NO IORG
Authors Posts by محه‌مه‌د محسن

محه‌مه‌د محسن

محه‌مه‌د محسن
14 POSTS 0 COMMENTS

28

رێخستنا تیتالێن جڤاكى
(به‌هی وه‌ك میناك) ژ كارێن فه‌ره‌
محه‌مه‌د محسن
مانشیت
(رێخستنا به‌هیان دێ بیته‌ پێنگاڤه‌كا مه‌زن بۆ رێخستنا جڤاكێ ژ گه‌له‌ك لایان ڤه‌ و دێ دووركه‌ڤین ژ گه‌له‌ك ئاریشه‌ و نه‌خۆشیێن ڤه‌گر)
هه‌ر د كه‌ڤن دا، مژارێن جڤاكى پویته‌كێ گه‌له‌ك مه‌زن پێ هاتیه‌دان و هه‌مى جڤاكان به‌رده‌وام بزاڤ كرینه‌ تیتال و سیسته‌مێن خوه‌ یێن ژیانێ ل دووڤ پێڤاژۆیا رۆژێ رێكبێخیت، مه‌ كوردان ژى، وه‌كى هه‌مى جڤاكێن دونیایێ ل گه‌ل رۆژێ ژیانا خوه‌ رێخستییه‌ و گوهۆڕین تێدا كرینه‌، بێگومان ده‌ڤه‌را مه‌ یا به‌هدینان ژى یا ڤه‌ده‌ر نه‌بوویه‌ ژ ڤان گوهۆڕینان، كو ده‌ڤه‌ره‌كا ناسیاره‌ ب دۆستینیێ و هه‌ڤالینیێ و مرۆڤایه‌تیێ و هتد…
ئێك ژ وان تیتالێن گه‌له‌ك به‌ربه‌لاڤ و ئه‌م هه‌مى دپێڤه‌ گرێدایى، به‌هی و شینى نه‌، هه‌لبه‌ت به‌رى چه‌ند ساله‌كان، به‌هی ژ سێ رۆژا كرنه‌ دو رۆژ و ئه‌و رۆژ ژى كرنه‌ دانێ ئیڤارى، كو ئه‌ڤه‌ كاره‌كێ گه‌له‌ك باشبوو هاتیه‌كرن و بوو بارسڤكیه‌ك بۆ خودانێ به‌هیێ و كه‌س و نێزیكێن وی ژى.
به‌لێ هه‌ر وه‌كى ئه‌م هه‌مى دبینینن ئه‌ڤه‌ ژى هێدى هێدى یا دبیته‌ تیتاله‌كێ ڤارى و غه‌ریب د ناڤ جڤاكا مه‌دا، هه‌لبه‌ت هه‌مى ده‌ڤه‌ر و هۆزان قه‌در و رێزێن خوه‌ ل ده‌ف مه‌ هه‌نه‌، به‌لێ نوكه‌ به‌هی هێدى هێدى یێ ژ قالبێ خوه‌ یێ ئه‌م هه‌مى ل سه‌ر فێر بووین ده‌ردكه‌ڤن و هنده‌ك چاڤلێكرنێن كرێت و نه‌ درێدا یێ لێ په‌یدا دبن و یا بوویه‌ هه‌ڤڕكانێ، كانێ دێ كى شێت پتر ریكلامێ بۆ به‌هیا خوه‌ كه‌ت و ل جهه‌ك و مزگه‌فته‌كا مه‌زن دانیت و پتریا مرۆڤێن خوه‌ ل دۆرێن خوه‌ كۆم كه‌ت و ب رێزكه‌ت بۆ بخێرهاتنا به‌هیڤانان و كانێ دێ كى خوارنه‌كا به‌رفره‌هتر و خۆشتر به‌رهه‌ڤكه‌ت و پتر مرۆڤان ل خوه‌ كۆم كه‌ت.
هه‌كه‌ مه‌ بڤێت ئه‌م رێزێ ل وه‌غه‌ركریێ خوه‌ و مالباتا وى بگرین، یا فه‌ر و پێدڤى و كه‌ڤنشۆپا بابوكالێن مه‌یه‌ ژى، كه‌سێن لێزم و نێزیكى وى كه‌سێ مرى و وه‌غه‌را دووماهیێ كرى، ئه‌وژى هه‌ر مالێ ئێك، ئانژى ژ پێش بنه‌مال و ئویجاخێ و گوندى ڤه‌، چه‌ند كه‌سه‌كێن كێم بچنه‌ به‌هیا وان و سه‌رخۆۆشیێن خوه‌ بگه‌هیننێ و یا باش و سه‌رده‌میانه‌ ژى ئه‌وه‌ كو ئه‌م هه‌مى خوه‌ فێر بكه‌ین، ب رێیا ئامیرێن په‌یوه‌ندیكرنێ، وه‌كى تێله‌فۆن و تۆڕێن جڤاكى به‌هیداریێ ژ هه‌ڤال و دۆست و نێزیكێن خوه‌ قه‌بوول بكه‌ین و هه‌ر ب رێیا تۆڕێن جڤاكى ل گه‌ل به‌لاڤكرنا نووچه‌یێ وه‌غه‌ركرنێ، هه‌ژمارێن تێله‌فۆنێن خودانێن كه‌سێ وه‌غه‌ركرى ژى به‌لاڤبكه‌ن كو مه‌ پێ خۆشه‌ ب رێیا په‌یوه‌ندیێ و تێله‌فۆنێ سه‌ره‌خۆشیێ و هه‌ڤخه‌میێ ل مه‌ بكه‌ن و ئه‌ڤه‌ دێ بیته‌ بارسڤكیه‌كا مه‌زن بۆ به‌هیڤانا و خه‌رجى ژى دێ هێنه‌ كێمكرن و روودانێن هاتنوچوونێ ژى د ڤێ رێیێ دا نامینن و بۆ ده‌مێ هه‌فتیه‌كێ نێزیك و لێزمێن كه‌سێ وه‌غه‌ركرى، ئه‌وژى كه‌سێن دانه‌عه‌مر و ریهسپیێن مالباتێ كو ژ ده‌هـ كه‌سان ده‌رباس نه‌بن، به‌رده‌وام ل ده‌ف خودانێن مرى بن داكو هه‌دارا وان بهێت.
ژبۆ بارسڤكیێ و كێمكرنا خه‌رجیا، هه‌ر دانه‌كێ خوارنێ و بۆ چه‌ند كه‌سه‌كێن ده‌ستنیشانكرى و كێم، ژلایێ كه‌سه‌كێ خودانێ مریڤه‌ بهێته‌ به‌رهه‌ڤكرن و دان و مێهڤاندارى و خوارنێن ل خوارنگه‌ها دهێنه‌دان راببن، چونكو خوارنا نوكه‌ دهێته‌ چێكرن و دان، خه‌رجیێن بێ رامان لێ دهێنه‌ مه‌زاختن و پتر ژ نیڤا وێ خوارنا هاتیه‌ چێكرن ژى، ناهێته‌ خوارن و دهێته‌ هاڤێتن كو ئه‌ڤه‌ نه‌ ژلایێ شه‌رعى و نه‌ژى لایێ كه‌لتوورى ڤه‌ یێ دروست نینه‌ و ب گوننه‌هـ دهێته‌ هه‌ژمارتن.
ژبۆ ڤێ مژارێ داخوازێ ژ ئالیێن هاڤلدار دكه‌م كو كۆمبوونه‌ك بهێته‌كرن و كۆمه‌كا كه‌سێن شه‌هره‌زا د بیاڤێن دینى و جڤاكى و قانوونی دا بهێنه‌ ده‌ستنیشانكرن و پاشى كۆنفراسه‌ك بهێته‌ گرێدان و ڤه‌كۆلینه‌كا كوور و به‌رفره‌هـ ل دوور رێك و پێككرنا به‌هیان بهێته‌كرن و چه‌ند بریاره‌كان ده‌ربێخن و ئه‌ڤ بریاره‌ ب رێیا سازیێن مێدیایێ بهێنه‌ بلاڤكرن و ته‌وعیه‌كا باش ژى بۆ بهێته‌كرن. بێگومان رێخستنا به‌هیان و نه‌هێلانا وان ب ڤى ته‌ڕزى و ئاوایى، دێ بیته‌ پێنگاڤه‌كا مه‌زن بۆ رێخستنا جڤاكێ مه‌ ژ گه‌له‌ك لایێن دیترڤه‌ و دێ دووركه‌ڤین ژ گه‌له‌ك ئاریشه‌ و نه‌خۆشیێن ڤه‌گر و سه‌رده‌م و خه‌رجى و ده‌مكوشتنه‌كا بێ به‌رهه‌م..

17

محه‌مه‌د محسن

هه‌ر قووناغه‌كا دیرۆكى د وه‌لاتێ عراقێ دا بخوینى، دێ بینى كو به‌رى ئه‌و هێزێن ده‌سته‌لات وه‌رگرتى، ب درووشم و ب ناڤێن گه‌له‌ك جان و رێكوپێك، به‌ر ب ده‌سته‌لاتێ ڤه‌ چووینه‌، به‌لێ هێش عه‌مرێ وان یێ ساڤا و گه‌له‌ك نه‌ڤه‌كێشایى، هه‌مى نیاز و ئارمانجێن وان یێن ڤه‌شارتى هاتینه‌ ل سه‌ر به‌ڕێ و به‌رى هه‌ر تشته‌كى ژى دوژمنداریا خوه‌ بۆ مافێن خه‌لكێ كوردستانێ دیاركریه‌ و ب هه‌مى رێ و ئالاڤان ده‌ست ب شه‌ڕێ كوردان كریه‌، و پێنگاڤا ئێكێ ژى ئه‌و بوویه‌ كانێ دێ چاوا شێن ئێكرێزیا كوردان تێكده‌ن و دوبه‌ره‌كیێ ل ناڤبه‌را هێزێن وان یێن سیاسى دا دروستكه‌ن و وان هێزێن ئیراقى، بزاڤ كرینه‌ كو دوژمناتیێ د ناڤبه‌را كورد و عه‌ره‌بان دا چێبكه‌ن و ئه‌ڤێ ژى كێنجا خوه‌ هه‌تا راده‌كێ بلندكریه‌ و هه‌ر هێزه‌كا پتر دوژمنیا كوردان كرى، وێ پتر ژ هه‌میان ده‌نگ برینه‌ و پتریا خۆشتڤى بوویه‌ ل نك عه‌ره‌بان و ل ڤێره‌ وه‌سا دیاردبیت كو نه‌ بتنێ كه‌سێن ده‌سته‌لاتدار دوژمنێن كوردانه‌، وه‌كى ملله‌ت ژى ب وى ره‌نگینه‌ و ئه‌و ل سه‌ر وێ چه‌ندێ هاتینه‌ په‌روه‌رده‌كرن و هه‌تا نوكه‌ د گه‌له‌ك ده‌لیڤان دا مه‌ خوه‌ خاپاندیه‌ و مه‌ نه‌زانیه‌ كو ئه‌ڤ سه‌ركێشه‌ژى هه‌ر د ناڤ ره‌حما وى جڤاكى دا ده‌ركه‌ڤتینه‌ و ئه‌م د وێ باوه‌ریێ داینه‌ كو ئه‌و نه‌شێن پێكڤه‌ژیانه‌كا براییه‌تى برێڤه‌ببه‌ن، ئانكو قه‌بوول بكه‌ن.
ئێك ژ گۆتنێن ڤێ دووماهیێ یێن حه‌یده‌ر عه‌بادى دبێژیت: ئه‌ڤا نوكه‌ ل دژى خوه‌نیشادانان دكه‌ن بیرا مرۆڤى ل سه‌رده‌مێ به‌عسیا و سه‌دامى دئینیت، عه‌بادى نێ هێش گه‌له‌ك كه‌ڤن نه‌بوویه‌ كو تو سه‌رۆك وه‌زیرێ ئیراقێ و ئه‌م پێكڤه‌ هه‌ڤسه‌نگه‌رێن شۆره‌شێ بۆین، ب دژى سه‌دامى، به‌لێ بێ وه‌فایى و بێ ویژدانیا ته‌ و یا ده‌وروبه‌رێن ته‌، دیاربوو كو وه‌ هێرش كریه‌ سه‌ر كوردستانێ و ب خیانه‌تا هنده‌ك كالفامان هه‌وه‌ كه‌ركووك ب هێزا له‌شكرى داگیركر و تو هاتبووى كو ئه‌نفالێن 1988 دوباره‌ بكه‌یه‌ڤه‌، به‌لێ به‌رسینگێن ته‌ ب میرانى هاتنه‌ گرتن و بخوینا كۆمێن شه‌هیدان تو هاتییه‌ پاشڤه‌برن و ته‌ژى بیرا مه‌ ل سه‌ر ده‌مێ ره‌ش و تاریێ سه‌دامى ئیناڤه‌ و ل نك خه‌لكێ كوردستانێ چ جوداهى ل ناڤبه‌را ته‌ و سه‌دامى دا نه‌بوو.
له‌وا ئه‌م دبێژین چ جوداهى ل ناڤبه‌را ڤان و یێن به‌رى وان نینه‌ و هه‌مى ئێك هزر و بیرن د راستا كوردان دا و ب تنێ رێیا مه‌ كوردان ژى یا د ئێگگرتنا مه‌دا، داكو بشێین ڤان ده‌ستكه‌ڤت و ڤى كیانێ فیدرالى بپارێزین و گه‌له‌كا فه‌ره‌ كو ئه‌م كورد ب زووترین وه‌خت ڤێ چه‌ندێ ب كریار بكه‌ین و گه‌له‌ك زوى وێ پێنگاڤێ بهاڤێژین و هه‌ر سه‌ركێشه‌ك و گرۆپه‌كێ كوردان و د هه‌ر هێز و حزبه‌كا دابیت، ده‌ستێ خوه‌ كره‌ د ده‌ستێ دوژمنان دا بۆ تێكدانا كوردستانێ، یا فه‌ره‌ پێشمه‌رگه‌ و جه‌ماوه‌رێ وێ هێزێ به‌رسینگا وى بگریت و رووره‌ش و شه‌رمزار بكه‌ت و بلا ژ هێرڤه‌ پاشه‌ به‌س ببینه‌ ئێخسیرێن حزبایه‌تیێ و بلا ده‌نگێن دلسۆزێن خه‌لكێ كوردستانێ، نه‌خاسمه‌ یێن پێشمه‌رگێن قه‌هره‌مان بلند ببن بۆ ئێكرێزیا مه‌ كوردان و ببێژن ئه‌م ژ ڤێ زێده‌تر ژ وه‌ قه‌بوول ناكه‌ین و یێ دژى به‌رژه‌وه‌ندیا كوردستانێ بیت، بێ ئێكودو ژ ناڤ خوه‌ ده‌ربێخن و جهێ وى ل كوردستانێ نه‌هێلن و خالا ژ وێ ژى گرنگتر ئه‌وه‌ یا فه‌ره‌ كو هه‌ر نوكه‌ ده‌ست ب سزادانا گه‌نده‌لكاران بهێته‌كرن و ب ره‌نگه‌كێ دیار و ب ئاشكرایى ئه‌ڤ كریاره‌ بهێته‌كرن، داكو ئه‌و ببنه‌ عیبره‌ت بۆ گه‌له‌كان و بسپۆر و شه‌هره‌زایێن دلسۆز بیننه‌ پێش، داكو بشێن هه‌ڤركیا دوژمنان بكه‌ین و وه‌لاتێ خوه‌ ب كریار بهێز بێخین.
ئه‌ڤرۆ ب ده‌هان هزار گه‌نجێن مه‌، ده‌رچوویێن زانینگه‌هـ و په‌یمانگه‌هان دبێكارن، ژبه‌ركو هه‌تا نوكه‌ ئه‌م نه‌شیاینه‌ چ پلانێن خورستى دانین و ژێرخانا خوه‌ یا ئابوورى ئاڤا بكه‌ین، ئه‌م دزانین كو چ حوكمه‌ت ل هه‌مى دونیایێ نه‌شێن هه‌مى ده‌رچوویان دامه‌زرینن، به‌لێ مه‌ كۆمێن زانینگه‌هـ و په‌یمانگه‌هان هه‌نه‌ و ب سه‌دان دكتۆر و پروفیسۆر هه‌نه‌ كو د هه‌مى بیاڤان دا دشه‌هره‌زانه‌ و ئه‌ڤ مرۆڤێن داهینه‌ر بهێنه‌ رێخستن و كۆمڤه‌كرن و پشته‌ڤانى لێ بهێته‌كرن بۆ دارێتنا باشترین پلان بۆ پێشڤه‌برنا ژێرخانا ئابوورى د هه‌مى كه‌رت و بیاڤان دا و بۆ میناك هه‌كه‌ پلانه‌كا زانستى و رێكوپێك بۆ پێشخستنا پرۆژێن په‌له‌وه‌ران بهێته‌ چێكرن و حوكمه‌ت پشته‌ڤانیه‌كا ب هێز بۆ بكه‌ت، ئه‌م د وێ باوه‌ریێ داینه‌ كو دێ ب هزاران گه‌نج و ده‌رچوویێن مه‌ بكاركه‌ڤن و ل گه‌ل هندێ ژى كۆمپیانیێن ته‌ئمینێ بهێنه‌ دامه‌زراندن كو ئه‌ڤێن د ڤان بیاڤان دا كار دكه‌ن ژیانا وان بهێته‌ ته‌ئمینكرن و ئه‌ڤه‌ دێ 80% بارێ حوكمه‌تێ سڤككه‌ت و ل گه‌ل هندێ ژى ئه‌م دێ شێین پشتا خوه‌ ب ڤى كه‌رتێ گرنگ گه‌رم كه‌ین و چاڤێ مه‌ تنێ ل نه‌فتێ نابیت و هه‌روه‌سا ل خالێن سنۆرى گۆمرك رێكوپێك ببن و رێ ل وان تشتان بهێته‌گرتن یێن كو ئه‌م بشێین تێرا خوه‌ به‌رهه‌م بینین و گۆمركا تشتێن بیانى بهێنه‌ بلندكرن كو نه‌شێن هه‌ڤركیا تشتێ مه‌ بكه‌ن و ئه‌ڤا ئه‌م دبێژین ژى چپكه‌كه‌ ژ ده‌ریایه‌كى.
گه‌لى هێز و حزبێن ده‌سته‌لاتدار، ئه‌ڤرۆ ئه‌م دشێین گرێكێن خوه‌ ب ده‌ستان ڤه‌كه‌ین، ما دێ بۆچى ئێكا هندكه‌ین ل سوبه‌هی پێدڤى ددانان ببین.

20

محه‌مه‌د موحسن ئامێدی

د ڤان چه‌ند رۆژان دا ل ده‌ڤه‌را ئامێدیێ بۆ چه‌ندین جاران ئاگر به‌ربوو ئاقارێن گوندان، ژبه‌ر بۆمبه‌بارانكرنا فرۆكێن توركی. بوویه‌ ئه‌گه‌را سۆتنا هزاران دۆنه‌مێن بیستان و دارستانان. ئه‌ڤ دارێن دهێنه‌ سۆتن كه‌زان، گهیشك، گرسك، به‌ری، مازی، دیندار، دارا هه‌لهه‌لۆك، سماق و هرمیك وه‌ ب ده‌هان جۆرێن دی یێن داروباران. كو پتریا ڤان به‌رهه‌مێن خوارنێ ده‌ن. وه‌ گه‌له‌ك ژ ڤان داران ژیێ وان پتر ژ ٢٠٠ سالانه‌. زێده‌باری ژناڤبرنا چه‌ندین گیانه‌وه‌رێن كیڤی و بالندان و مێشێن هنگڤینی.
ئه‌ڤ سۆتنا دارستانا وه‌كی سۆتنا له‌شێ مه‌یه‌. چونكو ئه‌ڤه‌ژی سامانێن نه‌ته‌وه‌یی نه‌ مینا (گاز، غاز) وه‌ هه‌ر سامانه‌كێ دیتر. ژبلی تێكدانا ژینگه‌هێ كو ب ناڤ میدیا هه‌مى به‌حس ژێ دكه‌ن.
لێ جهێ داخێ یه‌ ئه‌ڤرۆكه‌ ره‌ش پۆش دبیت. ئه‌ڤ كاره‌ ژی به‌رده‌وامیا ئه‌نفالانه‌ ب پلانێن تایبه‌ت بۆ وێرانكرنا كوردستانێ. ڤێره‌ مه‌به‌ستا من ئه‌وه‌ كی به‌رپرسه‌ بۆ ڤه‌مراندنا ڤان ئاگران؟!
ئه‌م دزانین به‌رپرسیاره‌تیا ئاگربه‌ربوونێ د ستویێ كێدایه‌ و ئه‌گه‌رێن وێژی د خۆیانه‌ و دیارن. لێ داخوازا من ئه‌وه‌ ده‌ستان نه‌ داهێلین. حوكمه‌تا هه‌رێمێ و سه‌ركردایه‌تیا مه‌ خوه‌ ل ڤان كاودانان بكه‌ته‌ خودان. هه‌كه‌ بێژن چاوا مادێ چلێ كه‌ین و یا به‌رفره‌هبووی، ئه‌ڤه‌ ژی چه‌ند رێك
* سه‌ركردایه‌تی ئاگه‌هداریا لقێن خوه‌ بكه‌ن ل هه‌مى جهان.
* حوكمه‌ت ئاگه‌هداریا هه‌مى قایمقامیێن خوه‌ بكه‌ت ل ده‌ڤه‌رێ.
* هه‌ماهه‌نگیێ بكه‌ن ل گه‌ل جهێن ئه‌منی.
هه‌ر جهه‌كێ ئاگر به‌ربیتێ ئه‌ركێ ناوچا حزبی و ئیداری یه‌ بۆ ڤه‌مراندن و كۆنترۆلكرنا وی ئاگری. هه‌كه‌ ئه‌و ناوچه‌ ده‌رگه‌هێن ناوچا خوه‌ بگرن و كادر و ئه‌ندامێن خوه‌ ببه‌نه‌ هه‌وا ئاگرڤه‌مراندنێ ل گه‌ل خه‌لكێ گوندان سه‌د ژ سه‌دێ دێ كونترۆل كه‌ن. ئه‌ڤه‌ ئه‌ركێ وانه‌، چونكو یێن دبینن هه‌ر سێ رێزدار (سه‌رۆكێ هه‌رێما كوردستانێ، سه‌روكێ حوكمه‌تا كوردستانێ، سه‌رۆكا په‌رله‌مانێ كوردستانێ) یێن هه‌وا دارچاندنێ دكه‌ن. گه‌لی كادرێن حزبێ ما پێۆیست دكه‌ت سه‌ركردایه‌تی هه‌وه‌ راسپارده‌بكه‌ت؟ پێویسته‌ هوون د ئاستێ به‌رپرسیاره‌تێ دابن. ئه‌ڤه‌ سامانێن نه‌ته‌وه‌یی نه‌. ئه‌ڤه‌ عه‌ردێ خه‌لك و لایه‌نگرێن هه‌وه‌یه‌ یا خێزانین شه‌هیدێن هه‌وه‌یه‌. ئه‌ڤاندارستانا ئه‌م د شۆره‌شان دا بخودان كرینه‌ و پاراستینه‌ بلا پیچه‌ك به‌رامبه‌ری وه‌فا بین.
ئو ب ناڤێ خه‌لكێ گوندێن ئاگر ب ئاقارێن وانڤه‌ ئه‌م سوپاسیه‌كا مه‌زن ئاراسته‌ی جه‌نابێ قایمقامێ ئامێدیێ دكه‌ین كو پۆلیسێن دارستانێ و یێن ئاگرڤه‌مراندنێ ئێخستینه‌ د خزمه‌تا هه‌وا ئاگرڤه‌مراندنێ دا. دیسا سۆپاسیه‌كا گه‌رم ل فه‌رماندێن له‌شكری دكه‌ین جه‌نابێ (فه‌رمانده‌ مه‌نسۆر بارزانی، فه‌رمانده‌ شێخ عه‌لی، فه‌رمانده‌ هه‌كار محسن) كو ب سه‌دان پێشمه‌رگه‌ فرێكرنه‌ هه‌وار مه‌ بۆ كونترۆلكرنا ئاگری. پشتی كۆنترۆلكرنا ئاگری دوهی ٢٠١٩/٩/٣ جاره‌كا دی ئه‌ڤرۆكه‌ سپێدێ ٢٠١٩/٩/٤ ئاگر به‌ربوویێ ڤه‌ و به‌رفره بوویه‌ ژ ده‌ستێن خه‌لكێ گوندی ده‌ركه‌فتیه‌. گازیا مه‌ گوندیان بۆ سه‌رۆك بارزانیه‌ خه‌مخۆرێ هه‌می كارێن هه‌ژاران. كو فه‌رمانه‌كێ ل كادرێن حزبی و ئیداری و له‌شكری بكه‌ت كو هه‌وه‌كا مه‌زن بكه‌ن بۆ كۆنترۆلكرنا ڤی ئاگری. ئه‌گه‌ر نه‌ باوه‌ر بكه‌ن بێ مبالغه‌ دێ ب سه‌دان هزار دار ژ ناڤچن و چیا و چه‌لختێن مه‌ دێ بنه‌ بیابان و كه‌چه‌ل بن. هیڤیه‌ هه‌می كورد خوه‌ ل ڤی بابه‌تی بكه‌نه‌ خودان.

23

محه‌مه‌د محسن

مله‌ته‌ك ل سه‌ر ئاخا خوه‌ بژیت و بێده‌نگ و حه‌زژێكرێن ئاشتى و ئازادى و پێكڤه‌ژیانێ بن، مله‌ته‌ك هژار و دووربیت ژ كه‌ربوكینان، لێ ژیان لێ حه‌رام بوویه‌.
كوردستان ب گشتى و ده‌ڤه‌را ئامێدیێ ب تایبه‌تى بووینه‌ گۆره‌پانا هێزێن بیانى، رژێما تركیا ئه‌ڤه‌ چه‌ندین جاره‌ خه‌لكێ مه‌ یێ هه‌ژار و سڤیل دكه‌ته‌ نێچیرا خوه‌ یا دراندانه‌، ب بهانه‌یا هه‌بوونا چه‌كدارێن پ ك ك، كو ل ده‌مه‌كى ترك بخوه‌ دبێژن مه‌ چه‌كێن گه‌له‌ك پێشكه‌فتى، نه‌خاسه‌م یێن عه‌سمانى هه‌نه‌، ئه‌رێ باشه‌ مه‌عقوله‌ ئه‌و فرۆكێن وان یێن باشترین ته‌كنولۆژیا پێشكه‌فتى تێ دا، خه‌لكێ سڤیل و پ ك ك ژێكجودا نه‌كه‌ن، ئه‌ز دبێژم ترك باش دزانن كو ئه‌ڤه‌ نه‌ پ ك ك نه‌، به‌لێ پێدڤیه‌ ل به‌رخوه‌ به‌رزه‌ نه‌كه‌ین، ل نك تركا و فارس و عه‌ره‌با، جوداهى ل ناڤبه‌را ره‌ش و سپی دا نینه‌، ماده‌م كورده‌ كوشتنا وان یا حه‌لاله‌ و دیسا بلا ئه‌م خوه‌نه‌ خاپینین و ب شاشى تێنه‌گه‌هین، ده‌مێ رێفراندۆمێ ژی ترك و فارس و عه‌ره‌ب، ئێك هه‌لویست بوون دژى كوردان، نوكه‌ژى ئه‌ڤا ل رۆژئاڤایێ كوردستانێ دبیت، دیسا ترك و عه‌ره‌ب و فارس، د هه‌ڤهه‌لویستن و ب پلانێن دارشتى پێنگاڤێن خوه‌ دهاڤێن، بۆ نه‌ چێكرنا چ كیانا ل رۆژئاڤایێ كوردستانێ و ل ده‌مێ د ڤى بابه‌تی دا بسه‌ركه‌فتن، دێً بیته‌ گه‌را هه‌رێما كوردستانێ و دێ هه‌موو بزاڤان كه‌ن كو وێ ده‌ڤه‌رێ ژی داگیربكه‌ن و ناڤێ هه‌رێمێ نه‌ هێلن.
تركیا ب ئاشكه‌رایى دبێژیت دڤێت ئه‌م ده‌رگه‌هه‌كێ دیتر ل گه‌ل عیراقێ ڤه‌كه‌ین، ئه‌ڤه‌ژى هه‌ر ژ وان پلانایه‌ یێن دڤێت هه‌رێمێ لاواز بكه‌ن.
ئه‌ڤجا یا پێدڤیه‌ كورد دوور ژ پارتایه‌تیا به‌رته‌نگ هزر ل پاشه‌رۆژا نه‌ته‌وا خوه‌ بكه‌ن. من نه‌ڤێت ناڤێ چ حزبان بینم، لێ ده‌مه‌ هه‌ر ئێك ل جهێ خوه‌ ل خوه‌ بزڤڕیت و كا چ د به‌رژه‌وه‌ندیا ڤى مله‌تیدایه‌ بهێته‌كرن و چ هیجه‌تا بۆ نه‌یاران نه‌هێلن.
ل سه‌ر حوكمه‌تا هه‌رێما كوردستانێ یه‌، كو پشته‌ڤانیا خه‌لكێ خوه‌ بكه‌ن و خوینا وان ب هه‌روه‌ نه‌چیت و ب رێكێن قانوونى داخوازا به‌ده‌لڤه‌كرنا خوینا ڤان قوربانیان بكه‌ن و به‌هرا پتر ژ ڤان قوربانیان پێشمه‌رگه‌نه‌ و ل ده‌مێ بێهنڤه‌دانێن خوه‌ دچنه‌ نێچیرا ماسیان و ئینانا داران بۆ سۆتنێ ژبه‌ر نه‌بوونا گازا سپى و ده‌بارا ژیارا زارۆیێن خوه‌.
پێدڤیه‌ هه‌موو ته‌خ و چینێن مه‌ژى ب رێكێن ئاشتیانه‌ و ئارام و بچنه‌ به‌رده‌رگه‌هێ په‌رله‌مانى و جڤاتا وه‌زیران و نه‌ رازیبوونا خوه‌ دیاربكه‌ن داكو توخیبه‌ك بۆ ڤێ خوینرێتنا مله‌تێ مه‌ بهێته‌ دانان.

27

په‌یكه‌ك بۆ داگیركه‌رێن كوردستانێ
محه‌مه‌د محسن
ب درێژیا سه‌دان سالایه‌ مله‌تێ كورد دبن زۆلم و زۆرا داگیركه‌رێن وه‌لاتێ خوه‌دا دژین و هه‌ر لڤینه‌كا ژ كوردان چێبووى ژ بۆ خوه‌رزگاركرنێ ژ وان قه‌ید و زنجیران، هه‌ر ئێكسه‌ر و ب هێزه‌كا مه‌زنڤه‌، هاتینه‌ ژناڤبرن و بێده‌نگكرن و وه‌لاتێن داگیركه‌ر ل دووڤ به‌رژه‌وندیێن خوه‌ و بۆ پاراستنا سیسته‌مێن خوه‌ یێن زالمانه‌، ده‌ستوور و قانوون ده‌رێخستینه‌ و هه‌ر بزاڤ و لڤینه‌ك ل كوردان حه‌رامكریه‌ و ب گونه‌هه‌كا مه‌زن هه‌ژمارتیه‌ و داگیركه‌رێن كوردستانێ چ جاران باوه‌رى ب پێكڤه‌ژیانێ نه‌بۆیه‌ و تنێ ژیان بخۆ ڤیایه‌ و ل دووڤ قانوونێن خوه‌، كورد ب تیرۆریست هه‌ژمارتینه‌.
ئه‌و رێكخستى و كۆمێن ب ناڤێ مافێن مرۆڤان دئاخڤن و دبێژن ئه‌م به‌ره‌ڤانیێ ل مافخوران دكه‌ین، چ راستى بۆ نینه‌ و ئه‌و رێكخستى چێكریێن وه‌لاتێن زلهێزن و ل دووڤ سیاسه‌ت و به‌رژه‌وندیێن وان كارێن خوه‌ برێڤه‌ دبه‌ن و ڤان رێخستیان تێكهه‌لیێن به‌رفره‌هـ یێن دگه‌ل داگیركه‌رێن وه‌لاتێ مه‌ هه‌ین و ئه‌و چ جاران یا نه‌ باش د راستا وان دا نابێژن و به‌رژه‌وه‌ندیێن زلهێزان گه‌له‌ك و گه‌له‌ك ژ خوین و ژیانا هه‌ژار و زۆلملێكریا گرنگتره‌ و ئه‌گه‌ر وان وه‌لاتان، نه‌خاسمه‌ ئه‌مریكا ڤیابیت به‌رژه‌وندیێن خوه‌ ل جهه‌كى بپارێزیت، دێ وى ئالیێ خودان هێز كه‌ته‌ فریشته‌ و ئالیێ به‌رامبه‌رژى دێ روى ره‌ش و شه‌رمزاركه‌ت و هزار و ئێك ناڤێن كرێت دێ پالده‌تێ و دیرۆك دیده‌ڤانه‌ كانێ ڤان زلهێزان چاوا كۆمه‌كا مله‌تێن زێندى كرینه‌ قوربانى به‌رژه‌وندى و سیاسه‌تێن خوه‌ یێن گه‌نى، هه‌ر بۆ میناك شۆره‌شا باشۆرێ كوردستانێ ل سالا 1975 و خیانه‌تا ب ناڤوده‌نگا جه‌زائیرێ و دیسا هێرشا ل سه‌ر كه‌ركووكێ و بێده‌نگیا ئه‌مریكا و هه‌ڤپه‌یمانا ل 2017 و داگیركرنا وێ ژ لایێ هه‌ڤپه‌یمانێن ئیرانێ ڤه‌، كو چ خش تێدا نینه‌ كو ده‌ستێ ئه‌مریكا و ئنگلیزێ پیر تێدا هه‌بوو و د وى ده‌میدا وان كورد و ریفراندۆم كرنه‌ بهانه‌، ئه‌ڤجا ئه‌گه‌ر وان ڤیا ئالیه‌كى بشكێنن دێ كۆمه‌كا بهانه‌ و هه‌جه‌تان برێزكه‌ن و ده‌نه‌ ل دووڤ ئێك بۆ سه‌ردابرنا ره‌ئیا ته‌ڤایا دونیایێ و نه‌هه‌قكرنا وى ئالیێ وان ئارمانج پێ.
ئه‌و بریارا ژ نشكه‌كێڤه‌ ژلایێ سه‌رۆكێ ئه‌مریكا ترامپى ڤه‌ بۆ خوه‌ ڤه‌كێشانێ ژ رۆژئاڤایێ كوردستانێ، خوه‌ چ ریفراندۆم ل وێرێ ژی نه‌ هاتبوونه‌ كرن و ئه‌و به‌رنامێ ئه‌مریكا بۆ هه‌سه‌دێ داناى، وه‌كى وان دڤیا دهاته‌ بجهكرن و كۆمێن مه‌زنێن قه‌هره‌مانان ژی كرنه‌ قوربانى و دیسا مشه‌ختبوونا ب هزاران ژ خه‌لكێ رۆژئاڤا.
یا من دڤێت ئاڤڕیێ پێ بده‌م و جهێ سه‌ر راوستیانێ، پێدڤیه‌ دو ئالیێن سه‌ر پشك پێ راببن و گۆتنێن خوه‌ بێ گیرۆبوون بكه‌نه‌ كریار، داكو جاره‌كا دى نه‌كه‌ڤینه‌ به‌ر لێهمشتێن به‌رژه‌وه‌ندیێن وه‌لاتێن زلهێز.
لایێ ئێكێ: پێدڤیه‌ سه‌ركردایه‌تیا سیاسیا كوردستانێ به‌رژه‌وه‌ندیێن خوه‌ یێن پارتایه‌تى و كه‌سى بده‌نه‌ لایه‌كى و ب ویژدانه‌كا پڕى ڤیانا وه‌لاتى و نه‌ته‌وى به‌رێ خوه‌ بده‌نه‌ به‌رژه‌وه‌ندیا مله‌تێ خوه‌، ئه‌م دزانین هه‌ر پارچه‌كا داگیركریا كوردستانێ، تایبه‌تمه‌ندیا خوه‌ یا هه‌ى، به‌لێ بلا ب نه‌په‌نى هه‌ڤپه‌یمانى هه‌بن، ئه‌مژى وه‌كى داگیركه‌رێن كوردستانێ بین كو وان گه‌له‌ك ئاریشه‌ و هه‌ڤڕكى هه‌نه‌، به‌لێ ل هه‌مبه‌ر كوردان ئه‌و هه‌ڤپه‌یمانن و برایێن ئێكن ل دژى كوردان، ئه‌رێ ما نه‌به‌سه‌ گه‌لى كوردان ئه‌و سه‌ربۆرێن مه‌ تێرا هندێ نینن كو هوون ژى ڤان ته‌كتیك و به‌رنامان بدارێژن.
لایێ دویێ: گازیا من بۆ هه‌ر چار وه‌لاتێن عیراق و تورك و فارسایه‌، ئه‌رێ ما هوون ژ خوینا كوردان تێر نه‌بوون، ما هه‌تا كه‌نگى دێ خودانێن ڤان هزر و عه‌قلیه‌تا بن، ما هوون نابینن كو ئه‌و زلهێزێن دونیایێ وه‌كى به‌ركێن شه‌تره‌نجێ یێ یاریێ ب هه‌وه‌ ژی دكه‌ن؟ و به‌رده‌وام یێ ئاگرێ دوبه‌ره‌كیێ و هه‌ڤركیێ ل ناڤ هه‌وه‌دا خۆش دكه‌ن؟ و هوون یێن خێر و به‌ره‌كه‌تێن د ناڤ وه‌لاتێن خوه‌دا دكه‌نه‌ غه‌زه‌ب بۆ مه‌ و هه‌موو پارێ وه‌ بۆ كڕینا چه‌كى و كارێن له‌شكرى دهێنه‌ مه‌زاختن و وه‌لاتێن وه‌ژى چ جاران ب ته‌ناهى ناژین و رۆژ بۆ رۆژێ كه‌ربوكین زێده‌تر لێ دهێت و دبنه‌ ڤۆلكانێن دژوار و دپه‌قن و چ مله‌ت ب هه‌وێن قركرنێ و ئه‌نفال و مشه‌ختكرنێ ژناڤناچن، ئه‌ڤجا هوون هه‌ر چار وه‌لات و هه‌رسێ مله‌ت، ترك و عه‌ره‌ب و فارس، ده‌لیڤه‌كا زێرینه‌ بۆ هه‌وه‌ باوه‌ریێ ب مافێن خه‌لكێ دیتر بینن و وێ هێزێ بده‌نه‌ خوه‌ و باوه‌ریێ ب ژیانا ب هه‌ڤرا و دیالۆگێ بینن و پێكڤه‌ژیانێ قه‌بوول بكه‌ن و سامانێن خوه‌ بكه‌نه‌ ئالاڤێ خۆشكرنا ژیارا خوه‌ و نه‌هێلن ده‌سته‌لاتدارێن وه‌ بۆ قركرنا خه‌لكێ دیتر بكاربینن و براینیێ و وه‌فاداریێ بكه‌نه‌ بنیاتێ هزر و باوه‌رێن خوه‌ و ئه‌م یێ د وێ باوه‌ریێ دا هه‌ر سه‌ركێشه‌كێ ژ ڤان وه‌لاتان ئه‌ڤێ بكه‌ت دێ بیته‌ قه‌هره‌مانێ چه‌رخى و دێ ناڤێ وى ب زێرى هێته‌ نڤیسین و یا فه‌ره‌ كو هوون ڤێ ره‌وشه‌نبیریێ بحه‌بینن و خوه‌ فێرى ڤى ره‌وشتى و سیسته‌مێ ژیانێ بكه‌ن و بلا ئه‌م هه‌موو باش بزانین كو ئه‌و زه‌مان چوو و نا زڤریته‌ڤه‌ ئه‌وێ حاكمه‌ك بته‌نا سه‌رێ خوه‌ دشیا حوكمى ل نیڤا دونیایێ بكه‌ت و یا وى ڤیابا دا كه‌ت و هه‌تا نوكه‌ وه‌ چ مفا ژ ڤى كه‌لتۆرێ خراب و نه‌ مرۆڤایه‌تى دیتیه‌؟ هه‌وه‌ چ مفا ژ كوشتن و تالانكرن و وێرانكرنا مله‌تێ مه‌ دیتیه‌؟ هه‌وه‌ چ مفا ژ سه‌بیكرنا كچ و ژنێن كوردان و خه‌لكێ دیتر دیتیه‌ ژبلى نه‌فره‌ت و رووره‌شیێ و رێیا ئێكانه‌ یا پێكڤه‌مان و ژیانه‌كا ب سه‌رفه‌راز ئه‌ڤه‌یه‌ و دیسا رێگریكرنه‌ ل تۆڤێ دوبه‌ره‌كیێ و پیلانێن وه‌لاتێن زلهێز ئه‌وێن خوینا گه‌لان دمێژن بۆ به‌رژه‌وه‌ندیێن خوه‌، خوه‌ هشیاركه‌ن و وه‌رنه‌ سه‌ر هێلا راستا ژیانێ، بلا به‌س یارى ب چاره‌نڤیسێ هه‌وه‌ بهێنه‌كرن و بلا ڤه‌مان و پاشكه‌ڤتن به‌س بن.

51

محه‌مه‌د محسن
هه‌لبژارتنێن ڤێ دووماهیێ یێن په‌رله‌مانێ ئیراقێ و كوردستانێ، ب سه‌ركه‌ڤتیانه‌ بدووماهیك هاتن و پارتى د هه‌ردو هه‌لبژاتنان دا باشترین سه‌ركه‌ڤتن بده‌ستخوه‌ڤه‌ ئینان، بێگومان ئه‌ڤ سه‌ركه‌ڤتنا پارتى ژ ڤالاتیێ و ژ چننه‌یێ نه‌هاتیه‌، به‌لكو ئه‌ڤه‌ ڤه‌رێژا وان هه‌لویست وراوستیانا بۆ یێت پارتى و جه‌ماوه‌رێ وێ ل هه‌مبه‌ر دۆزێت نه‌ته‌وى و ئه‌و ره‌وشێت ب سه‌ر وه‌لاتێ مه‌ دا هاتین بوون، بۆ خه‌لكێ كوردستانێ دیار بۆ پارتى پارێزڤانا ئاخا وه‌لاتێ خوه‌یه‌ و تنێ ئه‌وه‌ دشێت ته‌ناهیێ و ئاڤه‌دانیێ ل كوردستانێ په‌یداكه‌ت.
ل ڤێره‌ یا فه‌ر و پێدڤیه‌ بێژین كو خه‌لكێ كوردستانێ ب هه‌مى ته‌خ و جوینیت خۆڤه‌، پارتى خه‌لاتكر ب ده‌نگێن خوه‌، سه‌خمه‌راتى مانه‌ڤا كوردستانه‌كا ب هێز و خودان ئیراده‌ و ته‌نا، ئه‌ڤجا یا فه‌ره‌ پارتى ژی هزره‌كێ ل خوه‌ بكه‌ت و پێداچوونه‌كێ دخوه‌دا بكه‌ت و ده‌ستبده‌ته‌ چاكسازى و سه‌ر و به‌ركرنا ناڤمالیا خوه‌ و بلا هزر نه‌كه‌ت كو خه‌لكێ كوردستانێ یێ كور و نه‌ شه‌هره‌زایه‌ و هه‌تا هه‌تایێ دێ چاڤێن خه‌و ل شاشى و كه‌چیێن پارتى نقینیت و هه‌تا نوكه‌ خه‌لكى ده‌لیڤه‌ دا بۆ پارتى داكو ل خوه‌ بزڤریت و ئه‌و دوورشم و گۆتنێن كرین و گۆتین، بكه‌ته‌ كریار و بجهبینیت، هه‌كه‌ر نه‌ دێ پارتى زیانێت مه‌زن ڤێكه‌ڤن و دێ زیانڤێكه‌فتیا ئێكێ بیت و دێ ب ده‌مه‌كێ گه‌له‌ك كێم خه‌لكێ خوه‌ ژ ده‌ستده‌ت.
نوكه‌ هه‌مى خه‌لكێ كوردستانێ یێ چاڤه‌رێ یه‌ كانێ دێ شكل و ره‌نگێ حوكمه‌تا كوردستانێ ئه‌وا دێ هێته‌ ئاڤاكرن دێ یا چاوا بیت و دێ چ كه‌ت، دێ به‌رنامێ وێ یێ چاكسازیا چ بیت و كانێ چه‌ندا رژده‌ بۆ خزمه‌تكرنا خه‌لكى و وه‌لاتى، كو گه‌له‌كا فه‌ره‌ حوكمه‌تا كوردستانێ بێ ترس و دو دلى و ب وێره‌كیه‌كا مه‌زن ده‌ست ب چاكسازیا بكه‌ت، پاوانكرن به‌س بیت، دز بهێنه‌ سزادان و ب سیته‌مێن مودرن رێك ل وان بهێته‌ گرتن كو چ كه‌سه‌ك وێ وێره‌كیێ نه‌ده‌ته‌ خوه‌ ده‌ستێ خوه‌ درێژكه‌ته‌ مالێ خه‌لكى و هه‌ر كه‌سێ دز و د هه‌ر پله‌ و به‌رپسیاریه‌كێ دا بیت ل به‌ر چاڤێن خه‌لكى و ب مه‌حكه‌مێن عه‌له‌نى بهێنه‌ دادگه‌هكرن و ب دروستى ده‌ست ب ئاڤاكرنا ژێرخانا ئابوورى بهێته‌كرن و نه‌ تنێ پشتا خوه‌ ب كه‌رتێ نه‌فتێ ڤه‌ گرێده‌ن، پشته‌ڤانى و هاریكاریا كه‌رتێ تایبه‌ت و چاندن و سنعه‌تكاریێ بكه‌ن، رێك ل ئینانا تشتێ بیانى بهێته‌ گرتن و ئه‌وێ رێك پێ دهێته‌دان ژی خویكێن مه‌زن دداننه‌ سه‌ر داكو به‌رێ خه‌لكێ بكه‌ڤیته‌ تشت و به‌رهه‌مێ خومالى و ب باشى خالێن تخویبى بهێنه‌ كونترۆلكرن.
دیسا ئه‌م یێ دبینین كو سالانه‌ ب هزاران قوتابى یێ ل په‌یمانگه‌هـ و زانكۆیا ده‌ردچن و دكه‌ڤنه‌ كولاننا و ژلایێ حوكمه‌تێ ڤه‌ ناهێنه‌ دامه‌زراندن، هه‌لبه‌ت ل دونیا هه‌میێ هه‌مى ده‌رچوویێن خواندنگه‌ها ناهێنه‌ دامه‌زراندن، به‌لێ ده‌لیڤێن كارى ل به‌ر دهێنه‌ ڤه‌كرن و خوشكرن كو نه‌میننه‌ به‌تال و بمیننه‌ ل كولانان و ببنه‌ بارگرانى بۆ مالباتێن خوه‌ و جڤاكى ژی و داكو قه‌ستا رێكێن پرى ترس نه‌كه‌ن و به‌ر ب وه‌لاته‌كێ دیتر ڤه‌ بچن.
ئه‌ڤجا گه‌له‌كا فه‌ره‌ و هه‌ر پشتى دامه‌زراندنا كابینه‌یا نوو یا حوكمه‌تا كوردستانێ ده‌ست ب ڤان چاكسازیان بهێته‌كرن و ب به‌رنامه‌ پشته‌ڤانیا كه‌رتێ تایبه‌ت د هه‌مى سیكته‌راندا بهێته‌كرن و حومكه‌ت ل سه‌ر خودان كاران بسه‌پینیت كو هه‌ر ئێك ل دووڤ پێدڤیا خوه‌ و ل دووڤ بسپۆریا قوتابیان چه‌ند كه‌سه‌كا ل ده‌ف خوه‌ بده‌ته‌ شۆلى و ته‌ئمینا وان ژ لایێ حوكمه‌تێ ڤه‌ بهێته‌كرن و ئه‌ڤه‌ ژی ب قورعه‌ بهێنه‌ به‌لاڤكرن ل سه‌ر وان كۆمپانى و كارگه‌هـ و شولا و هه‌لبه‌ت ئه‌ڤه‌ دێ بیته‌ بارسڤكیه‌كا گه‌له‌ك مه‌زن بۆ حوكمه‌تێ و دێ شێت پتر خزمه‌تا پێشكێشكه‌ت و هه‌رده‌مێ حوكمه‌تێ ئه‌ڤه‌ كره‌ مه‌بده‌ئێ خوه‌ و ب رژدى ل سه‌ر كاركر، هینگى یا دبێژنێ قه‌یران به‌راهیا حوكمه‌تێ ناگریت و رۆژ بۆ رۆژێ دێ ده‌ستێ وێ ڤه‌كریتر لێ هێت و ئه‌م دوێ باوه‌ریێ داینه‌ هه‌كه‌ ئه‌ڤه‌ هاته‌ كرن، وه‌لات، خه‌لك، دێ د باشترین ژیاندا ژیت و كه‌سێ چ ئاریشێن ئابوورى نامینن.
ئه‌ڤجا به‌سه‌، مله‌تى باوه‌رى دا هه‌وه‌، هوونژى رێزێ ل ڤێ دیاریا مه‌زنا خه‌لكێ كوردستانێ یێ دلسۆز و وه‌فادار و یێ خوه‌ نه‌ چه‌مینیت بگرن و ده‌ست ب باشى و قه‌نجیا بكه‌ن و خوه‌ راستڤه‌كه‌ن.
ئه‌گه‌ر نه‌؟

46

د گه‌له‌ك ده‌لیڤه‌ و جاران دا كورد گه‌هشتینه‌ گوپیتكا سه‌ركه‌ڤتنێن خوه‌ و نێزیكى خه‌ونا خوه‌ یا دێرین بووینه‌، كو ببنه‌ كیانه‌كێ سه‌ربخوه‌ و ئازادیا خوه‌ وه‌ربگرن، به‌لێ ب مخابنیڤه‌، هه‌ر كورد بخوه‌ یێن بووینه‌ رێگر و ئاسته‌نگ ل هه‌مبه‌رى وێ خه‌ونا خوه‌ و نه‌هێلایه‌ خوه‌ بگه‌هیننه‌ وێ ئارمانجا خوه‌ یا پیرۆز و ژ ئه‌گه‌رێ ڤێ نه‌زانین و سه‌رهشكیا خوه‌ زڤرینه‌ ڤه‌ خالا چنه‌یێ و چ خش تێدا نینه‌ كو هه‌مى گاڤان ئه‌و ده‌لیڤه‌ په‌یدا نابن و هه‌ر ده‌مێ مه‌ بڤێت به‌ر ب وێ ئارمانجێ بچین، به‌لكو ژ ئه‌گه‌رێ ئالۆزى و شلقیان و شه‌ر و هه‌ڤركیێن دكه‌ڤنه‌ د قانه‌كا عه‌ردی دا هینگى ده‌لیڤه‌ چێدبن كو گه‌ل و مله‌ت سه‌ربخوه‌یا خوه‌ وه‌ربگرن.
هه‌ر وه‌كى ئه‌م هه‌مى دزانین نوكه‌ و پشتى ئه‌و ئالۆزیێن ده‌ڤه‌را رۆژهه‌لاتا ناڤین ڤه‌گرتى و به‌رژه‌وندیێن زلهێز و ئه‌ورۆپیان كه‌ڤتینه‌ د ڤێ پارچا عه‌ردی دا و ل گه‌ل به‌رژه‌وه‌ندیێن كوردستانێ هه‌ڤجووت بووین و ئه‌م یێ به‌ر سینگێ دژوارترین رێخستیا تیرۆرى دگرین و دونیایێ هه‌میێ ژ ترسا وان دپارێزین و راسته‌ كوردستانێ قوربانى و زیانێن گه‌له‌ك مه‌زن ڤێ كه‌ڤتن و دان، به‌لێ د گه‌ل هندێ دا ژی كوردستان گه‌له‌ك ب به‌رفره‌هى ل دونیایێ هاته‌ نیاسین و پێشمه‌رگه‌ بوویه‌ ئێك ژ سمبۆلێن دونیایێ و كورد بووینه‌ جهێ باوه‌ریا خه‌لكى و ئه‌ڤ رێخستیا تیرۆرى ل سه‌ر ده‌ستێ كوردان هاته‌ تێكدان و ئه‌و چیڤانووكا ب ترس هاته‌ شكاندن و نوكه‌ یا به‌ر ب مه‌رگێ خوه‌ دچیت و ژ ئه‌گه‌رێ ڤێ چه‌ندێ و ڤێ شلقیانا ب ده‌ڤه‌رێ كه‌ڤتى، كوردستان یا نێزیكى خه‌ونا سه‌رخوه‌بوونێ دبیت و پێنگاڤێن گه‌له‌ك مه‌زن یێن هاتین هاڤێتن و رانان، به‌لێ مخابن جاره‌كا دى وه‌سا دیاره‌ كو كورد بخوه‌ دێ بنه‌ ئه‌گه‌ر كو ئه‌ڤ ده‌لیڤا زێرین ژ ده‌ست بچیت.
دوور ژ ده‌مارگیریا حزبى و هزرى، یا پێدڤیه‌ خالان دانینه‌ ل سه‌ر پیتا و ب دلسۆزى راستیان ببێژین و نه‌ڤه‌شێرین.
ده‌مێ هێرشا درونده‌یێن داعش ل سه‌ر كۆبانێ دژوار بووى و به‌ر ب كه‌ڤتنێ بووى و پێدڤى هێزا برایێن خوه‌ ل ڤێ پارچا كوردستانێ بووین، پێشمه‌رگێ قه‌هره‌مان بێ دودلى و ئێكسه‌ر حازریا خوه‌ ده‌ربڕى و پشتى چه‌ندین بزاڤێن مه‌زن هاتینه‌ كرن، پێشمه‌رگه‌ د هان و هه‌وارا كۆبانێ چوو و نه‌كره‌ منه‌تژى ل سه‌ر چ كه‌س و ئالیه‌كى، به‌لكو ئه‌و چه‌ند ب ئه‌ركێ خوه‌ زانى و پشتى ئه‌ركێ وان ب دووماهى هاتى، پێشمه‌رگه‌ بێ گیرۆبوون زڤرى ڤ جهێ لێ چووى و ل ده‌مێ كاره‌ساتا شنگالێ چێبووى، هێزێن پ ك ك، وانژى هاریكاریا خه‌لكێ لێ قه‌ومى كرن و سه‌ربارى گه‌له‌ك تشتێن نه‌ د جهدا، هه‌مى كه‌س و ئالیان سوپاسیا وان كرن، به‌لێ ئه‌و به‌روڤاژى پێشمه‌رگه‌یى بوون و وان ئه‌و كریار بخوه‌ ب ده‌لیڤه‌ زانى و ئه‌و كێم و كاسى و شكه‌ستنا له‌شكریا به‌ر وه‌ختا ل شنگالێ چێبووى كرنه‌ ئالاڤێ پرۆپاگنده‌كا نه‌ ژ هه‌ق دژى پارتى دیمۆكراتى كوردستان و گه‌له‌ك ب مخابنیڤه‌، گه‌له‌ك ئالیێن سیاسى ل باشۆرێ كوردستانێ كو هه‌ڤالبه‌ندێن پارتى نه‌ و د پشكدارن د حوكمه‌تا كوردستانێ دا، ئه‌و ژی وه‌كى په‌كه‌كێ كه‌ڤتنه‌ د چه‌په‌ره‌كێ هه‌ڤدژدا و سه‌خمه‌راتى ب ده‌ستڤه‌ئینانا سۆزا خه‌لكێ وێ ده‌ڤه‌رێ، پارتایه‌تیه‌كا كورانه‌ و به‌رته‌نگ كرن و دژوارترین پرۆپاگنده‌ دژى پارتى كرن.
به‌لێ پشتى سه‌رۆك بارزانى، سۆز دایه‌ ئێزدیان كو ب هه‌ر ئاوایه‌كێ هه‌بیت، دێ شنگالێ رزگار كه‌ین و سۆزا خوه‌ گه‌له‌ك زوو ب جهئینا و شنگال هاته‌ رزگاركرن ب خوینا گه‌شا ب سه‌دان عه‌گید و مێرخاسا و هه‌تا نوكه‌ ژی هه‌ر پێشمه‌رگه‌یه‌ به‌ره‌ڤانیێ ژ ڤێ پارچا پیرۆزا ئاخا كوردستانێ دكه‌ت، به‌لێ پیلانێن دوژمنان تلوڤه‌نه‌ ب دووڤ ئێكڤه‌ و ئێك ل دووڤ ئێكێ یا راچاندیه‌ و ئه‌و فلمێ نوكه‌ بۆ شنگالێ دهێته‌ به‌رهه‌م ئینان ژ ده‌رئینانا ئیرانێ یه‌ و ئه‌كته‌رێن سه‌رپشك مالكى و ئه‌سه‌د و دبنرا ژی تورك د گه‌لدانه‌ بۆ چێكرن و دامه‌زراندنا هێزین له‌شكرى كو پشته‌ڤانیا وان ژ حه‌شدا شه‌عبى یا شیعى دهێته‌ وه‌رگرتن و كه‌سێن بووینه‌ دار ده‌ستێن مالكى ژی ئه‌ون یێن ل هه‌لبژارتنێن عیراقێ ژی ده‌نگ ل دژى كوردان داین د به‌رژه‌وندیا ئیسلاحێ، چونكو جه‌ماعه‌تێن ئیسلاحێ نوكه‌ژى بێ شه‌رم دبێژن ئه‌م ئێزدى نه‌ كوردین و نوكه‌ ل بن په‌ردا پ ك ك ل ده‌ڤه‌رێ ئاریشان دروست دكه‌ن و دبنه‌ رێخوشكه‌ر بۆ ده‌ست تێڤه‌دانا ده‌وله‌تێن هه‌رێمى.
ئه‌ڤجا گازیا مه‌ ئه‌وه‌ بۆ هه‌مى ئالیێن سیاسى كو سه‌ربۆرێن كه‌ڤن بیننه‌ بیرا خوه‌ و ژبلى پێشه‌مانیێ شه‌رێ براكوژیێ چ مفا تێدا نینه‌ و بلا ئێكه‌تى و گۆڕان و پارتێن دیتر ژى هزر نه‌كه‌ن دێ د شه‌ری دا ب تنێ پارتى و پ ك ك زیانێ كه‌ن، ئه‌ڤجا بلا به‌س ئاگرێ ئه‌وا چێبووى خۆش كه‌ن و ئه‌ڤرۆ یێ غیره‌ت هه‌بیت و یێ ب رۆمه‌ت بیت و دلسۆزێ كوردستانێ بیت، هه‌كه‌ هه‌لبه‌ستڤان بیت، ب هه‌لبه‌ستا خوه‌ و هه‌كه‌ نڤیسه‌ڤان بیت ب گۆتار و شیره‌تێن خوه‌ و هه‌كه‌ نه‌ خواندى بیت، ب پارچه‌كا په‌رۆكێ سپى، د ناڤبه‌را كو جهێ گومان تێدا هه‌ى دێ شه‌ڕێ براكوچیێ لێ چێبیت، لێ بلند بكه‌ن و مه‌دیاكارێن كوردستانێ، هزر و ئه‌یدولۆژى و پارتایه‌تیێ دداننه‌ لایه‌كى، هه‌مى پێكڤه‌ ب دژى به‌رفره‌هبوونا ڤى ئاگرى راوستن و ببنه‌ ئێك ده‌ست بۆ ئارامیا كوردستانێ و هه‌مى پێكڤه‌ بزاڤێ بكه‌ین، پێشمه‌رگێن رۆژئاڤا و یه‌په‌گێ نێزیكێ ئێك بكه‌ین و ببنه‌ هێزه‌ك و بكه‌ڤنه‌ د خزمه‌تا گه‌ل و وه‌لاتێ خوه‌ دا.
بلا پتر لێك نه‌بینه‌ ره‌شه‌ و بلا چ خوینا گه‌نج و لاوێ مه‌ ب ده‌ستێن برایێن خوه‌ نه‌ هێته‌ رێتن و ژ لایه‌كێ دیترڤه‌ ئه‌م یێ دبینین بێ حورمه‌تى یا ل هه‌مبه‌رى ئالایێ كوردستانێ ل رۆژئاڤا دهێته‌ كرن و دهێته‌ سۆتن، ئه‌و ئالایێ ب سه‌دان هزار كوردان خوه‌ بۆ كریه‌ قوربانى و خوینا خوه‌ یا پیرۆز سه‌خمه‌راتى پاراستن و بلند راكرنا وى ئالایى رشتى، له‌وما ژی یا پێدڤیه‌ پ ك ك و یه‌په‌گه‌، داخازا لێبۆرینێ ژ خه‌لكێ كوردستانێ بخوازن و ئه‌گه‌ر ئه‌و بێژن ئه‌م نه‌ ئه‌گه‌رین ئه‌ڤێن ئالاى دسۆژن ره‌شه‌كێن نه‌یارانه‌و چ جوداهى ل ناڤبه‌را وان كه‌سان و میتا تركا و سیخۆرێن ئه‌سه‌دى و درونده‌یێن مالكى و ئیتلاعاتا ئیرانى دا نینه‌.
گازیا مه‌ یا دووماهیێ بۆ هه‌مى ئالیێن سیاسى ئه‌و كو ب به‌رپرسانه‌ سه‌ره‌ده‌ریێ بكه‌ن و بلا دلێ هه‌وه‌ ب ئاخا كوردستانێ ڤه‌ بیت و ڤێ ده‌لیڤا زێرین ژ ده‌ستێ گه‌ل و وه‌لاتێ مه‌ نه‌كه‌ن و ئه‌ڤ پارچا كوردستانێ گه‌له‌ك نێزیكى ئارمانجا خوه‌ بوویه‌ و به‌ر ب سه‌رخوه‌یێ پێنگاڤان دهاڤێژیت و ئه‌ڤه‌ ژی بێگومان سه‌ركه‌ڤتنا هه‌مى پارچه‌یێن دیترێن كوردستانێ یه‌ و بلا ئه‌م قه‌ت و قه‌ت دوێ باوه‌ریێ دا نه‌بین كو دێ ئالیه‌ك د ڤێ هه‌ڤكێشێ و خوه‌كوژیێ دا یێ سه‌ركه‌ڤتى بیت و ئه‌م هه‌مى دێ پێكڤه‌ سۆژین، شه‌ركه‌ر و ته‌ماشه‌كه‌ر و بێ جوداهى.

82

ئه‌م ملله‌ته‌كین مه‌ چ ژێرخانێن ئابوورى یێن بنه‌جهـ نینن وه‌كى كارخانه‌ و پرۆژێن چاندنێ و مریشك و هتد…، له‌وا ژی ئه‌م ژ گه‌له‌ك رویان ڤه‌ نه‌شێین خوه‌ و جڤاكا خوه‌ هه‌ڤبه‌ر بكه‌ین ل گه‌ل پتریا وه‌لاتێن دونیایێ و دبیت ژی گه‌له‌ك تشتێن مه‌ ژ جهـ نه‌لڤینه‌ و هه‌ر وه‌كى خوه‌ ماینه‌ڤه‌، كو یا فه‌ره‌ بهێنه‌ گوهۆرین، نه‌خاسمه‌ژى د وارێ جڤاكید ا و ب دیتنا مه‌ ئه‌ڤه‌ دێ تشته‌كێ گه‌له‌ك باش بیت و دێ كارتێكرنا وێ یا ئه‌رینى بیت و ئێك ژ وان تیتالان ژی كو مه‌به‌ستا مه‌ ژی هه‌ر پێ ئه‌وه‌ (به‌هینه‌) و پشتى ب ئه‌گه‌رێ كۆمه‌كا گڤاشتن و كاره‌سات و مالوێرانیان ب سه‌ر كوردان دا هاتین، مشه‌ختبوون بۆ ده‌رڤه‌ى وه‌لاتى و دیسا مشه‌ختبوون بۆ باژێرا و كۆمكرنا ب كوته‌كى، چێبووین، نیاسین و خزماتى گه‌له‌ك به‌رفره‌هـ بۆ و ژ تخویبێن خوه‌ یێن بچویك ده‌ركه‌ڤت و ئێشا ته‌مبه‌لیێ جڤاكێ مه‌ ڤه‌گرت و چاڤى وى ما ل به‌ر ده‌ستێ حوكمه‌ت و مووچان، ئه‌ڤجا ده‌مێ نوكه‌ كه‌سه‌ك دچیته‌ به‌ر دلۆڤانیا خودێ، یا بوویه‌ هه‌ڤڕكى كانێ دێ تازیا كێ ژ یا كێ ب قه‌ره‌بالغتر و ب مرۆڤتر بیت و دیسا كانێ دێ خوارنا كێ باشتر و به‌رفره‌هتر بیت و هه‌ر دانه‌كێ خوارنێ دێ چه‌ند كه‌س به‌رهه‌ڤبن، هه‌كه‌ ئه‌م هه‌مى د هاریكاربین ل گه‌ل خودانێ تازیێ، پێدڤیه‌ ئه‌م ده‌سپێشخه‌ریه‌كێ بكه‌ین و ژ لایێ خوه‌ ڤه‌ ئه‌ز ڤان پێشنیازان دكه‌م، هیڤیدارم كو خودان هزر و كه‌ساتیێن ده‌ڤه‌رێ ژی ره‌ئیا خوه‌ هه‌بیت و به‌رسڤا مه‌ بده‌ن، داكو ئه‌ڤ بابه‌ته‌ پتر بهێنه‌ زه‌نگینكرن و هه‌مى ره‌ئى و بۆچوون بهێنه‌ لێكدان و كۆمكرن و جڤاتا پارێزگه‌هێ و ئێكه‌تیا زانایێن ئیسلامێ لقێ دهۆك، ل سه‌ر شاشه‌یێن تیڤیا مێزگه‌رده‌كێ بكه‌ن و بگه‌هنه‌ بریارێن باش و ئه‌ز ژى دێ به‌رۆكا پێشنیاران ب ڤى ره‌نگى ڤه‌كه‌م:

1 ـ تازى ژ سێ رۆژا ببنه‌ دو رۆژ و پشتى نیڤرۆ.
2 ـ بریار بهێنه‌دان كو ئه‌و خوارنێن دده‌نه‌ تازیكه‌ران د بێ گۆشت بن، گۆشتێ سۆر و سپى، چونكى ئه‌ڤه‌ دبیته‌ بارگرانیه‌كا مه‌زن ل سه‌ر ملێن خودانێن تازیێ، بلا ب تنێ ساڤار و ئاڤك بن، یان ژی برنج و ئافكه‌ك و ئیڤارى ژی پێخوارنێن سڤك چێكه‌ن.
3 ـ مرۆڤ و كه‌سوكارێن نێزیك و گوندێن دى و بلا گوندێن جیران ژی بچنه‌ تازیێ.
4 ـ خودانێ تازیێ ل سه‌ر لافیتێ بنڤیسیت كو تێله‌فۆنا من یا سه‌ره‌خۆشیێ ئه‌ڤه‌یه‌ و هه‌ژمارا تێله‌فۆنا خوه‌ ل سه‌ر بدانیت.
ئه‌و بارگرانیا بۆ خودانێ تازیێ و مرۆڤێن وى چێدكه‌ن دێ گه‌له‌ك سڤك بیت، چونكى خه‌رجیێن تازیان 75% گۆشت و مریشكن و دبیت ئه‌ڤ بابه‌ته‌ ژ لایێ هنده‌كاڤه‌ یێ په‌سه‌ندكرى نه‌بیت، به‌لێ ئه‌ز هزر دكه‌م دێ پتریا جڤاكى ل گه‌ل ڤان پێشنیاران بن و ئه‌ڤه‌ مه‌ به‌رۆكه‌ بۆ دانوستاندن و پێشنیاران ڤه‌كر و هیڤیدارین هه‌مى خودان هزر و دیتن ل دۆر ڤێ مژارێ ل دۆر ڤێ بانگه‌وازا مه‌ بهێن و ره‌ئى و بۆچوونێن خوه‌ بێخنه‌ به‌رچاڤ و ب هوورى شلۆڤه‌ بكه‌ن و ماده‌م مه‌ دڤێن ئه‌م ببینه‌ ده‌وله‌ت، دڤێن ئه‌م ژ هه‌مى لاڤه‌ ژیانا خوه‌ یا جڤاكى رێك بێخین.

86

هه‌مى كار و لڤین و بزاڤێن كورد پێ رابووین، گه‌له‌ك ب پاقژى و دلسۆزى و ب دله‌كێ پاقژ پێ رابووینه‌، ئه‌ڤجا چ تێدا سه‌ركه‌تى بن، یان ژی شكه‌ستن تێدا دیت بیت، ئه‌ڤ دلسۆزیا ڤى مله‌تى بوویه‌ سیمایه‌ك و سمبۆله‌كا پیرۆز د ناڤ جڤاكێ كوردى دا و ئه‌ڤه‌ بوویه‌ ئه‌گه‌رێ هندێ كو ب درێژیا سه‌دان سالان به‌رخودان و خه‌باتێ ب دژى زۆلم و زۆرا دوژمن و نه‌یارێن خوه‌ بكه‌ت.
ئه‌ز وه‌كو كه‌سه‌كێ گرێدایى ب پارتى ڤه‌، من گه‌له‌ك ب فه‌ردیت، گه‌له‌ك ب جورئه‌ت ره‌خنێ ل حزبا خوه‌ بگرم، كو یا پێدڤیه‌ ل سه‌ر هه‌ر ئه‌ندام و كادرێ هشیارێ هه‌ر هێزه‌كا سیاسى، هه‌ر ب ڤێ رۆحیه‌تێ ڤه‌رێژا كه‌دا حزبا خوه‌ ب هه‌لسه‌نگینیت و بێ ترس و دودلى نقینكان ل شاشى و خه‌له‌تیێن وێ بگریت، چونكى تشته‌كێ گه‌له‌ك نۆرماله‌ كو هه‌مى هێز و بزاڤێن سیاسى دكه‌ڤنه‌ د ناڤ شاشیان دا و یا فه‌ره‌ ب رێكا ئه‌ندامێن وان یێن هشیار و ل سه‌ر خوه‌، به‌رێ وێ ژ وان شاشیان وه‌رگێرن و رێكا راست و دروست بۆ بهێته‌ ده‌ستنیشانكرن، ئه‌و ژی ب رێكا دانوستاندنه‌كا هوور و كوور و ل سه‌ر خوه‌ و ژ بۆ پاراستنا به‌رژه‌وندیا ته‌ڤایا خه‌لكێ كوردستانێ.
هه‌لبه‌ت چ غش تێدا نینه‌ كو پارتیبوونا هه‌ر ئێكى ژ مه‌ ل سه‌ر بنیاته‌كێ ب هێز و خورستى بوویه‌، كو ئه‌و ژى رێبازا پیرۆزا بارزانی یه‌، به‌لێ گه‌له‌ك ب مخابنی ڤه‌ دبێژین كو ئه‌ڤه‌ چه‌ند ساله‌كه‌ رۆژ بۆ رۆژێ به‌رپرسێن مه‌ یێ مه‌زنیا وێ رێبازێ سڤك دكه‌ن و هێدى هێدى یێ ژ وێ سه‌مت و رێكێ ڤه‌ده‌ر دبن و ب ئه‌گه‌رێ كریار و پێرابوونێن وان سه‌نگا وێ رێبازا كوردایه‌تیێ دئیننه‌ خوارێ و ئه‌و خه‌لكێ ب هه‌مى وه‌فادارى و دلسۆزیا خوه‌ قه‌ستا رێزێن ڤێ حزبێ كرین، هێدى هێدى یێ دل شكه‌ستى و دل سار دكه‌ن و بێگومان به‌رده‌وامیدان ب ڤان ره‌فتار و كریاران، د ڤه‌رێژێ دا ب تنێ زه‌ره‌ر و زیان دێ گه‌هیته‌ سه‌نگ و بهایێ پارتى و ڤى سه‌روه‌ت و سامانێ مه‌زنێ ڤێ حزبێ دێ به‌ر ب لاوازبوونێ ڤه‌به‌ن.
ئه‌ڤه‌ پترى دو سالایه‌ كوردستان و خه‌لكێ وێ هه‌ڤرویشى دژوارترین رێكخستیا تیرۆرى ل دونیایێ بوویه‌ كو ئه‌و ژى ده‌وله‌تا ئیسلامیا داعشه‌ و ژ ئه‌گه‌رێ روى ب رویبوون و به‌ره‌ڤانیكرن ژ كوردستانێ، ب هزاران كور و كچ و قه‌هره‌مانێن ڤى وه‌لاتى گیانێ خوه‌ كریه‌ قوربانى و هه‌میا ب دله‌كێ گه‌رم قه‌ستا به‌روكێن شه‌رى كر و نه‌خاسمه‌ و پتر ژ هه‌ر هێز و ئالییه‌كێ سیاسى، كادر و ئه‌ندام و ئالیگرێن پارتى به‌ر ب سه‌نگه‌رێن به‌ره‌ڤانیێ چوون و نوكه‌ ژى ب هزاران كادرێن پارتى دگه‌ل برایێن خوه‌ یێن پێشمه‌رگه‌ د سه‌نگه‌ران دانه‌ و ب ده‌هان كادرێن ژێهاتى و قه‌هره‌مان جانێ خوه‌ كریه‌ قوربانى ئاخا پیرۆزا وه‌لاتێ خوه‌ و پێخه‌مه‌ت سه‌ركه‌فتن و نه‌هاتنه‌ خوارا مه‌عنه‌ویاتێن پێشمه‌رگه‌ى، وان خوه‌ ل سه‌ر هه‌مى تشته‌كى بێده‌نگ كریه‌، ژ به‌ركو دزانن كو پارتیا وان ئه‌ڤرۆ هه‌لگرا درووشمێ سه‌رخۆبوونا كوردستانێ یه‌، ل ڤێره‌ گه‌له‌ك یا فه‌ره‌ و پێدڤیه‌ پارتى پتر ژ ڤێ یا هه‌تا نوكه‌ بووى و ب ئاشكراتر و ل به‌رچاڤێن هه‌مى خه‌لكێ كوردستانێ و دونیایێ خویا بكه‌ت ئه‌و خودانا درووشمێ ده‌وله‌تا كوردستانێ یه‌ و هه‌مى پێشبینى یێن چاڤه‌رێكرى ژی بۆ خه‌لكى رۆهن بكه‌ت كانێ دێ پشتى قووناغا راگه‌هاندنا سه‌ربخۆیێ چ چێ بیت، نه‌خاسمه‌ ژی ژ لایێ ئابوورى و ژین و ژیارا خه‌لكى و ئه‌و گه‌فێن پشتى وێ قووناغێ دهێنه‌ چاڤه‌رێكرن و هه‌ر نوكه‌ هه‌وه‌كا به‌رفه‌هـ و بێى ڤه‌شارتن ژلایێ به‌رپرس و سازیێن حكوومه‌تێ ڤه‌ بهێته‌ كرن ل سه‌ر داهات و خه‌رجیێن حكوومه‌تێ و نه‌خاسمه‌ ل دۆر كه‌رتێ نه‌فتێ و به‌رهه‌مئینان و فرۆتنا وێ و هوور هووركێن وێ بهێنه‌ دیاركرن و ئه‌و نه‌شه‌فافیه‌تا ژێ دهێته‌ گۆتن ب دروستى بۆ خه‌لكێ كوردستانێ و هێزێن سیاسى و ناڤه‌ندێن دونیایێ بهێنه‌ رۆهنكرن، دا كو ئه‌و په‌ردا تاڕیا هنده‌ك هێزێن سیاسى ل دۆر ڤێ چه‌ندێ چێكرین بهێته‌ راكرن و خه‌لك ب چاڤێن خوه‌ هه‌ر تشته‌كى ببینیت و دیسا داهاتێ ناڤخۆیى ژی ب هه‌مى چه‌ق و تایێن وێ ڤه‌ بهێته‌ رۆهنكرن و چ تاریاتیێ ل سه‌ر چ كوژیه‌كێ داهاتى نه‌هێلن، بێگومان هه‌ر وه‌ختێ ئه‌ڤ پێنگاڤه‌ ب دروستى هاتنه‌ هاڤێتن، هینگێ دێ دلێ خه‌لكى ته‌نا بیت و حكوومه‌ت ژی دێ پتر بیته‌ جهێ باوه‌ریا وان كو بێ باوه‌ریه‌كا مه‌زن په‌یدا بوویه‌ و نه‌خاسمه‌ كو خه‌لك كه‌ڤتیه‌ د بن كێنجا میدیایا زالمانه‌ یا هێزێن دیترێن سیاسى یێن كوردستانێ دا، كو پێیه‌كێ وان د ناڤ گه‌هـ و وه‌سه‌لێن حكوومه‌تێ دایه‌ و پێیێ دیتر ژی دوژمنیا وێ دكه‌ن و ئه‌و ژی ب تنێ بۆ هندێ یه‌ كو پارتى پێ بهێته‌ شكاندن و گه‌له‌ك یا فه‌ره‌ پارتى بزاڤێن مه‌زن بكه‌ت و وان نه‌چار بكه‌ت كو وێ دو رویێ نه‌كه‌ن و ب دروستى ملێن خوه‌ داننه‌ به‌ر بارێ به‌رپسیاریێ و حكوومه‌ت بێى ڤه‌شارتن بێژیته‌ خه‌لكێ خوه‌ یا د شیانێن مه‌ دا ئه‌ڤه‌یه‌، هینگێ خه‌لك ژی یێ دلگران نابیت و دێ یێ ژ حكوومه‌تا خوه‌ رازى و هاریكار بیت و ب ڤێ چه‌ندێ دێ تخویب بۆ وان هه‌می هێزێن سیاسى یێن موزایده‌چى هێنه‌ دانان و كه‌س ژی نه‌شێت چ ئه‌زمان درێژیا بكه‌ت.
ل ڤێره‌ پێدڤیه‌ سه‌ركردایه‌تیا پارتى و مه‌كته‌با سیاسى، ب هه‌مى سازیێن خوه‌ڤه‌ پشته‌ڤانیا حكوومه‌تێ بكه‌ن و ده‌ستى نه‌ دانه‌ سه‌ر داهاتیێن حكوومه‌تێ و ئه‌ڤه‌ دێ بیته‌ ئه‌گه‌رێ هندێ كو گڤاشتن بكه‌ڤیته‌ سه‌ر هه‌مى حزب و هێزێن سیاسى ئه‌و ژی وه‌كى پارتی بكه‌ن، وى ده‌مى حكوومه‌ت ژی دێ شێت ب دروستى ب كار و ئه‌ركێن خوه‌ رابیت.
هیڤی خوازین ئه‌ڤێن ب ناڤێ رێبازا پیرۆزا بارزانى دئاخڤن، ژ بۆ پاراستنا به‌رژه‌وندیێن خوه‌ بلا تخویب بۆ بهێنه‌ دانان، چونكی خه‌لكێ كوردستانێ قوربانیێن مه‌زن ل سه‌ر وێ رێبازێ داینه‌ و هه‌رده‌م جهێ باوه‌ریا ڤى خه‌لكى بوویه‌ و بلا ئه‌ڤ رێبازا پیرۆز و ره‌سه‌ن بهێته‌ پاراستن و وه‌رار پێ بهێته‌ دان كو ئه‌و ژى خوه‌ د سه‌ربخۆیا كوردستانێ و ئاڤاكرنا ده‌وله‌ته‌كا دادپه‌روه‌ر دا دبینیت.

61

مله‌تێ كورد ددیروَكێدا، شۆڕه‌ش ل دووڤ شۆڕه‌شێ كریه‌ و هه‌موو ده‌ماژی ئه‌و وه‌لاتێن ئه‌م دناڤدا هاتینه‌ پارڤه‌كرن عێراق، ئیران، توركیا و سوَریا، ئه‌و چه‌ند دژی ئێك بن، به‌لێ بوَ هه‌ر بزاڤه‌كا كوردان ئێك ده‌نگن و برایێن ئێكێن ده‌یبابینه‌ و دئێكگرتی و هه‌ڤسوَزن، هه‌رده‌م وان پیلانێن دژوار و رێك و پێك دارێتینه‌ و وه‌كی فلمه‌كی بوَ هه‌ر روَله‌كی ئه‌كته‌رێن خوه‌ پارڤه‌كرینه‌ و ئێك ژ وان روَل گێرانان بزاڤكرینه‌ كانێ دێ چاوا شێن ئێكرێزیا كوردان تێكده‌ن و ژێك دوور ئێخن و ئه‌ڤه‌ژی دژوارتین چه‌ك بوویه‌ وان ب كار ئینایی و یێن شیاین سه‌ركه‌ڤتنێن مه‌زن تێدا بینن و ب ڤێ رێكێ هه‌رجار بزاڤ و شۆڕه‌شێن كوردا ژناڤ ببه‌ن.
پشتی شه‌رێ كوێتێ و هه‌موو تشت د به‌رژه‌وه‌ندیا وه‌لاتێن زلهێزان دا هاته‌ گوهوَڕین، وه‌سا خاست كو تێكهه‌لیێن خوه‌ دگه‌ل باشوورێ كوردستانێ خوه‌ش بكه‌ن و په‌ردێ ل سه‌ر وان گونه‌هێن ده‌رهه‌قا مله‌تێ كورد هاتینه‌ كرن مینا ئه‌نفالكرنا بارزانیا و فه‌یلیا و خوپانا هه‌له‌بجه‌ و ئه‌نفالێن 1988ێ، راكه‌ن و گڤاشتنا بێخنه‌ سه‌ر وان ده‌ستهه‌لاتدارا، تاكو سالا 2003یێ كو بریارا لێدانا رژێما عێراقێ دا و ئێخستنا دكتاتورێ چه‌رخێ بیستێ سه‌ددام حسین، ئو كورد بوونه‌ یاریكه‌رێن ئێكێ د عێراقا نوو دا كو پێكڤه‌ بژین و ئێدی ب وه‌لاتیێن پله‌ دو نه‌هێنه‌ هه‌ژمارتن، ب ڤی ره‌نگی كورد بوونه‌ پشته‌ڤان بوَ عێراقه‌كا دیموكراسی. به‌لێ مخابن دوَستێن دوهی ل چیا و دنه‌خوه‌شیادا دگه‌ل كوردا، پشتی هاتینه‌ سه‌ر حوكمی، چ جوداهی ل ناڤبه‌را وان و سه‌ددامی دا نه‌بوو، نه‌خاسمه‌ ئالیێ شیعی یێن وه‌كو ئیبراهیم جه‌عفه‌ری و پاشی مالكی و نوكه‌ژی عه‌بادی، ئه‌ڤه‌ژی دزڤریت بوَ پیلانگێریێن ئیرانێ كو یاریێ ب رێڤه‌ دبه‌ت و ژ پێش هه‌موو وه‌لاتێن داگیركه‌ر كارێ تێكدانێ دكه‌ت، چنكو ئیران، عێراق، سوَریا و توركیا نه‌شێن ب شه‌ر بهێنه‌ سه‌ر كوردستانێ، به‌لێ به‌رنامه‌كێ رێك و پێك دانا و هنده‌ك ئالیێن سیاسیێن كوردستانێ كرنه‌ ئامیره‌ك و پالدده‌ن ژبوَ تێكدانا ره‌وشا ناڤخوه‌. جارا ئێكێ و پێنگاڤا ئێكێ هێرش برنه‌ سه‌ر باره‌گه‌هێن پارتی ب بهانه‌یا نه‌بوونا خزمه‌تكاری و كێماسیێن رێڤه‌برنێ. یا دیار بوو ڤێ كریارێ چ تێكهه‌لی ب خزمه‌تكاریێن سلێمانیێ نه‌بوون، به‌لێ پلان ئه‌و بوو كو فه‌وزایێ دروست بكه‌ن، پشتی وێ چه‌ندێ سه‌رنه‌گرتی، ده‌ست هاڤێنه‌ پیلانه‌كا دیتر ب رێكا قانوونێ كو ب كوَمبوونێن په‌رله‌مانی سه‌روَكی نه‌هێلن و دیسا ڤێ ژی سه‌رنه‌گرت و قانوونێ رێك لێ گرتن، چنكو مه‌ره‌مێن وان نه‌ سه‌روَكاتیا كوردستانێ یه‌، ئه‌و ژی ب دویماهیك بهێن دێ هنده‌ك بهانه‌یێن دی ئینن و بزاڤێ كه‌ن بوَ تێكدانێ بكه‌ن و ئه‌ڤه‌ ژی هه‌موو ب جهئینینا پلان و نه‌خشێ ئیرانێ یه‌ بوَ تێكدانا ڤی كاودانی و هزرا نه‌ته‌وی.
ئه‌ڤا ل ڤێ دووماهیێ بوَ په‌قاندنا بوَریا په‌تروَلا كوردستانێ كو pkk دبێژیت چوونا پترولێ دێ ئابووریا توركیا ب هێز ئێخیت، ئه‌ڤ پێنگاڤه‌ گه‌له‌ك و گه‌له‌ك یا ب ترسه‌ و ب ئاشكه‌رایی لێدانا هزرا نه‌ته‌ویه‌، چنكو عێراقێ ئه‌ڤه‌ دوو ساله‌ بوَدجا كوردستانێ بڕی و خه‌لكێ كوردستانێ بێ قووت كرین، ئه‌ڤه‌ ته‌مامكرنا پلانا ئیرانێ یه‌ بوَ دژایه‌تیكرنا رێفراندومێ كو ب ئاشكه‌را دژی وێ پێنگاڤا كوردانه‌، لاوازیا كوردا دناڤ خودایه‌ و ده‌هوَل قوَتان بوَ دوژمنا دێ ئه‌ڤێ جارێ ژی كو ددیروَكیدا چ جارا كاودان هوسا خوه‌ش نه‌بووینه‌ بوَ گه‌هشتنا ب مافێن خوه‌ كو ئه‌و ژی ده‌وله‌تبوونا كوردانه‌ و دیروَك خوه‌ نوی دكه‌ته‌ڤه‌.
پێدڤیه‌ تێگه‌هشتی و ره‌وشه‌نبیرێن كورد هنده‌ دبێ ده‌نگ نه‌بن، هه‌ر پارچه‌كا كوردستانێ تایبه‌تمه‌ندیێن خوه‌ هه‌نه‌ و ئارمانجێن ژێك جودا هه‌نه‌ و ل ڤێره‌ خوَیا دبیت كو دژایه‌تیكرنا هزرا نه‌ته‌ویه‌ و ب جهئینانا پیلانێن نه‌یارێن مله‌تێ كوردانه‌، ئه‌گه‌ر pkkێ بڤێن دربه‌كێ ل ئابووریا توركیا بده‌ت بلا بوَریێن د رێكا ئیران و ئازه‌ربێجانێ دا ب په‌قینیت، بلا تێكدان و فه‌وزایێ ل باژێرێن توركیا دروست بكه‌ت، ئه‌و جهێ تێكدانێ دكه‌ت هه‌ر باژێرێن باكورێ كوردستانێ نه‌ و هه‌ر مله‌تێ كورده‌ باجا زیانێن وان دده‌ت، ئه‌رێ ئه‌ڤه‌یه‌ وه‌لاپارێزی و كوردپه‌روه‌ری و وان گه‌له‌ك زوی ژبیر كر كانێ بوَچی دگه‌را دویێ دا ژ هه‌لبژارتنێن توركیا پتر ژ ملیونه‌كێ ده‌نگێن وان كێمكرن.
ئه‌گه‌ ب ڤی ره‌نگی برێڤه‌ بچیت سوبه‌هی ئه‌مریكا و هه‌ڤپه‌یمانێن وێ باشترین هه‌جه‌ته‌ بوَ وان و دێ بێژن به‌رنامێ مه‌ هه‌بوو بوَ سه‌ربخوَیا كوردستانێ، به‌لێ كورد دناڤ خودا ئێك نه‌بوون، دیسا بزاڤێن مه‌زن دهێنه‌ كرن كو ب رێكا ئیرانێ پشته‌ڤانیا حكومه‌تا عێراقێ هێزه‌كێ بوَ بزاڤا گوران و بزاڤا ئیسلامی چێكه‌ن، ئه‌ڤه‌ژی دێ بیته‌ خه‌نجه‌ره‌ك دێ ل دلێ هه‌رێما كوردستانێ ده‌ن و ئه‌ڤه‌ ب ترسترین پێنگاڤه‌ و پێدڤیه‌ ب هه‌موو ره‌نگا به‌رسینگا وێ بهێته‌ گرتن.
هه‌تا ئه‌ڤروَكه‌ ژی ئه‌میرێن كومه‌لێ رێزێ ل سرودا نیشتیمانی ناگرن و هه‌تا ئه‌ڤروَ ژی گورانێ پشته‌ڤانیا پێشمه‌رگا نه‌كریه‌ كو نێزیكی دو سالایه‌ دشه‌ریدا، گه‌له‌ك جارا ژی سفكاتی پێ كریه‌ و چه‌ندین جارا ژی بوَ به‌رژه‌وندیا خوه‌ دچارچوڤه‌كیدا مه‌دح و سه‌نا بوَ كریه‌.
ئه‌ز وه‌كو پێشمه‌رگه‌كێ دێرین ده‌نگێ خوه‌ بلند دكه‌م بوَ هه‌موو ئالیا و دوور ژ پارتایه‌تیا به‌رته‌نگ؛ پێشمه‌رگه‌ دوور ژ مال و حالێ خوه‌ ب شه‌ڤ و روَژ یێ دچه‌په‌رادا دا به‌ره‌ڤانیێ ژ شه‌ره‌ف و نامیسا كوردا دكه‌ن و به‌رده‌وام گیانێ وانێ پیروز یێ ل سه‌ر ده‌ستێ وان بوَ پاراستنا ئاخا كوردستانێ.
بلا هه‌موو سه‌ركردێن سیاسیێن كوردستانێ و نه‌خاسمه‌ ل باشوورێ كوردستانێ شه‌رمێ ژ خوینا شه‌هیدا بكه‌ن، ئه‌ڤروَ ئه‌م یێن كه‌ڤتینه‌ دقه‌یرانێن مه‌زندا، به‌هرا پتر حكومه‌تا عێراقێ كو نوینه‌راتیا ئیرانێ دكه‌ت گڤاشتنێ ل سه‌ر كوردستانێ دكه‌ت داكو ب هه‌لوه‌شینن، ئه‌م به‌ره‌ڤانیێ ژ كێم و كاسی و گه‌نده‌لیێ ناكه‌ین و مه‌ ل به‌ری حه‌فت سالان راپوَرته‌كا تێر و ب رێك و پێك بوَ سه‌ركردایه‌تیا پارتی بلند كربوو و ب وێره‌كی هه‌موو گلی و گازنده‌ و كێم و كاسی و هه‌ر تشت به‌رچاڤ كربوون.
ئه‌ڤروَ روَژا ئێكبوون و ئێك ده‌نگیێ یه‌ و ئه‌وژی نه‌ ب تنێ ب گوتن، به‌لكو ب كریارڤه‌.
مه‌رج نینه‌ كو ئێكسه‌ر ببینه‌ ده‌وله‌ت، به‌لێ مژارا رێفراندومێ، گه‌له‌كا گرنگه‌ كو مافێ خه‌لكێ كوردستانێ یه‌ و داكو ببیته‌ بنگه‌هه‌كێ خوَڕستی و به‌رهه‌ڤی بهێنه‌ كرن و سازیێن چه‌لنگ یێن چاكسازیێ بهێنه‌ پێك ئینان و د به‌رژه‌وه‌ندا مله‌تی دا بكه‌ڤنه‌ كاری، نه‌كو كه‌یس ژ لایێ هێزێن سیاسی ڤه‌ لێ بهێته‌ كرن بوَ حزبایه‌تیا به‌رته‌نگ.

website security
WP Facebook Auto Publish Powered By : XYZScripts.com