NO IORG
Authors Posts by دلوڤان ئه‌مجه‌د بارزانى

دلوڤان ئه‌مجه‌د بارزانى

دلوڤان ئه‌مجه‌د بارزانى
14 POSTS 0 COMMENTS

3

دلۆڤان ئه‌مجه‌د بارزانی
66 سال به‌ری نها و د ره‌وشه‌كا دژوارا سیاسی و نه‌ته‌وه‌یی یا گه‌لێ مه‌دا، ل ١٨ شوباتا سالا ١٩٥٣، ب پێشنیار و ده‌سپێشخه‌ریا سه‌ركرده‌ و رابه‌رێ كارێزمایێ نه‌ته‌وه‌یا گه‌لێ مه‌ (مه‌لا مسته‌فا بارزانی)، رێكخراوێن ئێكه‌تیا قوتابیێن كوردستانێ و ئێكه‌تیا لاوێن دیمۆكراتا كوردستانێ هاتنه‌ دامه‌زراندن و بوونه‌ ئامرازه‌ك بۆ جوشدانا لاوان و قوتابیێن كوردستانێ ب هه‌ستا نیشتمانی و نه‌ته‌وه‌یی.
رێكخراوێن (ئێكه‌تیا قوتابیێن كوردستانێ و ئێكه‌تیا لاوێن دیمۆكراتا كوردستانێ) كو ل سه‌ر ده‌ستێ بارزانیێ نه‌مر ل ١٨ شوباتا سالا ١٩٥٣ هاتنه‌ دامه‌زراندن، ژ به‌ر ڤێ بیرهاتنێ پارسال سه‌رۆكێ هه‌ڕێما كوردستانێ (مسعود بارزانی) د په‌یامه‌كێ دا كو پیرۆزباهیا قوتابیان و لاواێن دیموكراتا كوردستانێ كر و گۆت :”قوتابی و لاوێن دیمۆكراتا كوردستانێ ل هه‌موو قووناغێن خه‌باتا گه‌لێ مه‌دا ئه‌رك و شینتلێن وان دیار بینه‌ و جهێ پێگه‌هاندن و په‌روه‌ردا كوردایه‌تیێ و نیشتیمانپه‌روه‌ر و چاڤنه‌ترس بوون و د ڤێ رێیێ دا قوربانیێن داین، نها ژی كو گه‌لێ مه‌ ل قووناغا به‌رخوه‌دان و چه‌سپاندنا مافان و ده‌ربازكرنا ئاریشه‌ و ته‌حه‌ددیان دایه‌، ئه‌ركێ قوتابی و لاوان ل هه‌موو ده‌مه‌كێ هه‌ستیارتر و گرانتره‌”.
هه‌روه‌سا سه‌رۆكێ هه‌ڕێما كوردستانێ د په‌یاما خوه‌دا گۆت ب پێدڤی دزانم ” قوتابیان و لاوان ل جاران زێده‌تر شوون كه‌فتیێن بهایێ بلندێ خه‌بات و كوردایه‌تیێ بن و ل هه‌ره‌شا و ته‌حه‌ددییان بێ هێڤی نه‌بن”.
هه‌روه‌سا گۆت ژی “گه‌لێ مه‌ و هێزا پێشمه‌رگه‌هێن كوردستانێ خوه‌ راگرانه‌ قوربانیێن دای، ل هه‌مبه‌ری دكتاتۆران دا راوه‌ستان و تیرۆر و هزرێن توندره‌وێن وان ژی تێكشكاندن. هه‌روه‌سا ب ره‌نگه‌كێ ئازادیخوازانه‌ دووماهیا مافێ ره‌وایێ خوه‌ یاكری ل هه‌موو قووناغان، ب ئیراده‌كا ب هێز و پۆلایین به‌رده‌وام بوون.
ــ پارتی دیمۆكراتێ كوردستان ل سالا ١٩٥٣، سێیه‌مین كۆنگره‌ ل باژێرێ كه‌ركووكێ گرێدا د وی كۆنگره‌ی دا چه‌نده‌ها بریار و راسپارده‌یێن گرنگ تێدا هاتنه‌دان، له‌وما دامه‌زراندنا رێكخراوێن جه‌ماوه‌ری وه‌ك “لاوان و قوتابیان و ئافره‌تان” هه‌ر چه‌نده‌ به‌حسێ هندێ دهێته‌كرن كو ئێكه‌تیا ئافره‌تێن كوردستانێ ل سالا ١٩٥٢ ڤه‌ یا دامه‌زراندی، لێ به‌لێ ل كۆنگره‌یا سێیێ یا پارتا دیمۆكراتا كوردستانێ ل سالا ١٩٥٣ بریارا دامه‌زراندنا ئه‌ڤان سێ رێكخراوان ب فه‌رمی یا ده‌رچووی، ئێك ژ وان رێكخراوا دامه‌زراندنا” ئێكه‌تیا لاوێن دیمۆكراتا كوردستانێ ” بوو.
ــ (بارزانی نه‌مر) نێزیكێ نیڤ سه‌ده‌ به‌ری نها دبێژیت :” لاوێن كورد شورێ پۆلاینن بۆ پاراستنا كوردستانێ”.
كور و كچێن ناڤ ئه‌ڤێ رێكخراوا تێكۆشه‌ر هه‌رده‌م ده‌سته‌كێ وان خزمه‌ت و ده‌سته‌كێ وان پاراستنا وه‌لاتی بووینه‌، ل ره‌وشا دیموكراتی و ده‌لیڤا كارێ رێكخراوی دا ل پێشیا هه‌موو رێكخراوێن دیتر دا بوویه‌، ده‌لیڤا خزمه‌تكرن ب كچ و كورێن كوردستانێ ب تنێ د ڤێ رێكخراوێ دا ب رژدی و بێ چ به‌رامبه‌ره‌كێ و بێ مه‌به‌سته‌كا حزبی یه‌، له‌وما هندی ب كووری و هووری بچینه‌ ناڤا خه‌بات و كارێن ئه‌ڤێ رێكخراوێ و هه‌ر یا كێمه‌ ئه‌م نه‌شێین به‌رخوه‌دان و خزمه‌تكرنا ئێكه‌تیا لاواێن كوردستانێ ب نڤسین وه‌سفا وان بكه‌ین و هه‌میێ بێخینه‌ سه‌ر كاغه‌زێ.
ــ له‌وما ئه‌ڤرۆ ب هه‌لكه‌فتا ١٨ ێ شوباتێ بیرهاتنا (٦٦)مین سالرۆژا دا دامه‌زراندنا ئێكه‌تیا لاوێن دیمۆكراتا كوردستانێ و ئێكه‌تیا قوتابیان، گه‌رمترین پیرۆزباهی ل هه‌موو لاوان و قوتابیێن كوردستانێ ل هه‌ر جهه‌كێ لێ بن ب گشتی و هه‌ڕێما كوردستانێ ب تایبه‌تی دكه‌م.
ئه‌ڤرۆ رۆژ رۆژا لاوانه‌ ب راستی ژی بوومه‌ لاوان جه‌ژنه‌كا پیرۆز و دێرینه‌ رۆژا دامه‌زراندا ئێكه‌تیا لاوێن دیمۆكراتا كوردستانێ و ئێكه‌تیا قوتابیێن كوردستانێ یه‌ كو ئه‌ڤرۆ (٦٦) سال ده‌ربازبوون ل سه‌ر دامه‌زراندنا ئه‌ڤێ رێكخراوا پیرۆز و تێكۆشه‌ر هه‌روه‌سا یا ژ هه‌میێ گرنگتر ئه‌وه‌ ئه‌ڤ رێكخراوه‌ هه‌موو ل سه‌ر ده‌ستێ سه‌ركرده‌ و بابێ روحیێ نه‌ته‌وا كورد “بارزانی نه‌مر” یا هاتیه‌ دامه‌زراندن.
راسته‌ ئه‌ڤه‌ چه‌ند ساله‌كه‌ ئه‌م د قه‌یرانه‌كا ئابووری دا ده‌ربازدبین لێ به‌لێ ئه‌ڤێ قه‌یرانێ و شه‌ڕی نه‌شیانه‌ ببنه‌ رێگر د هه‌مبه‌ر لاوان دا و كارتێكرنێ ل هزر و بیر و بۆچوونێن لاوێن هه‌رێما كوردستانێ ب گشتی بكه‌ن و رۆژ بۆ رۆژێ لاوێن مه‌ زێده‌تر یێ پێش دكه‌ڤن و هه‌ولێن پێشڤه‌برنا وه‌لاتی دده‌ن چونكێ یێ ل قوتابخانه‌یا بارزانی نه‌مر خواندی و فێری كوردایه‌تیێ بووی.
لاو بربره‌یا پشتا وه‌لاتی نه‌ و هیڤیا گه‌شا پاشه‌رۆژا ملله‌تی نه‌.

8

دلۆڤان ئه‌مجه‌د بارزانی
هه‌بوونا په‌كه‌كێ و سه‌ربازگه‌هێن توركیا ل سه‌ر ئاخا هه‌رێما كوردستانێ رێك و ژیانا ناڤچه‌یێن نێزیك سنۆران و جێهن ئه‌ڤه‌ لێ هه‌ی یا خستیه‌ د مه‌ترسیێ دا، هه‌تا وی راده‌ی خه‌لك نه‌شێن قه‌ستا جه و گوند و ره‌ز و باغێن خوه‌ بكه‌ن.
رۆژانه‌ ده‌نگوباسێن نه‌خوه‌ش و دلته‌زینێن دگه‌هنه‌ گوهێن مه‌ كو ب ئه‌گه‌رێن تۆپ بارانكرن و لێدانا فرۆكه‌یێن توركیا ل سه‌ر په‌كه‌كێ خه‌لكێ سڤیلێ هه‌ڕێما كوردستانێ دبنه‌ قوربانی، باشترین نموونه‌ ژی ئه‌ڤ چه‌ند رۆژێن چوویی كو ل دێره‌لۆكێ چه‌ند گه‌نجه‌كێن بێ گونه‌ه شه‌هید كه‌فتن، پشتی هنگی ژی كو خه‌لكێ دێره‌لوك و شێلادزێ و سیریێ و ناڤچه‌یێن ده‌وروبه‌ر خوه‌نیشادانه‌ك ئه‌نجامدای ل دژی حوكمه‌تا توركیا و په‌كه‌كێ د ڤێ خوه‌نیشادانێ دا هاتنه‌ شه‌رمزاركرن و باره‌گا و سه‌ربازگه‌هێن وان یێن ل سیریێ دا هاتنه‌ خراپكرن و سووتاندن دڤێ خوه‌نیشادانێ ژی دا چه‌ند كه‌سه‌ك بوونه‌ قوربانی.
ب راستی ژی هه‌بوونا په‌كه‌كێ و سه‌ربازگه‌هێن توركیا ل هه‌ڕێما كوردستانێ چ جوادهی نینه‌ وه‌كی ئێكن.
ــ په‌كه‌كێ چ ژ هه‌ڕێما كوردستانێ دڤێت؟
ــ په‌كه‌كێ كوردستانا باكوور ئازادكریه‌؟
ــ هه‌ڕێما كوردستانێ پێدڤی ب په‌كه‌كێ هه‌یه‌؟
ــ ئه‌رێ بۆچی په‌كه‌كه‌ ناچیت شه‌ری ل كوردستانا باكوور بكه‌ت؟
گه‌له‌ك پسیارێن دژی یێن هه‌ین كو یێن بۆیه‌ جهێ گۆمانێ بۆ خه‌لكێ هه‌ڕێما كوردستانێ كا شولا په‌كه‌كێ ل ڤێره‌ چی یه‌.
راسته‌ ئه‌م هه‌موو كورد ئێكین و براینه‌ ل هه‌ر جهه‌كێ لێ بن بێ جوادهی، لێ ئه‌م خه‌لكێ هه‌ڕێما كوردستانێ ب برایانه‌ یێ داخوازێ ژ پارتا كاركه‌رێن كوردستانێ په‌كه‌كێ دكه‌ین كو ل هه‌ڕێما كوردستانێ ده‌ركه‌ڤیت و بچیت ل جهێن خوه‌ شه‌ری بكه‌ن و ئازاد بكه‌ن هه‌ڕێمێ چ پێدڤی ب په‌كه‌كێ نینه‌ بخوه‌ یا ئازاد كریه‌ لێ كوردستانا باكوور یا د مه‌ترسیێ دا و ل بن ده‌ستێ توركیا دا هوون هه‌رن ماردین و دیاربه‌كر و ئورفا و ئه‌ده‌نه‌ و جزیرێ و گه‌له‌ك جهێن دی یێن خوه‌ ئازاد بكه‌ن، به‌لا خوه‌ ژ كوردستانا من ببه‌ن ژ ئه‌گه‌رێ هه‌وه‌ ئه‌ڤه‌ چه‌نده‌ها گه‌نجێن و هه‌ڤوه‌لاتێن وه‌لاتێ من دبنه‌ قوربانی، چه‌نده‌ها دایك جگه‌رسۆتی بوون ئیدی بلا به‌س بیت وه‌كی مشك و ماران ل كون و شاخان ده‌ركه‌ڤن و هه‌رنه‌ جهێ خوه‌ شه‌ری بكه‌ن، ئه‌گه‌ر هوون نه‌وێرن شه‌ری ل جهێن خوه‌ دژی داگیركه‌رێن تورك بكه‌ن، دوی ده‌می دا بنده‌ستیێ قه‌بوول بكه‌ن به‌س ژ هه‌رێما كوردستانێ هه‌رن خه‌لك وه‌ ناخوازیت و پێدڤی ژی ب هه‌بوونا هه‌وه‌ نینه‌.
ئه‌و بخوه‌ په‌كه‌كه‌ ژی بۆ هه‌ڕێما كوردستانێ جهێ مه‌ترسیێ یه‌ ژبه‌ر دیرۆكا كوردان كو به‌ری چه‌ند ساله‌كا په‌كه‌كێ ژی شه‌رێ مه‌ دكر و چه‌نده‌ها خه‌لكێ هه‌ڕێما كوردستانێ شه‌هیدكرن هه‌تا نها ژی مه‌ باوه‌ری ب په‌كه‌كێ نینه‌، هه‌روه‌سا ئه‌م ژ په‌كه‌كێ ژی دخوازین ژ چیایێن مه‌ ده‌ركه‌ڤن و بچن دا خه‌لكێ مه‌ ب ئازادانه‌ بهێن و بچنه‌ سه‌ر جهێن خوه‌.
ئه‌گه‌ر ئه‌م بهێینه‌ سه‌ر توركیا ئه‌و هیچ د دیرۆكا خوه‌دا دوژمنێ كوردان بوویه‌ و خیانه‌ت كار بوویه‌ ل دژی كوردان ئارمانجا وان ژناڤبرنا كوردانه‌ ل هه‌ر جهه‌كێ لێ بن، بۆ توركیا چ جوادهی نینه‌ ل ده‌مێ ناڤچه‌یێن هه‌ڕێما كوردستانێ تۆپ باران دكه‌ت په‌كه‌كه‌ بینه‌ كۆشتن یان خه‌لكێ سڤیلێ هه‌ڕێما كوردستانێ ده‌ف وان وه‌كی ئێكه‌ یا گرنگ كوردن.
له‌وما سۆتنا سه‌ربازگه‌هێن توركیا ل كومه‌لگه‌ها سیریێ ب ده‌ستێ خوه‌نیشاداران كو خه‌لكێ هه‌رێما كوردستانێ بوون، ئه‌ز نابێژم سه‌د ژ سه‌دێ باش بوو به‌س پا كاره‌كێ خراپ ژی نه‌بوو ئه‌و د حه‌ق بوون و حه‌قێ وان بوو.
لێ به‌لێ دڤێت وێ ژی بزانن توركیا بتنێ تۆمه‌تبار نه‌بوو په‌كه‌كه‌ ژی هندی توركیا و هێش زێده‌تر تۆمه‌تباره‌، چونكێ ئه‌گه‌ر په‌كه‌كه‌ ل هه‌رێما كوردستانێ بچیت و بچنه‌ جهێن خوه‌ ل سه‌ر ئاخا خوه‌ شه‌ری بكه‌ن ئاها د وی ده‌می ژی دا توركیا ژی نه‌شێت ناڤچه‌یێن هه‌رێما كوردستانێ تۆپ باران بكه‌، له‌وما پێدڤیه‌ بزانین كو هه‌ردوو سووچبارن.

15

دلوڤان امجد بارزانی
ل كوردستانێ چو جاران چ ئاریشه‌یێن ئاینی یان نه‌ته‌وه‌یی نه‌بووینه‌ د ناڤ جڤاكی ب تایبه‌تی و هه‌رێمێ ب گشتی.
له‌وما دهێته‌ گۆتن و دبێژن (كوردستان لاندكا پێكڤه‌ژیانا هه‌می ئایین و ئوول و مه‌زهه‌ب و نه‌ته‌وه‌یێن جودا جودایه‌).
ئه‌ڤه‌ راسته‌ و ئه‌م ملله‌تێ كورد و هه‌می جیهان ژی ئه‌ڤێ راستیێ ب باشی دزانن و یا ل پێشچاڤێن وان ل ده‌مێ به‌حسێ وه‌كهه‌ڤی و ئاشتی و پێكڤه‌ژیانێ دهێته‌ كرن هه‌رێما كوردستانێ ب نموونه‌ دهێته‌ وه‌رگرتن و به‌حسكرن ب تایبه‌تی ل ڤێ دووماهیێ ژی به‌رێ ڤان كاره‌ساتێن دل ته‌زین و ل دژێ مرۆڤایه‌تیێ ئه‌ڤێن هه‌مبه‌ری ملله‌تێ مه‌یێ كورد هاتیه‌كرن ب گشتی.
كوردێن ئێزیدی و نه‌ته‌وه‌یێن دیێن هه‌رێمێ دژین كو هه‌می جیهانێ ب چاڤێ خوه‌ دیت كا چ ب سه‌رێ مه‌ كوردان هات و چ تاوانه‌كا مه‌زن و هه‌ژیه‌ بێژم كو ئێكه‌م جار بوو تاوانه‌كا وه‌سا درندانه‌ ل دژی مرۆڤان هاتیه‌ ئه‌نجام دان.
هه‌تا من ب چاڤێن خوه‌ نه‌دیتی من باوه‌ر نه‌دكر، چونكی خه‌لكێ هه‌رێما كوردستانێ چو جاران هزره‌كا وه‌سا نه‌دكر، كو هنده‌ك جۆرێن مرۆڤان یێن هه‌ین وه‌سا ده‌رهه‌قێ مرۆڤان دا هزردكه‌ن و جوداهیێ د ناڤبه‌را ئایین و ئۆل و مه‌زهه‌بان دا دكه‌ن.
ئه‌م كورد دهه‌ق بووین باوه‌ر نه‌كه‌ین ئه‌گه‌ر به‌رپه‌رێن دیرۆكا كوردان هه‌لڤه‌ده‌ین كو ئه‌ڤه‌ چه‌ند سه‌ده‌یه‌ و سه‌دان ساله‌ ئه‌وێن به‌ری مه‌ و ئه‌م ژی ل كوردستانێ دژین ب هه‌بوونا ڤان هه‌می ئایین و نه‌ته‌وا چو جاران كوردان ئاریشه‌ ل سه‌ر ئاینی و نه‌ته‌وه‌ ی نه‌بووینه‌.
براینی و وه‌كهه‌ڤی و ئاشتی ل كوردستانێ به‌رقه‌راربوون.
هه‌می مرۆڤ ل هه‌رێما كوردستانێ وه‌ك هه‌ڤبوون بێ جوداهی مافێ وان دهاته‌ دان وه‌كی ئێك.
له‌وما هه‌رێما كوردستانێ دهاته‌ نیاسین ب ناوچه‌یه‌كا ئارام و لاندكا پێكڤه‌ ژیانا هه‌می ئایین و نه‌ته‌وه‌ و ئۆلانه‌ بێ جوداهی و نها ژی یا وه‌سایه‌ و دێ هه‌ر مینیت وه‌سا ژی.

13

دلۆڤان ئه‌مجه‌د بارزانى
خۆیایه‌ كو ل رێكه‌فتێ (٢٢/١١/٢٠١٨) رۆژا پێنجشه‌مبیێ، سه‌رۆكێ هه‌رێما كوردستانێ مسعود بارزانی ل گه‌ل شاندا یاوه‌را د گه‌ل دا گه‌هشتنه‌ به‌غدا و ل ئه‌نجوومه‌نێ وه‌زیرانێ عیراقێ و ژ لایێ (عادل عه‌بدولمه‌هدی) سه‌رۆك وه‌زیرانێ عیراقێ پێشوازیه‌كا گه‌رم لێ هاته‌ كرن كو فه‌رشێ سۆر هاتبوو دانان، ب راستی ژی چوونا بارزانی بۆ به‌غدا هه‌می خه‌لكێ كوردستانێ و عیراقێ دلخۆشكر، ب تنێ ئه‌و جاش و خوه‌فرۆش نه‌بن ئه‌ڤێن هه‌ر لس ه‌ر جاشاتیا خوه‌ د به‌رده‌وام و ل دژی سه‌رخه‌بوونا كوردستانێ بوون.
د ڤێ سه‌ردانێ دا و شێوازێ پێشوازیكرنا مه‌رجه‌عێ كوردان دیاربوو بێ بارزانی هه‌رێما كوردستانێ ب تایبه‌تی و كۆمارا عیراقێ ب گشتی ب رێڤه‌ ناچیت و ل ئاریشان قورتال نابیت.
یا سه‌یر د ڤێره‌ دا ئه‌وه‌ كو به‌ری ساله‌كێ حوكمه‌تا عیراقێ داوا دادگه‌كرنا سه‌رۆك بارزانی دكر ب ئه‌گه‌ر هندێ كو داخوازا سه‌رخوه‌بوونا ملله‌تێ كوردا كری ریفراندۆم ئه‌نجامدا ب سه‌ركه‌ڤیت.
ئه‌ڤرۆ ژی سه‌رۆك وه‌زیرێن عیراقێ د خۆشیێن ئاماده‌بوونا بارزانی باوه‌رنه‌دكر.
هه‌روه‌سا سه‌روك وه‌زیرێ عیراقێ (عادل عه‌بدولمه‌هدی): بارزانی ب ئه‌ندازیارێ عیراقا فیدرال و دیمۆكراسیه‌تێ ب ناڤكر و راگه‌هاند و گۆت:ـ دێ هه‌می ئاریشه‌یێن هه‌ولێر و به‌غدایێ چاره‌سه‌ركه‌ین.
بێگومان هه‌ر جهه‌كێ بارزانی بچیتێ دێ ئاڤه‌دان بیت و چ ئاریشه‌ نامینن.
هه‌روه‌سا سه‌رۆك و وه‌زیرانێ عیراقێ سه‌ردانا سه‌رۆك بارزانی ب دیرۆكی ناڤكر و گۆت ژی بارزانی ئه‌ندازیارێ عیراقا نوو و فیدرال و دیمۆكراسیێ یه‌، به‌ریا نها په‌یوه‌ندیێن هه‌ولێر و به‌غدا هاتینه‌ تێكدان و هنده‌ك كه‌س هه‌بووینه‌ كو مه‌ره‌ما وان تێكدانا ره‌وشێ بوویه‌، لێ ب پشته‌ڤانیا بارزانی دێ هه‌می ئاریشه‌یێن هه‌ولێر و به‌غدایێ چاره‌سه‌ركه‌ین و په‌یوه‌ندیان دێ دێ ڤه‌گه‌رینه‌ڤه‌ بۆ ره‌وشا ئاسایی.
مه‌ خه‌لكێ كوردستانێ باوه‌ریه‌كا گه‌له‌كا مكوم و ته‌ماما ب سه‌رۆكێ خوه‌ هه‌ی، هه‌تا سه‌رۆكێ مه‌ نه‌چیته‌ به‌غدا كه‌س به‌حسێ مافێ كوردان ناكه‌ت، هه‌تا ئه‌و ده‌مێ مافێن كوردستانێ ل وێرێ بن، دڤێت سه‌رۆك بچیت و گه‌نگه‌شه‌ و شه‌رێ وه‌رگرتنا ماف و مانه‌ڤا ده‌ستكه‌فتیێن ملله‌تێ كورد بكه‌ت، هه‌روه‌سا به‌غدا ژی بۆ چ جاش و خوه‌فرۆش و كه‌سێن بێ بها ب جێهناهێلین.
هندی ل بیرا من دهێت و دهێته‌ به‌حسكرن هه‌می ده‌مان سه‌رۆكێ مه‌ كوردان كارێ كری بۆ بده‌ستڤه‌ئینانا ده‌ستكه‌فتیێن كوردان و ژ هه‌ولدان و پێكۆلكرنێ رانه‌وه‌ستایه‌ ئارمانجا بارزانی خزمه‌تكرن و پێشخستنا كوردستانێ بوویه‌ و ئازادی و سه‌رخوه‌بوونا هه‌رێما كوردستانێ كارێ سه‌ره‌كیێ بارزانی نه‌.
بۆ مه‌به‌ستا نیازپاكی و رازیكرنا مه‌رجه‌عێ كوردان سه‌رۆك بارزانی كو بچیته‌ ڤێ سه‌فه‌را به‌غدا، ئه‌نجوومه‌نێ نوونه‌رێن عیراقێ ب قانوونه‌كێ ته‌مامیا وان بریاران هه‌لدوه‌شینیته‌ڤه‌ ئه‌ڤێن عه‌بادی ل دژێ كوردان ده‌ركری. لێ ئه‌ڤه‌ ئێكه‌م ده‌ستكه‌فتیا ڤێ سه‌ردانێ یه‌، پشتی ڤێ چه‌ندێ كو هه‌لبژارتنان دووماهیك ب ژیانا سیاسیا ئه‌ڤانه‌ ئینا كو په‌نجا هه‌ره‌شێ ل كوردان دهه‌ژاند.
ئه‌ڤرۆ ژی دێ دووماهیێ ب بریارێن وا ئینیت ل سه‌ر ده‌ستێ سه‌رۆك و پێشمه‌رگێ كورد و كوردستانێ، له‌وما ئه‌ڤا روون و ئاشكرایه‌ كو پێنگاڤێن سه‌رۆك بۆ سه‌ر ئێخستنا ریفراندۆم و ب ئه‌نجام گه‌هاندنا وێ یه‌، ده‌رئه‌نجاما ڤان پێنگاڤا ژی زۆر د روون و ئاشكرانه‌ و دێ د ماوه‌یه‌كێ كێم دا ئه‌م هه‌می بخوه‌بینین.
(عادل عه‌بدلمه‌هدی) سه‌روك وه‌زیرانێ عیراقێ بۆ رێبه‌رێ نه‌ته‌وا كورد سه‌رۆك بارزانی دبێژیت :ـ بارزانی ئه‌ندازیارێ پرۆسه‌یا بنیاتنانه‌ڤا په‌یوه‌ندیان بوویه‌، نه‌ك ب تنێ ل عیراقێ به‌لكو ل ڤێ ناوچه‌یێ و هه‌می جیهانێ ژى دا.
و دبێژیت ژی شه‌ره‌فمه‌ندین ب سه‌ردانا مسعود بارزانی بۆ به‌غدا بارزانی مه‌زنتره‌ ژ هندێ كو پێناسا وی بكه‌ین، ئه‌و خه‌باتكاره‌كێ دێرینه‌، هه‌تا چیایێن كوردستانێ ژی بارزانی باش دناسن، كو سه‌ركردایه‌تیا پرۆسه‌یا گوهۆینا و به‌ر ب دیمۆكراسیبوونێ ل عیراقێ دكر بۆ ژناڤبرن و هه‌رفاندنا دكتاتۆریێ.
سه‌رۆك بارزانی خه‌بات و خزمه‌تا ل پێناڤ گه‌لێ عیراقێ و گه‌لێ كوردستانێ یا كری.
دگۆت ژی مه‌ پێشوازیا ل رێبه‌ره‌كێ مه‌زن كری، ئه‌و كه‌سه‌كه‌ هه‌می سیفه‌تێن سه‌ركردا یێن تێدا رێزه‌كا زۆرا هه‌ی.
ب راستی دڤێت ئه‌م هه‌می كورد ل هه‌ر جهه‌كێ جیهانێ بین خوه‌ سه‌ربلند ببینین كو بارزانی سه‌رۆكێ مه‌یه‌ و شانازیێ پێ ببه‌ین.

16

دلۆڤان ئه‌مجه‌د بارزانی

پێكڤه‌ژیان و ته‌ڤایی، وه‌كهه‌ڤی و ئازادیا هه‌می دین و ئۆل و مه‌زهه‌بان بێ جوداهی دبن سیبه‌ڕا ئێك سه‌رۆك و ئێك ئالا دا ل هه‌ڕێما كوردستانی دا دژین. هه‌رێما كوردستانی جهێ پێكڤه‌ژیانێ یه‌ كو گه‌له‌ك ئایین و نه‌ته‌وه‌ تێدا دژین وه‌كی (ئێزیدی، مۆسلمان، توركمان، ئه‌رمه‌نی، عه‌ره‌ب، كاكه‌یی كلدان و ئاشۆری و … گه‌له‌كێن دی)، هه‌روه‌سا د به‌رێ دا جوهی ژی ل كوردستانی هه‌بوون هه‌می پێكڤه‌ وه‌كی خووشك و بڕایان د خۆشی و نه‌خۆشیان دا پشكدار دبوون بێ جوداهی كار كریه‌ و به‌ڕه‌ڤانی ژ ئاخا پیڕۆزا كوردستانێ دكر. كوردستان سیمبۆلا ئاشتی و پێكڤه‌ژیانێ بوو ل به‌ڕێ دا و هه‌تا نها ژى هه‌ر وه‌كی خۆیه‌، لێ به‌لێ پشتی هاتنا چه‌كدارێن ده‌وله‌تا ئیسلامی یا ب ناڤێ داعش و ب ڕه‌نگه‌كێ زۆرێ دڕندانه‌ هێڕش كڕه‌ سه‌ر چه‌ند ناڤچه‌یێن كوردستانێ داگیركرن و وێڕان كڕن. ئاڕمانجا وان ژناڤبڕن و بنبڕ كرنا كوردیێن ئێزیدی ب تایبه‌تی و كوردستانێ ب گشتی بوو، هه‌روه‌سا ئارمانجا وان ل داگیركڕنا “شنگالێ” و ناڤچه‌یێن ده‌وروبه‌رێن شنگال ژناڤبڕن و كۆمكۆژكڕنا كوردێن ئێزیدی بوو، به‌س ژبه‌ر هندێ كو كوردن و ئێزیدینه‌. ڕێژه‌یه‌كا زۆرا زه‌لام و زاڕۆیان ب ڕه‌نگه‌كێ زۆرێ هۆڤانه‌ كوشتن و بنئاخكڕن، د هه‌مان ده‌م ژی دا ب هه‌زاران كه‌چ و ژنێن كوردێن ئێزیدی ل گه‌ل خوه‌ برن و ل بازاران كڕین و فرۆتن پێ دهاته‌ كڕن، هه‌روه‌سا ل ئه‌میڕێن داعشێ دهاتنه‌ ماره‌كرن و ب زۆرێ دینێ ئیسلامی ل سه‌ر دهاته‌ سه‌پاندن. دڤێت وێژی ژبیر نه‌كه‌ین كو پێشمه‌ڕگه‌ێن قاڕه‌مانێن كوردستانێ ب سه‌رپه‌رشتیا سه‌رۆكێ هه‌رێما كوردستانێ “مسعوود بارزانی” رۆله‌كێ به‌ڕچاڤ گێڕا ل ئازادكرن و رزگاركڕنا كوردێن ئێزیدی، كو ب هزاران كه‌س ئاواره‌یێ چیایی شنگالێ ببوون چه‌ند ڕۆژه‌كا مه‌نه‌ د ناڤ چیای دا بێ نان و ئاڤ گه‌له‌ك ژبرسان و تێنان دا مرن، د وی ده‌می دا هێزێن پێشمه‌ڕگێن قاڕه‌مان نه‌راوه‌ستان هه‌تا گه‌هشتینێ و رزگار كڕین. ب راستی كوردێن ئێزیدی گه‌له‌ك نه‌هامه‌تی و ده‌رده‌سه‌ری دیتن، ژ به‌ر هندێ یا فه‌ره‌ بێژم ژبه‌ر ڤان تیرۆرستێن داعش و وێڕانكڕنا ده‌ڕبه‌ده‌ركرنا كوردێن مه‌ یێن ڕه‌سه‌ن ل سه‌ر زێدێ بابۆ باپیڕێن وان هه‌می ئاواره‌ بوونه‌ ناڤچه‌یێن دیێن كوردستانێ، هه‌روه‌سا ڕێژه‌یه‌كا زۆرا خه‌لكێ قه‌ستا وه‌لاتێن بیانی كر ب تایبه‌تی ئه‌لمانیا كو ب قاچاغی خوه‌ گه‌هاندنه‌ ده‌رڤه‌ هه‌می ڕێبێن بتڕس و گڕان دگرتنه‌ به‌ر به‌س دا ل ڤێ زه‌لاما چه‌كداڕێن ده‌وڵه‌تا ئیسلامی رزگارببن و بگه‌هنه‌ ئه‌ورۆپا، ب سه‌دان زارو و گه‌نج و پیڕ د ده‌ریایا ئیجه‌دا نقۆم بوون و هه‌تا نها ژی بێ سه‌روشوونن. ڕێژه‌یه‌كا زۆرا كوردێن ئێزیدی ژی نها ل كوردستانێ مانه‌ و مل ب ملێ پێشمه‌ڕگا به‌ڕه‌ڤانیێ ژ ئاخا پیڕۆزا كوردستانێ دكه‌ن بێ جوداهی، چونكی كوردستان وه‌لاتێ هه‌مووانه‌. هه‌روه‌سا د داموده‌زگه‌هێن حوكمه‌تێ ژی دا هه‌می نه‌ته‌وه‌ و ئاین پشكداڕن و پێكڤه‌ كاردكه‌ن بۆ پاڕاستن و پێشكه‌فتنا كوردستانێ، د په‌رله‌مانی دا ل ئه‌نجوومه‌نێ دا ژ هه‌می داموده‌زگه‌هێن حكومی و حزبی دا هه‌می نه‌ته‌وه‌ و ئاینێن ل كوردستانێ دا دژین بێ جوداهی پشكدارن و هه‌ر ئێك كارێ خوه‌ بڕێڤه‌دبه‌ت. كوردستان هه‌ر ژ به‌رێ دا جهێ پێكڤه‌ژیانێ بۆیه‌ هه‌می پێكڤه‌ د به‌خته‌وه‌ر و خۆشبه‌خت بوون د هه‌می هه‌لكه‌فت و بیره‌وه‌ریان ل گه‌ل ئێك بوون هه‌می ئایین و نه‌ته‌وه‌ و ئۆل تێكه‌لی ئێك دبن، ژیان ب هه‌می ڕه‌نگان و پێكهاته‌یان یا خۆشه‌، له‌وما دێ بێژم كوردستان و هه‌می ڕه‌نگێن ژیانێ.

31

دلۆڤان ئه‌مجه‌د بارزانى
ژیان ل ڤی وه‌لاتێَ ئه‌م تێدا دژین، هه‌روه‌كو رۆژ بۆ رۆژێ یا نه‌خۆش دبیت و گه‌له‌كا ب زحمه‌ته‌ ئه‌ز نزانم كا به‌خت و چاره‌نڤیسا مه‌یا وه‌سایه‌ و ژ ده‌ف خودایێ مه‌زن ئه‌ڤ نه‌خۆشیه‌ بۆمه‌ هاتینه‌ یان هنده‌ك كه‌سان ژیان ل كوردستانا من به‌ر ب ژناڤچوونێ ڤه‌بریه‌.
راستی مخابن ئه‌ڤ ملله‌تێ هندێ دلسۆز و باش و ب كه‌رامه‌ت وه‌سا بهێته‌ ره‌زیلكرن و مافێن وان بهێنه‌ پێشێلكرن.
هه‌تا وی راده‌ی كو رێیێن وه‌سا سه‌خت و دژوار دگرنه‌ به‌ر و دزانن ژ ٩٠% ده‌ربازبوونا وان نینه‌ و هه‌ر به‌ر ب وێ رێیێ دچن بۆچی؟ پێخه‌مه‌ت چێ؟
پێخه‌مه‌ت هندێ دا بگه‌هنه‌ وێ ژیانێ ئه‌وا هه‌ژی وان و بگه‌هنه‌ وی وه‌لاتی ئه‌وێ مافێ وان ب دروستی بده‌تێ، چونكی مرن و ژین د ڤێ ره‌وشا نها ئه‌م تێدا وه‌كی ئێكن و چ جوداهی نینه‌.
رۆژانه‌ ئه‌م ب ساخی یێن دمرین و دبینین و روودانا ڤان كاودان ئه‌ڤێن ئه‌م ب چاڤێن خوه‌ دبینین.
كا چاوا بێرێزی و پێشێلكرنا مافان به‌رامبه‌رمه‌ دهێنه‌ كرن.
ب تایبه‌تی خوه‌نده‌ڤانان چ بها نینه‌ ل وه‌لاتێ من.
چ گرنگیه‌ك ب باوه‌رنامێ ناهێته‌دان، ب ره‌نگه‌كێ گشتی دامه‌زراندن نه‌مایه‌.
بلا نه‌هێینه‌ دامه‌زراندن به‌لێ كار ل كه‌رتێ تایبه‌ت ژی نینه‌ و بۆ گه‌نجان ناهێته‌ ره‌خساندن دڤێت رێیه‌چاره‌یه‌ك هه‌بیت دا خه‌لكێ مه‌ بشیت كار بكه‌ت چونكی د ناڤ مه‌دا ل هه‌رێمێ مه‌ گه‌له‌ك گه‌نج و كه‌سێن زیره‌ك و دانا یێن هه‌ین زۆر پێگه‌هشتی خودان هزر و بیرێن باشن تشتێ نوو و ب مفا یێ ل ده‌ف وان هه‌ی، به‌لێ مخابن چاوا بكاربینن ب چ رێك بێ پشته‌ڤانی ب راستی ئه‌ڤه‌ كاره‌ساته‌.
ئه‌رێ چاوا بژین و ب چ بژین؟
هه‌می ته‌مه‌نێ مه‌ چوو هه‌تا بووینه‌ خودان باوه‌رنامه‌، لێ به‌لێ مخابن باوه‌رنامێ ژی چ بهایێ خوه‌ نینه‌.
ب كورتی و دروستی ئه‌م هزر دكه‌ین كو مه‌ چو پاشه‌رۆژ ل ڤی وه‌لاتی نینه‌.
ئه‌گه‌ر مرۆڤ ژی یێ بێ پاشه‌رۆژ بیت وه‌كو مرنه‌كێ یه‌.
ب راستی گه‌له‌كا نه‌خۆشه‌ مرۆڤ یێ بێ كار بیت و چ ل ژیان و پاشه‌رۆژا خوه‌ نه‌زانیت.
هیڤیدارم حوكمه‌تا هه‌رێما كوردستانێ كار بكه‌ت و هنده‌ك پرۆژان دابنیت دا رێژا بێكاریێ كێم ببیت و گه‌نجێن مه‌ژی ببنه‌ خودان كار.

40

دلۆڤان ئه‌مجه‌د بارزانى
هێشتا برینا 16 ئوكتوبه‌رێ ساخنه‌بوو یا نوو بوو ژبۆ مه‌ خه‌لكێ كوردستانێ ب گشتی و كه‌ركووكا خۆراگر ب تایبه‌تی.
جاره‌كا دی ئه‌ڤان هه‌ر خیانه‌تا خوه‌ كر و هه‌ر به‌رده‌وامن ل سه‌ر جاشاتیا خوه‌ و بریارا ل قاسم سوله‌ێمانی وه‌ردگرن، چونكێ ئه‌و چو جاران ل گه‌ل سه‌ربه‌خوه‌یا كوردستانێ نه‌بووینه‌ وه‌كی به‌ری نوكه‌ ژی مه‌دیتی چه‌ند كاندیدێن دیار یێن ئێكه‌تیێ ل دژێ كوردان به‌رگری ژ عیراقێ دكر.
بلا عیراقه‌كا ئێكگرتی و ئێكرێزیا عیراقێ پیرۆزێ ئێكه‌تیا نشتیمانی بیت چونكی وان ئێك پارچه‌یا عیراقێ دڤێت.
هه‌روه‌سا پارتی دیمۆكراتی كوردستانێ هیڤیا وێ ئه‌وه‌ كوردستان ببیته‌ ده‌وله‌ت و ژ عیراقێ جودابین و ب سه‌ربه‌خوه‌یی بژین، چونكێ پارتی بنده‌ستی و جاشایه‌تی چو جاران قه‌بوول نه‌كریه‌ و قه‌بوول ژی ناكه‌ت.
مه‌ كوردستانه‌كا ئێكگرتی و ئێك پارچه‌ دڤێت نه‌ك عیراق.
به‌س د ڤێره‌ دا پارتی دیمۆكراتی كوردستان ژی یا شاشبوو چونكێ نه‌دبوو وه‌سا ب ساناهی باوه‌ریا خوه‌ لایه‌نێ دى ئینا با پشتی 16 ئوكتوبه‌رێ ئه‌و خیانه‌تا مه‌زنا به‌رامبه‌ری ملله‌تێ كورد كری.
پارتی هندی هندا نیازپاك و دلسۆز و راست و دروسته‌ به‌ر هندێ دڤێت هه‌می تشت ب ئاشتی و لێك تێگه‌هشتن چاره‌سه‌ربن.
مه‌زنا یا گۆتی: “ئه‌و كه‌سێ گرت ب شیری به‌رناده‌ت ب پیری “.
ئه‌و حزبێن خیانه‌ت ب شیری یا گرتی و باش بزانن ژی چو جاران به‌رناده‌ت خوه‌ ب پیری ژی.
دڤێت ئه‌م خه‌لكێ كوردستانێ ژی بخوه‌ باش بزانین و تێبگه‌هین كا كێژ پارت و لایه‌ن د به‌رژه‌وه‌ندیا كوردستانێ دایه‌ و بۆ كوردستانێ كاردكه‌ت ئه‌م ل گه‌ل وی لایه‌نی دابین.
به‌س تشتێ سه‌یر د ڤێره‌ دا ئه‌ز نزانم به‌ربژارێ خوه‌ بۆ سه‌رۆك كۆمارێ عیراقێ كرى د وی ده‌می دا كو كه‌سه‌كه‌ ژمه‌ هه‌میان ب چاڤێ خوه‌ دیت نه‌شیا سه‌رۆكاتیا پارته‌كا بچووك ژی بكه‌ت ڤێجا دوورا سه‌رۆك كۆماری یه‌.
به‌س هیڤیا ڤانه‌ به‌س كورسی و پۆسته‌ وه‌كی سه‌رۆكێ به‌ری نها یێ كۆمارا عیراقێ.
هه‌تا نها ژی بلا ئێك بێژیت فلان شۆل یان كارێ بۆ هه‌رێما كوردستانێ كری د ڤان سالێن سه‌رۆك كۆماری كری چ كریه‌؟ چنه‌ كریه‌…!!
وه‌كی گوله‌كا بێ بهێن بوو چ فایده‌ بوو كه‌سێ نه‌بوو.
ل دووماهیێ بلا ئه‌م پسیاره‌كێ ژ خوه‌ بكه‌ین:ـ
ئه‌رێ ئه‌و ئێكه‌تیا كه‌ركووك فرۆتیه‌ عه‌ره‌ب و شیعا وه‌سا ب ساناهی چاوا پۆستێ سه‌رۆك كۆماری وه‌رناگریت؟ ئه‌رێ بێژنه‌ من دێ چاوا دێ پارته‌كێ كه‌نه‌ سه‌رۆك كۆمار كو هه‌ول و كار بۆ دروستكرنا ده‌وله‌ته‌كا سه‌ربه‌خوه‌ دكه‌ت دڤێت ل عیراقه‌كا ئه‌نفالچی و زۆردار جودا ببینن.
ئه‌و ژی پارتی دیمۆكراتی كوردستانه‌ خودان هێز و خه‌مخۆڕا ملله‌تێ كورده‌.

9

دلۆڤان ئه‌مجه‌د بارزانى
ئه‌ز دێ ل ده‌سپێكێ به‌حسێ ده‌سه‌لاتدار و زه‌نگین و پله‌دارێن رۆژهه‌لاتا ناڤین ب گشتی و عیراقێ و هه‌ڕێمێ ب تایبه‌تی كه‌م.
ئه‌گه‌ر مه‌ گۆت زه‌نگین یان ده‌سه‌لاتدار یان پله‌دار و بالاده‌ست یان گه‌له‌كێن دی یێن وه‌سا رامانا وێ ئه‌وه‌ كو مال و سامان و پاره‌كێ بێ هه‌ژمارێ هه‌ی و یێن ده‌ستێن وان دا، به‌س كا دا ته‌ماشای وان بكه‌ین كا ڤی مال و دارایی چاوا بكاردئینن و دمه‌زێخن.
ــ ئه‌رێ ئه‌ڤێن زه‌نگین چاوا پارێ خوه‌ بكاردئینن؟
ــ ب زۆری گرنگیێ ب چ دده‌ن …؟
ــ ئه‌ڤ ده‌سه‌لاتدار و زه‌نگینه‌ زۆرتر ب دووڤ چ ڤه‌نه‌؟
دێ ب ره‌نگه‌كێ تێكه‌ل و كورت به‌رسڤا ڤان پسیاران ده‌م:
ئه‌گه‌ر ئه‌م هزر د ڤان زه‌نگین و ده‌سه‌لاتدار و ئه‌ڤێن خودان داراییه‌كێ زۆر دا بكه‌ین، دێ بۆ مه‌ دیار بیت كو ڕێژه‌یا (95%) ژ سه‌دێ گرنگیێ دده‌نه‌ سێ تشتان ئه‌و ژی:
1ـ ماله‌كا جوان و سه‌رنجراكێش.
2ـ كچكێن جوان و نازك.
3ـ ئۆتۆمبێل یێن ب بها گران و خوارنێ.
ئه‌گه‌ر ئه‌م بچینه‌ سه‌ر راستیێ ئه‌ڤ هه‌رسێ تشته‌ نه‌ د وی ئاستی دانه‌ كو هند گرنگی پێ بهێته‌دان، نابێژم باش نینه‌ و چنینه‌ نه‌ دڤێت هه‌بن.
لێ به‌لێ تشتێ ل ڤان گرنگتر و ب بهاترێ هه‌ی ده‌سه‌لاتدار و زه‌نگینێن رۆژهه‌لاتا ناڤین ب گشتی و هه‌ڕێما كوردستانێ ب تایبه‌تی كو هه‌می مال و سامانێ خوه‌ تێدا بمه‌زێخین و بكاربینین.
هه‌كه‌ هاتوو ڤان ده‌وله‌تێن جیرانێن هه‌رێما كوردستانێ ده‌رگه‌هێن سنۆری یێن خوه‌ ل سه‌ر هه‌ڕێمێ گرتن و نه‌هێلا چ تشته‌ك داخلێ هه‌ڕێمێ بیت، پاشی دێ چ رووده‌ت ئه‌ڤ سێ تشته‌ دێ چ كه‌ن دێ چ گرنگیا خوه‌ هه‌بیت؟.. هیچ.!
له‌وما من دڤێت بێژم یا باش ئه‌وه‌ ئه‌ڤ ده‌سه‌لاتدار و زه‌نگین و پله‌دارێن حوكمه‌تێ وی مال و سامانی و دارایێ خوه‌ د ڤه‌كرنا كۆمپانیێن وه‌به‌رهێنانێ و چاندنا به‌رووبومێ كشتوكالی و ڤه‌كرنا كارگه‌ه و كۆمپانیێن وه‌سا كو هه‌می پێدڤیێن ملله‌تێ مه‌ پێ بهێنه‌ دابینكرن، دا چاڤێن كه‌سێ ل به‌رووبوم و ئالاڤ و داهێنانێن ده‌وله‌تێن جیران و بیانی نه‌بیت هه‌می تشت لێ بهێنه‌ دروستكرن (made in Kurdistan) بن و بێ منه‌تێ ده‌وله‌تێن دی، هه‌روه‌سا ئه‌گه‌ر هاتوو ده‌رگه‌هێن سنووری ژی ل سه‌ر مه‌ هاتنه‌گرتن د ووی ده‌می دا دێ تشته‌كێ ئاسایی بیت و كارتێكرنێ ل وه‌لاتی ناكه‌ت و چ ژێ كێم نابیت.
له‌وما یا فه‌ره‌ گرنگیه‌كا باش ب هه‌می ڤان كارگه‌هو كۆمپانی و پرۆژان بهێته‌دان.
ئه‌ڤه‌ گه‌له‌كا باشه‌ بۆ هه‌ڕێمێ ب تایبه‌تی و عیراقێ ب گشتی، چونكێ دێ بیته‌ ئه‌گه‌رێ نه‌هێلان یان كێمبوونا قه‌یرانا ئابووری ل سه‌ر هه‌ڕێما كوردستانێ.
ئه‌گه‌ر بێمه‌ سه‌ر زه‌نگین و ده‌سه‌لاتدارێن ده‌وله‌تێن بیانی ئه‌و به‌روڤاژی زه‌نگین و ده‌سه‌لاتدارێن روژهه‌لاتا ناڤین.
ئه‌ڤ ده‌وله‌تێن بیانی ئه‌گه‌ر ئه‌م ته‌ماشا بكه‌ین یا دیار و پێش چاڤه‌ كو هه‌می به‌رهه‌م و داهێنانێن وان هه‌ریێن وه‌لاتێ وان بخوه‌نه‌ ئه‌و بخوه‌ هه‌می تشتێ پێدڤی چێدكه‌ن. هه‌روه‌سا فرێ دكه‌نه‌ ده‌وله‌تێن دی ژی.
زه‌نگین و ده‌سه‌لاتدارێن وان هه‌می مال و سامان و پاره‌ی د ڤه‌كرنا كارگه‌هێن جۆراو جۆر و كۆمپانیا و چاندنا به‌رووبومی و گه‌له‌ك تشتێ دی دا دمه‌زێخن.
هه‌تا وی ڕاده‌ی كو یێ هنده‌ك داهێنانان دكه‌ن د هزرا مه‌ژی دا نینه‌ و ئه‌م پێ سه‌رسام دبین.
هه‌روه‌سا چ قه‌یران ژی نه‌شێن كارتێكرنێ ل وه‌لاتێ وان بكه‌ن و خه‌لكێ وان زۆر ب باشی دژین سه‌ره‌رای هندێ ژی كو ڕێژا ئاكنجیێن وان ده‌ه جارا ژی پتری ده‌وله‌تێن رۆژهه‌لاتا ناڤینن.
ئه‌ڤه‌ ژی وێ چه‌ندێ بۆ مه‌ دیار دكه‌ت كو ئه‌ڤ ده‌وله‌ته‌ سیسته‌مێ برێڤه‌برنێ دا گه‌له‌ك زیره‌ك و دانا و شاهره‌زانه‌.
سامان و داراییێ خوه‌ د تشتێ بێ مفادا نامه‌زێخن.
هیڤیدارم ئه‌ڤ زه‌نگین و حوكمه‌ت و ده‌سه‌لاتدارێن رۆژهه‌لاتا ناڤین ب گشتی و هه‌ڕێما كوردستانێ ب تایبه‌تی چاڤ ل ڤان ده‌وله‌تێن پێشكه‌فتی بكه‌ن دا بشێن ڤان ئاریشا چاره‌سه‌ر بكه‌ین و نه‌هێلین.
ئاریشا هه‌ڕێما كوردستانێ ئه‌وه‌ نزانن ڤی دارایی بكاربینن، چونكێ ژلایێ دارایی ڤه‌ ئه‌م ژ هه‌میان زه‌نگینترین به‌س نه‌زانین د سیسته‌مێ بكارئینانێ دا ئه‌مێن به‌ر ب قه‌یرانێ ڤه‌ برین.
ئه‌گه‌ر نه‌ ئه‌م یێن د ناڤ خه‌زینێ دا زێرێ ڕه‌ش، ئاخا عیراقێ هه‌می “گازه‌” چه‌نده‌ها بیر و شه‌ریكێن گازێ یێن هه‌ین ل عیراقێ، ئه‌رێ ئه‌و داهاته‌ هه‌می كێڤه‌ دچیت چلێ دهێت.
ئه‌ز دێ پسیاره‌كێ ژ هه‌وه‌ كه‌م خۆنده‌ڤانێن هێژا هوون به‌رسڤێ بده‌ن:
ئه‌رێ بۆچی خه‌لكێ كوردستانێ د ناڤ گازێ دایه‌ و یێ بێ گازه‌ ژی..؟

35

دلۆڤان ئه‌مجه‌د بارزانى

به‌ربژارێن هێژا سۆز و په‌یمانێن مه‌زن نه‌ده‌نه‌ خه‌لكی كو جێبه‌جێكرنا وان د شیانێن هه‌وه‌ دانه‌بیت.
هه‌می لایه‌نان دڤێت ناما خوه‌ یا تایبه‌ت هه‌بیت هه‌روه‌سا هه‌ر به‌ربژاره‌ك نوونه‌راتیا پارتا خوه‌ دكه‌ت و زۆر ژى ئاسایه‌ به‌ربژار بێژن ئه‌م دێ به‌رنامێ پارتا خوه‌ جێبه‌جێكه‌ین، به‌لێ یا ژ هه‌میێ گرنگتر ئه‌وه‌ كو د په‌رله‌مانی دا ئێكگرتی و ئێك هه‌لۆێست بن، راسته‌ دڤێت پارتا وان و به‌رنامێ پارتا وان ل ده‌ف یا گرنگ بیت و ل دووڤ بچن به‌س دڤێت ب ڕه‌نگه‌كێ گشتی كار بۆ هه‌ڕێما كوردستانێ بكه‌ن.
زۆرا خراپه‌ به‌ربژار به‌رژه‌وه‌ندیێن گشتی بكه‌ته‌ قوربانی به‌رژه‌وه‌ندیێن تایبه‌تی یا پارتا خوه‌ به‌رۆڤاژی ڤێ چه‌ندێ دڤێت به‌رژه‌وه‌ندیێن تایبه‌تی بكه‌نه‌ قوربانی به‌رژه‌وه‌ندیێن گشتی.
به‌لێ ل وی ده‌می دا ئه‌گه‌ر بزانن ئه‌و به‌رژه‌وه‌ندیا گشتی بۆ ته‌ڤایا ملله‌تێ كورد یا باشه‌، چونكی هه‌می به‌ربژار دێ ب نوونه‌راتیا خه‌لكی ب تایبه‌تی وان كه‌سێن ده‌نگێ خودایێ دێ چنه‌ د ناڤ هۆلا په‌رله‌مانی دا.
له‌وما پێدڤیه‌ ئێك ده‌نگ بن هه‌ولا بجهئینانا وان هه‌می په‌یمان و سۆزێن دایه‌ خه‌لكی به‌ری ده‌نگدانێ بده‌ن و ببنه‌ جهێ ره‌زامه‌ندیا خه‌لكی د به‌رژه‌وه‌ندیا خه‌لكی دا كار بكه‌ن.
ل ڤێره‌ دڤێت ئه‌م هه‌می خه‌لك بزانین كا شۆلێ ئه‌ندام په‌رله‌مانی چیه‌ د په‌رله‌مانی دا؟، كا به‌ربژاری شاره‌زایی د چ وار دا هه‌یه‌ و تایبه‌تمه‌ندیا وی چیه‌ و دێ ل دووڤ وی بیاڤێ شۆل كه‌ت یێ ئه‌و تێدا شاره‌زا.
هه‌روه‌سا به‌ربژار ژی نابیت سۆزێن مه‌زن بده‌ته‌ خه‌لكی كو ئه‌م سۆر و سۆر دزانین كو ئه‌و نه‌شێت وێ سۆزێ جێبه‌جێ بكه‌ت.
له‌وما به‌ربژار بلا بارێ خوه‌ گران نه‌كه‌ت بلا وان سۆزان بده‌ت كو د شیانێن وی دا هه‌بن و بشێت ل هه‌مبه‌ر سۆزا خوه‌ ده‌ربكه‌ڤیت دا ئه‌و شه‌رم و زار نه‌بیت و خه‌لك ژی بێ هێڤی نه‌بن و په‌شیمان نه‌بن كو ده‌نگێ خوه‌ یێ دای.
من ل چاڤ پێكه‌فتنه‌كا تی ڤی یێ دا دیت یا خولا چووی یا هه‌لبژارتنا نوونه‌راتیا په‌رله‌مانی عێراقێ دا كو به‌حس ل دستوور و مووچه‌یا دهاته‌كرن.
من دڤێت ڤێ چاڤپێكه‌فتنێ ب نموونه‌ وه‌ربگرم، هه‌رچه‌نده‌ یا به‌ربژارێن نوونه‌راتیا په‌رله‌مانی عیراقێ بوو وان ئه‌ڤ چه‌نده‌ دگۆت به‌س من دڤێت دوباره‌ بكه‌مه‌ڤه‌ دا به‌ربژارێن په‌رله‌مانی هه‌رێما كۆردستانێ ڤێ شاشیێ دووباره‌ نه‌كه‌ن: نابیت به‌ربژار بێژیته‌ خه‌لكی ده‌نگێ خوه‌ بده‌نه‌ من و به‌حسێ دستووری بكه‌ت و بێژیت دێ ڤێ خالا دستووری جێبه‌جێ كه‌م، نه‌خێر چ به‌ربژاره‌ك یان لایه‌نه‌كێ سیاسی نه‌شێت خاله‌كا دستووری بتنێ جێ به‌جێ بكه‌ت.
ئه‌گه‌ر هه‌می لایه‌نێن سیاسی یێن هه‌می پارتێن كوردی پێكڤه‌ كار ل سه‌ر نه‌كه‌ن و نه‌بنه‌ ئێك.
هه‌روه‌سا یا چاره‌سه‌ركرنا مووچه‌یان كو بێژن دێ مووچێ فلان جهی یان باژێری چاره‌سه‌ركه‌ین، نه‌خێر ئه‌و ژی ب تنێ ناهێته‌ كرن چۆنكی په‌رله‌مان دێ ب زۆریا ده‌نگان بڕیاران په‌سه‌ند كه‌ت، لایه‌نه‌ك یان پاڕته‌ك یان به‌ربژاره‌ك ب تنێ نه‌شێت وان تشتان بكه‌ت، ل وی ده‌می دێ گه‌له‌ك ئه‌ندامێن پارتێن دی یێن عه‌ره‌بی نه‌رازی بن ل پێناڤ چاره‌سه‌ركرنا ئاڕیشێن هه‌رێما كوردستانێ و دانا مافێ خه‌لكێ هه‌ڕێمێ.
ل وی ده‌می دا دێ ب زۆریا ده‌نگان بڕیارا هێته‌ په‌سه‌ندكرن.
ژبه‌ر هندێ ئه‌م بۆ په‌رله‌مانێ عیراقێ و نها ژی بۆ په‌رله‌مانی هه‌رێما كۆردستانێ هه‌ر ته‌كه‌زیێ دكه‌ینه‌ سه‌ر ئێكگرتنێ چونكی ئێكگرتن سه‌رێ هه‌میێ یه‌.
بێ ئێكگرتنا هه‌می پارتان چ تشته‌ك ب ده‌ست مه‌ڤه‌ ناهێت، چوونا وان دێ یا بێ مفابیت و دێ وه‌كی ڕووبۆتا بن د ناڤ په‌رله‌مانێ دا لێ هێن، ل ده‌مێ بریاره‌ك دهێته‌ په‌سه‌ندكرن به‌س دێ ده‌ستێن خوه‌ بلند كه‌ن ئه‌و ژی د وی ده‌می دا ئه‌گه‌ر وا خیره‌تكر نه‌چووبنه‌ د هزرێن كویر دا.

36

دلۆڤان ئه‌مجه‌د بارزانى
كاره‌ساتا شنگالێ ئه‌وا ل 3/8/2014، ب سه‌رێ كوردێن ئێزیدی دا هاتی كو كاره‌ساته‌ك، تاوانه‌ك بوو هه‌تا نوكه‌ ژی د هزرا چ مرۆڤان دا نه‌بوو، تاوانه‌كا هندا مه‌زن به‌رامبه‌ری دیانه‌ته‌ك، نه‌ته‌وه‌كا بچووكا هه‌ڕێما كوردستانێ بهێته‌كرن، كو ئه‌و ژی كوردێن ئێزیدینه‌، هه‌روه‌سا یا ژ هه‌میێ گرنگتر كوردێن ڕه‌سه‌نن.
ئه‌گه‌ر ئه‌م بچینه‌ سه‌ر بنیاتێ كوردان، دێ دیرۆك بۆ مه‌ دیاركه‌ت كو ژ ئیزیدیاتیێ یا هاتی، له‌وما دڤێت رێز ل هه‌بوونا وان بهێته‌ گرتن.
ــ ئه‌ڤه‌ چار سال ب سه‌ر كاره‌ساتا شنگالێ دا ده‌ربازبوون، كو ب دڕنده‌ترین و داخبارترین كاره‌ساته‌ ب سه‌رێ ملله‌تێ مه‌یێ ئێزیدی دا هاتی، بێگومان ژی ئه‌ڤ برینا كوڕ چ جاران د دلێ مه‌ و هزرا مه‌دا ده‌رناكه‌ڤیت دێ هه‌ر مینیت برینه‌كا كوور، چونكی چو جاران ل پێش چاڤێن مه‌ ناچیت ئه‌ڤ تاوانا دژێ مرۆڤایه‌تیێ.
ــ هێرشا ده‌وله‌تا ئیسلامی یا ب ناڤێ “داعش” بۆ سه‌ر شنگالێ و ب دڕنده‌ترین كاره‌سات دهێته‌ هژمارتن كو د ڤان سالا دا هاتینه‌كرن، د ڤی ده‌می دا جیهان د بلندیا پێشكه‌فتن و پێشڤه‌چوونان دا بوو.
لێ مخابن ئه‌ڤ هووڤ و درنده‌ ب ناڤێ ئیسلامێ هاتن و ئه‌و بخوه‌ ژی دوور و دژێ ئیسلامێ بوون، هه‌ولدان ناڤێ ئیسلامێ ژی كێم بكه‌ن و ئه‌م هه‌می دزانین كا كویلێن ده‌ستێ كێ بوون و چ ده‌وله‌ت بوون.
هه‌ر ل ده‌سپێكا هاتنا وان بۆ كوردستانێ بوو، چونكی هاتن و هه‌ولا هه‌می ده‌وله‌تێن جیران و ئه‌وێن دی یێن رۆژهه‌لاتا ناڤه‌ڕاست ژناڤبرن و قیركرنا كوردانه‌ ب ئێكجاری، ئه‌گه‌ر ب وان بیت یێ كوردبیت ل سه‌ر روویێ عه‌ردی نامینیت، به‌س هزر و بیرێن وان د به‌تال و فاشلن، چونكی كورد چو جاران ب دووماهى نابن، هندی دنیا ژی هه‌بیت كورد دێ هه‌ر هه‌بن.
ــ لێ وان ڤێجارێ كوردێن مه‌ یێن ئێزیدی كرنه‌ ئارمانج وان دڤیا كوردێن ئیزیدی نه‌هێلن و ب ته‌مامی ژناڤببه‌ن، ب تنێ ژبه‌ر هندێ كو كوردن و ئێزیدینه‌.
بێگومان ژی ئه‌ڤا ب سه‌رێ كوردێن ئێزیدی دا هاتیه‌كرن جینۆسایده‌، ئه‌گه‌ر ئه‌م به‌حسێ هێرشا ل سه‌ر شنگالێ بكه‌ین، دڤێت بێژین جینۆسایدكرنا كوردێن ئێزیدی ژلایێ ده‌وله‌تا ئیسلامی ڤه‌ یا ب ناڤێ “داعش”.
ب راستی ئه‌و تشتێ ئه‌م كوردستانی هه‌می ئێشاندین و برینداركرین كو هندی د ژیانێ دابین ئه‌ڤ برینه‌ د دلێ مه‌دا ساخ نابیت دێ هه‌ر یا ئازریایی و كووربیت، ئه‌و ژی برنا كچ و ژنێن كوردێن مه‌یێن ئیزیدی بوون. ژبلی كوشتن و ژناڤبرنا چه‌ندین زه‌لام و زارۆیان ب ساخی بن ئاخكرن و ب دڕنده‌ترین شێوه‌ ئه‌شكه‌نجه‌دان، ب زۆری دینێ ئیسلامێ ب سه‌ردا دسه‌پاند، هه‌تا وی ڕاده‌ی ئه‌و كه‌سێ نه‌ببا موسلمان دكۆشتن و سه‌ر ژێ دكرن.
هه‌روه‌سا ب زۆری و زۆرداریێ شه‌هده‌ پێ دئینا و نڤێژ پێ دكرن، گوهۆرینا دیانه‌ته‌كێ ب دارێ زۆریێ ب راستی ئه‌و بخوه‌ ژی كاره‌ساته‌كا گه‌له‌كا مه‌زنه‌ د دیرۆكا جیهانی دا.
ــ هه‌روه‌سا چه‌ندین هه‌زار زارۆ و گه‌نج و پیر د چیایێ شنگالێ دا مان بێ نان و ئاڤ ژ برسان و ترسان و تێهنی بوونێ دا مرن و بوونه‌ قوربانی، هه‌تا هێزێن پێشمه‌رگێن قاره‌مان گه‌هشتینێ و رزگاركرین.
له‌وما پێدڤیه‌ ل سه‌ر مه‌ كو به‌حسا كاره‌ساتا شنگالێ دكه‌ین قاره‌مانی و مه‌ردایه‌تیا پێشمه‌رگا ژبیرنه‌كه‌ین كو وان هه‌می هه‌ولێن خودان بۆ ئازادكانا كوردێن ئێزیدی ئه‌وێن ل چیایێ دا مای و شیان ب زووترین ده‌م وانا رزگار بكه‌ن ب هه‌ر ڕه‌نگه‌كێ هه‌بیت.
ــ هه‌روه‌سا دڤێت ئه‌م خه‌لكێ هه‌ڕێما كوردستانێ ب گشتی و كوردێن ئێزدی ب تایبه‌تی هه‌رده‌م سۆپاسیا ده‌ڤه‌را به‌هدینان و خه‌لكێ دهۆكێ و ده‌وروبه‌ر بكه‌ین و چو جاران باشی و ئه‌ركێ وانێ مرۆڤایه‌تیێ ژبیرنه‌كه‌ین، چونكی وان ب هه‌می ڕه‌نگان ده‌رگه‌هێن مالێن خوه‌ و دلێ خوه‌ بۆ ئاوارێن شنگالێ و ده‌وروبه‌ر ڤه‌كرن و هه‌روه‌سا ده‌رگه‌هێن خواندنگه‌هان و مزگه‌فتان ژی هاتنه‌ ڤه‌كرن.
زۆرا ب زحمه‌ته‌ راستی ملله‌ته‌كێ ل سه‌ر ئاخا وان وه‌لاتێ وان زێدێ باب و باپیرێن وان ده‌ربه‌ده‌ر بكه‌ن و ل مال و حالێ وان بكه‌نه‌ ده‌رێ و مال و ملكێ وان تالان بكه‌ن، یا ژ هه‌میێ نه‌خۆشتر د ناڤ وه‌لاتێ خوه‌دا ببنه‌ ئاواره‌ و ئه‌و بخوه‌ خودانێن ڤی وه‌لاتی و ئاخێ بن.
ــ ئه‌ز بخوه‌ سه‌رێ رێز و ته‌قدیرێ و به‌ژنا خوه‌ دچه‌مینم بۆ هه‌می خێزانێن سه‌ربلندێن شه‌هید و قوربانیێن كاره‌ساتا شنگالێ ، بۆ وان هه‌می خه‌باتكار و قه‌هره‌مانان و هه‌می پێشمه‌رگا و شه‌رڤانا ئه‌ڤێن كو هه‌می هه‌ولێن خودایی و شه‌ڤ و رۆژێن خوه‌ كرینه‌ ئێك بۆ رزگاركرنا كه‌سوكارێن مه‌ یێن ئێزدی.
ئه‌ڤان كوردبوونا خوه‌ سه‌لماند، كورد هه‌می ئێكن بێجوداهیا دین و نه‌ته‌وه‌، ئه‌م هه‌می د ڤێ كوردستانێ دا وه‌كی برایان بووینه‌ و دێ هه‌ر مینین برا ژی.
سه‌رشۆڕی و شه‌رمه‌زاری ژی دێ هه‌ر به‌هرا دوژمن و نه‌حه‌ز و نه‌یارێن كوردستانێ بیت.

website security
WP Facebook Auto Publish Powered By : XYZScripts.com