NO IORG
Authors Posts by به‌هجه‌ت هرۆرى

به‌هجه‌ت هرۆرى

به‌هجه‌ت هرۆرى
7 POSTS 0 COMMENTS

17

به‌هجه‌ت هرۆری

خوه‌نیشادانا شێلادزێ دو ئالی یه‌؛ ئاله‌ك نه‌رزازیبوونه‌ ل سه‌ر تۆپبارانێن توركیا دژی خه‌لكێ سڤیل ل ده‌ڤه‌رێ ب به‌هانا هه‌بوونا چه‌كدارێن په‌كه‌كه‌ یێ كو نه‌رازیبوونه‌كا د جهێ خوه‌ دایه‌. ئالێ دی تێكده‌رانه‌ و نه‌به‌رپرسیارانه‌ بوو ژ ئه‌نجامێ چه‌پدانا ئاراسته‌یا خوه‌نیشادانێ و هێرشكرن بۆ سه‌ر له‌شكرگه‌ها توركیا و سۆتنا ئه‌مبۆلانس و ترۆمبێلان.
خوه‌ ڤه‌كێشانا سه‌ربازێن توركیا كاره‌كێ فه‌ره‌ و دڤێت بهێته‌ كرن، لێ دڤێت بزانین كو هاتن و خوه‌ ڤه‌كێشانا توركیا ژ هه‌رێمێ كریاره‌كا سیاسیانه‌ یا گرێدایی د ناڤبه‌را توركیا و حوكمه‌تا فیدراله‌ و ب سۆتنا ترۆمبێله‌كێ توركیا نه‌ ته‌نگاڤ دبیت و نه‌ خوه‌ ڤه‌دكێشیت!
توركیا وه‌لاته‌كێ هه‌ڤسوو و ده‌رگه‌هه‌كێ مه‌زن یێ گرێدانا هه‌رێمێ ب جیهانێ ڤه‌ یه‌ و پێدڤیه‌ ئه‌ڤه‌ ل به‌ر چاڤێن مه‌ بیت، لێ مه‌ره‌م ئه‌و نینه‌ به‌رگری ژ كریارێن وێ یێن دوژمنكارانه‌ بهێته‌ كرن. توركیا ب رێیا تۆپباران و بۆمبه‌رانكرنێن دوژمنكارانه‌ یێن به‌رده‌وام كو ره‌نگه‌ رۆژانه‌ نه‌، زیانێن مه‌زن ل باشوور داینه‌:
ـ كوشتنا ده‌هان وه‌لاتیێن سڤیل.
ـ برینداركرنا هژمارێن زۆر یێن وه‌لاتیان.
ـ خرابكرنا ده‌هان خانیان.
ـ كوشتنا هژماریێن مه‌زن ژ مه‌رومالاتێ خه‌لكی.
ـ سۆتنا بێ هژمارا دونه‌مێن عه‌ردێ هه‌رێمێ ژ ئاقارێن چاندنێ و ژینگه‌ها سروشتێ چیایی. هه‌كه‌ رۆژنامه‌ڤانه‌ك ل جهێن شووله‌ژێ ل دووڤ بچیت، دێ ئامارێن دروست و سه‌یر ژ ڤان زیانان په‌یدا كه‌ت.
هه‌كه‌ ب چاڤه‌كێ ڤه‌كری به‌رێ خوه‌ بدین ڤێ بوویه‌رێ، دێ زانین كو ژ بلی ئالێ توركیا، ئالێ په‌كه‌كه‌ یێ ژی سوچداره‌ یا كو ب ناهه‌ق خوه‌ ب سه‌ر ده‌ڤه‌رێ دادای و باره‌گایێن خوه‌ لێ داناینه‌. ژ ناڤ ئاخا هه‌رێمێ كریاران دژی به‌رژه‌وه‌ندیێن توركیا دكه‌ت و خوه‌ ل دۆرێن گوندان ل باشوور ڤه‌دشێریت و ئاسێ دكه‌ت و به‌هانێ دده‌ته‌ توركیا تۆپباران بكه‌ت! د ئه‌نجام دا هه‌ر وه‌لاتیێن كوردن دبن قوربانی، ئه‌ڤجا په‌كه‌كه‌ یی بن یان وه‌لاتیێن باشوور بن، ل ده‌ف توركیا كوردن و ئێكن.
زێده‌باری هه‌بوونا هنده‌ك ئالێن كوردی یێن ناڤخوه‌یی و ده‌رڤه‌ی هه‌رێمێ د گه‌رمكرن و ئازراندن و هایدانا خوه‌نیشادایان دا و كه‌نالێن تلفزیۆنی ژی هه‌بوون خوه‌نیشادای هان ددان و دئازراندن، لێ ره‌نگه‌ خه‌مساری ژ ئالێن ئێمناهیێ یێن ناڤخوه‌یی ژی هه‌بیت كو زوو رێ لێ نه‌گرتیه‌.
بۆ دوباره‌ نه‌بوونا ڤان بوویه‌رێن نه‌خوه‌ش و وێرانیێ كو خه‌لكێ گوندان ل باشوور كه‌فتینه‌ ناڤبه‌را بزمارا په‌كه‌كێ وچه‌كۆچێ توركیا و ژ ئاقار و چیا یێن خوه‌ بێ به‌هر بوویه‌، تنێ چاره‌سه‌ریه‌كا بنگه‌هین هه‌یه‌، ئه‌و ژی توركیا و په‌كه‌كه‌ ب رێیێن ئاشتیانه‌ و د چارچووڤێ ئاخا توركیا دا دانوستاندنان بكه‌ن و كێشه‌ یێن خوه‌ چاره‌سه‌ر بكه‌ن.

11

به‌هجه‌ت هرۆری
رووبرووبوون و نه‌هێلانا گه‌نده‌لیێ هند ب ساناهی نینه‌ وه‌ك دهێته‌ به‌حسكرن، رێكارێن به‌رفره‌ه یێن تاك و كۆمی و قانوونی یێن توكمه‌ و رژدی پێ دڤێن، ب تایبه‌ت كو هه‌رێما كوردستانێ د چارچووڤێ وه‌لاته‌كێ نیڤ هه‌لوه‌شیای و گه‌نده‌ل دایه‌ و ب ساناهی نینه‌ ببیته‌ خودان ده‌سه‌لاته‌كا ئابووی یا سه‌ربخوه‌. ب گۆره‌ی راپۆرته‌كا نه‌ته‌وێن ئێكگرتی، عیراق ل رێزبه‌ندا حه‌فتێ یه‌ ژ ناڤ 180 گه‌نده‌لترین وه‌لاتێن جیهانی. گه‌نده‌لی ژ دیاردێن هه‌ره‌ ترسناكه‌ د ناڤ جڤاكان دا و ب تاوان و دوژمنه‌كێ كوژه‌ك دهێته‌ نیاسین. ب شێوێ تاك یان كۆمی دهێته‌ كرن و پتر ل وه‌لاتێن جیهانا سێیێ هه‌یه‌. ب گه‌له‌ك شێوه‌یان ژ ئالیێ هنده‌ك به‌رپرسێن حكومی و حزبی ڤه‌ دهێته‌ كرن. پۆست و پله‌یێن خوه‌ بۆ به‌رژه‌وه‌ندی و مفا یێن تایبه‌ت ب كاردئینن، ب رێیا دزینه‌كا نهێنی یان رێڤه‌برنا هنده‌ك مامه‌له‌ و كارێن نه‌قانوونی ل به‌رامبه‌ر وه‌رگرتنا هنده‌ك ده‌ستكه‌فتێن كه‌سۆكی یێن مادی و مه‌عنه‌وی. د ئه‌نجام دا كارتێكرنا نێگه‌تیف د به‌رژه‌وه‌ندی و مافێن گشتی و كه‌سێن دی دا دكه‌ت.
گه‌نده‌لی كو هنده‌ك شێوێن وێ دبچووكن و هنده‌ك ژی دگه‌هن بهایێ ملیاران دۆلاران، هند به‌رفره‌ه بوویه‌ هه‌موو قولاچكێن ژیانێ ڤه‌گرتینه‌ و ب زه‌حمه‌ت ده‌ست ب سه‌ر دا دهێته‌ گرتن. ب گوره‌ی راپۆرته‌كا نه‌ته‌وێن ئێكگرتی، ل ڤان وه‌لاتان سالانه‌ یه‌ك ترلیۆن دۆلار ب به‌رتیل دهێته‌ دان و 2.6 ترلیۆن دۆلار ب گه‌نده‌لی دهێنه‌ مه‌زاختن كو یه‌كسانه‌ ب 5% ژ سه‌رجه‌مێ داهاتێ جیهانێ.

گه‌نده‌لی د گه‌له‌ك واران دا دهێته‌ كرن كو د هه‌مان ده‌م دا دبن جۆرێن وێ: گه‌نده‌لیا سیاسی..گه‌نده‌لیا دارایی.. گه‌نده‌لیا جڤاكی ب رێكا توندوتیژی و پێلێنانا مافێن مرۆڤی ب گشتی.. گه‌نده‌لیا نیشتمانی ب رێكا خوه‌فرۆشی و خیانه‌تا وه‌لاتی..گه‌نده‌لیا كارگێری..گه‌نده‌لیا بازرگانی.. گه‌نده‌لیا بیروباوه‌ران ب رێكا به‌لاڤكرنا بیروباوه‌رێن توندره‌و و هاڤی ل ناڤ جڤاكی..گه‌نده‌لیا ره‌وشه‌نبیری كو وارێن ئه‌ده‌بی، هۆنه‌ری و میدیایی ب خوه‌ڤه‌ دگریت و گه‌نده‌لیا له‌شكری. گه‌نده‌لی ب شێوێن؛ دزین، دره‌و، به‌رتیل، مرۆڤكانێ، واسته‌كاری، فێلكرن، پاشگوهكرنا یاسا و رێنمایان، به‌ره‌لایی و گرێبه‌ستێن بێ بنیات دهێته‌ كرن. گه‌نده‌لی ل هه‌رێما كوردستانێ بوویه‌ جهێ ترسێ. د سه‌ر پێنگاڤێن رووبرووبوونێ یێن ده‌سه‌لاتێ را ژی، گه‌نده‌لی به‌رده‌وامه‌ و ده‌مارێن ژیانا جڤاكی ب شێوه‌كێ كوژه‌ك ڤه‌گرتینه‌ و پتریا وان د ب په‌رده‌كا یاسایكرنێ ڤه‌ دهێنه‌كرن كو ب ساناه ئاشكرا نابن. وه‌سا دبینم كوجدیه‌ته‌كا خورت و بنیاتی و زانستی د رووبرووبوونا وێ دا نینه‌. ئه‌گه‌ر ئالیێن ده‌سه‌لات ژ سه‌رۆكاتیێن یاسادانانێ و هه‌رێمێ و حوكمه‌تێ و دادوه‌ریێ نیاز و به‌رنامه‌ و پێنگاڤێن جدی و كه‌تواری نه‌بن، ده‌ست ب سه‌ر دا ناهێته‌ گرتن و ترسا وێ رۆژانه‌ دێ مه‌زنتر بیت و جڤاك دێ به‌ر ب هه‌لوه‌شیانێ ڤه‌ چیت. كێشه‌ ئه‌وه‌ درووشمێن سه‌رڤه‌یی یێن بۆ دژاتیا گه‌نده‌لیێ دهێنه‌ بلندكرن پترن ژ پێنگاڤێن رژد یێن بۆ نه‌هێلانا وێ دهێنه‌ هاڤێتن! ئانكو نه‌هێلانا گه‌نده‌لیێ راگه‌هاندنا شه‌ره‌كێ مه‌زن ژ هه‌موو ئالیان ڤه‌ پێ دڤێت كو هه‌موو تاكێن جڤاكی هه‌ر ئێك ل جهێ خوه‌ پێشمه‌رگه‌ یێ نه‌هێلانا وێ بیت. هنده‌ك سه‌قا وهۆكارێن هاریكار و پشته‌ڤان بۆ په‌یدابوون و گه‌شه‌كرنا گه‌نده‌لیێ هه‌نه‌ و پێدڤیه‌ هه‌ر چ زووتره‌ بهێنه‌ چاره‌سه‌ركرن. چاره‌سه‌ركرنا ڤان رێكێن گه‌شه‌كرنا گه‌نده‌لیێ هه‌مان رێكێن دژاتی و نه‌هێلانا وێ نه‌، كو ئه‌ڤه‌ نه‌:ـ لاوازیا بنه‌مایێن دیمۆكراسیێ. ـ نه‌بوونا دادپه‌روه‌ریا جڤاكی. ـ نه‌بوونا نیازا جدی یا رووبروو بوونا گه‌نده‌لیێ.
ـ رێ نه‌دانا سرووشتی ب ئازادیا راده‌ربڕین و رۆژنامه‌ڤانیێ.
ـ بجهنه‌ئینانا یاسان ب شێوه‌كێ راست. ـ لاوازیا رۆلێ زانكۆ و په‌یمانگه‌هان د به‌رهه‌ڤكرن و به‌لاڤكرنا ڤه‌كۆلینێن زانستی یێن تایبه‌ت ب رووبرووبوونا گه‌نده‌لیێ و ئاڤاكرنا جڤاكه‌كێ سڤیل ڤه‌. ـ به‌رزه‌بوونا ره‌ئیا گشتی یا جڤاكی. ـ بلندیا ئاستێ نه‌خوانده‌ڤانیێ ل ناڤ جڤاكی. دێ راستتر بیت هه‌كه‌ بێژین نزمیا ئاستێ ره‌وشه‌نبیری و ژیاتیبوونێ ل ده‌ف تاكێ كوردستانێ. ـ تێكه‌لێككرنا پله‌ و پۆستان ل گه‌ل كارێن بازرگانی. ـ لاوازیا گۆتارا دینی. ـ په‌یره‌ونه‌كرنا بنیاتێ (دانانا كه‌سێن هه‌ژی ل جهێن هه‌ژی). ـ په‌یره‌ونه‌كرنا ناڤه‌رۆكا مه‌ته‌لا مه‌زنان (نان بۆ نانپێژی و گۆشت بۆ قه‌سابی). ـ هه‌بوونا ره‌وشه‌كا ئالۆز یا سیاسی و ئابۆری ل هه‌رێمێ كو قه‌یران و بڕینا مووچه‌یان ژێ په‌یدا بوویه‌.ـ هه‌بوونا رێژه‌كا به‌رچاڤ یا هه‌ژاری و بێكاریێ د ناڤ جڤاكی دا. ـ نه‌بوونا شه‌فافیێ د داموده‌زگه‌هان یێن دارایی و داهاتێن وه‌لاتی دا. ـ پێشچاڤنه‌كرنا وان دۆسیێن گه‌نده‌لیێ یێن راده‌ستی دادگه‌هان دبن بۆ رایا گشتی.

6

به‌هجه‌ت هرۆری
د سه‌ر بزاڤێن چڕ و سالانه‌ یێن حوكمه‌تا هه‌رێما كوردستانێ را بۆ نه‌هێلانا توندوتیژیا دژی ژنان، د سه‌ر گوهۆڕینا قانوونا بارێ كه‌سایه‌تی را و ده‌رێخستنا هنده‌ك قانوونێن د خزمه‌تا ژنان دا، د سه‌رهه‌بوونا گه‌له‌ك یه‌كێتی و كۆمه‌له‌ یێن ژنان را ل كوردستانێ، د سه‌ر هه‌بوونا گه‌له‌ك رێكخراوێن جڤاكا سڤیل را یێن به‌رگریێ ژ مافێن مرۆڤی و تایبه‌ت ژنان دكه‌ن، د سه‌ر پێكئینانا گه‌له‌ك كۆنفرانس و بزاڤێن به‌رده‌وام را ب ناڤێ پاراستنا مافێن ژنان و مه‌زاختنا ملیۆنان دیناران د ڤان رێیان دا، مخابن ب گۆره‌ی وان داتا یێن ژ ئالیێن شۆله‌ژێ ڤه‌ ده‌ردكه‌ڤن، توندوتیژی ب شێوازێن جودا یێن جه‌سته‌یی، سێكسی و ده‌روونی ل هه‌مبه‌ر ژنان به‌رده‌وامه‌ و د زێده‌بوونێ دایه‌.
ئه‌گه‌ر ب هووری ل دۆر ڤێ چه‌ندێ راوه‌ستین، دێ هێته‌ هزرا مه‌ كو بناس نه‌ نیاز و چالاكینه‌، به‌لكو بناس بۆ شێواز و چاوانیا رێڤه‌برنا ڤان چالاكیان ڤه‌دگه‌رن. له‌و ب فه‌ر دبینم، لیژنه‌یه‌كا تایبه‌تمه‌ند ژ چالاكڤان و جڤاكناسان، شاره‌زا و خه‌مخۆرێن پێشكه‌فتنا ژنان بهێته‌ پێكئینان، ب هووری ل دۆر هه‌ر تشتی راوه‌ستن و سه‌حكه‌ن هنده‌ك رێ یێن پتر كه‌تواری و گونجای ل گه‌ل جڤاكا مه‌ بۆ رێڤه‌برنا هه‌وێن كێمكرنا توندوتیژیا دژی ژنان. د وێ باوه‌ریێ دا نینم كو توندوتیژی نه‌مینیت وه‌ك (نه‌هێلانا توندوتژیێ) بوویه‌ درووشمێ حوكمه‌تێ د هه‌وێ دا، لێ د شیان دا یه‌ ب رێژه‌ یێن باش بهێته‌ كێمكرن. كار بهێته‌ كرن كو هه‌موو رۆژێن سالێ ببن رۆژێن رێز ل هه‌ڤگرتن و نه‌بوونا توندوتیژیێ نه‌ك ده‌مه‌كێ ده‌ستنێشانكری ب تنێ د سالێ دا.
هه‌موو نڤیسه‌ر (نێر و مێ) د به‌حسكرنا كێشه‌یه‌كێ دا كو ناڤێ وێ كریه‌ (كێشه‌یا ژنێ!) خوه‌ ب هنده‌ك بابه‌ت و درووشمێن سار و بێ مفا ڤه‌دگرن و خوه‌ نێزیكی بنیاتێ كێشه‌ یێ و چاره‌سه‌ریێن بنیاتی ناكه‌ن، له‌وا به‌رده‌وام مه‌ گوه ل هنده‌ك درووشمێن سار و كه‌ڤنار دبیت هه‌تا ژ ئالیێ چالاكڤانێن ژن ڤه‌ ژی و دبێژن؛ دڤێت ژن و زه‌لام وه‌كهه‌ڤ بن. ئه‌ڤ كێشه‌یه‌ كێشه‌یا ژنێ یه‌. ژن نیڤا جڤاكی یه‌ و دایكا نیڤا دی یه‌. ژنێ خه‌بات كریه‌ و قوربانی داینه‌. بێی حه‌زا گه‌له‌ك كچان دهێنه‌ شوودان و… هتد ژ ڤان درووشمێن دلینی (عاتفی) ! وه‌سا دبینن رووكرنا ڤان درووشمان به‌سه‌ بۆ كو خوه‌ دیار كه‌ن خه‌م ژ مافێن ژنێ خوار و هه‌كه‌ گۆتن، ئه‌و كێشه‌ چاره‌سه‌ر بوو و پێ ئارام دبن!
هه‌ر كه‌سه‌ك دبێژیت دڤێت رێز ل مافێن ژنێ بهێته‌ گرتن و مافێن وێ ل گه‌ل مافێن زه‌لامی د وه‌كهه‌ڤبن، به‌لێ راسته‌. لێ دڤێت بزانین رێزگرتن چیه‌ و چاوا دبیت؟! مافێن ژنێ چنه‌ و د ده‌ست كێ دانه‌؟ ئه‌و ماف چاوا دهێنه‌ ده‌ست و چاوا ل گه‌ل مافێن زه‌لامی وه‌كهه‌ڤ دبن؟ دیسا مافێن زه‌لامی چنه‌؟ دستوور و قانوون و دین و مه‌ده‌نیه‌ت چنه‌ و هه‌موویان چ گرێدان پێكڤه‌ هه‌یه‌؟ ژ به‌ر كو بێی زانینا ئه‌گه‌ران، چاره‌سه‌ری ژی نابن یان دێ ب زه‌حمه‌ت بن.
ئه‌ڤ كێشه‌یه‌، ئه‌وا ناڤ لێ كری (كێشه‌یا ژنێ !) كێشه‌یا گشت جڤاكی یه‌. یا ژن و زه‌لامان ب هه‌ڤرایه‌. ژ به‌ر كو زه‌لام ئاله‌كێ سه‌ره‌كی یه‌ تێدا و پره‌نسیپێن قانوونێ بنیاتێن وێ نه‌. هه‌موو تێگه‌هێن جڤاكی و دینی ژی چ راسته‌وخوه‌ چ نه‌راسته‌وخوه‌ پێڤه‌ دگرێدای نه‌ و كار تێدا دكه‌ن.
ل دووڤ سه‌لیقه‌یا ڤان درووشمێن دلینی یێن ژن بۆ خوه‌ دبێژن، زه‌لام ژی دشێت بێژیت؛ زه‌لام نیڤا جڤاكی یه‌ و بابێ نیڤا دی یه‌ ! زه‌لامی خه‌بات كریه‌ و قوربانی داینه‌. د هه‌موو شۆره‌شان دا زه‌لام سه‌ركێش بوونه‌ و پتر دبن قوربانی. زه‌لام ژی هه‌نه‌ بێ ی حه‌زا وان ژ خواندنێ بێبه‌هر بووینه‌ و بێ ی حه‌زا گه‌له‌كان ژی ژن بۆ هاتینه‌ خواستن وه‌ك چاوا گه‌له‌ك كچ بێ ی حه‌زا وان هاتینه‌ شوودان ! به‌لێ، ئه‌رێ ئه‌ڤ درووشمه‌ به‌سن كو بێژین مه‌ ئه‌ڤ كێشه‌یا جڤاكی پێشچاڤكر؟!
ئه‌ڤه‌ هه‌موو كێشه‌ و درووشمێن دلینی و سه‌رڤه‌ سه‌رڤه‌ نه‌ و مرۆڤی ناگه‌هینن چو ئه‌نجامان. به‌لكو ئه‌ڤه‌ خوه‌ ڤه‌دزینه‌ ژ گوهۆرینا كه‌تواری و راستیێن هه‌یی. ژ به‌ر كو ژن و زه‌لام دو ره‌گه‌زێن پێكئینانا خێزانێ و جڤاكی و وه‌لاتی نه‌. ره‌گه‌زێن هه‌ڤپشكێن زێده‌بوونێ نه‌. پێكڤه‌ ئاڤاكه‌رێن خێزانێ و جڤاكی نه‌. كێشه‌ یێن وان پێكڤه‌ گرێداینه‌، كێشه‌ یێن جڤاكی نه‌ و ژ هه‌ڤ جودا نابن. ئه‌كتیڤ نه‌بوونا ره‌گه‌زه‌كی ژ وان، ئه‌گه‌رێ سه‌قه‌تبوونا جڤاكی یه‌.
مه‌ره‌ما من، ژ ره‌گه‌زێ مێ نه‌ ئه‌وه‌ (وه‌ك دیتنا گه‌له‌ك نێرێن جڤاكی دبینن) ژن تنێ كارگه‌ها چێكرنا زارۆیان بیت و به‌س، به‌لكو هه‌ردو پێكڤه‌ بنیاتێن دانان و رێڤه‌برنا هزرێ، پلانێ، سیاسه‌تێ، مافان و ئاڤاكرنێ بن. ژ به‌ر كو چو ملله‌ت بێی رزگاركرنا ژنان، رزگار نه‌بوونه‌. رزگاربوون ژی وه‌ك تێگه‌ه؛ وه‌كهه‌ڤی، دیمۆكراسی، مه‌ده‌نیه‌ت و ئازادی یه‌ د هه‌ر واره‌كی دا.
ئه‌ڤجا كێشه‌ ل كیڤه‌یه‌؟

علمانیكرن د بنیات دا په‌یره‌وكرنا زانستی (علم) یه‌ د ئه‌رك و كارێن رێڤه‌برنێ دا نه‌ك هزرێن ئایدیولۆژی و كه‌ڤنار. د په‌یره‌وكرنێ دا ل سه‌ر زه‌مینی ب ئانكۆ یا ژ هه‌ڤجوداكرنا هه‌ردو ده‌سه‌لاتێن دینی و ده‌وله‌تێ دهێت كو گه‌له‌ك جوداهی ل ناڤبه‌را تێگه‌ه و ئه‌ركێن وان هه‌نه‌؛ دین وه‌ك گرێدانه‌كا تاكه‌ كه‌سی ل گه‌ل خودای و ده‌وله‌ت ژی كۆمه‌كا پرنسیپێن پێكڤه‌ گرێداینه‌ بۆ رێڤه‌برنا كاروبارێن خه‌لكی یێن گشتی. دین كاره‌كێ (تاكی) یه‌ و ئێدی خودا ل رۆژا قیامه‌تێ دێ حسابێ ل گه‌ل هه‌ر تاكه‌كی كه‌ت و ل دووڤ كارێن وی پێرابوونان ل گه‌ل كه‌ت و ئه‌و ئارێشه‌ پاشخستیه‌ بۆ وێ رۆژێ. یاسایێن ده‌وله‌تێ د كۆمی نه‌، یێن پێرابوونانه‌ د ده‌مێ خوه‌ دا بۆ رێڤه‌برنا ژیانا خه‌لكی ل سه‌ر روویێ ئه‌ردی.
د سستمێ علمانی دا هه‌موو ماف ژێك دهێن ڤاڤارتن؛ مزگه‌فت، دێر، لالش، حوسه‌ینی و هه‌ر په‌رستگه‌هه‌كا دی، بۆ وان كه‌سانه‌ یێن بخوازن خودای تێدا بپه‌رێسن و هه‌موو ئازادی بۆ ڤی تاعه‌تی هه‌یه‌.
ل ئه‌ورۆپا، ل ده‌مێ خوه‌ (وه‌ك وه‌لاتێن رۆژهه‌لاتی و نوكه‌ و مایتێكرنا مزگه‌فتان)، كنیشتێ مایێ خوه‌ د هه‌موو كارێن مرۆڤی دا دكر، د سیاسه‌تێ، ئابوورێ، بازاری، ره‌وشه‌نبیریێ، خێزانێ، جلكان، خواندنێ، شوودانا كچان و هه‌موو ئازادیێن دی وه‌ك بنه‌ما یێن مافێ تاكه‌ كه‌سی، له‌و ل وی ده‌می كێشه‌ یێن جڤاكی، قه‌یرانێن ئابووری، شه‌ر و كوشتار، ئالۆزیێن جڤاكی زۆر بوون!
ئاقلمه‌ندێن وان یێن دینی و سیاسی ب هه‌ڤرا بڕیاره‌كا حه‌كیمانه‌ دا و دین و ده‌وله‌ت ژ هه‌ڤ جوداكرن. دینێ مه‌سیحی د كه‌نیسه‌یان ڤه‌ و دین و ئۆلێن دی ل په‌رستگه‌هێن وان یێن تایبه‌ت ڤه‌ دهێن پاراستن. گه‌له‌ك رێز لێ دهێته‌گرتن و خه‌لك ئازاده‌ چاوا ده‌ربرینێ ژێ بكه‌ت. كنیشته‌ مایێ خوه‌ د سیاسه‌ت و قانوونێ دا ناكه‌ت. دستوورێ ده‌وله‌تێ ژی ل په‌رله‌مانی دهێته‌ دانان و ل ده‌ف حوكمه‌تێ و دادوه‌ریێ دهێته‌ برێڤه‌برن و پاراستن. هه‌موو ده‌سهه‌لاتان سه‌ربخوه‌ یا خوه‌ هه‌یه‌ ومایێ خوه‌ د هه‌ڤ دا ناكه‌ن. قانوونێ ژی بۆ هه‌ر تاكه‌كی ب جوداهیا هزری و ره‌گه‌زی ڤه‌ ب وه‌كهه‌ڤی برێڤه‌دبه‌ن.

16

نه‌هجه‌ت هرۆری
پشتی دووماهیهاتنا سه‌ره‌دانا وان یا مێژوویی بۆ به‌غدا، سه‌رۆك بارزانی دێ سه‌ره‌دانا هنده‌ك وه‌لاتێن كه‌نداڤی كه‌ت.
سه‌رۆك بارزانی وه‌ك ب هێزترین كه‌ساتیێ عێراقێ كو دهێته‌ خواستن بۆ سه‌ره‌دانان، هنده‌ك ئارمانجێن گرنگ ل به‌غدا هه‌بوون، راستكرنا بۆدجا هه‌رێما كوردستانێ بۆ رێژا 17%، پێكئینانا حوكمه‌تا عێراقێ ل سه‌ر بنه‌مایه‌كێ دروست كو رۆلێ كوردان وه‌ك نه‌ته‌وه‌ یا دوێ ل عێراقێ تێدا دیار بیت و سه‌رراستكرنا كێشا ده‌ڤه‌رێن مادێ 140 یێ دستووری ب تایبه‌ت كه‌ركووكێ كو كوردان رۆله‌كێ دیار و ب هێز تێدا هه‌بیت.
بێگۆمان كو سه‌رۆك بارزانی كه‌ساتیێن بالاده‌ست و بڕیارده‌رێن عێراقی دیتین، گه‌هه‌شتینه‌ هنده‌ك ئه‌نجامان كو كارتێكرنا وان تا رۆژێن دووماهیا ئه‌ڤ ساله‌ دێ خۆیا بن و كار د باشتركرنا ره‌وشا دارایی و ئابۆری یا خه‌لكێ هه‌رێمێ دا كه‌ن. دهێته‌ چاڤه‌رێكرن هه‌رل ده‌ستپێكا سالا نوو 2019 سیسته‌مێ پاشه‌كه‌وتكرنا مۆچه‌یێن فه‌رمانبه‌ران ژی نه‌مینیت.
سه‌رۆك بارزانی نه‌ تنێ وه‌ك سه‌رۆكێ پارتی و لێڤه‌گه‌رێ كوردستانێ دهێته‌ دیتن، به‌لكو وه‌ك لێڤه‌گه‌رێ عێراقێ ژی دهێته‌ دیتن و پێشوازیكرن كو رۆله‌كێ مه‌زن د بنیاتنانا عێراقا نوو و دستوورێ وێ دا هه‌یه‌ و پشته‌ڤانه‌كێ سه‌رسه‌خت یێ دانوستاندن و بجهكرنا دستووری یه‌ بۆ دووماهی ئینان ب كێشه‌یێن ناڤخوه‌یی. هه‌ر ئه‌ڤه‌ بوو سه‌رۆكوه‌زیرێ عێراقێ عادل عه‌بدولمه‌هدی بارزانی ب سه‌رۆكه‌كێ مه‌زن و ئه‌ندازیارێ بنیاتنانا عێراقا نوو سالۆخه‌ت دای.
وه‌لاتێن هه‌رێمی، ئه‌مریكا و ئه‌ورۆپا ژی ب هه‌مان چاڤ ل سه‌رۆك بارزانی دنێرن، له‌و ژی گه‌له‌ك هاریكار و پالده‌رێن ڤێ پێنگاڤا بارزانی و وێ پێشوازیا گه‌رم یا عێراقێ بوون كو دێ هێزه‌كا مه‌زن ده‌ته‌ كوردستانێ و پارتی دیمۆكراتی كوردستان ب خوه‌ ژی.
سه‌رۆك بارزانی چێكه‌رێ مێژوویه‌كا گه‌شه‌ ل كوردستانێ و عێراقێ و ده‌ڤه‌رێ، دهێته‌ چاڤه‌رێكرن سه‌ره‌دانا وان بۆ هنده‌ك وه‌لاتێن كه‌نداڤی پترد چارچووڤێ دو خالێن گرنگ دا بیت؛ سه‌رراستكرنا ئالۆزیێن پێكهاتنا حوكمه‌تا عێراقێ كو وان وه‌لاتان و گه‌له‌ك وه‌لاتێن هه‌رێمی باندۆر ل سه‌ر هه‌یه‌ ژ ئالیه‌كی و خورتكرنا په‌یوه‌ندیێن سیاسی و بازرگانی یێن وان وه‌لاتان ل گه‌ل هه‌رێما كوردستانێ ژ ئالیێ دی ڤه‌.
وه‌لاتێن هه‌رێمی و جیهانی هایدار و دیده‌ڤانێن ڤێ سه‌ره‌دانا مێژوویی یا سه‌رۆك بارزانی نه‌ و دلخوه‌شیا خوه‌ بۆ دیار كریه‌. دیسا سه‌ركوه‌زیرێ عیراقێ عه‌بدولمه‌هدی دۆسته‌كێ نێزیك یێ كوردان و سه‌رۆك بارزانی یه‌. كو پتر گه‌شبینیێ دده‌ن. ئه‌گه‌ر ژ به‌ر چ هۆكار و ئه‌گه‌رێ بیت، ڤێ جارێ ژی به‌غدا سۆزێن خوه‌ بجهنه‌كرن، ئێدی جیهان د رێیا داخوازیێن كوردستانێ دا ناراوه‌ستیت.

23

به‌هجه‌ت هرۆری
دراما ب گشتی..كاره‌كێ هونه‌ری یێ پیرۆزه‌. ده‌رگه‌هه‌كێ كاریگه‌ر یێ دیاركرنا كێماسیان و ره‌خنه‌گرتن و گوهارتنا جڤاكی یه‌. دیسا ده‌رگه‌هه‌كێ گه‌هاندنا سیاسه‌تێ و ركلامكرن و به‌لاڤكرنا هزره‌كا تایبه‌ته‌.
‎ دراما كوردی، مخابن یا بێ خودان و بێ پشته‌ڤانه‌ و مرۆڤ دشێت بێژیت كو نوكه‌ نینه‌. ل به‌ریا چه‌ند سالان جهێ خوه‌ هه‌بوو و نوكه‌ ژی ناڤ و ئه‌كته‌ر و مۆزیكا وان د هزرا خه‌لكی دا ماینه‌. دڤیا نوكه‌ و ب گۆره‌ی گوهارتنا ژیانێ و هه‌بوونا ده‌رگه‌هێن په‌یداكرنا تایبه‌تمه‌ندیێ دراما كوردی پێشكه‌فتبا نه‌ك پاشداچووبا!
‎ئه‌وا نوكه‌ مرۆڤ تێبینی دكه‌ت، كۆمپانیێن دوبلاژێ جهێ گرۆپ و هونه‌رێ نواندنێ (ته‌مسیلێ) گرتیه‌. دراما توركی (ب پله‌ ئێك) و هندی و ئیرانی ژی دوبلاژ دكن بۆ زمانێ كوردی. ڤێ چه‌ندێ ژی ئه‌رێنی و نه‌رێنیێن خوه‌ هه‌نه‌.
‎هنده‌ك خالێن ئه‌رێنی:
ڤاڵه‌هیا نه‌بوونا دراما كوردی پڕكریه‌ كو خه‌لكی پێویستی پێ هه‌یه‌ بۆ خوه‌ ژبیرڤه‌كرنێ ژ به‌ر خه‌م و ئالۆزیێن رۆژانه‌ یێن ژیان و ژیارێ.
ـ پشته‌ڤانی یه‌ بۆ به‌لاڤكرنا زمانێ كوردی یێ شرین و چاندنا وی د هزرا خه‌لكی دا.
ـ ده‌ڤوكه‌كا سڤك یا زمانی دهێته‌ بكارئینان كو بچووك و مه‌زن تێدگه‌هن و كارتێكرنا د چاندنا زمانی دا هه‌یه‌.
‎ـ هنده‌ك ئیدیه‌مێن كووڤی یێن زمانی كه‌هی كرینه‌ و خه‌لك د ژیانا خوه‌ یا رۆژانه‌ دا ل شوونا یێن عه‌ره‌بی بكاردئینیت.
خالێن نه‌رێنی:
بێگۆمانه‌ ده‌ما خه‌له‌ك ل
‎دووڤ خه‌له‌كێ هاته‌ دیتن و بچووك و مه‌زنان لێ نێری، وه‌كو دیوانه‌كا مالباتی لێ دهێت و كارتێكرنا خوه‌ یا راسته‌وخوه‌ ل سه‌ر زارۆیان هه‌یه‌ و گه‌له‌ك كه‌سێن دی ژی پێ كاریگه‌ر دبن ژ گه‌نج و ژن و زه‌لامان كو ژ ره‌وشتت و كولتۆرێ جڤاكا مه‌ دوورن.
‎ـ شاش بكارئینانا هنده‌ك په‌یڤێن كوردی.
‎ـ بسته‌هیا بێرێزیكرن و لێخوڕینێ ل به‌رامبه‌ر دایكوبابان.
‎ـ په‌یوه‌ندی و دانوستاندنێن خێزانی تێكداینه‌ ژ به‌ر كو ب درامایان ڤه‌ مژوولن.
‎ـ كولتۆرێ فێل و دزی و دره‌وكرنێ د ناڤ خێزانێ و كارێن فه‌رمی دا.
‎ـ به‌لاڤبوونا نۆرمالیا هه‌بوونا مافیا یێ د كارێن گشتی و حكومی دا.
‎ـ به‌لاڤبوونا بسته‌هیا بكارئینانا چه‌كی و كێران ب شێوه‌یه‌كێ به‌رفره‌ه.
‎ـ هه‌بوونه‌كا ئاشكرا یا گه‌نده‌لی و سه‌خته‌كاریێ د ناڤ كارێن فه‌رمی دا.
‎ـ خیانه‌تا هه‌ڤژینیێ ل ده‌ف هه‌ردو ره‌گه‌زان ب شێوه‌یه‌كێ به‌رفره‌ه و ب ئاشكرا یی.
‎ـ دان و وه‌رگرتنا ره‌شوێ ب شێوه‌یه‌كێ به‌رفره‌ه د ناڤ كارێن حكومی دا.
‎ـ دوگیانبوونا كچان هێشتا ل مالا بابێ و گه‌له‌ك جاران ب نۆرمال دهێته‌ دیتن و كچ شانازیێ ب دوگیانیا خوه‌ دكه‌ن.
‎ـ بكارئینانا مادێن بێهوشكه‌ر ب شێوه‌یه‌كێ به‌رفره‌ه و هه‌تا ل زیندانان ژی.
‎ـ به‌لاڤكرنا گه‌له‌ك شێوێن گه‌نده‌لیێ و رێكێن پێرابوونا وان.
‎ـ رێكلامه‌كا زۆر یا جهێن گوزاری تێدایه‌ كو ئه‌و رێكلام ب به‌رامبه‌ر پاره‌كێ مه‌زن دهێته‌ كرن، لێ ب رێكا ته‌له‌فزیۆنێن مه‌ و د ناڤ ڤان درامایان دا ب هه‌روه‌ و ساناهی به‌لاڤ دبن.
‎ـ به‌لاڤكرنا ره‌وشه‌نبیریا تۆلڤه‌كرنێ ب هه‌ر بهایه‌كێ هه‌بیت.
‎ـ به‌لاڤكرنا هزرا نه‌ته‌وی یا وان وه‌لاتان، كو ب خواندن و شاره‌زایی ئیزافه‌ی دراما یێن خوه‌ دكه‌ن و ب ساناهی دگه‌هینن مه‌.
‎ـ به‌لاڤكرنا نه‌ڤیانا ته‌خا زه‌نگین بۆ ته‌خا هه‌ژار كو د گه‌له‌ك درامایان دا ده‌ربازی نه‌ڤیان و ئێشاندنا وان دبیت.
‎ـ دایكوبابێن گه‌له‌ك كه‌سان دیار نینن گه‌له‌ك كه‌س ده‌ردكه‌ڤن بیژی نه‌ و بابه‌كێ دی بۆ ده‌ردكه‌ڤیت!
‎ـ هه‌ڤڕكیێن كه‌سۆكی دهێنه‌ ڤه‌گوهاستن بۆ ناڤ كارێن فه‌رمی و هه‌لویستێ پۆلیسان ب پاره‌ دهێته‌ كڕین.
‎ـ زیندان هێلینێن كوتله‌بازی و كارێن گه‌نده‌لیێ نه‌.
‎ـ زه‌نگین ب پارێ خوه‌ ده‌سه‌لاتێ ل سه‌ر فه‌رمانێن هنده‌ك فه‌رمانگه‌هێن میری دكه‌ن.

51

گه‌لێ كوردستانێ ل قۆناخه‌كا خه‌باتا خوه‌ ل گه‌ل عیراقێ ژیایه‌ و ئارمانج تنێ عیراقه‌كا دیمۆكراسی بوو. ل قۆناخه‌كێ ئوتونۆمی خواستیه‌، ل قۆناخه‌كێ فیدرالی خواستیه‌، نها ژی كو ره‌وشا جیهانێ و كوردستانێ و عیراقێ هاتیه‌ گوهارتن و ره‌وش گونجایه‌ بۆ خه‌ون و ئارمانجا مه‌زن كو سه‌رخوه‌بوونه‌، سه‌رۆكاتیا كوردستانێ بڕیارا ریفراندۆمێ دا وه‌ك باشترین رێك بۆ گه‌هاندنا ره‌ئیا گه‌لێ كوردستانێ بۆ ناڤه‌ندین جیهانی ب ئارمانجا سه‌رخوه‌بوونێ.
گه‌لێ كوردستانێ ل هه‌موو قۆناخین ژیانا خوه‌ قوربانیێن بێ وێنه‌ داینه‌ و به‌غدا هه‌ر وه‌ك جاران هه‌ڤدژه‌ ل گه‌ل هه‌موو مافین گه‌لێ كوردستانێ. تشتێ گه‌شبین نها ئه‌وه‌ كو ناڤه‌ندین ناڤده‌وله‌تى دهه‌ڤسۆزن ل گه‌ل ده‌رده‌سه‌ریێن گه‌لێ كوردستانێ و ئارمانجێن وی، لێ عیراق و وه‌لاتێن داگیركارێن كوردستانێ ب هه‌موو رێیان ئاسته‌نگان بۆ ریفراندۆمێ چێدكه‌ن و عیراق و ئیران ب تایبه‌تی بزاڤا ژناڤبرنا ڤێ خه‌ونێ دكه‌ن ژ به‌ركو وان دڤێت گه‌لێ كوردستانێ هه‌رده‌م كویله‌یێ وان بیت و بڕیار و ئیراده‌ یا وی و سامانێن وی د ده‌ست وان دا بن.
شه‌ڕێ ده‌روونی ئێكه‌ ژ چه‌كێن دوژمنان یێن كوژه‌ك كو ب دیراسه‌ت و به‌رنامه‌ كار بۆ دكه‌ن. چه‌كه‌كى زۆر كاریگه‌ره‌ و زوو به‌لاڤ دبیت. مخابن زوو باوه‌ری ژێ دئێته‌كرن و گه‌له‌ك كه‌سێن ساده‌ دكه‌ڤن بن باندۆرا ڤی چه‌كی و به‌لاڤدكه‌ن ژی.
ئه‌ڤ شه‌ره‌ د هه‌موو وارێن ژیانێ دا دئێت بكارئینان، ب تایبه‌ت وارێن سیاسی و ئابووری. پتریا جاران ژی چو ژێده‌رێن ب هێز یێن فه‌رمی بۆ وی چه‌كی نینن. یان ژی ره‌نگه‌ ل جهه‌كی هاتبیته‌ گۆتن و د رێیا ڤه‌گوهاستنێ دا مه‌زن دبیت و ببیته‌ ئه‌گه‌رێ چێكرنا قه‌یران و ئالۆزی و ترسێ د ناڤ جڤاكی دا، یان لڤینه‌كا له‌شكری ل جهه‌كی هه‌بیت و دوژمن ب شاره‌زایی دئێخن د خانا دژاتیێ دا ب ئارمانجا چێكرنا قه‌یرانان و ئالۆزى و ره‌ڤین ژ ده‌نگدانێ و ژناڤبرنا ڤێ پرۆسێ. وه‌ك ؛چێكرنا خه‌لایا كه‌لوپه‌لێن خوارنێ و پانزینێ و گرتنا سنۆران و شه‌رێ مه‌زن یێ حه‌شدا شه‌عبی دژی كوردستانێ كو ترس ل ده‌ف خه‌لكه‌كی چێكریه‌. زانایه‌ ژی كو دوژمنان سه‌ربۆر و شاره‌زایه‌كا باش د ڤی واری دا هه‌یه‌. یا باش و راست ئه‌وه‌ گه‌لێ مه‌ باوه‌ری ب سه‌رۆك و سه‌رۆكاتیا گه‌لێ خوه‌ بهێت كو هه‌موو رێك بۆ ریفراندۆمێ ئاسانكرینه‌ و ئارامیا وێ دابینكرینه‌ و دۆست و پشته‌ڤان ل جیهانێ بۆ په‌یداكرینه‌. دیسا مه‌ باوه‌ری ب راستیا مافێن گه‌لێ خوه‌ بهێته‌ و مه‌ باوه‌ری ب خوه‌ ب خوه‌ بهێت كو دێ گه‌هین ئارمانجێن خوه‌. مه‌ باوه‌رى هه‌بیت ژی كو ره‌نگه‌ ئاریشه‌ ژى ژى ژێ په‌یدا ببن ژ به‌ر كو چو ده‌ستكه‌فت ب ساناهی و بێی قوربانی ب ده‌ست ڤه‌ ناهێن. ئانكو د ڤێ رێیا پیرۆز دا خوه‌ بۆ هه‌ر پێشهاته‌كێ ئاماده‌ بكه‌ین. گه‌لێ كوردستانێ ژ ڤێ چه‌ندێ بیئاگه‌ه نینه‌ و خوه‌راگرتن و سه‌ركه‌فتن یا بوویه‌ سیمایه‌كێ وی یێ نه‌گوهۆر و ڤێ جارێ ژى دێ سه‌ركه‌ڤین.
ژ بلێ ناحه‌زان و خه‌لكێ ساده‌، میدیا یێ و تۆرێن جڤاكی رۆله‌كێ دیار د به‌لاڤكرنا شه‌ڕێ ده‌روونی یێ دوژمنان دا هه‌یه‌ ب به‌لاڤكرنا ره‌ئی و نووچه‌ یێن نه‌رێنی ل بن په‌ردا ئازادیا ده‌ربڕینا ره‌ئیێ! یا باش ئه‌وه‌ میدیا خوه‌ ژ به‌لاڤكرنا هه‌ر نووچه‌یه‌كی بده‌ت پاش یێ د خزمه‌تا ریفراندۆمێ دا نه‌بیت و بلا ڤان دو حه‌فتیان وێ ئازدایێ (ئه‌گه‌ر وه‌سا ببینن) ژ ده‌ست بده‌ن و تنێ وان بابه‌تان به‌لاڤ بكه‌ن یێن خزمه‌تا ریفراندۆمێ دكه‌ن.
ریكلامكرن بۆ ریفراندۆمێ كو ئه‌ركێ هه‌ر تاكه‌ كه‌سه‌كی یه‌ ل كوردستانێ، چ سه‌ربخوه‌ بیت چ ل ناڤ ده‌زگه‌كێ حكوومی، حزبی، رێكخراوێن جڤاكێ سڤیل و جه‌ماوه‌ری دا كار بكه‌ت، پێویسته‌ بزاڤا رازیكرنا خه‌لكه‌كێ ژ پل بكه‌ت و ریكلامێ بۆ ریفراندۆمێ بكه‌ت ب ئاخفتن، ب SMS، ب نامه‌یێن ئه‌لیكترۆنی و مالپه‌رێن تۆرێن په‌یوه‌ندیێن جڤاكی.
بلندكرنا ئالایێ كوردستانێ ئێك ژ رێیێن پڕ گرنگه‌ د ریكلامێ دا بۆ ڤێ پرۆسێ كو مخابن مرۆڤ هنده‌ك سستیێ د ڤی واری دا دبینیت، ژ بلى كیمیا فلیكس و لافیته‌ و درووشمان ل جهێن جودا یێن بانیران. پێویست بوو هه‌ر بانه‌كی ئالایه‌ك لێ هه‌ژیابا و هه‌ر ترۆمبێله‌كێ ئالایه‌ل ل بانێ وێ هه‌ژیابا و باژێر د ناڤ ئالایان را مابان. پیویست بوو میدیایێ و ریكخستنێن پارتیان پێشوه‌خت ئه‌ڤ ره‌وشه‌نبیریێ به‌لاڤكربا. ئه‌ڤه‌ دا بیته‌ باشترین به‌رسڤ بۆ ناحه‌زان و دا به‌ره‌یێ ناڤخوه‌ و خواستا ده‌روونی یا جه‌ماوه‌ری ب هێزئێخیت و به‌ره‌یێ دوژمنی لاوازكه‌ت.
ئێدی پێویسته‌ بابه‌تێ ریفراندۆمێ و ریكلامكرنێ نه‌هێلین ب هیڤیا ده‌زگه‌هێن حزبی ب تنێ ڤه‌. به‌لكو ب ئێك ده‌ست بزاڤێ بكه‌ین. سه‌دان بازرگان و زه‌نگین هه‌نه‌ ل بن سیبه‌را ئارامیا كوردستانێ و ب سایا خوونا شه‌هیدان كاركریه‌، پێویسته‌ خوه‌ ل ڤی بابه‌تی بكه‌ن خودان و خه‌ملاندنا باژێران ب ستۆیێ خوه‌ڤه‌ بگرن.

166

پێكڤه‌ژیان، ئانكو قه‌بوولكرنا یێ دی، كو سیمایێ هه‌ره‌ بنیاتی یێ مرۆڤاتیێ یه‌. مه‌ره‌ما مه‌ ژ پێكڤه‌ژیانێ، پێكڤه‌ ژیانا ره‌نگ و ره‌گه‌زێن جودا، ئالیێن نه‌ته‌وی، دینی، ئۆلی و هزری یێن جودا.
هه‌ر ژ ده‌ستپێكا هه‌بوونێ، گه‌له‌ك ره‌نگی، سیمایێ ژیانێ بوو. نووكه‌ ژی هێمایێ بهایێن ژیانێ یه‌. خودایێ مه‌زن مرۆڤ ب ڤان جوداهیێن مه‌ گۆتین داینه‌. له‌وا چ كه‌س و سیسته‌مان مافێ ژێ ستاندنا ڤان مافان نینه‌. هه‌ر ملله‌ته‌كێ سیسته‌مێ پێكڤه‌ ژیانێ تێكدای، مافێن مرۆڤی و مرۆڤاتی تێكداینه‌. به‌رۆڤاژی ژی، هه‌ر جهێ ئه‌ڤ سیسته‌مه‌ خوه‌دی كری، خوه‌شی ته‌ناهی و مافێن مرۆڤی پاراستینه‌. ئه‌ڤجا مرۆڤاتی پێدڤی ب پێكڤه‌ژیانا ئاشتیانه‌ و گیانێ لێبوورینێ و ئازادیێن ئادیۆلۆژی و نه‌وته‌وی و ئۆلی و ده‌ربڕینا ره‌ئیێ و رێزگرتنا هه‌ڤدو و پاراستنا بهایێن مرۆڤاتی هه‌یه‌. پێدڤی ب هه‌ڤڕكیان و بێرێزكرن و بێ بهاكرنا یێ به‌رامبه‌ر و خرابكاریان و تێكدانا ژینگه‌هێ و بنپێكرنا ماف و ئازادیێن كه‌سۆكی نینه‌ و ئه‌ڤ چه‌نده‌ جهێ خوه‌ژی لێ ناكن. ئه‌ڤ یه‌كه‌، ملله‌تان پاشڤه‌ دهێلت و برساتی و نه‌ساخی و كینێ و نه‌دادپه‌روه‌ریا جڤاكی په‌یدا دكت. ته‌خێن سه‌رده‌ست و ته‌خێن هه‌ژار په‌یدا دكت و یه‌كسانی و وه‌ك هه‌ڤیێ دكوژت. له‌وا پێدڤیه‌ ره‌نگێن جودا و دیتنێن جودا، نه‌بنه‌ هۆكارێن تێكدانا وێ هه‌مه‌ڕه‌نگیا خودای دایه‌ مه‌ و هه‌موو دین و ئۆل و په‌رتووكێن ئاسمانی و قانوونێن نێڤده‌وله‌تی ل سه‌ر ڤێ چه‌ندێ دكۆكن. پێدڤیه‌ دانوستاندن و بزاڤا د هه‌ڤدو گه‌هه‌شتنێ دا، بنه‌ما و ستوونا پاراستنا هه‌مه‌ره‌نگیێ بیت.
كوردستان، ژ مێژ دا، وه‌ڵاته‌كێ زه‌نگینه‌ د هه‌موو ره‌نگێن پێكڤه‌ ژیانێ دا. ئه‌ڤه‌ ژی بۆ ئاشتیخوازیا خه‌لكێ كوردستانێ دزڤڕیت. ل دوورگه‌ها عه‌ره‌بی، پشتی خوه‌جهبوونا ئیسلامێ، نه‌هێلا چ دین و ئۆلێن دی ل وێرێ بژین، لێ خه‌لكێ كوردستانێ ب سینگه‌كێ فره‌ه هه‌مبێزا هه‌موو دین و ئۆل و نه‌ته‌وه‌یان كر، له‌وا كوردستان لاندكا ڤێ پێكڤه‌ ژیانێ یه‌ و ئالیه‌كێ وێ مزگه‌فت و ئالیه‌ك دێر و ئالیه‌ك لالشه‌. د خوه‌شی و نه‌خوه‌شیێن هه‌ڤدوو دا پشكدارن. پێكڤه‌ به‌رخوه‌دان كریه‌ و قوَربانی داینه‌ و د پاراستنا ئازادیێ دا و د گه‌شه‌كرنا دیمۆكراسیێ دا هه‌ڤپشكن. حوكمه‌تێن دكتاتۆری یێن ده‌سه‌ڵاتدار ل عێراقێ به‌رده‌وام و ب پرۆگرام بزاڤا تێكدانێ ل ناڤبه‌را نه‌ته‌وه‌ و ئۆلان ل باشوورێ كوردستانێ كریه‌ و بزاڤێن نه‌هێلانا مۆركێن نه‌ته‌وی كریه‌ و عه‌ره‌بكرن و ڤێكڕا به‌ردانا نه‌ته‌وه‌و ئۆلان ب شێوه‌یه‌ك رێكخستی كریه‌ ئارمانجا خوه‌ و نوكه‌ژی هه‌وێن بنبڕكرنا مه‌سیحیان و جاران ئێزدیان ل شنگال و مووسل و پارێزگه‌هێن دی دهێته‌ كرن. دیسا كوردستان دبیته‌ ئه‌و خانیێ هه‌موو ب هه‌ڤڕا و ب یه‌كسانی تێدا دژین.
درووشمێ سه‌ره‌كی یێ پێكڤه‌ ژیانێ، وه‌كهه‌ڤی و رێز ل هه‌ڤگرتن و هه‌ڤئارمانجی و هه‌ڤپاشه‌رۆژی یه‌. ئانكو، ئه‌م گه‌له‌ك ره‌نگین، گه‌له‌ك نه‌ته‌وه‌ و ئۆل و ده‌نگین، خودان گه‌له‌ك بیروباوه‌رین، لێ مه‌ یه‌ك وه‌لات، یه‌ك ئارمانج، یه‌ك ئالا، یه‌ك سه‌رۆك و یه‌ك پاشه‌رۆژ هه‌یه‌. ئانكۆ ئه‌م دشێین ب گه‌له‌ك ره‌نگ و رێكان د یه‌ك وه‌ڵات دا بژین و ب یه‌ك ده‌ست و ب یه‌ك هه‌ست بۆ یه‌ك ئارمانج خه‌باتێ بكه‌ین.
پێدڤیه‌ بزاڤێ بكه‌ین ڤێ دیتنێ د سه‌رێ زاڕۆ و مه‌زن و ژن و زه‌ڵامان دا بچینین وهه‌تا د په‌یره‌وێ خواندنێ دا ژی هه‌بیت و وه‌ك مرۆڤ و هه‌ڤپشك د ژیانێ و ئارمانجێ دا به‌رێ خوه‌ بده‌ینه‌ هه‌ڤدو. پێدڤیه‌ ئه‌م هه‌موو بزانین كو گه‌له‌ك ره‌نگی، سیمایێ هه‌ره‌ ساخله‌م یێ گه‌شه‌كرنا دیمۆكراسی و دادپه‌روه‌ریا جڤاكی یه‌ و كوردستانا مه‌ ب هه‌مه‌ره‌نگیا مه‌ یا جوانه‌.

website security
WP Facebook Auto Publish Powered By : XYZScripts.com