوون د دروستكرنا حوكمه‌تا عیراقا فیدرال پشتی روخاندنا رژێما به‌عس ل سالا 2003، لێ ب مخابنی ڤه‌ شۆفینیه‌تا حوكمه‌تێن عیراقێ یا به‌رده‌وام بوو، سه‌ره‌رای كورد شیاینه‌ مه‌زنترین رێكخراوا تیرۆرستی ب ناڤێ ده‌وله‌تا ئیسلامی (داعش) بشكێنن ل 2014.
ئه‌م ئاماژه‌ ب وێ چه‌ندێ ناكه‌ین كا ڤێ پارتێ چه‌ند ده‌ستكه‌فت ب ده‌ستخوه‌ڤه‌ ئینایه‌ وه‌ك پرۆپاگنده‌كا سیاسی، لێ ئایدۆلۆژیه‌تا ڤێ پارتێ شیایه‌ وه‌ك سه‌ربۆرێن مێژووی و هزری و سیاسی بۆ رایا جیهانی بسه‌لمینن و ئاشكرا بكه‌ن كو رۆخاندنا رژێما عیراقێ ل 2003 پێدڤیه‌كا سیاسی بوو ل رۆژهه‌لاتا ناڤین. له‌ورا گرنگیا ئایدۆلۆژیا سیاسی نه‌ ب تنێ ئاخ و نشتیمان و نه‌ته‌وه‌، به‌لكو پشكداربوونه‌ د مه‌له‌ڤانیا سیاسی یا جیهانی دا ل ناڤ بۆیه‌رێن جودا جودا، بۆ رزگاركرنا جڤاك و وه‌لاتان ژ سیسته‌مێن فاشست و سته‌مكار، لێ ب دیتنا مه‌ گرنگیا ڤێ ئایدۆلۆژیێ ئه‌وا پارتی دیمۆكراتی كوردستانی ل سه‌ر وێ بنیاتێ پرۆژێن خوه‌ یێن نه‌ته‌وایه‌تی تۆمار كرینه‌ ئه‌و بوویه‌ بریارا ڤێ پارتێ ب سه‌ركرداتیا سه‌رۆك (مسعود بارزانی) و بریارا ریفراندۆمێ ئه‌ڤ بریاره‌ بوویه‌ نیشادانه‌ك بۆ ئایدۆلۆژیا سیاسی یا كوردی به‌ر ب سه‌رخوه‌بوونا خوه‌ ل ناڤ هه‌لسه‌نگاندنا سیاسی و هه‌رێمێ و نیڤده‌وله‌تی. گه‌ر بریارا ریفراندۆمێ ل سالا 25/9/2017 بریاره‌كا شاش بیت، پێگوهۆرێ وێ چ بوویه‌؟ و بۆچی خودانێن ئایدۆلۆژیێن جودا، ب تنێ هه‌ڤڕكیێن سیاسی دكه‌ن و نه‌شێن بریارێن وێرانه‌ بده‌ن بۆ دامه‌زراندنا وه‌لاته‌كی ب ناڤێ كوردستان.

80

عادل حه‌سه‌ن ره‌شید مزیرى*

دیمه‌نێن نه‌مرۆڤایه‌تى و كریارێن قڕكرنا هزاران ژ خه‌لكێ سڤیل یێ ناوچا شنگال، پشتى شه‌ش سالان ژ هێرشكرنا ده‌وله‌تا ئیسلامى یا ئاشۆپى ب سه‌رپه‌رشتیا رێكخراوا داعش isis و سه‌ده‌هان چه‌كدارێن ڤێ رێكخراوێ ژ ره‌گه‌زنامێن وه‌لاتێن عه‌ره‌بى و بیانى بوون، ئه‌ندامێن ڤێ رێكخراوێ ژ سنوورێ وه‌لاتێ سووریا و باژێرێ مووسل قه‌ستا شنگالێ كر و هێرشكرن، و شنگالێ دكه‌نه‌ گۆره‌پانه‌كا سه‌ربازى ب پلانه‌كا دارشتى ژ روویێ سیاسى و له‌شكرى، به‌لێ نه‌ بتنێ ب مه‌به‌ستا كوشتنا خه‌لكێ سڤیل، به‌لكو ب مه‌به‌ستا جینۆسایدكرنا كۆمه‌لگه‌ها ئێزدییان ژ تلعزێر، تل قصب،خانه‌سۆر، سیپا شێخ خدر، كۆچۆ، چه‌ندین جه و گوند و مزارێن ئێزدییان بووینه‌ تراجیدیا مێژوویا هه‌ڤچه‌رخ. تایتلێن میدیایا ناڤخوه‌یى و هه‌رێمى و جیهانى ئه‌ڤ روودانه‌ شه‌رمزاركریه‌، لێ پشتى كۆمكوژیێن ب كۆمب بۆ هزاران ژ گه‌نج و لاو و زارۆیێن ئێزدییان ژ ته‌مه‌نێ 12،13 تا 80 سال هاتنه‌ گوله‌برانكرن، ل گۆر گۆرێن كۆم ب كۆم هاتنه‌ بنئاخكرن، ئه‌ڤ دیمه‌نه‌ و كریارێن نه‌مرۆڤایه‌تى به‌شه‌ك بوو ژ ژێكجوداكرنا ئافره‌تان و كچێن سنێله‌ و بكارئینانا توندترین كریارێن نه‌ مرۆڤایه‌تى د مێژوویێ دا ژلایێ ئه‌ندامێن رێكخراوا ژناڤبرى ڤه‌ وه‌ك پلان. و هزاران تاوانێن ده‌ست درێژیێ هاتنه‌كرن ل گه‌ل ژن و كچێن ئێزدیان، و ڤه‌گوهاستنا وان بۆ باژێرێن تله‌عفر و مووسل ل عیراقێ و چه‌ندین باژێرن سووریێ، ب مه‌به‌ستا كرین و فرۆتنا وان. بۆچى زارۆیێن جیهانێ ل ته‌باخا 2014 دگه‌ل خێزانێن خوه‌ د ناڤ دیمه‌نێن جوان و مه‌له‌ڤانگه‌هان و باخچه‌ و پاركان بوون، لێ زارۆیێن ئێزدییان ل بازارێن كرین و فرۆتنێ قوربانى بوون. پشتى هه‌ر روودانه‌كا هاتیه‌ ئه‌نجامدان د ناڤ میژوویێ د،ا هزاران سڤیل بووینه‌ قوربانى، بۆ نموونه‌ جینۆسایدا ئه‌رمینیا هولوكوست ئه‌نفال دارفۆر، رواندا. له‌ورا ژ لایێ قانوونى ڤه‌ ل مێژوویا سه‌رده‌م په‌یمان و بریار ب شێوه‌یه‌كێ فه‌رمى هاتینه‌ دروستكرن ل سه‌ر ئاستێ جیهانى بۆ قه‌ده‌غه‌كرنا كریارێن جینۆسایدێ و تاوانێن دژى مرۆڤایه‌تى و هه‌ ر ژ سالێن چلان دا هه‌تا ئه‌ڤرۆ، بریار هاتنه‌دان، بۆ نموونه‌ ژ ئارتیكلێ دووێ ژ په‌یمانا نیڤده‌وله‌تى بۆ نه‌هێلان و قه‌ده‌غه‌كرن و سزادانا تاوانێن جینۆسایدێ و تاوانبارێن كریارا قركرنا ره‌گه‌زێ مرۆڤایه‌تى ب شیوه‌یه‌كى (عن قصد) كو قركرنا ره‌گه‌زى مرۆڤایه‌تى وه‌ك (genocide) هاتیه‌ وه‌سفكرن و نیاسین ئه‌و كریاره‌ ئه‌وا دهێته‌ ئه‌نجامدان ب مه‌به‌ستا ژناڤبرنا كۆمى، یان پشكه‌كى ل سه‌ر گرۆپه‌كێ مرۆڤایه‌تى، ئانكو ئه‌و ره‌گه‌ز ل سه‌ر بنیاتێ نه‌ژاد و ئاین و نه‌ته‌وه‌ى ئه‌ڤ پێناسه‌ هاتیه‌ تۆماركرن ب وه‌سفه‌كا قانوونى ل گۆر په‌یمانا رێكه‌فتناما قه‌ده‌غه‌كرنا جینۆسایدێ و سزادانا وێ ئه‌ڤ ریكه‌فتنامه‌ هاته‌ دروست كرن 1948.
ماددا ئێكێ ـ ژ ڤێ رێكه‌فتنامێ ژلایێ لایه‌نێن پێكهاتى بۆ نه‌هێلانا تاوانێن جینۆسایدێ ل ده‌مێ ئاشتیێ یان شه‌ڕى، به‌لكو ئه‌و تاوان ل گۆر قانوونا نێڤده‌وله‌تى دهێته‌ ئیدانه‌كرن و دووڤچوونا قانوونى دژى تاوانبارێن ڤان تاوانان.
ماددا دووێ ـ ژ ڤێ رێكه‌فتنامێ جینۆساید وێ رامانێ دده‌تن بۆ كریارێن دهێنه‌ ئه‌نجامدان بۆ ژناڤبرنا گشتى یان به‌شه‌كى ل سه‌ر گرۆپه‌كێ ئاینى و نه‌ژاد و نه‌ته‌وه‌یى و به‌رگێن ڤى ماددێ:
أ. كوشتنا ئه‌ندامێن ڤى گرۆپێ.
ب. هێرشكرنا توندره‌وى دژى كه‌سانێن ڤى گرۆپێ فیزیكى و ده‌روونى.
ج. نه‌چاركرنا باردۆخه‌كێ نه‌خۆش بۆ ڤى گرۆپێ، یان به‌شه‌كى ژى بۆ مه‌به‌ستا نه‌هێلانا وى.
د. سه‌پاندنا باردۆخێ رێگرى ژدایكبوونێ (زاروێ) بكه‌ت د ناڤ گرۆپه‌كى.
ه.ڤه‌گوهاستنا زورى یا زارۆیان ژ گرۆپه‌كى بۆ ئیكێ دیتر.
ماددا سیێ: خالا هه‌ره‌ گرنگ ژ ڤێ رێكه‌فتنامێ هاتیه‌ واژووكرن كو ئه‌ڤ كریارێن ل خوارێ سزا ل سه‌ر دهێته‌ چه‌سپاندن وه‌ك جینۆساید ـ مه‌به‌ستا ئه‌نجامدانا جینۆسایدێ ـ هاندانا زیندى و ئاشكه‌را مه‌ره‌ما ئه‌نجامدانا جینۆسایدێ ـ هه‌ولدان بۆ ئه‌نجامدانا جینۆسایدێ ـ پشكداركرن د كریارا جینۆسایدێ دا). له‌ورا نه‌بتنێ ئه‌نجامدانا كریارێن جینۆسایدێ دبیته‌ تاوان، هه‌ر ئێك ژ وان كریارێن مه‌ئاماژه‌ پێدایى دێ ئه‌نجامده‌رێ وێ وه‌ك تاوانبار هێته‌ نیاسین و دێ هێته‌ سزادان، هه‌روه‌سا ئه‌ڤ رێكه‌فتناما و چه‌ندین رێكه‌فتنامێن هاتینه‌ واژوكرن د مێژوویێ دا سه‌باره‌ت بابه‌تێ جینۆسایدێ، هه‌روه‌سا دووماهیك رێكه‌فتناما دژى كریارێن جینۆسایدێ ئه‌وا ل سالا 1998 هاتیه‌ واژوكرن ب ناڤێ ICC سیسته‌مێ رۆما یێ سه‌ره‌كى بۆ دادگه‌ها جینائى یا نیڤده‌وله‌تى، دیار دكه‌ت چه‌ندین گه‌لێن جیهانێ و كه‌لچه‌رێن هه‌ڤپشك هه‌نه‌، هه‌روه‌سا دیاردكه‌ت كو هزاران زارۆ و ئافره‌ت و زه‌لام بووینه‌ قوربانى بۆ مه‌زنترین كاره‌ساتێن جینۆسایدێ و ئه‌ڤ تاوانێن كو مێشكێ مرۆڤایه‌تى هه‌ژاندن. له‌ورا ل ئارتیكلێ پێنجێ ژ رێكه‌فتناما ICC 1998 ته‌كه‌س دكه‌ت كو تایبه‌تمه‌ندیا دادگه‌هێ دووڤچوونا تاوانێن مه‌ترسیدار وه‌ك تاوانا جینۆسایدێ و تاوانێن دژى مرۆڤایه‌تى و تاوانێن دژى شه‌ڕى، چونكى مه‌به‌ستا ڤێ رێككه‌فتنامێ ئه‌و بوو چێكرنا دادگه‌هه‌كا نیڤده‌وله‌تى یا جینائى، له‌ورا پشتى شه‌ش سالان ژَ كاره‌ساتا شنگالێ ئه‌گه‌ر ئه‌م ڤان دیمه‌نان ئه‌وێن هاتینه‌ تۆماركرن دژى خه‌لكێ شنگال ل چارچووڤێ قانوونا نێڤده‌ولى دا پێدڤیه‌ دادگه‌هه‌كا نشتیمانى یان نێڤده‌وله‌تى بهێته‌ دامه‌زراندن. و بۆ پێزانین چه‌كدارێن رێكخراوا isis نوونه‌رێن هیچ وه‌لات و حوكمه‌تان نه‌بووینه‌ دا ئه‌و حوكمه‌ته‌ و وه‌لاته‌ بهێنه‌ سزادان، لێ وه‌ك تاوانبار دهێنه‌ هژمارتن و پێدڤیه‌ ژ دادپه‌روه‌ریێ قورتال نه‌بوون ئه‌ڤ رێكخراوه‌ گه‌له‌كا مه‌ترسیدار بوو ل سه‌ر ئاستێ جیهانێ، لێ ئه‌ڤ رێكخراوه‌ ژلایى َ هێزێن پێشمه‌رگه‌ و هێزێن هاڤپه‌یمانان ڤه‌ هاتنه‌ شكاندن، هه‌روه‌سا وه‌ك مێژوو هێزێن پێشمه‌رگێن قه‌هره‌مان چه‌ندین داستانێن سه‌ركه‌فتیانه‌ تۆماركرینه‌ بۆ رزگاركرنا شنگال دژى چه‌كدارێن ڤێ رێكخراوێ. هه‌روه‌سا یا پێدڤیه‌ ل سه‌ر حوكمه‌تا عیراقێ دادگه‌هه‌كا نشتیمانى درست بكه‌ت و قه‌ره‌بۆیا خه‌لكێ شنگالێ بكه‌ت، هه‌روه‌سا یا پێدڤیه‌ شنگال بهێته‌ ئاڤاكرن و ئه‌و خه‌لكێ ئاوه‌ره‌بوویێ بزڤریته‌ وارێ خوه‌. له‌ورا 3/8/2014 بوویه‌ خاله‌كا ره‌ش د مێژویا هه‌ڤچه‌رخ دا هه‌مبه‌ر ملله‌تێ كوردێن ئێزدى كو گونه‌ها وان ب تنێ ئه‌و بوو كو ئاینێ وان ئیزدیاتى بوویه‌. تاوانبارا ناڤێ ئاینه‌كێ دى تاوانا خوه‌ ئه‌نجام دایه‌، لێ هه‌مى ئاینێن ئه‌سمانى ئاماژه‌ بڤان كریارێن توندره‌وى نه‌كریه‌ و چ جاران هزرێن توندره‌وى و تاوانبارێن جینۆسایدێ و كریارێن دژى مرۆڤایه‌تى نابنه‌ نوونه‌رێن هیچ ئاینه‌كێ ئاسمانى. ئه‌رێ پێنج هزار قوربانى و گۆرێن كۆم ب كۆم و برنا هزاران كچێن كوردێن ئێزدى و فرۆتنا وان ل بازارێن مووسل و ره‌قه‌ و جوداكرنا زارۆیان ژ دایك و بابان و وێرانكرنا كومه‌لگه‌هه‌كا خودان مێژوو و كه‌لچه‌ر و زمان و دیرۆك دێ رۆژه‌كێ هێته‌ لقه‌له‌مدان ب شێوه‌یه‌كێ قانوونى ژلایێ دادگه‌ها جینائى یا نیڤده‌وله‌تى و ل گۆر هه‌مى رێكه‌فتنامێن هاتینه‌ واژوكرن بۆ نه‌هێالانا كریارا جینۆسایدێ و تاوانێن دژى مرۆڤایه‌تى؟! یان وه‌ك جینۆسایدا هه‌شت هزار كوردێن سڤیل یێن بارزانى و چار هزار قوربانى ژ كیمیابارانكرنا هه‌له‌بچه‌ و 182 هزار كه‌س یێن سڤیل ژ ملله‌تێ كورد ل ئه‌نفالا توندره‌و 1988 تنێ دێ بیته‌ مێژوو و چیرۆك؟!
*تایبه‌تمه‌ندێ وه‌رگێرانا كه‌یسێن جینوسایدێ ل زانكویا ره‌وان فره‌نسا

website security
WP Facebook Auto Publish Powered By : XYZScripts.com