NO IORG
Authors Posts by دێران كتاني‮

دێران كتاني‮

دێران كتاني‮
13 POSTS 0 COMMENTS

13

دێران كتانى
سه‌ره‌راى وێ ئێكێ كو چو خشته‌یێن گرێداى ده‌مى ڤه‌ نینن بۆ په‌یمانێن نێڤده‌ولى یێن ده‌ستنیشانكرى، كو ژ لایێ چه‌ندین وه‌لاتان ڤه‌ دهێنه‌ واژۆكرن، نابیت ژى ب بۆرینا ده‌مى بهێنه‌ ژ كارخستن، ب تنێ هه‌كه‌ سیفه‌تا په‌یمانیێ ژده‌ست بده‌ت، به‌لێ ل ڤان دووماهیان مژاره‌كا زۆر هه‌یه‌ ل سه‌ر گه‌ره‌كا كانسلكرنا په‌یمانا لۆزان یا سالا 2023، یانكو پشتى بۆرینا سه‌د سالان ل سه‌ر واژۆكرنا وێ! چونكو چاوا په‌یمانا سیڤه‌ر هاته‌ ژكارخستن، ل ژێر فشارا بزاڤا نه‌ته‌وه‌ى یا توركى، هینگى ژى ره‌نگه‌ دێ په‌یمانا لۆزان ژى هێته‌ ژكارخستن، ژ ئه‌نجامێ خه‌باتا ئه‌ردوغانى! ل سالا 1919 په‌یمانا سیڤه‌ر هاته‌ واژۆكرن، ئه‌وا ده‌وله‌تا ئوسمانلى نه‌چاركرى ده‌ستان ژ ئه‌ردان به‌رده‌ت، یێن ب هێز كونترۆل ل سه‌ر كرى و به‌رده‌وامبووى ب ده‌ستهه‌لاتا خوه‌، و بۆ چه‌ندین چه‌رخان حوكم لێ كری! و ب گۆره‌ى وێ په‌یمانێ كورد ب حوكمێ خوه‌سه‌ر هاتنه‌ به‌خشین، به‌لێ بزاڤا نه‌ته‌وى یا توركى ب سه‌رۆكاتیا مسته‌فا كه‌مال ئه‌تاتورك شیا په‌یمانا سیڤه‌ر ژكاربێخیت و ل جهێ وێ په‌یمانه‌كا دیتر هاته‌ ئیمزاكرن، ل سالا 1923 ب ناڤێ لۆزان هاتبوو بناڤكرن، كو ب گۆره‌ى وێ ئه‌و حوكمێ سه‌ربخوه‌ یێ كوردستانێ هاتبوو ژكارخستن و ئه‌ردێن وێ هاتنه‌ پارچه‌كرن ل سه‌ر چار ده‌وله‌تان، ئه‌و ژى توركیا و ئیران و عیراق و سووریا، سه‌ره‌راى په‌یمانا سیڤه‌ر و ئیمزاكرنا په‌یمانا لۆزان بۆ توركیا دهێته‌ هه‌ژمارتن وه‌كو سه‌ركه‌فتن، به‌لێ هه‌ركه‌سێ چاڤدێریا نووچه‌یێن توركى و داخویانیێن سه‌رانێن وێ و وه‌زیرێن وێ ل دیرۆكا هه‌ڤچه‌رخ، دێ بینیت كو نیگه‌رانیه‌كا مه‌زن ژ رێككه‌فتنا لۆزان هه‌یه‌ ژ لایێ وان ڤه‌! چونكو ل سالا 1991 ده‌مێ سه‌دام حسێن گۆتى كۆێت پارچه‌كه‌ ژ عیراقێ، وى ده‌مى سه‌رۆك وه‌زیرێن توركیا (توركوت ئوزال)، به‌رسڤا وى دابوو كو، عیراق هه‌مى ژى پارچه‌كه‌ ژ توركیا و گۆتبوو، هه‌كه‌ مه‌ ئه‌ڤ هه‌ڤسه‌نگیه‌ سه‌پاندن، ئه‌ڤجا دڤێت عیراق ژى بزڤریته‌ سه‌ر ب توركیا ڤه‌! و ل سالا 1994 سه‌رۆكێ توركى (سلێمان دیمرێل) خۆیاكربوو كو دڤێت ئه‌م سنۆران راستڤه‌بكه‌ین و ده‌مه‌ كو توركیا ئه‌ردێن خوه‌ بزڤرینیته‌ڤه‌! و ل سالا 2004 وه‌زیرێ ده‌رڤه‌ یێ توركیا (عه‌بدوللا گوول) گۆت كو پێدڤیه‌ سنۆرێن توركیا بهێنه‌ مه‌زنكرن و باكۆرێ عیراقێ و مووسل بچنه‌ بسه‌ر ڤه‌ و كو ئه‌ڤه‌ مافێن دیرۆكینه‌، دڤێن بۆ مه‌ بزڤرن. هه‌ر وه‌كو سه‌رۆكێ نها یێ توركیا ره‌جه‌ب ته‌یب ئه‌ردۆگان خۆیاكری و بۆ ژپترى جاره‌كێ كو په‌یمانا لۆزان زولم ل توركیا كریه‌ ئه‌و ئه‌وێن نوونه‌راتیا مه‌ دكرن، و مه‌ره‌ما وى پێ (مسته‌فا كه‌مال ئه‌تاتورك و عسمه‌ت ئاینۆنۆ) نه‌، ئه‌وان به‌رگرى ژ مه‌ نه‌كربوو. باشه‌ ته‌ماكاریێن توركیا بۆ برنا ئه‌ردێن كوردى بۆ خوه‌، گه‌له‌ك یێن دیار و ئاشكرانه‌ ل ڤى ده‌مێ نوكه‌ یێن دهێنه‌ وه‌رگێران ل سه‌ر ئه‌ردى، له‌ورا هه‌وا سه‌ربازى یا توركیا نها دئینیته‌ سه‌ر توركیا ل رۆژئاڤایێ كوردستانێ یا چارێ یه‌ هه‌ر ژ 2016 كو ئارمانج ژى ئه‌وه‌ هه‌موو ئه‌وه‌ كو كوردان ده‌ربێخن و مشه‌خت بكه‌ن ژ ده‌ڤه‌ریچن وان و گوهۆرینه‌كا ریشالى په‌یدا بكه‌ن د پێكهاته‌یا جهنشینا ده‌ڤه‌رێ دا، و ئه‌ڤ لڤینا سه‌ربازى یا به‌رده‌وام یا توركیا ره‌نگه‌ وه‌لاتێن مه‌زن نه‌چار بكه‌ت په‌یمانه‌كا نوو ببه‌ستن كو جهێ په‌یمانا لۆزان بگریت، كا چاوا وه‌كو به‌رى سه‌د سالان هاتبوو روودان! د ژیوار ژى دا قوربانیێن مه‌زنتر د په‌یمانا لۆزان دا كورد بوون و هه‌كه‌ خوه‌ په‌یمان بهێته‌ ژكارخستن ژى یان نه‌، ئه‌ڤ چه‌نده‌ راستیا پارچه‌كرنا كوردستانێ ناگوهۆریت، ئه‌ڤجا گوهۆرینا مه‌زن یا كورد هیڤى دكه‌ن ب تنێ سه‌ربخوه‌یا كوردستانێ یه‌، ئه‌ڤجا هه‌كه‌ ئه‌م سه‌رب ده‌وله‌تا عیراقێ ڤه‌ بین یان توركیا و ئیران و سووریێ ڤه‌، ئه‌ڤ راستیه‌كێ ناگوهۆریت كو ئه‌و ژى ئه‌م یێن ل ژێر داگیركرنێ ینه‌! یا پێدڤى ئه‌وه‌ كو نه‌ئازریێین و تۆره‌ ببین، هه‌كه‌ توركیا ئه‌ردێن كوردستانى ببه‌ت و هه‌میان ببه‌ت، به‌لكو دڤێت به‌ره‌ڤاژى بیت، هه‌كه‌ بۆ نموونه‌ هه‌كه‌ ئیران ڤان ئه‌ردان ببه‌ت ژ توركیا و وه‌لاتێن دیتر! ئه‌ڤجا داگیركرن (استعمار) ئێكه‌ چه‌ندى ناڤ بهێنه‌ گوهۆرین! وه‌رن عیراقێ و توركیا و ئیرانێ و سووریێ بهێلین شه‌رێ هه‌ڤدو بكه‌ن ژ پێخه‌مه‌ت ته‌ماكارێن هه‌ڤ ل سه‌ر ئه‌ردێ مه‌! نه‌یا گرنگه‌ ئه‌م خوه‌ بكه‌ینه‌ قوربانى ب خوینا خوه‌ ژبۆ پاراستنا ئێكبوونا ده‌وله‌تا عیراقێ یان سووریێ و توركیا و ئیرانێ! فه‌ره‌ ل سه‌ر مه‌ كو بكه‌ینه‌ قوربانى و خه‌باتێ بكه‌ین ئه‌م وه‌كو كورد ب تنێ د ناڤ هه‌ر چار پارچه‌یێن كوردستانێ دا! ژ پێخه‌مه‌تى سه‌ربخوه‌یا كوردستانێ هه‌میێ ژ وان وه‌لاتێن شۆفێنى یێن دكتاتۆر.
و/ ئه‌ڤرۆ

45

چه‌ندین چه‌رخ و سه‌رده‌من و سیاسیێن عیراقێ ب تنێ ئێك ئارمانج هه‌یه‌، ئه‌و ژى لاوازكرنا كوردانه‌، د كۆمبوونێن خوه‌دا چو به‌حسان ناكه‌ن ل دۆر كاروبارێن وه‌لاتى و پێدڤیێن وه‌لاتیان و مه‌ترسیێن ل سه‌ر وان ل ناڤخوه‌ و ده‌رڤه‌، ته‌مه‌تى هندێ كو به‌حسێ به‌حسكرنا چاوانیا رێكێ بۆ لاوازكرنا كوردان! ئه‌ڤه‌ بوو ره‌وا هه‌مى حوكمه‌تێن ل دووڤ ئێك یێن ده‌سهه‌لاتى ل عیراقێ كرین، له‌ورا هه‌مى نه‌شیان ئاڤا بكه‌ن و شكه‌ستن ئینان، ئه‌مبراتۆریا ئوسمانى به‌رى شه‌رێ جیهانى ده‌سهه‌لاتدارى ل پتریا ده‌ڤه‌رێن رۆژهه‌لاتا ناڤین دكر، نه‌خاسمه‌ كوردستان ژى ئێك ژ وان بوو. هینگى چو وه‌لات نه‌بوون پتریا وان ژى ویلایه‌ت بوون دكه‌فتنه‌ ل ژێر حوكمێ ئوسمانى بۆ ده‌هان و سه‌دان سالان، به‌لێ پشتى سه‌ركه‌فتنێن بریتانیا و فره‌نسا ل شه‌رێ جیهانى یێ ئێكێ و پاشى به‌ستنا چه‌ندین رێككه‌فتنان د ناڤبه‌را وان وه‌لاتان دا و ژ وان ژى رێككه‌فتنا سایكس پیكۆ و سیڤه‌ر و پشتى هینگى رێَككه‌فتنا لۆزان، ب رێیا وێ توركێن ئه‌مبراتۆریا ئوسمانى هاتنه‌ به‌لاڤكرن و ده‌وله‌تێن نوو هاتنه‌ دانان، ب راستى ئارمانجا وان ده‌وله‌تان كورد یان عه‌ره‌ب نه‌بوون به‌لێ ب تنێ جه‌ختیا وان ل سه‌ر چاوانیا ژێكژێكركرنا ئمبراتۆریا ئوسمانى و لاواكرنا وێ بوو، له‌ورا ئه‌م كورد هه‌ر د ناڤ حسێبا وان دا نه‌بووین، كو ئه‌م گه‌له‌كین مه‌ زمانێ خوه‌ و نه‌ته‌وا خوه‌ هه‌یه‌ جوادیه‌ ژ ده‌وله‌تێن دیتر یێن ل سه‌ر مه‌ هاتینه‌ دابه‌شكرن! ره‌نگه‌ دابه‌شكرنا وان ب وێ رێكێ ب ئامانجا چاندنا فاكته‌رێ نه‌به‌رقه‌راربوونا وان ده‌وله‌تان بوو! چونكو ده‌مێ عیراق دامه‌زراندین، بۆ نوونه‌ حوكمه‌تا عیراقێ نێزیكترین هێز نه‌بوو كو داخواز بكه‌ت پارچه‌ك ژ كوردستانێ بۆ خوه‌ بدانیت، ده‌وله‌ته‌كا نوو بوو ل ژێر ئه‌نتیدابا بریتانى دا بوو، چو هێز و شیان نه‌بوون! ئه‌ڤ هه‌مى بریارانه‌ ب ده‌ستێ بریتانیا بوون، ئه‌ڤجا ئه‌و ده‌سپێكى بۆ نه‌هێلانا سه‌ربخوه‌یا كوردستانێ بوو و نه‌ به‌رقه‌راریا عیراقێ! ب ڤى ره‌نگى عیراق ل مه‌ بوو به‌لا و ئه‌م ژى پێ تێر به‌لا بووین، هه‌ر ژ به‌رى چه‌رخان و ئه‌م كورد خه‌باتێ دكه‌ین ژ پێخه‌مه‌ت سه‌ربخوه‌یێ و جوابوونێ، چه‌ندین بزاڤێن رزگاریخوازێن كوردى ده‌ركه‌فتینه‌ ئێك ل دووڤ یا دیتر، داخوازا مافێن كوردان دكه‌ن و رزگارگرنا كوردستانێ و ل به‌رامبه‌ر ژى حوكمه‌تا عیراقێ هه‌مى هێزا خوه‌ خرڤه‌دكر بۆ به‌رسنگگرتنا وان بزاڤان، هه‌تا راده‌كى كو رێكه‌فتنه‌ك ل گه‌ل ئیرانێ به‌ستكربوو ل سالا 1975 و سنۆر ل به‌رامبه‌رى شاهێ ئیرانێ گوهارتبوو ژ پشته‌ڤانیكرنا كوردان! ب ڤى ره‌نگى و هه‌تا رۆژا مه‌ ئه‌ڤرۆ حوكمه‌تا عیراقێ ده‌ستێ خوه‌ دكه‌ه‌ته‌ ده‌ستێ ئیرانێ دا و ده‌ستێ شه‌یتانى ب ئارمانجا لاوازكرنا كوردان و ژبیرا خوه‌ دبه‌ت یان ژبیركریه‌ كو خه‌باتا مه‌ نا راوه‌ستیت چه‌ندى ئه‌م پارچه‌ك بین ژ عیراقێ، چو وانه‌یان ژ دیرۆكێ وه‌رناگرین و رازى نابین كو د به‌رژه‌وه‌ندیا عیراقێ دایه‌ ل ده‌سپێكێ كو كوردستان سه‌ربخوه‌ بیت دا كو ل كاروبار و وه‌لاتیێن خوه‌ بزڤریت و بزاڤان بكه‌ت كو ئه‌من و ستایشێ بۆ وان دابین بكه‌ت و هه‌مى پێدڤیێن ژیارێ، پشتراست بن گه‌لێ عیراقێ كو چو كه‌سێن خوساره‌ت نینن پشتى ژ هه‌وه‌ جودا دبن، ئه‌م دێ سه‌ربخوه‌ بین و هوون دێ به‌رقه‌رار بن!.
و/ ئه‌ڤرۆ

62

ل سالێن حه‌فتێیان ده‌مێ بابێ من خودێ ژێ رازى بریار دایى قه‌ستا ئیرانێ بكه‌ت، كو بگه‌هیته‌ بزاڤا كوردى، پشتى هینگى ل سالێن هه‌شیتێیان به‌ر ب چیایێن كوردستانێ بچیت و بگه‌هیته‌ ناڤر ێزێن پێشمه‌رگه‌ى، ئه‌وى ب ڤێ بریارێ ده‌ست ژ پتریا تشتێن مادى به‌ردا د ژیانا خوه‌ دا!. ده‌ست ژ كارێ خوه‌، ئه‌ملاكێن خوه‌، هه‌روه‌سا ژ كه‌سوكارێن خوه‌، چوو كو ژیانه‌كا گه‌له‌كا سه‌خت ببه‌ت ژ پێخه‌مه‌تى كوردستانێ!، به‌لێ ئه‌و و هه‌ر وه‌سا سه‌دان هزار كه‌سان به‌رى وى و پشتى وى ژى، ژیان ل ژێر حوكمى ده‌سهه‌لاتێن عیراقێ یێن ل دووڤ ئێك ره‌تكرن، ره‌تكرن كو ببنه‌ وه‌لاتیێن پله‌ دو!، ره‌تكرن كو مافێن وان ل پێش چاڤێن وان ژێ بستینن و ئه‌و نه‌شێن داخوازیێن خوه‌ بكه‌ن!، سه‌ره‌راى دابینكرنا نانى و كه‌هره‌بێ و هه‌مى پێدڤیێن مادى ل وى ده‌مى، به‌لێ ئه‌وان و ب ساناهى خواست ژیانه‌كا ب كه‌رامه‌ت هه‌لبژێرن نان و ئاڤ بیت، چوون و خه‌بات كرن و قوربانى ب هه‌ر تشته‌كێ ب بها كرن، ژبۆ هندێ كو ئه‌م گه‌هاندینه‌ ئه‌ڤ رۆژا دیرۆكى، رۆژا كو هه‌مى جیهان چاڤێ وێ ل مه‌یه‌، دا كو ببینیت ئیراده‌كا مه‌زنترین گه‌لێن جیهانێ كو مافێن وى هاتینه‌ ژیستاندن!. دا كو ببینیت دێ كه‌رامه‌تێ یان كویله‌یاتیێ هه‌لبژێرن!. به‌لێ و ب مخابنیڤه‌ ڤان رۆ ژان هنده‌ك ده‌نگێن نه‌شاز دبهیستین، ده‌نگدان بۆ ریفراندۆمێ گرێدده‌ن ب قه‌یرانا ئابوورى ڤه‌ و ره‌وشا خوه‌ یا دارایى! مه‌رجدار دبیت ل سه‌ر حوكمه‌تێ كو رازى ببیت ل سه‌ر ده‌وله‌تێ ب (به‌لێ) بۆ ده‌وله‌تا كوردى، كو ل ده‌سپێكێ ژیانه‌كا خۆش بۆ خه‌لكى دابین بكه‌ن و مووچه‌یێن باشتر! كو هه‌ژى بیت ژ بڕینا به‌رهه‌مێ سه‌رخوه‌بوونێ یا كو ب خینا شه‌هیدان هاتیه‌ ئاڤدان ژ پێخه‌مه‌ت هندێ ژیانه‌كا ماددى یا خۆشتر! ژبیرا وان چوویه‌ یانژى نزا ئه‌و ژبیرا خوه‌ دبه‌ن كو قه‌یرانا داراى یا ب سه‌ر هه‌رێمێ را ده‌رباز دبیت، د بنیات دا ژ گه‌رێ بریارێن حوكمه‌تا به‌غدایه‌ ونه‌ك حوكمه‌تا هه‌رێمێ! ئه‌و ژ ئه‌گه‌را مالكى و عه‌بادى یه‌ و نه‌ك ژ بارزانى! ده‌مێ من گوه ل ڤان ده‌نگدان دبیت، بیرا من ل شه‌هیدان دهێت، یێن كو قوربانى ب گیانێ خوه‌ داین ژ پێخه‌مه‌ت بجهئینانا خه‌ونا مه‌زن، خه‌ونا ده‌وله‌تا كوردى كو هنده‌كا بۆ خوه‌ كرینه‌ وه‌كو كابووسه‌ك وحه‌ز ناكه‌ن بجهبینن!!. ئه‌وێن هه‌مێ فێربووینه‌ ل سه‌ر دووڤه‌لانكیێ و كوویلاتیێ، یا باش ئه‌وه‌ سه‌رێن خوه‌ بێخنه‌ ل ژێر ئه‌ردى ژ شه‌رمان دا ل به‌رامبه‌ر دایك و زارۆیین شه‌هیدان، چونكو ئه‌و ب ڤان رێگریكرنێن خوه‌، هه‌ر وه‌كو دبێژنه‌ خێزانێن شه‌هیدان بلا خوینا وان ب هه‌روه‌ بچیت!، بلا رۆنكدێن هه‌وه‌ و ده‌رده‌سه‌ریێن هه‌وه‌ یێن ساله‌ها سالان بۆ دووربوونا هه‌وه‌ ژ خۆشتڤیێن هه‌وه‌ بچیته‌ د كانیكا قێرى دا!. ئه‌ز ژى ل ڤێره‌ وه‌كو كچا شه‌هیدى هیڤیا ژ هه‌وه‌ دكه‌م ئه‌و كه‌سێن هوون رێگریكرنێ ل سه‌ر ریفراندۆمێ دكه‌ن بۆ سه‌ربخوه‌بوونێ كو رێ ل رێبازا قاره‌مانان نه‌گرن و ئاسته‌نگان ل به‌ر نه‌دانن، كو د رێیا ده‌وله‌تا كوردستانێ دا رانه‌وه‌ستن، هیڤی دكه‌ین بهێلن ئه‌م وى به‌رهه‌مێ هاته‌ به‌رى كو ب خوینا باب و باپیرێن مه‌ هاتیه‌ ئاڤدان بچنین دا كو ئاگرێ دلێن مه‌ ئارام بببیت ل سه‌ر دووركه‌فتنا وان ژ مه‌! داكو ئه‌م ژى ل سه‌ر ڤى ئه‌ردى ب ئاشتیانه‌ بنڤین و ئه‌م ژى ل بن ئه‌ردى ب ئاشتیانه‌ بنڤن!.
و: ئه‌ڤرۆ

57

به‌رێ چه‌ند رۆژه‌كان، سترانه‌كا ته‌حسین تاها (ئاى فه‌له‌ك) هاته‌ گوهێن من، كو ژ هه‌لبه‌ستا هه‌لبه‌ستڤانێ مه‌زن به‌درخان سندى یه‌، پارچا دووماهیێ دبێژیت (كه‌و دوژمنێ سه‌رێ خوه‌ یه‌) و .. (دار دارى دبڕیت.. ده‌ستكێ بڤرى هه‌ر ژ دارى یه‌) و .. ( ئه‌و وه‌ریسێ به‌رخك پێ دهێته‌ گرێدان هه‌ر ژ پیرتێ وى ب خوه‌یه‌)، ئاماژه‌كه‌ ژ وى كو دوژمنێن مه‌ كوردان ب خوه‌ بكاردئینن بۆ لاوازكرنا كوردان ب خوه‌، كو ژێكڤه‌بوونا مه‌ و نه‌ئێكبوونا مه‌ ئه‌وه‌ دبیته‌ ئاسته‌نگ د رێیا مه‌ دا نه‌ك هێزا دوژمنێن مه‌! ل گه‌ل ڤان په‌یڤان من ژى ڤه‌دگێران، من نه‌ دگۆت: ئه‌ى فه‌له‌ك به‌لێ من دگۆت: ئه‌ى كوردینۆ) حه‌تا كه‌نگى دێ مینن بژاله‌ و ژێكڤه‌قه‌تیایى! حه‌تا كه‌نگى دێ مینن ئالاڤه‌ك د ده‌ست دوژمنان دا، هه‌وه‌ ب دووڤ حه‌زا خوه‌ دلڤینن چاوا بخوازن. كه‌نگى دێ زان نكو ئێكگرتن بنیاتێ سه‌ركه‌فتنێ یه‌ و بجهئینانا ئارمانجان! كه‌نگێ دێ سه‌ربۆران ژ وان هه‌مى روودانان وه‌رگرن یێن ب سه‌ر مه‌ دا چووین، ئه‌وێن گرنگیا ئێكگرتنێ نیشا مه‌ دده‌ن، داكو خه‌لكى رێیه‌ك بۆ ناڤ مه‌ د هه‌بیت، به‌لێ ئه‌ڤرۆ ل گه‌ل ڤه‌گێرانا ڤێ سترانێ هه‌ستا من ب ئێكجارى یا جودابوو ژ ئه‌و هه‌ستا به‌رى چه‌ند رۆژه‌كێن به‌رى هینگى!، من ئه‌و هه‌ست نه‌دكر كو هێشتا ئه‌و دارین یێ كو ده‌ستكێ بڤرى ژێ چێكرى دا كو دارا كوردینێ پێ بهێته‌ بڕین، من هه‌ست نه‌كر كو ئه‌م هرینه‌ یێ وه‌ریسێ به‌رخى پێ گرێدده‌ن دا كو هه‌ر ژ كه‌ڤلێ وى ڤه‌كری و دێ به‌ر ب سه‌رژێكرنێ ڤه‌ به‌ن، من هه‌ست كر كو بالندێ كه‌وى گه‌له‌ك حه‌زژ خوه‌ دكه‌ت و رازى نابیت ب تنێ ب چیایێن كوردستانا جوان وه‌كو هێلینا خوه‌!.

ڤان هه‌مى هه‌ستان ئه‌م خه‌ندقاندم و ب هه‌مى هیڤیان بووم كو پاشه‌رۆژه‌كا جوانتر ل هێڤیا مه‌یه‌ ژ هه‌ر ده‌مه‌كێ دیتر یێ بۆرى باشتر! له‌ورا روودانێن كه‌ركووكێ یێن دووماهیێ گرنگیا ئێكگرتنێ بۆ مه‌ دیاركر! ئه‌ڤجا ب ئێكگرتنا مه‌ ئه‌م دكارین هه‌مى دوژمنان پاشڤه‌ببه‌ین یێن كو ل ده‌ردۆرى مه‌ ژ هه‌ر لایه‌كى ڤه‌!. ئێكبوونا په‌یڤا مه‌ و ئێكبوونا هه‌لویستێ مه‌ هه‌مى ده‌ڤ و ئه‌زمان كڕبوون، ئه‌م ملله‌ت پتریا تاكان ل سه‌رانسه‌رى جیهانێ و هه‌تا نها مه‌ ده‌وله‌تا خوه‌ نینه‌، نه‌ك ژ به‌ر هندێ كو یێ دۆرپێچكرى یه‌ ب دوژمنان! نه‌كو دا بزانین كو مه‌ چو گازنده‌ ل سه‌ر چو فورس و تورك و عه‌ره‌با نینه‌ كو هه‌تا نها ئه‌م نه‌گه‌هشتینه‌ مافێن خوه‌ یێن ره‌وا، وه‌كو هه‌ر ملله‌ته‌كێ دیتر ژ ملله‌تێن جیهانێ، به‌لێ هه‌ر ئه‌م كورد بووین ئه‌گه‌رێ سه‌ره‌كى، چونكو ئه‌م نه‌ د دئێكگرتى بووین، چونكو ڤێكنه‌كرنا مه‌ بنیاتێ شكه‌ستنێ و مالوێرانیا مه‌ بوو! له‌ورا بلا ئه‌م هه‌مى دخه‌مخۆر بین ل سه‌ر ئێكگرتنێ ژ ده‌رڤه‌ و ژناڤخوه‌یى دا، د هه‌ڤگرتی بین د ناڤبه‌را ئێكدا، دا كو ده‌باز ببینه‌ سالێن داهاتى ب كۆم ڤه‌ و نه‌ك ب تاك تاك ڤه‌، چونكو ئێكگرتن بنیاتێ هه‌ر پێشكه‌فتنه‌كێ یه‌ ل ژیانێ، ئێكگرتن ژێرخانه‌یا هه‌ر ده‌وله‌ته‌كێ یه‌ و بێى وێ دێ بنیاتێ مه‌ یێ هشك بیت، نه‌دووره‌ ل هه‌ر بیڤه‌له‌رزه‌كا سیاسى برۆخیێت و بهژیێت!.
و: ئه‌ڤرۆ

58

به‌رى ده‌مه‌كى چیرۆكه‌ك من خواند كو ژ لایێ نڤیسه‌ر و دكتورێ خه‌لكێ دهۆكێ (عامر عه‌بدوللا) ڤه‌ هاتبوو نڤیسین، بۆیه‌ر ل سالێن نۆتان ژ سه‌ده‌یا بۆری بوو، ل ده‌مێ شه‌رێ ناڤخوه‌یى د ناڤبه‌را پارتى دیمۆكراتى كوردستان و ئێكه‌تی نشتیمانى كوردستان دا، ناڤونیشانێن چیرۆكێ (چ فه‌رق نینه‌) بوو، قاره‌مانێ وێ ژى پێشمه‌رگه‌ك بوو خاترا خوه‌ ژ خێزانا خوه‌ دخوازیت و قه‌ستا به‌رۆكێن شه‌رى دكه‌ت، دا كو شه‌ڕێ خه‌له‌كى بكه‌ت ئه‌وى خه‌لكى ژى هه‌مان نیشان ل سه‌روچاڤێن وانن، پشتى سه‌ركه‌فتنا وى و هێزا هه‌ڤالێن وى ل سه‌ر هێزا لایه‌نێ دیتر، ڤه‌دجنقیت ده‌مێ دبینیت، هه‌مان نیشانێن ل سه‌ر روویێ شه‌رڤانه‌كێ دیتر هاتبوو دیلكرن، دكه‌فیته‌ به‌رامبه‌رى وى، ده‌ستێ خوه‌ ددانیته‌ سه‌ر جه‌له‌بكى و خوه‌ دكوژیت و دبه‌ررا دبێژیت : ما چو جوداهى هه‌یه‌؟ ئه‌ڤه‌ نه‌ ئنتیحارى بوو به‌لێ قێریه‌ك بوو ل دژى كوشتنا برای بۆ برایێ خوه‌ (شه‌رێ براكوژیێ)، ئه‌ڤه‌ خوكوشتنا ملله‌ت و نه‌ته‌وه‌ و وه‌لاتى و دیرۆكێ و پاشه‌رۆژێ یه‌! به‌رى چه‌ند رۆژا و ئه‌م یێن دبینین كو فتنه‌ جاره‌كا دى یا دگه‌هیته‌ لۆته‌كه‌یا خوه‌ ل كوردستانێ، هنده‌ك حزب یێن ب رێیا ده‌زگه‌هێن راگه‌هاندنێ دخوازن رایا گشتى یا كوردى ته‌ڤلى هه‌ڤ بكه‌ن و به‌رێ به‌وسه‌له‌یا وێ بده‌نه‌ هه‌لكرنا شه‌ره‌كێ ناڤخوه‌یى یێ نوو و به‌رهه‌ڤكرنا وى بۆ قه‌بوولكرنا هزرێ! هه‌ر وه‌كو شرۆڤه‌كار و زانا دبین كو هه‌لكرنا شه‌رێ د ناڤبه‌را گرۆپ و حزبان دا، په‌سنا هه‌مان هزر و بیران دكه‌ت و هه‌ر د وێ ده‌ڤه‌رێ دا خوجه دبیت و تاكێن وێ دگه‌هنه‌ هه‌مان خێزان و هه‌مبێزێن جڤاكى یێن لۆكال ب ره‌نگه‌كێ ساناهى، به‌لێ لێكهه‌لنگفتنا به‌رژه‌وه‌ندیان د خرڤه‌كرنا هه‌مبێزا مللى دا و برێڤه‌برنا داهاتێن مللى، هه‌سته‌كا ده‌ركه‌فتى ل ده‌ف ڤان حزب و گرۆپان ب هه‌بوونا ده‌لیڤان بۆ كه‌یسگرتنا هێزێ كو پالڤه‌ دده‌ت بۆ ده‌سپێشخه‌ریا شه‌ڕكرنێ ل گه‌ل حزبێن دیتر بۆ مفاوه‌رگرتن ژ ده‌لیڤا! به‌لێ ئه‌م نها د ڤێ قووناغا دیرۆكى یا هه‌ستیار دا، مه‌ دو پشتبه‌ستى یێن نێڤده‌ولى هه‌نه‌ بۆ دۆزا مه‌ یا پیرۆز و ئه‌م یێن ل دووراتیا پێنگاڤه‌كێ ژ راگه‌هاندنا سه‌ربه‌خوه‌بوونێ و دوژمن یێن خوه‌ ل به‌ر مه‌ دڤه‌نیسینن ل به‌ر مه‌ دراوه‌ستاینه‌ ژ هه‌ر ره‌خه‌كى ڤه‌، دێ گه‌له‌كا زه‌حمه‌ت بیت بۆ هه‌ر حزبه‌كا كوردى كو شه‌رڤانێن خوه‌ رازى بكه‌ت به‌رێ خوه‌ بده‌ته‌ به‌ریێن شه‌رى كو وى نه‌ه‌چار بكه‌ن به‌رێ تڤه‌نگا خوه‌ بده‌ته‌ سینگێ شه‌رڤانه‌كى كو هه‌ڤپشكێ خه‌م و نیشانێن روویێ بیت ب هه‌مان خینێ! له‌ورا زه‌حمه‌ته‌ ل سه‌ر جڤاكێ كوردى كو قه‌بوول بكه‌ت داهاتێن به‌شه‌رى و له‌شكرى و دارایى یێن كێم و بمه‌زێخیت بۆ شه‌ره‌كێ ناڤخوه‌یى یێ نوو ل وى ده‌مى دو فه‌ر بیت ل سه‌ر مه‌ هه‌میان كو دهاریكار بین، ژ پێخه‌مه‌ت رزگاركرنێ ژ حوكمه‌تێن سته‌مكار و راگه‌هاندنا ده‌وله‌تا كوردى! هشیاربه‌ كوردۆ و هزار جاران هزرا خوه‌ بكه‌ به‌رى كو چه‌كێ خوه‌ ل به‌رامبه‌ر برایێ خوه‌ راكه‌ى! بلا ل بیرا ته‌ بیت كو په‌یڤا ئێكێ و یا دووماهێى بۆ ته‌ دزڤریت، له‌ورا كه‌س نكاریت ته‌ نه‌چار بكه‌ت كو پشكدراى شه‌ره‌كێ ناڤخوه‌یى ببى، پشتراسبه‌ كو ده‌مێ تو و یێن دى ره‌تكرنا شه‌رى دكه‌ى، دێ سه‌ركردان ژى نه‌چارى هندێ كه‌ى كو په‌نایێ ببه‌نه‌ روونشتنێ ل دۆر مێزا بازنه‌یى بۆ چاره‌سه‌ركرنا ئاریشان ب ره‌نگه‌كێ دۆستانه‌، چونكو چو بژاره‌یێن فشارێ یێن دیتر نه‌ماینه‌ ل هه‌مبه‌رى وان كو ل هه‌ر قه‌یرانه‌كێ د ناڤبه‌را وان دا دیاربكه‌ن، ئه‌و ژى په‌نابرنه‌ بۆ هێزێ هه‌ر ه‌كو هه‌رده‌م وه‌دكه‌ن، بلا بس بیت د نه‌زان و تاگیر بین.
و: ئه‌ڤرۆ

69

ل گه‌ل زێده‌بوونا بزاڤا سیاسى ل هه‌رێما كوردستانێ ل ناڤا ڤان سالێن دووماهیێ و ده‌ركه‌فتنا حزبێن خوه‌دى ئاراسته‌یێن جۆره‌ و جۆر، هێزێن ناڤخوه‌یى ل عیراقێ و ل وه‌لاتێن هه‌رێماتیك بزاڤكرن كو كه‌یسا ڤى بارودۆخێ سیاسى بگرن و هنده‌ك حزبان بۆ خزمه‌تا ئه‌جینده‌یێن خوه‌ یێن سیاسى و بزاڤا لاوازكرنا كوردستانێ هه‌ر ب رێیا وان و ڤه‌گه‌راندن به‌ر ب پاشڤه‌ بۆ نه‌هێلانا هه‌مى ده‌ستكه‌فتیان، نه‌خاسمه‌ ئه‌و ده‌سكه‌فتیێن خوین بۆ هاتیه‌ رێتن و ب سه‌دان هزاران شه‌هید و بریندار داین! ژ گرنگترین ڤان جۆره‌ حزبان ته‌ڤگه‌را گۆڕانه‌ كو ل ده‌سپێكێن وێ دیاربوونا وێ چو گرنگیدان نه‌داینه‌ دۆزا نشتیمانى به‌لكو پشتبه‌ستیا خوه‌ ل سه‌ر داخوازێن جڤاكى كر و كه‌یسا دۆخێ نه‌وه‌كهه‌ڤیێ و نه‌یه‌كسانیێ ل جڤاكێ كوردى كرن دا كو مه‌زنترین هه‌ژمارا جه‌ماوه‌ى خرڤه‌كه‌ت دا پشتى هینگى ئه‌جینده‌یێن ده‌ره‌كى ب جهبینیت ب ئارماندا رۆخیانكرنا كوردستانێ بكه‌ت ب سیاسى و ئابووى! به‌لێ ده‌ملده‌ست، رۆناهیا وى دهێته‌ هه‌لوه‌شاندن و رۆناهیا وى دڤه‌مریت، ئێدى قووناغا به‌ر ب ژۆرداهیێ بۆ ژێى وى یێ سیاسى! هه‌ر چه‌نده‌ ده‌مێ كو هه‌ر حزبه‌كا سیاسى مفلس دبیت، به‌ره‌ به‌ره‌ ده‌ست ب تێكچوونێ دكه‌ت ب ره‌فتارێن خوه‌ ب بزاڤا دیاركرنا هه‌بوونا خوه‌ ل گۆره‌پانێ ب چه‌ندین رێیێن شه‌رعى و نه‌ شه‌رعى، هه‌ر ژ دو سالان و پتر هه‌ر كه‌سه‌كێ دووچوونا گۆره‌پانا سیاسى یا كوردستانى دكه‌ت دى بینیت كو ته‌ڤگه‌را گۆڕان یا نه‌وشێروان سه‌رپه‌رشتیێ لێ دكه‌ت، ئێدى به‌رێ خوه‌ دایه‌ رێیه‌كێ گه‌له‌ك كه‌ڤن بوویه‌، چونكو ل سه‌رده‌مێ ته‌كنۆلۆجیایێ و سه‌رده‌مێ موبایلێن پێشكه‌فتى زه‌حمه‌ته‌ هه‌ر لایه‌نه‌ك راستیان شاش بكه‌ت و شێلێ بكه‌ت و رایا گشتى ل به‌ر خه‌لكى شێلى بكه‌ت، ره‌فتارێن نه‌ژیرانه‌ یێن ئه‌ندامێن ڤێ حزبێ ب ئێكجارى ژناڤچووینه‌ و ژ راستیان دوورخستیه‌، ئه‌وێن ئه‌وى به‌حس ژێ دكرن و گه‌له‌ك ژ تاگیران ل كوردستانێ راكێشان! هه‌ر ژ ده‌سپێكا پشكداریا وان د حوكمه‌تێ دا و ئه‌و د ناڤ ره‌فتارێن خوه‌ دا دهێن و دچن، جاره‌كێ دبنین یێن پشتا حوكمه‌تێ دگرن، جاره‌كا دى ژى به‌ڤلاتیێ دكه‌ن و ئه‌و پشكداریێن وان د خوه‌نیشادانێن سلێمانیێ دا و زۆریكرنا وان ل سه‌ر باره‌گایێ پارتى كوردستان وه‌كو وى زلكى بوو یا پشتا حێشترێ شكاندى كو هه‌بوونا حزبێ د ناڤ حوكمه‌تێ دا ژناڤبرى و شه‌عبیه‌تا وى! خوه‌ دامه‌زرێنه‌رێ حزبێ ژى ئێدى یێ ل خوه‌ و ره‌فتارێن خوه‌ ب گومان كه‌فتى، ئه‌ڤجا هه‌ر جاره‌كێ كو گه‌شت بكه‌ت و ل به‌رچاڤان به‌رزه‌ دبیت، پشتى هینگى راسته‌وخوه‌ حزبا وى به‌لبه‌لێ په‌یدا دكه‌ن و دبنه‌ ئه‌گه‌رێ ئاژاوێ ل كوردستانێ هه‌تا وى راده‌ى كو ئێدى دیاربوو بۆ هه‌میان كو ئارمانجا سه‌ره‌كى یا حزبێ ئه‌وه‌ كو جاددا كوردى بمینیت یێ ئازریایى و نه‌ به‌رقه‌رار دا كو بزاڤا پێشكه‌فتنێ ل كوردستانێ براوه‌ستینت بۆ خزمه‌تكرنا دوژمنان!. دووماهى ره‌فتارا نه‌ یا عه‌قلانى یا ئه‌ندامێن حزبێ دلێ مرۆڤى دمینیته‌ پێڤه‌، ب دروستى ژى بۆ من گه‌له‌كا نه‌خۆشه‌ ده‌مێ دبینم وه‌لاتیه‌كى كورد ل ئه‌ورۆپا دژیت و په‌سنا ده‌ستپاكیێ و باوه‌ریێ د هه‌مى بیاڤان دا كریه‌ ژ بۆ ئاڤاكرنا وه‌لاته‌كێ ساخله‌م و پاك و پێشكه‌فتى، ئه‌و ب خوه‌ ب هنده‌ك ره‌فتاران رادبیت، ئێدى یێن بووینه‌ جهێ نیگه‌رانیا خه‌لكى خوه‌ ل پتر ژ ده‌وله‌ته‌كا گه‌شه‌ ژى ل سه‌رانسه‌رى جیهانێ، چاوا كور ده‌ك ل سه‌ر خوه‌ قه‌بوول بكه‌ت د ناڤ خرڤه‌كرنه‌كێ و بۆ هنده‌ك مه‌ره‌مێن گه‌له‌ك دوور ژ یا خونیشادانێ بۆ گرتنا وێنه‌كى ل ڤێره‌ و ویراهه‌نێ دا بۆ جیهانێ هه‌میێ دیاربكه‌ت كو ئه‌و خرڤه‌بوون ل دژى بارزانى یه‌!، وه‌كو دى هه‌مى درووشمێن راكرین ئارمانجا سه‌ره‌كى یا خوه‌نیشادانێ دیاردكه‌ن ئه‌و ژى نه‌هێلانا ناتۆ یه‌ و نه‌ زڤراندنا ئاواره‌یان بۆ ناڤ مالومولكێن وان، نه‌ك زێده‌تر ئه‌ڤ دیمه‌نێن هه‌ڤپێچى گۆتارێ گرۆڤه‌یا نه‌وه‌یا ئه‌ندامێن ته‌ڤگه‌را گۆرانن.

74

هه‌ر كه‌سێ دووڤداچوونا كۆمبوونێن چارقۆلی بكه‌ت یێت هه‌تا نها هاتیه‌ كرن د نێڤبه‌را ئێكه‌تی نشتیمانی كوردستان و بزاڤا گۆڕان و هه‌ردو حزبێن ئیسلامی یێن دیتر، هه‌ر ل ده‌سپێكێ دێ بینی تكو ڤان هه‌ر چار حزبان فۆبیایه‌ك هه‌یه‌ ژ بریارێن سه‌رۆك مه‌سعود بارزانی!! به‌لێ فۆبیایه‌ك هه‌یه‌ ل جه‌م ڤان هه‌ر چار حزبان ل هه‌مبه‌ری بریارێن سه‌رۆك بارزانی، هه‌ر وه‌سا شرۆڤه‌كارێن سیاسی و چاڤدێرێن ل سه‌ر روودانان سه‌ده‌مێن ئه‌ڤێ فۆبیایێ باش دزانن، ل دووڤ خویندنا من وه‌كو وه‌لاتیه‌كا كورد یا نۆرمال زال ل سه‌ر بۆیه‌رێن ل گۆره‌پانا سیاسی یا كوردی دئێنه‌ روودان سه‌ده‌مین ڤێ فۆبیایێ دزڤرینم بۆ ڤان چه‌ند خالان:
ئێك ژ داخۆیانیێن بارزانی یێن گرێدایی سه‌ربخوه‌بوونا كوردستانێ ل كه‌سێ ناهێته‌ ڤه‌شارتن،كو به‌ری دو سالان هاتیه‌ به‌لاڤكرن د میدیایێن جیهانی ده‌می چه‌ندین دیدار ل كه‌ل دهاتنه‌ كرن، چونكو گه‌له‌ك خه‌مێ ژێ دخۆت و دهه‌می دیدارێن خوه‌ دا داكۆكیێ ل سه‌ر ڤێ خالێ دكه‌ت یا سه‌ربه‌خوه‌بوونا هه‌رێما كوردستانێ و راگه‌هاندنا ده‌وله‌تا كوردی و هه‌ر ده‌م خۆیاكریه‌ كو ل نێزیك دێ ئه‌ڤ ئێكه‌ ئێته‌ بجهئینان و ب تایبه‌ت پشتی سه‌ردانا وی یا دووماهیێ بۆ كۆچكا سپی و نووچه‌یێن ل دۆر سۆزێن ئه‌مریكی بۆ وی ل دۆر ڤێ چه‌ندێ. هه‌لبه‌ت ئه‌ڤ داخۆینیه‌ گه‌له‌ك د نه‌خۆش بوون بۆ وه‌لاتێم هه‌رێماتیك و ترساندن، نه‌خاسمه‌ ئه‌و گه‌له‌ك دشاره‌زانه‌ بۆ ژێكژێككرنا ناڤمالا كوردی ب درێژیا دیرۆكێ، له‌ورا ئه‌وان جاره‌كا دی په‌نا بره‌ هه‌مان شێوازی دا ببیته‌ رێگر ل همبه‌ر راگه‌هاندنا ده‌وله‌تا كوردی كو هه‌ر ژ ناڤ مه‌ بخوه‌ بیت و د ناڤ مه‌دا بیت، وه‌كو هه‌ر جار، به‌لێ رژدیا سهه‌ر چار حزبان ب فه‌راتیا گوهۆرینا بارزانی سه‌ره‌رای ڤان كاودانان ب تنێ گرۆڤه‌یا وێ په‌یڤینا منه‌!! هه‌ر وه‌سا ژی هه‌ما پشته‌ڤانیا عه‌ره‌بێن شۆڤێنی و فورس و توركان ژی بۆ ڤان هه‌لویستێن وان ئه‌و ته‌كه‌زكرنه‌ ل سه‌ر ئه‌گه‌رێن ترسا ڤێ فۆبیایێ ژ راگه‌هاندنا ده‌وله‌تا كوردی!!.
هه‌ر وه‌سا تشتێ پتر بۆ مه‌ ئه‌ڤ حزبێن هه‌نێ یێن ئه‌جینده‌یێن دوژمنێن ده‌وله‌تا كوردی بجه دئینن، ئه‌و پێشنیاز بوو یا هاتیه‌ بۆ پارتی دیمۆكراتی كوردستان هاتیه‌ پێشكێش كرن ده‌رباره‌ ئالاڤا هه‌لبژارتنا سه‌رۆكی، هه‌لبه‌ت ئه‌ڤ ده‌سپێشخه‌ریا وان ناگونجیت ل گه‌ل بنیاتێن ده‌ولی، چونكو سه‌رۆكێ هه‌لبژارتی ژ لایێ ملله‌تی ڤه‌ ده‌سهه‌لاتێن وێ ئێدێ دێ زێده‌تر بن ژ سه‌رۆكێ بهێته‌ هه‌لبژارتن ژ لایێ په‌رله‌مانی ڤه‌!! ئه‌و ب تنێ دخوازن سه‌رۆكی ئه‌و ده‌سهه‌لاتێن راگه‌هاندنا ده‌وله‌تێ نه‌بن، نه‌پتر و نه‌ك كێمتر، ئه‌ز پشتراست كو بارزانی هه‌كه‌ ته‌نازل كر ژ هه‌می ده‌سهه‌لاتێن خوه‌ ژ بلی یا راگه‌هاندنا ده‌وله‌تا كوردی ئێدی هه‌ر چار حزب رازی نابن، چونكو ب تنێ ئه‌ڤ خاله‌یه‌ گه‌وهه‌رێ ناكۆكیێ هه‌تا نها، هه‌ر كه‌سێ باوه‌ر نه‌كه‌ت بلا چه‌نده‌كێ هزرا خوه‌ بكه‌ت و ژخوه‌ بپرسیت كا ئه‌ڤه‌ چو ترسه‌ ژ ده‌سهه‌لات و بریارێن سه‌رۆك بارزانی؟؟ ئه‌رێ بریاره‌ك هه‌یه‌ ده‌ركری ل دژی به‌رژه‌وه‌ندیا گه‌لێ كوردستانێ هه‌تا نها؟ ئه‌رێ نه‌یێ هه‌ژی یه‌ كو ل دژی شه‌ڕێ مه‌ یێ ل گه‌ل داعشێ براوه‌ستێت؟ ئه‌رێ مل ب ملێ پێشمه‌رگه‌ی ڤه‌ شه‌ڕی ناكه‌ت؟ ئه‌رێ ترسه‌ك هه‌یه‌ ژ خیانه‌تكرنا وی بۆ كوردستانێ؟ ئه‌رێ هه‌كه‌ كه‌سه‌كێ دیتر هه‌با ل جهێ وی دا باشتر بیت ژ وی كو یا باشتر بكه‌ت بۆ كوردستانێ؟ هه‌لبه‌ت نه‌خێر باشه‌ ئه‌و فۆبیا یا چیه‌ ژ ده‌سهه‌لاتێن وی ل ده‌ف وان هه‌ر چار حزبان ژ راگه‌هاندنا ده‌وله‌تا كوردی.
و: ئه‌ڤرۆ

76

ئه‌و بۆیه‌رێن نها ل گۆره‌پانا سیاسی یا كوردی په‌یدا بووین، نه‌ئه‌وه‌ بزاڤه‌كا سیاسی یه‌ وه‌كو هنده‌ك شرۆڤه‌كار ل قه‌له‌م دده‌ن، به‌لێ خاپاندنه‌كا سیاسی یه‌، ئارمانج ژێ بێده‌نگكرنا ده‌نگێن ملله‌تی یه‌ و دزینا مافێ وی یێ هه‌لبژارتنێ، له‌ورا هه‌ر كه‌سێ خالا ناكۆكیێ یا گه‌وهه‌ری دنێڤبه‌را حزبێن كوردی دا نه‌زانیت، كو بوویه‌ سه‌ده‌ما ئالۆزبوونا كاروباران هه‌تا ڤی راده‌ی، ئه‌ز ب كورتی دێ بۆ دیاركه‌م، ئاریشا سه‌ره‌كی ئه‌وه‌ كو پارتی دیمۆكراتی كوردستان دخوازیت بریارا هه‌لبژارتنا سه‌رۆكێ هه‌رێمێ د ده‌ستێن ملله‌تی دا بیت ب رێیا ئه‌نجامدانا هه‌لبژارتنان!!، لێ حزبێن دیتر دخوازن كو ئه‌ڤ بریاره‌ ب تنێ د ده‌ستێن ئه‌ندامێن په‌رله‌مانی دا بیت و خه‌لكی چو په‌یڤه‌ك و بۆچوونه‌ك نه‌بیت!! ئه‌ڤه‌ یه‌ خالا ناكۆكیێ یا گه‌وهه‌ری، دیسا ژی نها دێ بێژمه‌ هه‌وه‌ بۆچی ئێكه‌تی و گۆڕان و حزبێن ئیسلامی ڤێ چه‌ندێ دخوازن!، چه‌نده‌كێ بۆ پاش بزڤرین بۆ دووماهی هه‌لبژارتنێن ل هه‌رێمێ هاتینه‌ ئه‌نجامدان ل 30ـ 4ـ 2014، كو ده‌مێ ده‌نگێن ئێكه‌تیێ بده‌ستڤه‌ئیناین چاوا خه‌لك حێبه‌تی كرین به‌ره‌ڤاژی ئه‌وا پتریا شرۆڤه‌كارێن سیاسی هزر لێدكر، كو تووشی شكه‌ستنه‌كا مه‌زن دبوون هه‌ر وه‌كو هه‌لبژارتنێن به‌ری هینگی ل سپتێمبه‌را سالا 2013 كو پاشڤه‌چوونه‌كا مه‌زن بخوه‌ڤه‌ دیتبوو د شه‌عبیه‌تا ئێكه‌تیێ دا!!، له‌ورا ده‌ملده‌ست حزبا گۆڕان هه‌ڤپه‌یمانا وێ یا نها ئه‌و تاوانبار دكر ب سه‌خته‌كاریێ ب هاریكاریا ئیرانێ، هه‌روه‌سا پرانیا لایه‌نگران د گۆتارێن خوه‌ دا ل سه‌ر ڤێ سه‌رپێچیا قانوونی یا مه‌زن نڤیسبوو ژ لایێ ئیكێ ڤه‌ و ئارشیفێ وان ڤێ په‌یڤینا من دسه‌لمینیت!! ئه‌ڤجا ئێكه‌تی نشتیمانی كوردستان باش دزانیت كو شه‌عبیه‌تا وێ وه‌كو به‌رێ نه‌مایه‌ و ب تایبه‌ت پشتی دووربوونا سه‌ركردێ وێ جه‌لال تالبانی ژ پێشچاڤان ژ به‌ر هنده‌ك ئه‌گه‌رێن ساخله‌میێ، به‌لێ حزبا گۆران و پشتی پشكداربووی د حوكمه‌تێ دا نه‌شیا سۆزێن خوه‌ بجهبینیت، یێن ل گه‌ل لایه‌نگیرێن خوه‌ گۆتین، به‌لێ به‌ره‌ڤاژی لێهات و ببوو یاریكه‌ره‌كێ سیاسی ل سه‌ر گۆره‌پانا ململانا پۆسته‌ و ئمتیازاتان!! دیسا ژی تشته‌كێ مسۆگه‌ره‌ كو به‌ڤلێن پارتی و ئێكه‌تیێ یێن ده‌نگ داینه‌ وانل هیڤیا وێ ئێكێ بوون كو ب تنێ هه‌تكا گه‌نده‌لچیان ببه‌ن و نه‌ك شه‌ركرن ژ پێخه‌مه‌ت پۆستان وه‌كو یێن دیتر كو ل دووماهیێ و ب نێڕینا من دێ ته‌خه‌كا مه‌زن ژ وان ڤه‌بیت د هه‌لبژارتنێن داهاتی دا!! به‌لێ حزبێن دینی ژی د پشتراستن كو بۆیه‌رێن داویێ و شه‌رێ ل گه‌ل داعشێ گه‌له‌ك كارتێكرن كریه‌ سه‌ر نێڕینا خه‌لكی بۆ ئاینی و ئێدی یێن دخوازن كو دین ژ سیاسه‌تێ ڤه‌ببیت، هه‌لبه‌ت ژی ئه‌ڤ ئێكه‌ دێ ب ره‌نگه‌كێ نێگه‌تیڤ ره‌نگڤه‌ده‌ت د هه‌ر هه‌لبژارتنه‌كا جه‌ماوه‌ری یا داهاتی دا!! له‌ورا ئه‌ڤ هه‌می حزبه‌ دێ خوه‌ دووركه‌ن ژ هاڤێتنا ته‌پێ دا بۆ یاریگه‌ها ملله‌تی!! چونكو پارتی دیمۆكراتی كوردستان سه‌لماند كو ئه‌و باشترین یاریكه‌ره‌ و تایبه‌ت د ڤان بارودۆخێن سه‌خت دا یێ كو ب سه‌ر هه‌رێمێ را دبۆریت، چونكو ئه‌وه‌ بهێزترین پارێزه‌رێ ئێمناهیا كوردان!! له‌ورا دێ ئالۆزكرنا دانوستاندنان نوكه‌ به‌رده‌وام مینیت ژ پێخه‌مه‌ت چو هه‌لبژارتن نه‌هێنه‌ كرن هه‌لبه‌ت ژی قوربانیێ مه‌زنتر یێ ڤان ململانێن سیاسی هه‌ر وه‌لاتینه‌!! ئه‌و هه‌ڤوه‌لاتیێ كو فه‌ره‌ به‌رژه‌وه‌ندیا وی ل پێشیا هه‌می حزبان بیت و نه‌ك به‌رژوه‌ندیێن به‌رته‌نگ ب تنێ!!.
و: ئه‌ڤرۆ

78

د بارودۆخێن نۆرمال دا مافی هه‌ر مرۆڤه‌كی یه‌ كو ب ئازادانه‌ سه‌ره‌ه‌دریێ ل گۆر كه‌ساتی و هزر و بیرێن خوه‌ بكه‌ت، چونكو سه‌رده‌ریێن وی چو كارتێكرنێن مه‌زن یان راسته‌وخوه‌ ل سه‌ر روشا وه‌لاتی یا ناڤخوه‌ نینه‌، لێ ل ژێر بارودۆخێن شه‌ڕی د جودانه‌، چونكو مافێ مه‌ وه‌لاتیان نینه‌ ب ئازادانه‌ هه‌ر وه‌كو هه‌رده‌م ئه‌م د وه‌سا بووینه‌ و نه‌ك مافێ مه‌یه‌ كو بێی زانینا هه‌می روودانان باخڤین، هه‌ر وه‌سا مافێ سیاسه‌تمه‌داران نینه‌ كو دووڤچوونا هه‌مان په‌یره‌وی بكه‌ن، كو ل به‌ری ده‌می بجه دئینا، په‌یڤینه‌ك هه‌یه‌ یا دامه‌زرێنه‌رێ ئێكه‌تیا سۆڤێتی فلادیمێر لینین، دبێژیت: دشه‌ری دا كه‌سه‌ك نینه‌ كو ناڤێ وی (به‌رهنگارێ سیاسی) بیت، به‌لێ كه‌سه‌ك هه‌یه‌ ناڤێ وی خاینه‌، چونكو د شه‌ڕی دا راوه‌ستان ل دژی سه‌روه‌ریا وه‌لاتی و له‌شكرێ وی وه‌كو خه‌یانه‌ت دهێته‌ هه‌ژمارتن)، ل سه‌ر ڤێ چه‌ندێ گومانا به‌رده‌وام دشیانێن پێشمه‌رگه‌ی دا و جه‌ختی ل سه‌ر شاشیه‌كێ یان قوسیریه‌ك كربیت ل ده‌سپێكا روو ب رووبوونان ل گه‌ل رێكخراوا تیرۆری (داعش) و چاڤنقاندن ل هه‌می سه‌ركه‌فتنێن ل هه‌مان ده‌ڤه‌رێ بدستڤه‌ئیناین و هنده‌ك ده‌ڤه‌رێن دیتر وه‌كو خیانه‌ته‌كا سۆر و سۆر دهێته‌ هه‌ژمارتن!! به‌لێ خیانه‌تی ل ده‌مێ به‌حسێ پارێزه‌رێ گه‌لێ كورد دكه‌ین كو ئه‌و نه‌ ل ئاستێ باوه‌ریێ یه‌ و ژبیرا خوه‌ دبه‌ن هه‌كه‌ پێشمه‌رگه‌ نه‌با نوكه‌ دایكا من و دایكێن وان و برایێن من و برایێن هه‌وه‌ و ب سه‌دان هزار ژ ئێزیدی و مه‌سیحی و عه‌ره‌ب نها خۆشیێ و نه‌عیمی ب ئارامی و ئاسایشێ دبه‌ن ل كوردستانێ! هه‌لبه‌ت ژی بلا وێ سیاسه‌تا سه‌ركه‌فتی یا حوكمه‌تا هه‌رێما كوردستانێ ژبیر نه‌كه‌ین و رژدیا وێ ژ وه‌لاتێن جیهانێ ل دۆر پشته‌ڤانیا له‌شكری یا كوردان، لێ هه‌ر قه‌نجیا مه‌زن بۆ پێشمه‌رگه‌ی ڤه‌دگه‌ریێت!!تشتێ ب سه‌رێ كوردان هاتی ل ده‌ڤه‌را شنگالێ، دا ب سه‌رێ مه‌ هه‌میان ژی هێت هه‌كه‌ پێشمه‌رگه‌ نه‌با، ل شوونا كو چار هزار ژن د ده‌ستێن تیرۆرستان دابان، نوكه‌ ب سه‌دان هزاران بوون هه‌كه‌ پێشمه‌رگه‌ نه‌با، ئه‌ڤجا به‌ر ناكه‌ڤیت كو فتنێ پتر و پتر بچینن و ل سه‌ر ده‌زگه‌هێن میدیایێ داخۆیانیان بده‌ن كو خوه‌ڤه‌كێشان ژ شنگالێ، پلانه‌ك هه‌بوو و هه‌مان پرسیارێ دوپات بكه‌ن، ئه‌و ژی (بۆچی ده‌ڤه‌را زمار و ئێزدی ب خوه‌ بوونه‌ قوربانیێن مه‌زن؟) به‌رسڤ ژی ب ساده‌یی ڤه‌ ئه‌وه‌ كو حوكمه‌تا كوردستانێ نینه‌ ئێزدی هه‌لبژاتین كو ببنه‌ (كبش الفداء)!! به‌لكو داعشێ ئه‌و هه‌لبژارتینه‌ چونكو ل دووڤ گۆتنا وان ئه‌و كافرن و نه‌ ب سه‌ر چو ئایێن ئه‌سمانی ڤه‌نه‌، ئه‌و ب ڤی ره‌نگی عوزره‌كا ژ قبحه‌تێ مه‌زنتر په‌یدا دكه‌ن بۆ هه‌ر ده‌ڤه‌ره‌كا ئه‌و هێرش دكه‌نێ، ئه‌و ئازارا مه‌ هه‌ست پێ كری ل سه‌ر خه‌لكێ خوه‌ ل شنگالێ هه‌مان ده‌رده‌ یێ ل حه‌لبجه‌ مه‌ هه‌ست پێ كری و ل سه‌ر قوربانیێن ئه‌نفالان و ل سه‌ر هه‌ر كورده‌كی كو تووشی سسته‌مێ و كوشتنێ بووی ل سه‌ر ده‌ستێ عه‌ره‌ب و تورك و فارسان، ئه‌ڤجا به‌سه‌ هوون ئه‌وین خافل ژ مه‌ترسیێ ده‌ربكه‌ڤن یا قووناغا ئه‌م تێدا دبۆرین به‌سه‌ ته‌به‌عیه‌ت، به‌سه‌ ئه‌وا میدیایا حزبێ به‌لاڤ دكه‌ت ئه‌وا هوون ب سه‌رڤه‌، ئه‌ڤجا نه‌یا به‌رئاقله‌ كو پارتی هه‌رده‌م یا حه‌ق بیت وه‌ نه‌یا به‌ر ئاقله‌ كو هه‌رده‌م ئێكه‌تی یا حه‌ق بیت، ب ڤی ره‌نگی ژی هه‌ر حزبه‌كێ شاشیێن خوه‌ هه‌نه‌ و سیمایێن خوه‌ هه‌یه‌ و مێشكێ مه‌ دكاریت تشتێ باشتر و دروستتر و گونجایتر ژێكجودا بكه‌ت، به‌س دووڤه‌لانكیا كوره‌ یا سیاسه‌تا هه‌ر حزبه‌كێ نه‌ د به‌رژه‌وه‌ندیا كوردستانێ دایه‌، له‌ورا وه‌رن دا یا باشتر بۆ كوردستانێ ب هه‌لبژێرین بێی به‌رێ خوه‌ بدینه‌ باگراوه‌ندا حزبی یا كه‌سان.
و: ئه‌ڤرۆ

283

ل 2003 و پشتی رزگاركرنا عیراقێ ژ رژێما دكتاتۆری یا پێشین هینگی ده‌لیڤه‌ بۆ كوردان گه‌له‌ك یا گونجایی بوو، بۆ ڤه‌گه‌راندنا كه‌ركووكێ و ده‌ڤه‌رێن دیتر یین دابڕه‌ی ژ ئه‌ردێ كوردستانێ و راگه‌هاندنا ده‌وله‌تا كوردی، چونكو دی ده‌می عیراق نه‌هێزه‌كا وه‌سا بوو كو ئاسته‌نگان بدانه‌ه‌ به‌ر ڤێ بریارێ، له‌ورا كورد ب تنێ مان وه‌كو هێزه‌كا نیزامی د ناڤ گۆره‌پانا سیاسی یا عیراقی دا، لێ زێده‌باری مایتێكرنا نێڤده‌ولی و نه‌دانا رۆناهیا كه‌سه‌ك بۆ كوردان ژبۆ بجهئینانا ڤێ خه‌ونا وان، هینگی به‌رپرسێن مه‌زن ل هه‌رێمێ به‌رده‌وام دگۆتن كو (هێشتا زوییه‌ كو ژ له‌شێ عیراقێ ڤه‌ببین)، وی ده‌می ئه‌ز تێنه‌گه‌هشتم كا بۆچی ئه‌ڤ په‌یڤینه‌ هه‌رده‌م خۆیا دكرن و بۆچی ده‌م؟؟ لێ ل هه‌یاما داویان، به‌ره‌ بره‌ سه‌ده‌م هاتنه‌ حه‌باندن، له‌ورا یا فه‌ر بوو ل سه‌ر مه‌ وه‌كو گه‌لێ كورد ل باشۆرێ كوردستانێ كو ژ عیراقێ ڤه‌ببین ب عاتیفه‌ و هزر و ره‌وشه‌نبیری به‌ری ژێكڤه‌بوونا گشتی!! ئه‌ڤجا نابیت به‌ردان بهێته‌ (ته‌لاق) بهێته‌ كرن، چه‌ندی كو حه‌زژێكرن و دلۆڤانی مابیته‌ د دلی دا!! بۆ نموونه‌ ئه‌ز بخوه‌ 180 پله‌یان هاتیمه‌ گوهارتن د ناڤ ڤان سالان دا لێ ب به‌ره‌ به‌ره‌!! به‌ری چار سالان من به‌لاڤۆكێن خوه‌ ل سه‌ر فه‌یسبووكی ب تنێ ب زمانێ عه‌ره‌بی دنڤیسن و به‌لاڤدكرن و ب زمانه‌كێ وه‌لاتیه‌كێ عیراقی و ئه‌ز ته‌ڤلی وان كێشه‌یان دبووم یێن په‌یوه‌ندی ب عیراقی ڤه‌هه‌یی، بۆ سه‌ركه‌فتنان دلشادبووم و بۆ شكشه‌ستان خه‌مدار دبووم (ئه‌ز كچا شه‌هیده‌كی مه‌ كو ل سه‌ر ده‌ستێ وان عه‌ره‌بان شه‌هیدبووی، باشه‌ پا یێن دیتر دچاوابن؟!).
به‌ری دو سالان ژ نوكه‌ من رۆژانه‌ ل سه‌ر قوسه‌یی خۆلی دنڤیسی ل سه‌ر لاپه‌رێ خوه‌ و داخوازا سه‌ركه‌فتنێ بۆ دكر د به‌رنامێ (the voice) و ئه‌ز یا حێبه‌تی بووم كا پشته‌ڤانیا كیژان تیمی بكه‌م، تیمێ كازم ساهر یێ عیراقی یان قوسه‌یی خۆلی یێ عه‌ره‌ب؟! باشه‌ ما نه‌ ئه‌ڤ ژیبوونه‌ ب تنێ باندۆره‌كا داگیرا هزری ره‌وشه‌نبیری زمانی یه‌؟! هه‌كه‌ مژار یا بژاره‌ بیت دا ئه‌ز زمانێ ئنگلیزی ل شوونا زمانێ عه‌ربه‌ی هه‌لبژێرم!! لێ ل داویێ من ب چو ره‌نگه‌كی هه‌ست ب ژیبوونا عیراقێ نه‌كریه‌ و من نه‌خواستیه‌ و ڤیایه‌ كو ئه‌و سه‌ربكه‌ڤن د هه‌ر بیاڤه‌كی دا و ئه‌ز ل گه‌ل كێشێن وێ كاریگه‌ر نه‌بوویمه‌ چه‌ندی د بالكیش بن، داعش ژی ل شوونا وی زلكی بوون یا پشتا حێشتێ شكاندی!! چونكو هیرشا وان ل سه‌ر كوردستانێ دووماهی ماسك راكر ل سه‌ر روویێ عیراقیێن عه‌ره‌ب چونكو پرانیا وان خۆشحالیا خوه‌ ده‌بریی بوون ل هه‌مبه‌ر ئه‌وا ب سه‌رێ كوردان هاتی، هه‌لبه‌ت ژی هه‌ر ئێك وه‌كو خوه‌ هزر دكه‌ت چ راسته‌وخوه‌ یان نه‌، لاپه‌رێن په‌یوه‌ندیێن جڤاكی مه‌زنترین به‌لگه‌نه‌ ل سه‌ر هندێ كو مه‌حاله‌ كورد و عه‌ره‌ب بژین ل ژێر ئێك سیهوانه‌ پشتی ئه‌ڤرۆ، چونكو 90% ژ دیالۆگان هه‌می رسواكرن و جڤینن و هیڤیێن ژێكڤه‌بوونێ ن، خوه‌ عه‌ره‌ب ژی ئه‌وێن هزرا ژێكڤه‌بوونێ ددانان وه‌كو خیانه‌ته‌كا مه‌زن، نها ب وێ هیڤێ نه‌ كو ژێكڤه‌بین دا ژ مه‌ مرتاح بن، پا وه‌للا ده‌مێ ژێكبه‌ردانێ هاتیه‌ و ب هه‌ر سێ ته‌لاقێن خوه‌ڤه‌!!.
و: ئه‌ڤرۆ

website security
WP Facebook Auto Publish Powered By : XYZScripts.com