NO IORG
Authors Posts by كۆڤان حسێن

كۆڤان حسێن

كۆڤان حسێن
187 POSTS 0 COMMENTS

75

پشكه‌كا زوَرا میدیا ده‌ڤه‌را سلمانیێ ب هنده‌ك سه‌ده‌مێن نه‌دیار گه‌له‌ك بانگا هندێ دكه‌ن كورد جاره‌كا دی به‌ره‌ف به‌غدا ڤه‌ بچن بوَ چاره‌سه‌ركرنا قه‌یرانێن خوه‌. وه‌ك بیژی به‌غدا سه‌رده‌مێ(هارون ره‌شیدی)یه‌. پری خه‌زینێن وێ زێرو مراری نه‌؟! ئه‌ف بانگكرنا بێ رامانا چوونا به‌غدا بێگومان یا ئاسای نینه‌. چوونا به‌غدا ئانكو بلند كرنا ئالایێ سپی به‌رامبه‌ری حوكمه‌ته‌كا فاشل و تایفی و پری كه‌رب و كین ده‌ر حه‌قێ خه‌لكێ كوردستانێ و سه‌ربوَرا وێ. راسته‌ ئاستێ ژیانێ سه‌خت و قوَرس بوویه‌. راسته‌ هێدی شه‌قامێ كوردی ب درویشم و هوزانا, تێرنابیت لێ بێگومان كورد هه‌تا وێ راستێ بێ هیڤی و بێ چاره‌ نه‌بویه‌ بوَ (نانی) قه‌ستا به‌غدا بكه‌تن. د ناڤ به‌را كوردا و به‌غدا دا كوَمه‌كا ئاریشان هه‌یه‌ و به‌غدا و لوَژیكێ حوكمڕانیێ ل به‌غدا هیج پروژه‌یه‌ك نینه‌ نه‌ك بوَ عێراقێ و نه‌ك ژبوَ كوردستانێ هه‌تا (بنێ گوهی) دگه‌نده‌لی و بێ په‌لێژانیێ دایه‌. ب چی لوَژیك د ڤێ قوناغێ دا ئه‌م (رهێن)خوه‌ راده‌ستی به‌غدا بكه‌ین؟! چ به‌رئاقلی و لوَژیك د هندێ دایه‌ به‌ره‌ف به‌غدا بچین؟! به‌غدا ئاماده‌ نینه‌ مافێن ده‌ستوری یێن كوردا مسوگه‌ر بكه‌تن, به‌غدا ب خوه‌ به‌رگومانه‌ كو ده‌ست ل قه‌یرانا ئابووریا كوردستانێ دا هه‌یه‌؟! سه‌ر باری بارێ ئابووریێ قوَرس و شه‌رێ تیروَرێ لێ هێشتا هند زاخ ل تاكێ كورد و ته‌خا سیاسیا وێ دا مایه‌ مه‌ بوَ مدهه‌ك دی ژی خوه‌ راگریێ ب هه‌لبژرێیت ژ هندێ كو بچیته‌ به‌غدا. به‌غدا هیج روَناهیێ و چاره‌یه‌ك ڤێ نینه‌ بوَ ئالۆزیێن خوه‌ هه‌تا كورد قه‌ستا به‌غدا بكه‌ن. ئه‌م راستی ئالۆزترین بارێ ئابووری بووینه‌ ژ پشتی سه‌رهلدانێ هه‌تا نوكه‌. كو وه‌سا ژ مه‌ دخازیت ل ڤێ قوَناغێ ب كێم ترین خوساره‌ت ده‌رباس بین و سه‌رخوَبوونه‌كا ئابووری هه‌تا ئه‌گه‌ر ب هه‌ژاری ژی بیت لڤێ قوَناغێ وه‌ك ده‌ستپێك ئاڤا بكه‌ین باشتره‌ ژ ته‌سلیم بوونێ بوَ به‌غدا. كو مسوَگه‌ر به‌غدا به‌ری شه‌رێ داعشێ نینه‌ و كاروانێ مه‌ بوَ سه‌رخوه‌بوونا سیاسی ب ئالۆزێن ئابووری نه‌هێته‌ راوستاندن. ئه‌م د ڤێ قوَناغا نازك دا پێدڤی ب خوَتكرنا گیانێ برایه‌تی و هاروكاری و پشته‌ڤانیه‌كا جڤاكی نه‌, هه‌تا سه‌ربلندانه‌ ژ ڤێ قه‌یرانێ قوَرتال ببین. یا ژ من ڤه‌ ئه‌ڤ قه‌یرانا ئابووری ژانا ژ دایك بوونا ده‌وله‌تێ یه‌. و خوه‌ راگرتنا مه‌ وه‌ك ملله‌ت مه‌زنترین وانه‌یه‌ بوَ نه‌حه‌زێن كوردا ب پێشیا هه‌میا به‌غدایا هه‌رفتی. چوونا به‌غدا ب كوردی و كورتی فنجانا ژه‌هرێ یه‌ كی ئاماده‌یه‌ ب ڤه‌خوَت؟!

227

ئه‌وا راست بیت، عه‌یبه‌ك مه‌زنه‌ مروَڤ ل وه‌لاته‌كێ(گاز و نه‌فتێ) و وه‌لاته‌ك پری رووبارێن ئاڤێ و وه‌لاته‌كێ هه‌موو ئه‌ردێ وی(بركانی) بكێرجاندنێ بهیت، وه‌لاته‌كێ پتر ژ (70%) خه‌لكێ گه‌نج و ده‌ستێ كاری و مرۆڤ ل ڤی وه‌لاتی فه‌قیر بیت. لێ د سه‌ر ڤێ جه‌ندێ هه‌مووێ دا، هه‌ر كه‌سێ پیجه‌كێ شاره‌زایێ(كوردوَلوَژیا) بیت و هه‌ر چنه‌ پیچه‌كێ گوهێ خوه‌ دابیته‌ ستران و لاڤژه‌ین فلوكلورێ كوردی دێ زانیت ده‌ردێ كوردا ژ كه‌ڤندا هه‌ژاری و نه‌داریه‌؟! هه‌ژاری (جێمكێ) تاكێ كورد بوویه‌؟! ژ ده‌ردێ نه‌بوونا ده‌وله‌تێ باوه‌رناكه‌م كوردا سه‌رده‌مه‌ك پری سه‌قامگیری یا ئابووری ده‌رباس كربیت؟! هه‌تا وێ رادێ كوردێن كه‌ڤن فه‌قیری ب عه‌یب نه‌زانیه‌؟! و گه‌له‌ك ژ (مه‌لایێن كوردا) دگوتن: “فه‌قیر ئه‌هلێ به‌حشتێنه‌”!! وه‌ك دیار ژ كه‌توارێ نوكه‌ ئه‌م و فه‌قیری دێ جاره‌كا دی بوَ مده‌هه‌كی و وه‌خته‌كی پێكڤه‌ بوورینین. پشتی فه‌قیری ل وه‌لاتی گه‌هشتی(3ونیف%)؟!ئه‌رێ قه‌ده‌را مه‌یه‌ ئه‌م و فه‌قیری ئێك و دوو (غه‌ریب)نه‌كه‌ین؟! یان ژبێ به‌رنامه‌یا مه‌یه‌ وه‌ك تاك و وه‌ك حوكمه‌ت؟! پاشی ب راستی ما ئه‌م فه‌قیرین؟! مه‌ وه‌لاته‌كێ ده‌وله‌مه‌ندێ هه‌ی؟َ! یان ئه‌م هه‌تا راده‌یه‌كێ ب تاك و حوكمه‌ت ڤه‌ ژ هش چووبین ڤان چه‌ند سالێن (پر پاره‌ییێ) مانه‌ ئه‌م بوین مه‌ مترا ئه‌ردی بری(1000)دوَلارا و پتر؟! مانه‌ ئه‌م بووین ب دووڤ ستایل و مودێلا كه‌فتین؟! و مه‌ قه‌نج بیرا هندێ نه‌ دكر گرنگ و گرنگتر هه‌یه‌ ل ژیانێ؟! باب و كالێن مه‌ ل ڤی وه‌لاتی ب سه‌ر به‌رزی و بێ بوَدجه‌ و مووچه‌ دژیان؟! ب هه‌ژاری به‌لێ ب ده‌رونه‌ك ئارم و دله‌ك ده‌وله‌مه‌ند؟! ئه‌رێ قه‌یرانا نوكه‌ ژبلی هه‌موو نه‌خوه‌شیا خوه‌ بوَ مه‌ وه‌ك بوَنده‌كێ ژی نینه‌؟! (گاز و غاز) بتنێ ملكێ مه‌ ڤان كه‌سا نینه‌ ئه‌وێن نوكه‌ دژین، به‌لكو ملكێ (جیلێن) پشتی مه‌یه‌ ژی؟! قه‌یرنا ئابووری كه‌تواره‌!! سه‌ده‌مێن وێ دزوَرن و ده‌رهاڤێژته‌یێن وێ ژی گه‌له‌كن. ژ هه‌ژاریێ ئاریشه‌ و ئالوَزیێن جڤاكی و بگره‌ كارێن خراب ژی په‌یدا دبن. و هنده‌ك دبێژن هه‌ژاری دایكا هه‌موو ئالوَزی و شه‌قیاتیا مروَڤایه‌؟! ئه‌ڤه‌ دوو سالێن پڕی (ته‌قه‌شف، شووتكگرێدان) مه‌ بوراندن و هێشتا ئه‌م یێ ل هیڤیا بهایێ په‌تروَلێ بلند ببیت؟! ئه‌م نه‌شیاینه‌ خوه‌ رازی كه‌ین كو ئه‌و روَژه‌ ب زه‌حمه‌ت بزڤڕنه‌ ڤه‌؟! ئه‌ڤه‌ ژیانه‌ و دڤێت ل گه‌ل رابهێن؟! هه‌ژاری و فه‌قیریێ پیڤه‌رێن خوه‌ هه‌نه‌. دبیت ئه‌م وه‌ك خه‌لكێ كوردستانێ نه‌ گه‌هشتینه‌ هندێ كو وه‌ك وه‌لاته‌كێ هه‌ژار بهێنه‌ نیاسین. چنكو هێشتا مه‌ هنده‌ك كارت هه‌نه‌ مه‌ وه‌ك پێدڤی ب كارنه‌ئیناینه‌ وه‌ك بكار ئینانا شیانا مروَڤێن خوه‌ ل وارێن پری به‌رهه‌م دا مینا چاندن و گیانداری و گه‌له‌ك پروَژێن دی یێن سڤك. لێ دبیت ئه‌م ژ خوه‌ بگرین و بێژین ئه‌م فه‌قیرین.. . مانێ كوردا یا گوتی: “ئه‌و ژی نه‌عه‌یبه‌”!!

121

هه‌یامه‌كه‌ باس باسێَ هنده‌ك پاكێجێن چاكسازیێ دهێته‌كرن. جوانه‌ حوكمه‌تا وه‌لاته‌كی پروَژه‌كێ چاكسازیێ هه‌بیت و كار بوَ بكه‌تن. لێ ل چ ژینگه‌ها سیاسی و چڤاكی دا چاكسازی هه‌م فه‌رن هه‌م ژی د به‌رهه‌م هێنه‌رن؟! ل وه‌لاتێ مه‌ (گه‌نده‌لی) به‌شه‌كه‌ ژ كولتوَرێ مه‌. میراتێ جڤاكیێ مه‌ (گه‌نده‌لیێ) دحه‌بینیت و زوَر پاساو و بهانه‌یان ژی ل بن ناڤێن جودا جودا دا په‌رده‌ پوَش دكه‌تن؟! ژماره‌كا زوَرا (گه‌نده‌لا) ل وه‌لاتێ مه‌(ماقیل و كه‌سێن ل پێشن) بوَ خوه‌ و (گه‌نده‌لیا)خوه‌ هارمونیكه‌ك جوان ئاڤا كریه‌. خرابتر ژ ڤێ ناسنامه‌كا سیاسی و یان ماركه‌كا (جیهانی) یان نیشانه‌كاَ (بازرگانی) ئافراندیه‌. چاكسازی ل وه‌لاتێ مه‌ دێ مین بتنێ پروَژه‌ و هنده‌ك پێنگاڤێن ساده‌؟ كه‌س دژی جاكسازیێ نیه‌ لێ ب مه‌رجه‌كی نه‌گه‌هیته‌ سنوورێ پاوانكریێ(حزبا و گروَپێن جڤاكی و.. .. هتد) ژ (حاشیا)ده‌سته‌لاتێ. دبیت حوكمه‌ت هنده‌ك پێنگاڤا د ڤی واری دا پاڤێژیت ل بن گڤاشتنا قه‌یرانا ئابووری دا. لێ مسوَگه‌ر باوه‌رناكه‌م چاكسازی یا بنه‌رتی و گشت گیر بیت ل وه‌لاتێ مه‌. نه‌ ژ نه‌زانینا مه‌یه‌ بوَ چاكسازیێ به‌لكه‌ ژ ترسا مه‌یه‌. ژ پروَژێ چاكسازیێ بخوه‌. دبیت ل ولاتێ مه‌(سازانه‌كا)سیاسی هه‌بیت بوَ ده‌ست برنێ ل هنده‌ك (سێكته‌رێن ) هه‌ستیار وه‌ك بوارێن (نه‌فت وگازا) و (ئه‌رد و خانیا) و (كوَمپانیێن مژادار)؟؟! هه‌ر پروَژه‌ك بوَ چاكسازیێ دڤیا ل ژینگه‌هه‌كا نوَرمالا سیاسی و حڤاكی دا بهێته‌ كرن. بوَ چاكسازیێ (پاكێجه‌كا) یاسایان هه‌بیت و ژ هه‌موویێ گرنگتر(ئیراده‌كا سیاسی) هه‌بیت. نه‌ك پروَژه‌كێ له‌زێ و ترسێ بیت ل بن گڤاشتنا هنده‌ك قه‌یرانا دابیت. حوكمه‌تا كوردستانێ مه‌زنترین ده‌ست كه‌فتنێن وێ ژ ڤان چاكسازیا ژ من ڤه‌ ئه‌وه‌ دانێ ب هندێ ده‌تن كو ئه‌ڤ وه‌لاته‌ پَیدڤی ب چاكسازیانه‌؟! ئه‌ڤه‌ ئاماژه‌كا باشه‌ و ره‌نگه‌ ده‌ستكه‌فت بیت ژی ل ڤێ قوَناغێ. كاره‌سات دا ئه‌و بیت حوكمه‌تێ ئینكارا هندێ بكربا كو هیج تشته‌ك ل ڤی وه‌لاتی پێدڤی ب چاكسازیێ نینه‌؟! ئه‌ڤا نوكه‌ دهێت گوتن ئه‌و ب خوه‌ باشه‌. چاكسازیێ ل (بیرا) مروَڤا دا دڤێت بیهَته‌كرن. دڤیا(مینبه‌رین مزگه‌فت و دێرا) و زانكوَ و خاندنا بنه‌ره‌ت بوَ چاكسازیێ بهێنه‌ سواركرن، هه‌تا(واسته‌كاری و به‌رتیل و به‌خشیش و شرینی و خاترانێ) ژ كولتوَرێ مه‌بن و جاكسازی ل كێم كرنا هنده‌ك موَچه‌ و ده‌رمالا نینه‌. به‌لكو ل بلندكرنا ئاستێ به‌رپرسیاره‌تیا جڤاكیه‌ ل ده‌ف ته‌خا ده‌سته‌لاتدار و كێم كرنا بوراێ گه‌ندل كاریێ یه‌ ل به‌ر سیبه‌را حزبا یان یاسای بهێته‌كرن.

155

ناكه‌ڤینه‌ په‌سنكرنا كه‌سایه‌تیه‌كا وه‌ك یا به‌رێز(مسعود بارزانی)كو بخوه‌ د ژیانا سیاسی دا فه‌رهه‌نگ و ماركه‌یه‌كا خوَمالیا سیاسه‌تكرنێ یه‌ ل درێژیا ژیێ خوه‌ دا. لێ ژبلی بارزانی هیچ سیاسیه‌كێ كوردی هندی بارزانی راستی ره‌خنێ و بوَهتانا نه‌هاتیه‌ ژ لایێ میدیا یا سیبه‌رڤه‌. هه‌رچی سیفه‌ته‌ك هه‌یه‌ ب بارزانی هاتیه‌ گوتن. هه‌تا راده‌یا (دكتاتوَریه‌تێ)لێ پرسیار ئه‌وه‌ بارزانی ب راستی دكتاتوَره‌ ؟! سیفه‌تێن دكتاتوَرا ل دورێن بارزانی هه‌نه‌؟! یان بارزانی ب خاندنا ناڤه‌ندێن سیاسێن دنیایی دا كه‌سه‌ك دیموَكراتخوازه‌ و هه‌موو ته‌مه‌نێ خوه‌ بوَ خزمه‌تا ملله‌تێ خوه‌ كریه‌ قوَربانی؟ چ بێ وه‌فایه‌كه‌ بارزانی راست هاتی ژ هنده‌ك لایه‌ن و كه‌ساڤه‌ بێ هیج بهانه‌ و سه‌ده‌مه‌كێ هیرشێ ب هه‌موو ره‌نگه‌ بكه‌نه‌ سه‌ر بارزانی بتنێ چنكو نه‌یاریه‌كا سیاسی و هه‌ڤڕكیه‌كا دیموَكراتی دگه‌ل بارزانی و حزبا بارزانی هه‌یه‌؟ ساله‌كه‌ و پتر بارزانی روَلێ(ماریشاله‌ك) سه‌ربازی دگێریت و دنیا هه‌موو رێزی ل وی گیانی دگریت، یێ د چه‌په‌رێن به‌هنگاریا درنده‌ترین گروَپ دا راوه‌ستای؟!چ بێ وه‌فایه‌كا كوردیه‌ هنده‌ك ده‌رهه‌قێ بارزانی دا دكه‌ن. زوَر جارا بارزانی و كورسیكا وی گه‌هشتینه‌ وێ رادێ كه‌س نه‌ (حه‌سیدیێ) پێ به‌ت و نه‌كه‌سێ دلێ خوه‌ بریه‌ وێ كورسیكێ؟! سه‌روَك بارزانی بو قورتال بوون ژڤێ قه‌یرانا سه‌روَكاتیێ هه‌موو رایا گشتی و حزبێن سیاسی ب (3) پێشنیارا ئاگه‌هدار كرن؟فه‌رموون لوَژیكێ سیاسیێ كوردستانێ به‌رسڤا بارزانی بده‌ن؟ بارزانی هه‌موو ئالی ب پارتی ڤه‌(بێ مننه‌ت )كرن؟! فه‌رموون كه‌سه‌كێ هه‌لبژێرن دا (گوَپالێ مارشیالیا شه‌رێ داعشێ) بده‌مێ؟! فه‌رموون كه‌سه‌كێ بدانن بلا ل سه‌رتاج و ته‌ختێن بارزانی ل به‌روَكێن شه‌ری (روونیت) بارزانی ب په‌یاما خوه‌. هه‌موو حزب و دوستێن خوه‌ و نه‌یارێن خوه‌ روو برووی راستیه‌كا ته‌حل كرن. یان هه‌لبژرتنا بكه‌ن وه‌ك دیموَركاتیه‌ت دخوازیت. یان سازانێ بكه‌ن كه‌سه‌كێ دیاركه‌ن. یانژی بێ ده‌نگ بن هه‌تا هه‌لبژراتنا؟! باوه‌رناكه‌م هیج سه‌ركردیه‌كێ سیاسی ل روَژهه‌لاتا ناڤین ب ڤان ئه‌گه‌ر روو برووی مله‌تێ خوه‌ بیت، ئه‌رێ ئه‌ڤه‌ په‌یامێن كه‌سه‌ك دكتاتوَرن. بارزانی ب خوه‌ بوَ خوه‌ پوَسته‌ك دیاركریه‌ ئه‌وژی پێشه‌رگایه‌تیه‌ باروه‌رناكه‌م سیاسیه‌ك هه‌بیت ڤێ گاڤێ بڤێت (پێشمه‌رگه‌بیت)؟! لێ ده‌مێ داهاتی دێ دیاركه‌تن كا ته‌خا سیاسی ل وه‌لاتێ مه‌ ل ئاستێ قوَناغا نوكه‌یه‌؟! یان دیسا نه‌ڤیانا كه‌سوَكی و سوار بینا ل (ده‌وارێن خه‌لكێ) هێشتا ل وه‌لاتێ مه‌ رێبازه‌كا كه‌ڤنارا نوویه‌؟ ده‌مێ سه‌رخوه‌بوونێ یه‌ یان ده‌مێ سه‌روَك راكرنێ یه‌؟!

69

هزار سالێن دی ببوورن فاشیزما توركی نه‌شێتن ژ سێگوشێ خوه‌(ته‌ك ئالا، ته‌ك زمان و ته‌ك وه‌لات) قوَرتال بیتن. ئه‌ڤه‌ راستیه‌كا نه‌گوَڕه‌، راسته‌ توركیا وه‌لاته‌ك دیموَكراتیه‌ لێ ل هه‌مبه‌ر گه‌لێ كوردستانێ و پرسا ئاخێ ل باكوورێ كوردستانێ هه‌ر جار توركیا جارانه‌ و خوَدان كولتوَره‌كێ سه‌ر كوَتكرنێ ژ میراتێ ئوسمانیان. لێ ل به‌رامبه‌ر فاشیزما توركیا (فاشیزمه‌كا كوردی) نه‌ ئه‌لترناتیف و چاره‌سه‌ریه‌. ئه‌وا نوكه‌ ل باكوورێ كوردستانێ روو دده‌تن كوَمكوژیه‌كا سوَر و سوَره‌. لێ ڤێ ره‌وشێ هنده‌ك فاكته‌ر هه‌نه‌،(په‌كه‌كێ)هیچ كاره‌كێ قه‌نج نه‌كریه‌ مه‌یدانا شه‌ری ببنه‌ باژێرا و وان باژێرا ئه‌وێن (هه‌ده‌په‌)تێدا ده‌سته‌لاتدار؟َ سیاسه‌تا (خه‌نده‌كا) و هنده‌ك ئیدیه‌مێن مژدار وه‌ك(خوه‌سه‌ریا دیموَكراتی) كو د هیچ فه‌رهنگه‌ك سیاسه‌ دا رامانا وێ زه‌لال نینه‌، ئه‌ڤه‌ ئاشكرا خیانه‌ته‌ ل پرسا كوردی ئه‌وا ل توركیا دبن گڤاشتنا خه‌باتا جه‌كداریا(په‌كه‌كێ)دا دبن گڤاشتنا ئه‌وروپا و مه‌رجێن (كوبنهاگن) و دبن گڤاشتنا هه‌رێما كوردستانێ ڤه‌ ل هنده‌ك وارا دا چوویه‌ پێش. و توركیا ژ نه‌چاری دان ب پرسا كوردی كری و هنده‌ك چاكسازی و مافێن ده‌ستپێكی بوَ كوردێن باكوور دیار كرین. بوَ توركیایه‌كا ئه‌نداما ناتوَ و خوَدان بیروَكراتیه‌ته‌كا(سه‌نترال) جهێ قبولكرنێ نینه‌ باژێرن باكوورێ كوردستانێ بكه‌ڤنه‌ د بن ده‌ستێ(چه‌كداران) دا نه‌مازه‌ هێشتا(په‌كه‌كه‌) د چاڤێن جیهانێ دا رێكخراوه‌كا (تیروَرسته‌). شه‌ركرن ل كولانێن باژێرا و هاندنا هه‌رزه‌كارا بوَ خوه‌پیشاندانێ و كوشتنا پوَلیسا و كوَلانا خه‌نده‌كا سایسه‌ته‌كا سه‌ر كه‌فتی و ستراتیژیه‌كا دروست نینه‌ و سه‌رئه‌نجام دێ دوزا كوردی و پروَژێ به‌رێز(عبدلله ئوَجالانی) خوسارت بیت. توركیا نه‌به‌رئاقله‌ د بن ڤان مه‌رج و شه‌رتا دا دبن شه‌رێ كوَلانا دا ته‌نازلێ بكه‌تن یان ملیمه‌كێ بوَ به‌رامبه‌ر نه‌رمیێ دیاركه‌تن و جیهان هه‌موو ژ ڤێ ره‌شه‌ كوژیا ل باكوورێ بێده‌نگه‌، چنكو كاره‌كێ ره‌وا نینه‌ شه‌ر بكه‌فیته‌ كوَلانا ل ده‌مه‌كێ ده‌رفه‌تێن ئاشتیێ هه‌نه‌ و هه‌موو دوستێن كوردا پشته‌ڤانێن پروَسا ئاشتیێ نه‌. (هه‌ده‌په‌) د ده‌ردێ(حه‌یلولوه‌لایێ)دایه‌. یان دڤیا پشته‌ڤانیا هه‌یبه‌تا ده‌وله‌تێ بكه‌تن بوَ ئارامكرنا باژێرا یان ژی پشته‌ڤانیا سیاسه‌تا شه‌رێ كوَلانا بكه‌تن كو ئه‌ڤه‌ و خه‌باتا په‌رلمانی ئێك ناگرن. ئه‌ڤا نوكه‌ ل باكوور دبیت فه‌ربوو ل سالێن 80 یان 90 هاتبنا كرن وه‌ختا سیاسه‌تا ئینكارێ هه‌ی نه‌كو نوكه‌ توركیا ب هه‌موو ئالی ڤه‌ دانێ ب (عبدلله ئۆجه‌لانی) دكه‌تن وه‌ك(محاور)و لایه‌نه‌كێ چاره‌سه‌ریا پرسا كوردیه‌. ئه‌ڤه‌ به‌رخوه‌دان نینه‌ هه‌ر چه‌نده‌ خولكێ وێ دده‌تن لێ شه‌رت و مه‌رجێن وێ نینن. به‌لكو خیانه‌ته‌ ل دوزێ و په‌یاما به‌رێز (ئوَجه‌لانی).. خزمه‌ته‌ بوَ فاشیزما توركی.

87

ره‌نگه‌ بوَ پارتی هه‌تا دوماهیكێ نه‌چیته‌ سه‌ری دده‌مه‌كیدا گۆڕان دوه‌م هێزا سایسیا كوردستانێ یه‌؟ بوَ پارتی و مێژوویا وێ و سه‌نگا وێ یا سیاسی نه‌ماقووله‌ هێزه‌كا وه‌كی گۆڕان هه‌تا دوماهیكێ پشت گوهڤه‌ بهێلیت؟ خاندنا پارتی بوَ گۆڕانێ دڤێت ب وی ره‌نگی نه‌بیت ئه‌وا میدیا پارتی دادرێژیت. به‌لكو دڤیا پارتی دیسا حیكمه‌تا ناڤدارا خوه‌ بكاربینت هه‌تا وه‌لاتی ژڤێ چه‌قبه‌ستنا سیاسی قوَرتال كه‌تن. گۆڕان بخوه‌ ژ هه‌لسوكه‌فتا خوه‌ فێری ده‌رسه‌كا تایبه‌ت بوو ل یاریكرنا سیاسی دا ل كوردستانێ پشتی خوه‌ دیتی بتنێ ل به‌رامبه‌ری پارتی، نه‌مازه‌ پشتی ژ حكومه‌تێ دوور ئێخستی، ژ من ڤه‌ گۆڕان فێری په‌نده‌كا دژوار بوو د ده‌ما یاریكرنێ دا دگه‌ل پارتی؟ گۆڕانكاری ل ڤی وه‌لاتی وه‌سا ئاسان نینه‌ وه‌ك میدیا گۆڕان سیناریوَ دكه‌تن. حساب نه‌كرن بوَ سه‌نگا پارتی یا مێژوویی و جڤاكی ژ لایێ گۆڕانێ ڤه‌. گۆڕان بخوه‌ راستی گوشه‌گێریه‌كا نافخوه‌ی كوردستانێ بوو. ره‌فتارێن گۆڕانێ ل ئاست قه‌بار و سه‌نگا وێ یا جه‌ماوه‌ری نه‌بوو. نه‌ دڤیا هێزا دوویێ ل كوردستانێ هوسا ساده‌ ره‌فتارێ بكه‌تن، هێزا دوویێ ئانكو به‌رپرسیاریه‌كا مه‌زنتر ژ ئالێن دی. ئه‌ف ره‌وشا نوكه‌ كوردستان تێدا دبووریت، سوَر و سوَر د به‌رژه‌وه‌ندا پارتی دایه‌. ئه‌گه‌ر خاندن ب حزبایه‌تی بهێته‌كرن، لێ ئه‌ف ره‌وشه‌ سه‌رئه‌نجام د خێرا وه‌لاتی و سه‌ربوَرا وێ یا دیموَركاتی دا نینه‌. گوَمان روَژانه‌ ل سه‌ر مه‌ودایێ شه‌رعیه‌تا سیاسیا وه‌لاتی زێده‌ دبن، دیالوَگا سیاسیی و روو ب روو بوونا سیاستمه‌دارا ل سه‌ر ئاستێن بریار بده‌ست دێ زوَره‌كا گرێكا ڤه‌كه‌ت؛ بوَ پارتی ژ به‌ری گۆڕانێ ئه‌وه‌ ده‌ست پێشخه‌ربیت ڤێ ره‌وشێ ب دوماهیك بینیت یان ب جورئه‌ت بریارا هه‌لبژارتنا پێش وه‌خت ب ته‌وافق بهێته‌ دان. پارتی و گۆڕان نوكه‌ و د ڤێ ره‌وشێ دا به‌رامبه‌ر مێژوویێ به‌ر پرسن! هه‌ر ئێك ب ته‌مه‌ت قه‌بارێ سیاسیێ خوه‌ یان ب ته‌مه‌ت كاریگه‌ریا خوه‌ ل گوَڕه‌پانا سیاسی دا. هیج ئالیه‌ك فریشته‌ نینه‌ راستڤه‌كرنا هنده‌ك چه‌وتیا مه‌زنایه‌تیه‌ بوَ پارتی ژ به‌ری بوَ ئالێن دی بیت. لوَژیكێ سیاسی ل وه‌لاتێ مه‌ راستی سته‌ور بوونه‌كا خراب نه‌بویه‌ هه‌تا سیاسی ل وه‌لاتێ مه‌ نه‌شێن ب رێكه‌فتنه‌ك شه‌ره‌ف مه‌ندا بوَ هه‌موو ئالیان ده‌رباس ببن. قه‌یرانا قه‌یرانێ دئافرینیت؟َ! ئاریشه‌ یا ئاریشێ په‌یدا دكه‌تن، هه‌لویستێن بێ حساب ئاریشێ دكه‌نه‌(ده‌روونی) ئه‌گه‌ر نه‌ ء هیچ پرسه‌ك نینه‌ ل وه‌لاته‌كی چاره‌سه‌ر نه‌بیت

103

ئه‌گه‌ر رابردوو پیڤه‌رێ ئاینده‌ی بیت، راستی نه‌ ئه‌مریكا و نه‌ژی روسیا بۆ گه‌لێ كورد مێژوویه‌كا پاقژ نینه‌؟! ئه‌مركیا ل سالێن شۆره‌شا ئه‌یلولێ دا پشته‌ڤانه‌كا ب هێزا شۆره‌شێ بوو لێ ل گوَر دان پێدانا وه‌زیرێ ده‌رڤه‌ یێ ئه‌مریكا(كیسنجری)ئه‌وان كورد كرنه‌ قوَربانی؟! سوڤیه‌تستانا به‌رێ كو روسیا میراتگرا وێ یه‌ نوكه‌ ب گرانی ب رێكا نوینه‌رێ روَژناما(پراڤدا) ل وی ده‌می نوێنه‌رێ(كی جی پی) ژی بوو (یفگینی پریماگوف) سه‌رپه‌رشتیا ژماره‌كا گه‌رێن دان و ستاندنێ كریه‌ دناف به‌را شۆره‌شا كوردی و حكومه‌تا به‌غدا دا لێ ل تالیێ، پشت ل شۆره‌شێ كر و دگه‌ل به‌غدا رێكفتنا دوستایه‌تیێ ئیمزا كر. ئانكو دبیت ئه‌م ژی وه‌ك گه‌لێ كوردستانێ روَژه‌كێ مه‌ شه‌ر ل شینا خه‌لكێ كربیت و باجا دوماهیكا وێ به‌رهرا گه‌لێ مه‌ كاره‌سات بوینه‌؟! شه‌ر ب وه‌كاله‌ت یان به‌شداریا قوَلپا و (محوه‌را) نه‌ بوَ مه‌ نه‌ بوَ هیچ گه‌له‌كێ ئازادی خوازێ بێ ده‌وله‌ت جهێ مفایی نه‌بوویه‌؟َ سه‌ربوَرا مه‌ و سه‌ربوَرێن خه‌لكێ ژی وێ چه‌ندێ دیار دكه‌ن، زلهێز تالیێ بیر ل به‌رژه‌وه‌ندیا خوه‌ دكه‌ن؟ نوكه‌یا كوردستانێ هندا مژداره‌ دناف ڤان قولب و محوه‌رادا. سه‌رێ كه‌سێ تازه‌ ژێ ده‌رناكه‌ڤیت. هه‌ڤركیا نوكه‌یا روسیا و ئه‌مریكا و په‌رت و به‌لاڤبوونا كوردا وه‌ك دیار دناڤ به‌را ڤان (محوه‌را)دا دوور نینه‌ سه‌ر ئه‌نجام دارشتنه‌ك دی بوَ سنوورێن (لوَزانێ) بیهێته‌كرن. لێ ب وێ هیڤیێ نه‌ ئه‌ڤ جاره‌ كوردستان باجا شه‌رێ زلهێزا نه‌ده‌تن؟َ! هه‌نوكه‌یێ هه‌رچار پارچا نه‌ك تنێ كوردستانا (عێراقێ) گه‌له‌كێ دلخوه‌شكه‌ر نینه‌. له‌ورا كورد پێتڤی ئێك رێزی و بره‌كا زوَر (میكافیلیه‌تێ) نه‌، بوَ گه‌هشتن ب ئارمانجێن خوه‌. ئانكو كوردستان ببیته‌ ده‌وله‌ت ڤێجا ب ئالپشتیا كیژ (محوه‌ری) بیت ره‌نگه‌ نه‌ گرنك بیت، لێ نوكه‌ هه‌ر محوه‌ره‌كێ هنده‌ك ئاماژه‌ هه‌نه‌ مروَڤ وه‌ك چاڤدێر دزانیت چ د به‌رنامێ كێ دایه‌ بوَ ده‌ڤه‌رێ؛ روسیا بخوه‌ بهێز هاتیه‌ ده‌ڤه‌رێ ب وێ رامانێ پارستنا ده‌ڤه‌رێ بكه‌تن و رێكێ ل هه‌ر گوَڕانكاریه‌كێ بگریت و ب هه‌ر حالێ هه‌ی ئه‌وا حازر ب پارێزیت. ئه‌مریكا ژ به‌ر كو كولتوره‌كێ (كوَلنیالیزمی) نینه‌ و به‌شداری دارشتنا سنوورا ژی نه‌بوویه‌ ل ده‌مێ رێكه‌فتنا (لوزانێ) ره‌نگه‌ بوَ نه‌ بێژیت كوردا ئه‌ڤه‌ هین ده‌وله‌ت؟!, ێ ئه‌مریكا ب هندێ بناڤ و ده‌نگه‌ ژینگه‌هه‌كێ وه‌سا دئافرینیت كو تێدا هه‌ر كاره‌ك ببیت ئانكو وه‌ك دیار ژینگه‌هه‌كا روَخساندی بوَ كوردستانێ ب ئاسانی ل ئاینده‌كێ نێزیك بێ شه‌ر ببیته‌ ده‌وله‌ت. ب وی مه‌رجی كوردستانێ ئێك بریار و ئاراسته‌ بن.. ..

website security
WP Facebook Auto Publish Powered By : XYZScripts.com