NO IORG
Authors Posts by ته‌حسين ناڤشكى

ته‌حسين ناڤشكى

ته‌حسين ناڤشكى
74 POSTS 0 COMMENTS

3

ته‌حسین ناڤشكى
د تێگه‌هێ ده‌روونناسیێ دا هه‌ر ره‌فتاره‌كا مرۆڤ د ره‌وشه‌كا هه‌لچوونی (انفعالی) و كه‌ربێ دا بكه‌ت، ره‌فتاره‌كا كۆره‌یه‌، نه‌یا راستگۆیه‌ و په‌شێمانی د دووڤ دا دئێت، تایبه‌ت ده‌مێ كه‌ربا مرۆڤی دگه‌هته‌ گوپیتكێ، ئه‌و ده‌م ده‌مه‌ك هندی كورته‌ ب چركان دهێته‌ حسابكرن. ئه‌ڤا من گۆتی ده‌ستپێكه‌كه‌ داكو بۆ حزبێن هه‌رێما كوردستانێ دیار بكه‌م كو ئه‌ڤ نه‌رازیبوونا پتریا خه‌لكێ مه‌ دژی هنده‌ك حزبێن هه‌رێمێ تایبه‌ت هه‌ردو حزبێن سه‌ره‌كی یێن ده‌ستهه‌لاتێ دكه‌ت، ل دووڤ دیتنا زانایێ فه‌ره‌نسی ((گۆستاڤ لۆبۆن)) خودانێ پرتووكا (ده‌روونناسیا جه‌ماوه‌ری) دگه‌هته‌ گوپیتكا كه‌ربێ، هه‌كه‌ بزڤڕنه‌ ره‌وشا عه‌قلی و ئارام ببن هه‌لوه‌سته‌ك نه‌ راستگۆیه‌، ره‌نگه‌ پتر هه‌لوه‌سته‌كێ كورته‌ د حاله‌تێ كه‌ربا برا كوژ دانه‌، به‌رامبه‌ر نه‌دادیێ و گه‌نده‌لیێ په‌یدا دبت. واته‌ مرۆڤ پشتی هینگێ حه‌ز ناكه‌ت و په‌شێمانێ كوشتنا برایه‌، لێ مه‌ بڤێت نه‌ڤێت، ده‌مێ جڤاك د(نه‌زعا) لڤین و هه‌ڤڕكییه‌ك به‌رده‌وام دابت، وه‌ك ((دكتور عه‌لی ئه‌لوه‌ردی)) د گه‌له‌ك پرتووكێن خوه‌ دا ئاماژێ دده‌تێ، دێ هه‌ر ئه‌ڤ ره‌وشه‌ ب رێژه‌یی د جڤاكێن جیهانێ دا، تایبه‌ت وه‌لاتێن پاشكه‌ڤتی دا، وه‌ك وه‌لاتێ مه‌ به‌رده‌وام بت، تنێ ب دادپه‌روه‌ری و سه‌روه‌ریا قانوونێ رێژه‌یا وێ هه‌ڤڕكیا دگه‌هته‌ ره‌وشا (سه‌یرۆرێ) دێ كێم بت و قالبێ جیگریێ وه‌رگرت.
دووری ئیراقا مه‌زهه‌بی و تائیفی، ئه‌م دێ به‌حسێ نه‌رازیبوونا خه‌لكێ خوه‌ كه‌ین به‌رامبه‌ر ده‌ستهه‌لاتا حزبێن هه‌رێمێ یا كو ژ گه‌له‌ك ئالیانڤه‌ ب رێژه‌ وه‌كی حزبیێن دی یێن ئیراقێ حوكمی دكه‌ن، دێ زانین كو ئه‌ڤ گازنده‌ و ره‌خنه‌یا پتریا خه‌لكێ مه‌ دكه‌ن، ئه‌نجامێ وێ حوكمڕانیا هنده‌ سالن ب سه‌قه‌تی دهێته‌كرن و دبت سه‌ركرداتیێن وان حزبان ژی ئه‌ڤێ دزانن، لێ هنده‌ك كاغه‌زێن ب هێز د ده‌ستێ وان حزبان دا هه‌نه‌، هه‌كه‌ ته‌نگاڤ بوون، بێدودلی دێ بكارئینن، وه‌ك گه‌له‌ك جاران ژی بكارئیناین و خوه‌نیشاندانێن خه‌لكێ هه‌رێمێ سه‌ركوتكرین، ب به‌هانه‌یا كو دژی ئاسایشا نه‌ته‌وه‌یی ده‌ستێن پیلانگێڕان هاتینه‌ دناڤدا. هه‌موو ده‌ستهه‌لاتێن تۆتالیتاری، ده‌مێ دكه‌ڤنه‌ د خه‌ته‌رێ دا و خه‌لكێ نه‌رزای و سه‌رهلدانان دكه‌ن ڤێ كاغه‌زا كه‌ڤن و نوو بكاردئینن، داكو كورسیكا خوه‌ بپارێزن.
سه‌ڕایی هه‌موویێ، راستیا مژارێ، پڕانیا خه‌لكێ هه‌رێمێ تایبه‌ت ئه‌وێن عه‌قلانه‌ هزر دكه‌ن، نه‌ڤێت نه‌پارتی و نه‌ئێكه‌تی و نه‌ چو حزبێن كوردی نه‌مینن، ژ به‌ر كو ئه‌و دزانن تنێ ئالترناتیفێ وان داگیركه‌رێن كلاسیكی یێن كوردستانێنه‌ و كه‌س نینه‌ تووشی سته‌م و زۆرداریا وان دژمن و داگیركه‌ران نه‌بووی و ب رێژه‌ قوربانی نه‌داین. واته‌ هه‌كه‌ ماله‌كێ شه‌هید و پێشمه‌رگه‌ نه‌بن ژی، پتر ژ جاره‌كێ خانیێ وی و ملك و مالێن وی هاتینه‌ سۆتن و ته‌نگه‌زار و په‌نابه‌ر بوویه‌ و تنێ گیانێ خوه‌ و خێزانێ خوه‌ رزگار كرینه‌ یان نه‌رزگار كرینه‌.
ئها ئه‌ز ژ ڤی پیڤكی دبێژمه‌ حزبێن كوردی تایبه‌ت پارتی و ئێكه‌تی، وه‌ك دو مه‌زنترین خودان هێز و سامان، ماده‌م خه‌لكێ مه‌ پتریا وان هه‌ر هه‌وه‌ ب خودانێن خوه‌ دبینن و نه‌ڤێن بیانی جاره‌كا دی حوكمێ له‌شكری ل وان بكه‌ن، دڤێت هوون ڤی دیمه‌نی (كشتالتی)، ب زه‌لالی ل به‌ر چاڤ وه‌ربگرن و بزانن، ب نه‌بوونا هه‌وه‌ ئه‌ڤ خه‌لكه‌ دێ ژار و بنده‌ست بت، ب نه‌بوونا خه‌لكی هوون دێ كوردستانێ هێلان و وه‌كی گه‌له‌ك جاران هه‌وه‌ هێلای و ئه‌ڤ سامان و قه‌سروقوسوور و سه‌نته‌نه‌تێن هنده‌ ساله‌ ب رێیێن نه‌شه‌رعی هه‌وه‌ كۆم كرین دێ هێلن، وه‌كی سه‌ددامی بۆ هه‌وه‌ هێلایژن و هه‌وه‌ تالان كرین.
ئه‌ز باوه‌ر دكه‌م هه‌كه‌ هه‌لوه‌ستێ خه‌لكێ مه‌ د ڤان رۆژێن ده‌رباز بووین دا، ده‌مێ په‌ڕله‌مانێ هه‌رێمێ پڕۆژه‌یێ چاكسازیێ گه‌نگه‌شه‌ دكر، وه‌كی هه‌لوه‌ستێ وی خه‌لكی بایه‌ ئه‌وێ دچنه‌ (ساحه‌ت ئه‌لته‌حریر) ل به‌غدا و باژێڕێن دی یێن شیعه‌نشین هه‌وه‌ ئه‌ندام په‌ڕله‌مانێن هه‌رێمێ ل سه‌ر پتر ژ چار ملیۆن دیناران خانه‌نشین نه‌دكرن و فه‌رمانبه‌رێن خودانێن خوه‌ و پتر40 سالێن خزمه‌تێ ل سه‌ر چارسه‌د هزار دیناران خانه‌نشین نه‌دكرن. لێ دیاره‌ هه‌وه‌ ژ بیركریه‌ یان هوون نزانن یان هه‌وه‌ نه‌ڤێت بزانن، ڤی خه‌لكی چه‌ند زه‌حمه‌ت بریه‌ و چه‌ند قوربانی داینه‌، هه‌تا ئه‌ڤ هه‌ناسه‌یا ئازادیێ هه‌لكێشای، هه‌كه‌ باوه‌ر بكه‌ن ب چو ره‌نگان ژ هه‌وه‌ قه‌بوول نه‌دكر و تێگه‌هێ د كوورێ ڕا زراڤ بوویه‌ بلا د وێرێ ڕا بقه‌تیێت دا همبه‌ر ره‌فتارێن هه‌وه‌ یێن دووری درووشمێن هه‌وه‌ یێن ته‌یسۆك دا ل سه‌ر حوكمڕانیا هه‌وه‌ پراكتیزه‌ كه‌ن.
ئه‌وا مایی من نه‌گۆتی، باوه‌ر بكه‌ن هه‌ر تشته‌كی سینۆرێن خوه‌ هه‌نه‌، هه‌كه‌ ژێ ده‌ربازبوو، دێ په‌قت، ئه‌ڤه‌ د لۆژیكێ (فیزیا كه‌وانتی) دا بوویه‌ قانوونه‌كا باوه‌ریپێكری. ڤێجا هه‌كه‌ نفشێن به‌رێ خودانێن خوه‌ وی هه‌لوه‌ستێ جامێرانه‌ بن و دیرۆكێ ل به‌رچاڤ وه‌ربگرن و ئه‌ڤا هوون دكه‌ن ژ هه‌وه‌ قه‌بوول كه‌ن، ژ به‌ر كو چو گره‌نتی نینه‌ كو نه‌ڤیێن نوو ڤێ ژ هه‌وه‌ قه‌بوول بكه‌ن و ئه‌و دیرۆكا هوون پیرۆز دبینن، ئه‌و وه‌سا نابینن، ره‌نگه‌ وێ دیرۆكا نێزیك هوون (ته‌مجیدا) وێ دكه‌ن، نفشێ نوو وه‌ك هه‌ر قووناغه‌كا دی یا دیرۆكێ ب گومان ببینن و دووماهیێ رۆلێ قاره‌مانێن وێ مینا رۆلێ پیرۆزێ ((رۆپسبیر))ێ سه‌ركێشێ شۆڕشا ناڤدارا فره‌نسی و هنده‌ك هه‌ڤالێن وی ببته‌ رۆلێ خائینێن گه‌ل و وه‌لات و ئه‌ڤه‌ ژی گۆره‌ی جڤاكناسێن لڤین و گه‌شه‌سه‌ندنا جڤاكی دبینن، نه‌ تشته‌ك سه‌یره‌ و هه‌موو ده‌ما فاكته‌رێن خوه‌ هه‌نه‌ كو وه‌رچه‌رخانه‌كا نوو د دیرۆكێ دا بكه‌ن.

4

ته‌حسین ناڤشكی
هه‌لبه‌ت هه‌ر بڕیاره‌كا وه‌ك كارڤه‌دان، ژ له‌زێ و به‌زێ و (ئینفیعالی) بت و نه‌دیراسه‌كری مرۆڤ بده‌ت، ئه‌نجامێن وێ پتر دێ د وێرانكار بن. بڕیارا دوهی فراكسیۆنێن شیعی ب ناڤێ فراسیۆنه‌كا بارودۆخان هه‌ڤگرتی كری دایی، ب تنێ و بێی فراكسیۆنێن سنی و كوردان، داكو رێكه‌فتنا ستراتیژی یا پاراستنا ته‌ناهیێ دگه‌ل ئه‌مریكا ژ سالا 2008 وه‌ره‌ ئێمزاكری بهه‌لوه‌شینن، زێده‌باری بالیۆزخانه‌یا ئه‌مریكی ژی بگرن، ژ ڤان جۆره‌ بڕیاران بوو، ئه‌نجامێ كوشتنا دو ژ مه‌زنه‌ تیرۆرستێن شیعی و كه‌تنا بن گڤاشتنێن ئیرانا خودانا ده‌سته‌كی درێژ ل سه‌ر هیلالا شیعی هه‌ی و رابوونا فیریانا جادا شیعی، گه‌له‌ك ژ وان به‌رپرس و په‌ڕله‌مانتارێن ئیراقێ نه‌چاركرن كو ملكه‌چیا وێ بڕیارا كۆرانه‌ بكه‌ن و هه‌كه‌ د دلدا رازی ژی نه‌بن ب ده‌ڤی نیفاقێ بكه‌ن و ده‌نگێ خوه‌ ل گه‌ل بڕیارا گشتی دیار بده‌ن داكو ئاغایێن خوه‌ خودانێن شاش و په‌ڕان (عه‌ماما) ل ئیراقێ و ئیرانێ رازی بكه‌ن.
ب هه‌ر ره‌نگی هه‌ی، بڕیارا سه‌قه‌تا شیعه‌یان نوكه‌ بوویه‌ ته‌حسیل حاسل، ده‌ركه‌تنا ئه‌مریكا ب وێ بڕیار گه‌له‌كا ب زه‌حمه‌ته‌، هه‌كه‌ نه‌بێژین مسته‌حیله‌. نه‌ژبه‌ر خه‌له‌تی و نه‌شه‌رعیه‌تا بڕیارێ كو دڤێت حوكمه‌ت وێ بڕیارێ بده‌ت نه‌ په‌ڕله‌مانه‌ك نیڤڕۆ. واقعێ روودانێ، ده‌مێ ب هه‌ر بڕیاره‌كێ ئه‌مریكا ژ ئیراقێ یان هه‌ر ده‌ڤه‌ره‌كا به‌رژه‌وه‌ندیێن وێ تێدا هه‌ین ده‌ردكه‌ڤت واته‌ هه‌یمه‌نا وێ ل وێ ده‌ڤه‌رێ نه‌ما و مه‌یدان بۆ نه‌یارێن وێ چۆل بوو. واته‌ ئه‌مریكا ل دووڤ رێبازا پراگماتی (عملی) سیاسه‌تا خوه‌ یا ده‌رڤه‌ ب رێڤه‌ دبه‌ت، دبت وه‌نه‌كریه‌ و وه‌ناكه‌ت، ئانكو ئه‌مریكا هه‌كه‌ هات و خوه‌ ئاخا ئیراقێ ژی چۆل بكه‌ت، ئه‌سمان و ده‌ریایێن وێ دێ هه‌ر ل بن كۆنترۆلا وێ مینن و هه‌ر تشته‌كێ بڤێت دێ كه‌ت.
ژ ره‌خه‌كێ دی، هه‌كه‌ هات و ب هه‌ر ره‌نگێ هه‌ی، من گرتی، سونه‌ و كورد ژی قانوونی د بڕیارێ دا پشكدار بوون، پشتی سه‌رۆكوه‌زیرانه‌كێ نوو وحوكمه‌ته‌كا نوو ژی هه‌لبژارتین، گه‌له‌ك كاغه‌زێن دی د ده‌ستێ ئه‌مریكا دا هه‌نه‌ كو حوكمه‌تا ئیراقێ نه‌چار بكه‌ت ئه‌مریكا ژ ئیراقێ ده‌رنه‌كه‌ڤت. ژ وان كاغه‌زێن ب هێز، ئه‌مریكا پڕۆژه‌ قانوونا جۆبایدنی ئه‌وا ل سالا 1998 بۆ پارچه‌كرنا ئیراقێ بۆ سێ ده‌وله‌تێن (شیعی ـ سنی ـ كوردی) ته‌تبیق بكه‌ت. خالا دووێ ئه‌مریكا دێ هه‌می بزاڤان كه‌ت كو پتر هه‌ڤال و پشته‌ڤانان بۆ خوه‌ كۆمه‌ بكه‌ت، وه‌كی سالا 1991 داكو ئیراقێ بێخته‌ بن چاپته‌رێ (حه‌فت) یێ میساقا نه‌ته‌وه‌یێن هه‌ڤگرتی، هه‌ر ئێك ژڤان هه‌ردو كاغه‌زێن گڤاشتنێ ل سه‌ر ئیراقێ ژ یادی خرابتره‌ هه‌كه‌ ده‌نگێن پێدڤی ب ده‌ستڤه‌ ئینان. ئانكو شرینا وێ یا ته‌حله‌. ژ به‌ر كو ده‌مێ ئیراق كه‌ته‌ بن چاپته‌رێ 7 ژ میساقا نه‌ته‌وه‌یێن ئێكگرتی، دبت ژ سالێن نوتان خرابتر لێبهێت، ده‌مێ پترۆلا ئێراقێ كه‌تیه‌ بن ویسایا نه‌ته‌وه‌یێن هه‌ڤگرتی و هه‌تا ڤێ گاڤێ ژی خه‌لكێ ئیراقێ یێ ئاهێن خوارنێ ب خێرا وێ بڕیارا ناڤدارا ب هژماره‌ 986 دخۆت و ره‌وشا وان ب گشتی وه‌سا خوه‌ش نه‌بوویه‌ كو ئه‌ڤ بڕیاره‌ پشتی پتر ژ 23 سالان رابوه‌ستت. ئه‌ڤه‌ ژبلی قه‌رزێن ئه‌مریكا و ده‌وله‌تێن دی و قه‌ره‌بوویا ئه‌مریكا ژ ئیراقێ دكه‌ت بۆ فڕۆكخانه‌كا ستراتیژی ب تنێ كو ژ تڕلیۆن دۆلاران ده‌رباز دبت، دێ ڤێجا كه‌ره‌م كه‌ن گه‌لی برایێن شیعه‌ و رۆبۆتێن ده‌ستێ حاكمێن ئیرانێ، دگه‌ل هرچێ هه‌ڕنه‌ د خراری دا و خوه‌ ژ ڤێ قه‌یرانا قه‌یرانان قورتال بكه‌ن.

5

ته‌حسین ناڤشكى
هه‌چیێ ل ده‌ستپێكا ناكۆكیێ ل ناڤبه‌را سننه‌ و شیعه‌یان د دیرۆكا ئیسلامێ دا بزڤڕت، تایبه‌ت پشتی روودانا كوشتنا خه‌لیفه‌یێ سێیێ ئیمامێ عوسمان كو ب فتنا مه‌زن دهێته‌ نیاسین و وه‌رگرتنا ئیمام عه‌لی خیلافه‌تا ئیسلامێ، وه‌رچه‌رخانه‌كا نوو د دیرۆكا ئیسلامێ دا په‌یدابوو و دژواریا ناكۆكیێ ل ناڤبه‌را وی و معاوییه‌ی گه‌هشتیه‌ گوپیتكێ و هه‌ر ده‌م شیعه‌یان خوه‌ وه‌ك شۆڕه‌شگێڕ و ئۆپۆزسیۆن دیتینه‌ كو سننه‌یێن ده‌وله‌ت و ده‌ستهه‌لات زولمه‌كا زێده‌ ل وان كریه‌ و مافێ وان خواریه‌، ژ به‌ركو ئارمانجا وان ئه‌و بوویه‌ كو دادپه‌روه‌ریێ بێخنه‌ د ناڤبه‌را خه‌لكی دا و دژی به‌ترانیێ و ته‌بزیرێ و زه‌نگینیا فاحشا معاویه‌ی بووینه‌.
هۆسا خۆیا دبت كو شیعه‌یان ده‌ستوورێ جۆره‌ هه‌ڤپشكیه‌ك ده‌ستپێكی هه‌بوویه‌، به‌ری هه‌ڤپشكیا ماركسی ژێ گۆتی ب گه‌له‌ك چه‌رخان، ژ به‌ر هندێ هه‌ڤالێن عه‌لی ژی ئه‌و ئه‌سحابیێن پێغه‌مبه‌ری بووینه‌ ئه‌وێن حه‌ز ژ دادپه‌روه‌ریێ دكر، مینا ئه‌با زه‌رێ غه‌فاری، سه‌لمانێ فارسی، عه‌مارێ كوڕێ یاسری و هنده‌كێن دی كو خودان هزرێن په‌یره‌وكرنا دادپه‌روه‌ریا جڤاكی بووینه‌، لێ هه‌ر ل ده‌ستپێكێ گه‌له‌ك ئاسته‌نگ كه‌تنه‌ د رێیا وان دا و نه‌شیان وه‌ك پێدڤی به‌رنامه‌یێ خوه‌ یێ دادپه‌روه‌ریا جڤاكی په‌یره‌و بكه‌ن و دووماهیێ ناكۆكیا بسورمانان ژ شه‌ڕه‌ ده‌ڤێ گه‌هشته‌ شه‌ڕێن سینگوسینگانێن خویناوی ل ناڤبه‌را هه‌ر دو گرۆپێن سه‌ره‌كی یێن بسورمانان و شه‌رێ حێشترێ (معركه‌ الجمل) ئێكه‌مین شه‌ڕ بوو ل ناڤبه‌را قولپێ ئێمامێ عه‌لی و قولپێ هه‌ڤژینا پێغه‌مبه‌ری عه‌یشایێ، ب پشكداریا هنده‌ك كه‌سێن ژ ده‌هێن مزگینیا به‌هه‌شتێ دایێ ل باژێرێ به‌سرا هه‌لبووی و ب هزاران بسورمان ژ وان ته‌لحه‌ و زبێر وه‌ك ئه‌سحابیێن مزگینیا به‌هه‌شتێ دایێ هاتنه‌ كوشتن. ژ هینگێ وه‌ره‌ هه‌تا نوكه‌ شه‌ڕو شۆڕ ل ناڤبه‌را شیعه‌ و سننه‌یان به‌رده‌وامن و نه‌ پرۆژه‌یێ دادپه‌روه‌ریا عه‌لیێ كوڕێ ئه‌بۆ تالبی هاتیه‌ په‌یره‌و كرن و نه‌ زه‌نگینا فاحشا معاویێ كوڕێ ئه‌بۆ سوفیانی ب دوماهی هاتیه‌. به‌ره‌ڤاژی، ژ بلی كوور بوونا كه‌ڤنه‌ برینێ د ناڤبه‌را گرۆپێن جوجودا یێن ئیسلامێ دا و پڕانیا رێبه‌ر و ئیمامێن شیعه‌یان ژی نها وه‌ك ره‌فتار ل دووڤ مه‌نهه‌جێ معاویه‌ی دچن بیێ كو دانپێدانێ فه‌رمی ب زه‌نگینیا خوه‌ یا فاحش و گه‌هشتنا بورجێن عاجی بكه‌ن.
ژ به‌ر هندێ دێ بینین نها تایبه‌ت ل ئیراقێ هه‌ڤدژیه‌كا رۆهن د ناڤبه‌را گۆتن و كریارێن گرۆپێن سیاسی یێن شیعی دا هه‌یه‌، ل ره‌خه‌كی درووشمێ دادپه‌رپه‌وه‌ریا ئیشتیراكیا ئیمام عه‌لی بلند دكه‌ن و ل ره‌خێ دی به‌ره‌للایه‌ و هه‌ر گرۆپه‌كی ژ ئالیێ خوه‌ ئیراق تالان و وێران دكه‌ت و بازرگانیێ ب پله‌ و كورسیان دكه‌ن… دیاره‌ سیاسه‌تڤانێن شیعی ژنوو ب سه‌ر هه‌لبووینه‌ و ژ معاویه‌یێ سننی و یێن دووڤ دا هاتین خرابتر دكه‌ن و ب گۆتارا خوه‌ یا دینی، هه‌ر خوه‌ دبینن شۆڕشگێڕێن رێبازا دووازده‌ ئیمامێن پیرۆز و سننه‌ به‌رده‌وام زولمێ لێدكه‌ن.
حوكمرانیا شیعه‌یان، وه‌ك مه‌زنترین كوتله‌یا سیاسی د په‌ڕله‌مانێ ئیراقێ دا، پشتی كه‌تنا سه‌ددامی ل بهارا ل سالا 2003 وه‌ره‌، هه‌تا نها به‌لگه‌یه‌ كو شیانێن حوكمڕانیا شیعه‌یان ب ڤی ده‌ستوداری د گومانێ دانه‌ بشێن حوكمڕانیێ بكه‌ن.
دێ بینین مه‌زنترین كوتله‌ د په‌رله‌مانێ ئیراقێ دا، كوتلا سه‌دریه‌، گۆره‌ی هه‌مان كولتۆری حزبا خوه‌ ب ناڤێ شۆڕه‌شگێڕان (پائرون) ناڤكریه‌، واته‌ هێشتا ئیدیۆلۆجیا ئیمامێ عه‌لی و شۆڕه‌شا سته‌ملێكریا دژی سننه‌یان به‌رده‌وامه‌. ئها كاكلا هه‌ڤدژیا وان ل ڤێرێ دیار دبت كو هه‌ر ب وێ عه‌قلیه‌تا شۆڕه‌شگێڕییا كه‌ڤنار حوكمی دكه‌ن و هزر ناكه‌ن كو گه‌ز مه‌قه‌س د ده‌ستێ وان دانه‌ و ئه‌و یێ د قووناغا حوكمێ مه‌ده‌نی دا و ده‌وله‌تدارن و حزبێن معاوییه‌ی سسننه‌یێن ده‌ڤه‌ر وێران بووینه‌. ژ به‌ر هندێ هه‌ر ه‌مێ هزرا وێ شۆڕه‌شا تۆباوی د نه‌هۆشیا سه‌دری و گروپێن وه‌كی وی دا ئازری، دێ بینین كره‌ فه‌رته‌نه‌ و ئالۆزی، هه‌كه‌ چو ئالیێن سننی و كوردی ژی نه‌بن، دژی وان رابن، دێ دژی خوه‌ رابن و هه‌می تشتی هه‌لوه‌شینن و به‌رده‌وام د بازنه‌یێ ڤالا دا زڤڕن. دیمه‌نێ پتر ژ دو مه‌هانه‌ ئه‌م دبینین كو سه‌دری وه‌ك مه‌زنترین كوتله‌ ده‌ستژكاركێشان ب سه‌رۆكوه‌زیران دا كرن، بێی كو پێگوهۆڕه‌كی بۆ وی ببینن، داكو ڤالاهیا حكومی روونه‌ده‌ت گرۆڤه‌یه‌كه‌ دیاره‌ كو هێشتا عه‌قلیه‌تا شیعه‌یان عه‌قلیه‌تا به‌ری 14 چه‌رخانه‌ و گه‌له‌ك ده‌م پێدڤێت هه‌تا سه‌ره‌ ڕێببن و ژ قۆناغا ویلایه‌ت ل فه‌قیه و مه‌رجه‌عیان ده‌رباز ببنه‌ قۆناغا ئاڤاكرنا ده‌وله‌تا مه‌ده‌نی.

10

ته‌حسین ناڤشكی
مه‌ژیێن پرۆسێسا هزركرنه‌ك مه‌نتقی تێدا لاواز بت و هه‌رده‌م ب نێرینه‌ك چیڤانۆكی و خورافه‌یی ل بچووكترین كێشه‌یێ بنێڕن، خودانێن وان نه‌شیابن مه‌ژیێن خوه‌ ب زانستێ و مه‌عریفێ تێر بكه‌ن و ئاڤا بكن، مینا وان پاله‌یێن ته‌مبه‌ل و كارنه‌زانن كو هه‌ر ده‌م ل هیڤیا كارێن ساناهینه‌ بكن و خوه‌ د كارێن گران و ئاسێ هه‌لناكه‌ن. ئه‌ڤ جۆره‌ سه‌ره‌ ژی به‌هرا پتر چاڤه‌ڕێیی روودانێن بچووك و د به‌رژه‌وه‌ندیا وان دانه‌ نێچیرێ لێ بكه‌ن و بۆ خوه‌ بكن به‌رهه‌مه‌ك لۆژیكی و تشتی ژ مێشێ بكه‌نه‌ گامێش و ب ناڤێ رایا گشتی دا كو خوه‌ بۆ خه‌لكه‌كی دیار بكه‌ن كو ئه‌و ژی زلكه‌كن ژ شخارتێ و شیانێن گفتوگۆیێ و هزرێن ئاڤاكه‌ر بۆ سه‌ركێشیا جڤاكی هه‌نه‌.
ئه‌ڤه‌ ژی ئێشه‌كه‌ ژ گه‌له‌ك ئێشێن جڤاكی كو تاكێ وی گه‌له‌ك جاران د جڤاكێن گۆشه‌گیر و پاشڤه‌مایی دا تووش دبتێ، ده‌مێ ب دیتنه‌ك وه‌همی، تشتێ مه‌زن بچووك دكه‌ن داكو ب نه‌هۆشی وێ گرێیا كێماسیا ل ده‌ڤ هه‌ی ب وێ وه‌همێ قه‌ره‌ بوو بكن. ئه‌ڤ جۆره‌ كه‌سه‌ نزانن، یان نه‌ڤێت بزانن، ده‌مێ سالێ جاره‌كێ تشته‌كی وه‌سا ب دیتنه‌ك هه‌لچۆنی دئازرینن و نێچیرێ ل تشته‌كێ بێ بها دكن و گران دكن و وه‌سا ره‌فتارا خوه‌ دبینن كو یێ چاڤێ ساخله‌م كل دده‌ن و جوانیه‌كا دی دده‌نێ، نزانن راستیا مژارێ، ئه‌و یێ چاڤێ ساخ كۆره‌ دكن و هه‌كه‌ بزانن ژی، دبت ژ خوه‌ژی ناگرن دانپێدانێ ژی ب شاشیا خوه‌ بكن.
هه‌لبه‌ت ئه‌ڤ جۆره‌ مه‌ژیێن ژ ره‌خه‌كی ڤه‌ قۆچه‌كێ (هرم)ێ ژیانێ یێ سێ ئالی دبینن و دنرخینن، ژ ئالیێ میتۆدێ زانستیڤه‌ هندی كو مرۆڤ هه‌رسێ ئالیێن قۆچه‌كێ هه‌ر كێشه‌یه‌كێ نه‌بینت و ب دیتنه‌ك مه‌نتقی و زه‌لال و دووری ده‌مارگیریێ و به‌رژه‌وه‌ندیێن كه‌سۆكی نه‌هه‌لسه‌نگینت و دیتن و بۆچۆنێن خوه‌ ب ئارامی رانه‌گه‌هینت، هه‌ڤڕكی و ناكۆكیێن جڤاكی رۆژ بۆ رۆژێ دێ به‌رفره‌هتر لێهێن و گیانێ پێكڤه‌ژیانێ دێ لاوازتر لێهێت و شه‌مه‌نده‌فڕا پێشكه‌فتنا جڤاكێن خودانێن خوه‌ و رێژه‌یا پتر ژ ڤان جۆره‌ مه‌ژیان دێ ل دووماهیا كاروانێ پێشڤه‌چوونا جڤاكان مینن و دێ هه‌ر ده‌م ئه‌گه‌رێن كێشه‌ و ئاڕێشه‌یێن خوه‌ هاڤێژنه‌ سه‌ر ملێن چه‌رخ و فه‌له‌كان و ئێكودو تاوانبار كه‌ن و باوه‌ری ب قانوونا هه‌می دبن شمشێرێ وێ ڕا دچن نامینت.
گۆره‌ی وێ نێڕینا ل سلال مه‌ باس كری، كوردستان د درێژیا دیرۆكێ دا باجا ڤێ دیارده‌یێ دده‌ت. خالا بالكێش ئه‌وه‌ دێ بینین كو گه‌له‌ك روودان هه‌نه‌ د بچووكن و دبت چو گرنگیا خوه‌ بۆ رایا گشتی نه‌بت، لێ هنده‌ك كه‌س هه‌نه‌ ب وێ نێڕینا كۆره‌ دێ تشتی هه‌لسه‌نگینن و ژ قه‌باره‌یێ وی مه‌زنتر لێكه‌ن، به‌رامبه‌ر دیمه‌نێن گه‌له‌ك كاریگه‌ریا خوه‌ هه‌ی ب په‌راویزكرن و كرنگی پێنه‌دان ئاماژێ دده‌نێ. دووماهیێ راستی هه‌ر دیار دبت. لێ ئاڕیشه‌ ئه‌وه‌، بڕیار هه‌ر د ده‌ست وان كه‌سان دانه‌، ئه‌وێن یا باش بۆ خوه‌ د وێ نێڕینێ ڕا دبینن و ل سه‌ر به‌هرا لاوازیا هشیاریا جڤاكی وه‌كی خوه‌ دكن و ئاخفتنا مرۆڤێن راستگۆ ژی ل به‌ر گوهێن وان دبته‌ بلوولا بۆ گای دهێته‌ گۆتن.

3

ته‌حسین ناڤشكى

نها ژی گه‌له‌ك جاران ژ بێ زاڕی و بێ هیڤیبوونا خوه‌، ده‌مێ گه‌نگه‌شه‌ ل سه‌ر ڤێ ره‌وشا تلۆڤه‌ ژ شاشی و كێموكاسیان دهێته‌كرن، هنده‌ك ژ ره‌شبینیا خوه‌ و رێژه‌یه‌ك كێم ژی ژ گه‌شبینیا خوه‌ دێ گۆتنا كه‌ڤنشۆپ دوباره‌كه‌ن: ((دێ چێ بت)) پشتی ئه‌نجامێ ڤی مانشێتێ خودان گۆتاره‌ك درێژ، تنێ بوویه‌ ڤه‌جین و چێ نه‌بووی و به‌ر ب خرابترڤه‌ چووی، ئانكو پڕانیا خه‌لكی گه‌هشتینه‌ وێ باه‌ریێ كو ئه‌ڤه‌ دیفاكتۆیه‌ك (امر الواقع) خوه‌ سه‌پاندیه‌ و گه‌له‌كا ب زه‌حمه‌ته‌ پشتی پتر ژ 28 سالان ب هیڤیا ڤی خه‌لكی و ڤێ ده‌ستهه‌لاتێڤه‌ ره‌وش وه‌ك ئه‌و تیۆری دخوازن ببته‌ كریار و چێ ببت، ژ به‌ر هندێ خه‌لكه‌ك وه‌ك ره‌فتار و ئاخڤتن به‌ر ب وی تێگه‌هی ڤه‌دچن، ده‌مێ گه‌نگه‌شه‌ ده‌رباره‌ی بابه‌تی گه‌رم دبت دێ بۆ خوه‌ كه‌نه‌ به‌هانه‌ و به‌رگیریێ ژ ره‌فتارێن خوه‌ یێن به‌ری هینگێ وان بۆ خوه‌ ب حه‌رام و كوفری ددانان بكه‌ن و نها ئێدێ دبێژن :((مانێ هۆلێ هاته‌.)) ل ڤێره‌ مه‌به‌به‌ست ژ هۆلێ هاته‌ واته‌ واقعێ خوه‌ سه‌پاندی زێده‌ی تاقه‌تا هه‌موویانه‌، وان گه‌له‌ك خه‌بات ب وژدانه‌ك پاقژ كر كو گه‌نده‌لی، دزی، واسته‌كاری، مرۆڤكانێ نه‌مینن، لێ شكه‌ستن د وی پڕۆژه‌یێ نه‌واقعی دا هینا و ڤێجا ئه‌و ژی نه‌چارن خوه‌ دگه‌ل ره‌وشا هه‌ی بگونجن و شوونا كو هه‌كه‌ گول نه‌بن ستری ژی نه‌بن، ببنه‌ ستری و هه‌ڤڕكیێ دگه‌ل ئاقارێ ستریان بكه‌ن، ژ به‌ر كو هه‌ڤكێشا نه‌گول بن و نه‌ستری بن خوه‌ ل سه‌ر وان سه‌پاند و ئه‌و نه‌چارن ئێدی ئالایێ سپی بۆ ره‌وشا وێران و خوه‌ سه‌پاندی بلند بكه‌ن و چێ لێ دهێت بلا وه‌لێ بهێت.
دبت هه‌ر بۆچوونه‌كێ ژڤان بۆچۆنێن (دێ چێ بت) و (هۆلێ هاته‌)، گۆره‌ی سه‌فستائیێن یۆنانی به‌ریا پتر ژ 2000 سالان گۆتی، رێژه‌یه‌ك راستی تێدا هه‌بت، لێ كی ژ ئالی دروست بت (دێ چێ بت) یان (هۆلێ هاته‌) ئه‌وێ ڤه‌كۆلینێن زانستی پێدڤێن، لێ هه‌ر چاوابت، تێگه‌هێ (هۆلێ هاته‌) و ئه‌م ژی نه‌چارین مینا میری و وه‌زیری ئاڤا بارانێ ڤه‌خوین، د خزمه‌تا پرۆسێسا هه‌رێما كوردستانێ دا نینه‌. واته‌ پشكا شێری ژ خه‌لكێ هه‌رێمێ، بلندكرنا درووشمێ ((ب ته‌بای عامێ دێ چینه‌ شامێ)) ل سه‌ر بناغه‌یێ وێرانكرنێ بهه‌لبژێرن. ده‌مێ ئه‌ڤ جیهانبینیا نه‌زه‌لال دبته‌ رێبازا پتریا خه‌لكی، واته‌ چاكسازی و ریفرۆمخوازی دمینه‌ ب هیڤیا ده‌ستهه‌لاتێڤه‌ و پتریا خه‌لكی ئالایێ سپی هه‌لگرت و راده‌ستی قه‌ده‌رێ بوو. هه‌لبه‌ت هینگێ ژی ده‌ستهه‌لات و شیان و وژدانا خوه‌ كا دێ كیژان رێكێ هه‌لبژێت؟ ئه‌زموونێن ده‌ستهه‌لاتێن جیهانێ باشترین به‌لگه‌نه‌ كو هه‌ر ده‌مێ جه‌ماوه‌ر ژ بێ ئیراده‌ی و نه‌هشیاریا خوه‌ راده‌ست بوو و مه‌یدان بۆ ده‌ستهه‌لاتێ هێلا كو وه‌كی خوه‌ بكه‌ت، هینگێ تشته‌ك ب ناڤێ ده‌مۆكراسی نامینت، ژ به‌ر كو وه‌ك گه‌له‌ك ژ مه‌ دزانن زاراڤێ ده‌مۆكراسیێ ژ دو په‌یڤان پێكدهێت. ده‌ستهه‌لات + جه‌ماوه‌ر، ئانكو ده‌ستهه‌لاتا خه‌لكی د ده‌ستخه‌لكێ وی وه‌لاتی دانه‌، ده‌مێ رۆلێ ئالیه‌ك هه‌ڤكێشێ نه‌ما كو ئه‌و ژی جه‌ماوه‌ره‌، هینگێ پرۆسێسا ده‌مۆكراسیێ هه‌لوه‌شیا، مینا نها ل هه‌رێما كوردستانێ هه‌لوه‌شیای و ئۆپۆزسیۆن تنێ ناڤ مای.

14

ته‌حسین ناڤشكى
ب راستی هه‌لوه‌سته‌ك سه‌یره‌! ده‌مێ رۆسیا حاشاتیێ دكه‌ت كو وان ئاگه‌هـ ژ رابوونا فڕۆكه‌یێن ئه‌مریكی نینه‌، ده‌مێ وێ رۆژا هه‌نێ هێرش كریه‌ سه‌ر خه‌لیفه‌یێ داعشێ و ل گوندێ باریشا ب ره‌خ ئدلبێڤه‌ كوشتی. ل ڤێره‌ یان رۆسیا دره‌وان دكه‌ت، یان ئه‌مریكا هێزه‌كا میتافیزیكی یا (تێپه‌ڕ) خارق هه‌یه‌ و شیایه‌ هه‌می ئامیرێن ته‌كنه‌لۆجی و هه‌والگیری یێن رۆسیا ل سووریێ كۆره‌ كه‌ت و ژ ئه‌فریتێن سلێمانی ب له‌زتر خوه‌ بگه‌هینته‌ ئدڵبێ و خه‌لیفێ مه‌زترین رێكخراوا تیرۆرستی بكوژت.
هه‌كه‌ رۆسیا خوه‌ ژ ڤێ كریارێ بێ به‌هر كه‌ت، دبت به‌رامبه‌ر سه‌فقه‌یه‌كێ د ناڤبه‌را وان و ئه‌مریكا دا ل پشت دیواران هاتبته‌ ئێمزا كرن، ئه‌و سوحبه‌ته‌كا دیه‌، ژ خوه‌ هه‌كه‌ رۆسیا ئاگه‌هـ ژێ نه‌به‌ت و هند ژێ چێ كربت، ب راستی ئه‌ڤه‌ شه‌همزاریه‌ و بیرا وی كه‌سی دهینته‌ بیرا من، ده‌مێ ژنكا وی هنارتیه‌ كاره‌كه‌وێ و چو ژ شۆلێ نێچیرێ نه‌دزانی.. ده‌مێ گه‌هشتیه‌ ئاقاری، د گه‌رما كه‌وپڕكانێ دا لناڤ به‌فرێ، كه‌وه‌كی دادا د ناڤ تڕاشا، ل به‌ر سینگی ڕا و هندی زه‌لام هاتێ، وه‌كی مرۆڤه‌ك كۆره‌ نه‌شیا ببینت، دووماهیێ ئێكی ل نێچیرا كه‌وان شاره‌زا هاته‌ پشت وی و دناڤ لنگان ڕا بالاكره‌ پێپكێن كه‌وێ قه‌ڕمۆكی و ژ ناڤ لنگێن وی ده‌رخست و پاشی ب گڕنژینڤه‌ گۆتێ: ((مامۆ، تو نزانی كه‌وان بگری!)) واته‌ دیاره‌ رۆسیا ژی نزانت نێچیرێ ل تیرۆرستێن مه‌زن بكه‌ت و ئه‌مریكا دناڤ لنگێن وێ ڕا لێدكه‌ت، ڤێچا هه‌كه‌ بێژت مه‌ های ژێ نینه‌، ئه‌ڤه‌ عوزرا ژ قبحه‌تێ مه‌زنتره‌، هه‌كه‌ بێژت مه‌ های ژێ هه‌بوو، لێ وان به‌ری مه‌ جهێ وی دیت هێشتا كامباختره‌ و دیار دكه‌ت كو هێشتا گه‌له‌ك مایه‌ هه‌تا كو رۆسیا ببت به‌ڤلا ئه‌مریكا د هه‌موو بیاڤان دا و ئه‌ڤا ل سووریێ روودده‌ت خه‌فكه‌ بۆ رۆسیا، تركیا و ئیرانێ دا هه‌ر لاواز ببن و ئابوورێ وان تێكبچت.

3

ته‌حسین ناڤشكی
گۆره‌ی دیتنا من بۆ روودانێن نه‌ته‌وه‌ی، ده‌مێ ل هه‌ر پارچه‌یه‌ك كوردستانێ روودده‌ن، ژ رفتارێن پڕانیا كوردستانیان دیاره‌ كو خه‌لكێ مه‌ ب نه‌فسه‌ك لاواز و زارۆیێ نازداركری، ده‌رڤه‌ی لۆژیكێ عه‌قلی سه‌ره‌ده‌ریێ ل گه‌ل كێشه‌یێ دكه‌ت و ژ گۆتارا وان یا لاڤه‌لاڤ و خه‌به‌رگۆتنێ خوه‌یا دبت كو هه‌ر وه‌ك كوردان گرێبه‌سته‌ك جڤاكی ل گه‌ل وه‌لاتێن نه‌یار و زلهێز هه‌یی كو وان هه‌رده‌م بپارێزن و بكه‌ن كیانه‌ك خۆسه‌ر، لێ ئه‌و جوانیێ كرێت دكه‌ن و ب بێ ئه‌خلاقیا خوه‌ یا نه‌ مرۆڤدۆستانه‌ وان ناپارێزن و هه‌رده‌م دهێلنه‌ ب هیڤیا خودایڤه‌ د ده‌ستێن داگیركه‌ر و نه‌یاران دا.
ره‌نگه‌ ئه‌ڤ دیتنا عاتفی، هه‌لچۆنی (انفعالی) پتر بۆ نه‌هۆشیا كۆمی ل ده‌ف جڤاكێ كوردی هه‌ی دزڤرت، ئه‌ڤه‌ د ده‌رووننسیا جڤاكی دا دهێته‌ نیاسین كو هه‌ر ده‌م جڤاكێ كوردی خوه‌ هێلایه‌ ب هیڤیا خه‌لكه‌كێ بیانیڤه‌ كو ببت قاره‌مانێ ئه‌فسانه‌یی یێ قورتال كه‌ر، مینا یه‌سۆعی ل جه‌م فه‌لله‌یان، محه‌مه‌د مه‌هدیێ چاڤه‌رێكری ل ده‌ف بسورمانان و شه‌رفه‌ددینی ل جه‌م ئێزدیان كو بهێت وان رزگار بكه‌ت.
واته‌ پڕانیا كوردستانیان وێ نزانن كو وه‌لاتێن زلهێز مینا ئه‌مریكا و رۆسیا و وه‌لاتێن دی هند هه‌ڤالێن كوردانن هندی به‌رژه‌وه‌ندیێن وان پێ هه‌ین، مینا ته‌پا د ناڤبه‌را دو تیمێن ته‌پا پێی دا، هه‌ر ده‌مێ ته‌په‌ چو ژ ده‌رڤه‌ی مه‌یدانا یاریا به‌رژه‌وه‌ندیێن وان، هینگێ یاریێ گیرۆ ناكه‌ن و دێ بۆ خوه‌ ته‌په‌كا دی ئینن.
روودانێن پێرار ده‌مێ ریفراندۆم ل هه‌رێما كوردستانێ هاتیه‌ ئه‌نجامدان و جڤاكێ نێڤده‌وله‌تی ب دژواری دژی وێ ئه‌زموونا مافێ گه‌ل كورد راوه‌ستیا و كه‌سێ خوه‌ل هه‌رێمێ نه‌كریه‌ خودا، روودانا ڤێ گاڤێ ل رۆژئاڤا دهێته‌ ئه‌نجامدان باشترین گرۆڤه‌نه‌ كو تنێ كورد هژمارا به‌رده‌ستا كڕین و فرۆشتنێنه‌ د ناڤبه‌را هه‌ر چار داگیركه‌ران و زلهێزان دا و به‌رێكانا بازرگانی و ئابووریه‌ د ناڤبه‌را وان دا، كانێ كی دێ پتر كێكێ ل سه‌ر پشتا كوردان بۆ خوه‌ بده‌ستڤه‌ هینت.
ئه‌ڤه‌ ژیواره‌ك ته‌حل و دۆمدرێژه‌ د دیرۆكا كوردستانێ دا كو بۆ پتر ژ سه‌د سالان دزڤڕت، هه‌ر ژ ده‌مێ رێكه‌فتنا سایكس ـ پیكۆی و هه‌تا ڤێ گاڤێ، هه‌رده‌م بازرگانیا ب كوردان دهێته‌ كرن، ئه‌نجامێ نه‌هه‌ڤگرتن و دژمنكاریا وان ب خوه‌، لێ مخابن هه‌موو جاران ئه‌و خوه‌ دخاپینن و داگیركه‌ر و وه‌لاتێن زلهێز ب تراجودی و ده‌رده‌سه‌ریێن خوه‌ تاوانبار دكه‌ن. ئاریشه‌یا مه‌زن ئه‌وه‌، ئه‌و ژ بیر دكه‌ن كو ئه‌گه‌رێ سه‌ره‌كی یێ ده‌رده‌سه‌ریێن وان هه‌ر ئه‌و ب خوه‌نه‌، چو جاران زلهێزان، تایبه‌ت ئه‌مریكا و بریتانیا بۆ كوردان چو نه‌كریه‌ و ناكه‌ن ژی، هه‌كه‌ كێشه‌یا كوردی د به‌رژه‌وه‌ندیا خوه‌ دا ئیستیغلال نه‌كه‌ن. واته‌ ئه‌و كوردێن د گه‌رمه‌گه‌رما هه‌ردو جه‌نگێن جیهانی دا، نه‌مازه‌ د كۆنگره‌یێن (سیڤه‌ر ) و (لۆزانێ) دا نه‌بووینه‌ ده‌وله‌ت و نه‌شیاین مفای بۆ خوه‌ ژ فاكته‌رێن ده‌رانی و خۆیانی ببینن، گه‌له‌كا ب زه‌حمه‌ته‌ ب ڤی ده‌ستودارێ كو هه‌رده‌م حزبێن كوردی دژی هه‌ڤدو و دوبه‌ره‌كی بوویه‌ سیبه‌را وان ببینن. ئه‌ڤجا باشتره‌ ئێدی كورد زێده‌تر خوه‌ نه‌خاپینن، ئاڕیشه‌یێن خوه‌ بكه‌نه‌ ب ناسێن خه‌لكێ بیانی و وهه‌ر ده‌م خوه‌ بهێلنه‌ ب هیڤیا وانڤه‌ كو بكه‌نه‌ ده‌وله‌ت ل ده‌مه‌كی كو ئه‌و ب خوه‌ نه‌دبه‌رهه‌ڤ كو وی ناسناڤی وه‌ربگرن.

36

ته‌حسین ناڤشكى

ژبلی جوداهیا من یا ئایدیۆلۆژی ل گه‌ل pkk، وه‌ك دی ئه‌ز حه‌ز ژێكه‌رێن رێخستن و زیره‌كی و چه‌له‌نگیا جه‌نگاوه‌ر و ئه‌ندامێن وێ ته‌ڤگه‌را ب ده‌هان سالان خه‌بات و تێكۆشینێ دژی دژمنان دكه‌ت سه‌خمه‌رات ئازادیا كوردستانێ كو وه‌سا دبینت دژمن ب ژبلی زمانێ شه‌ڕی و ئاگری چو زمانێن دی نزانت مافێن كوردان بده‌تێ. واته‌ چو جودایی ژ ڤی ئالیڤه‌ ل ده‌ڤ من د ناڤبه‌را پێشمه‌رگه‌ و گرێللا و شه‌ڕڤانان دا نینه‌ كو هه‌رسێ پارێزه‌رێن كوردستانێنه‌. ره‌نگه‌ ئه‌ز نه‌دگه‌ل سیاسه‌تا نه‌گوهۆڕا وێ ته‌ڤگه‌را چه‌پڕه‌وم كو رۆژ بۆ رۆژێ قوربانیێن مه‌زن سه‌را رێبازا خوه‌ ددت كو ژبلی چیا و داگیركه‌رێن په‌رژه‌وه‌ندیخواز چو هه‌ڤالێن دن نینن بپارێزت. هه‌لبه‌ت هه‌ر ژ ده‌سپێكا دامه‌زراندنا پارتیا كرێكارێن كوردستانێ ل دووماهیا سالێن حه‌فتیان ژ سه‌دێ بیستێ، ل كوردستنا باكۆر ل سه‌ر شه‌نگسته‌یێ هزرا ماركسی، لینینی، ئۆجه‌لانی و هه‌ڤدۆزێن خوه‌ ئه‌و ته‌ڤگه‌ر دامه‌زراندیه‌ درووشمێ ئازاد كرنا كوردستانا مه‌زن بلندكریه‌. سه‌ره‌رایی گوهۆڕینێن ل 30 سالێن دووماهیێ ب سه‌ر جیهانێ دا هاتین، راسته‌ په‌كه‌كێ پتر ژ جاره‌كێ وه‌ك رۆخسار سه‌رڤه‌سه‌رڤه‌ ناڤێ خوه‌ گوهه‌ڕتیه‌، دا كو دگه‌ل ره‌وتێ جیهانا نوو بچت، لێ هه‌ر بێ مفا بوویه‌ و نه‌كاریه‌ ناڤێ خوه‌ د تۆمارێن سیاسه‌تا ئه‌مریكا و ئۆرۆپادا سپی كه‌ت و وه‌ك حزبه‌كا ئاشتیخواز خوه‌ بده‌ نیاسین و هه‌ر مایه‌ د لیستا تیرۆرا وان وه‌لاتان دا، ژبه‌ر كو وه‌ك گه‌وهه‌ر ئه‌و رێكخراو هه‌ر وه‌ك خوه‌ مایه‌ و پشتی گرتنا سه‌رۆكێ وێ ل شواتا 1999 نه‌شیایه‌، وه‌ك حزبێن دی یێن كوردی، زه‌لامێ دووێ ل شوونا زه‌لامێ ئێكێ دانت و هه‌تا نها ئۆجه‌لان د زیندانێ دا سیاسه‌تا وێ برێڤه‌ دبه‌ت. رێبازا تاكڕه‌ویا وێ حزبێ كو چو جاران دانپێدانی ب چو حزبێن هه‌ر چار پارچێن كوردستانێ نه‌كری و هه‌ر ده‌م خوه‌ وه‌ك برایێ مه‌زن دبینت و هه‌ر جهه‌كێ ڤیای و ده‌ستێ وێ گه‌هشتیێ، لژێر درووشمێ كوردستان مه‌زن چالاكی و رێكخستنێن خوه‌ لێ به‌لاڤكرنه‌ و چو هزر بۆ چو ئالیان نه‌كرینه‌ و گه‌له‌ك جاران بوویه‌ ئه‌گه‌رێ مایتێكرنا دژمنان ل وان ده‌ڤه‌رێن سینۆری یان د دلێ پارچێن دی یێن كوردستانێ دا. ئه‌نجامێ ڤێ سیاسه‌تا به‌ره‌ڤاژی جیهانا شارستانی، ژ ئه‌نجامێن سه‌ر ئاخا واقعی دیار دكن كو رۆژ بۆ رۆژێ ره‌وشا وێ ته‌ڤگه‌رێ یا كامباختر لێ دهێت و نها ژیانا ئه‌ندام و چه‌كدارێن وێ گه‌له‌ك سه‌خت بوویه‌ و هه‌رده‌م د خه‌ته‌رێ دانه‌ ل ژێر چه‌كێ پێشكه‌ڤتیێ دژمنێن ملله‌تێ كورد كو نها په‌كه‌كه‌ گه‌له‌ك ب هشیاری و زه‌حمه‌ت دشێت ل ده‌ڤه‌رێن بن كۆنترۆلا خوه‌ بلڤلڤت، ژ به‌ر كو ئه‌و دزانت، دێ بته‌ ئارمانجا ته‌كنه‌لۆژیا ئه‌فریتیا  فڕۆكه‌ و ده‌بابێن دژمنێ كو پرانیا جڤاكێ نێڤده‌وله‌تی پشته‌ڤانیا وان دژمنان دكه‌ت.  ده‌مێ pkk گه‌له‌ك ب زه‌حمه‌ت بشێت كریاره‌كێ دژی رژێما داگیركه‌را توركیا د ئاخا كوردستانێ دا ئه‌نجام بده‌ت،  ئه‌ڤرۆ ژ سوبه‌ باشتره‌ په‌كه‌كه‌ تاكتیك و ستراتیژیا خوه‌ بگوهۆڕه‌ و ل دووڤ ره‌وتێ جیهانی یێ نوو هه‌ڕه‌ و زێده‌تر قوربانیان د خزمه‌تا دژمنان دا نه‌ده‌، چونكه‌ وه‌ك دیار، پڕانیا رژێم و ته‌ڤگه‌رێن ماركسی لینینی دڤان 30_ 40 سالێن داویێ دا خوه‌ گوهه‌ڕتیه‌ و رۆژ بۆ رۆژێ به‌ره‌ڤ كێمبوونێ و سیسته‌مێ نوو یێ لیبرال ده‌مۆكراسی دچن. ئه‌ڤه‌ژی ناهێته‌ كرن، هه‌تا چه‌كدارێن وێ ته‌ڤگه‌رێ ژ پارچه‌یێن دی یێن كوردستانێ ده‌رنه‌كه‌ڤن و خه‌باتا خوه‌ نه‌بته‌ د ناڤ ئاخا كوردستانا باكوور دا. هه‌كه‌ ئه‌ڤ پێنگاڤه‌ هاڤێت، ره‌نگه‌ هینگێ هیجه‌ت بۆ ده‌وله‌تێن داگیركه‌ر نامینت، نه‌ پارچێن دی یێن كوردستانێ بۆمبه‌بارانكه‌ن و نه‌ هێزێن خوه‌ بهێلته‌ د ئاخا وان دا و نه‌هێرشێن هۆڤانه‌ ئه‌نجام بدن.

22

ته‌حسین ناڤشكى
ئه‌ڤه‌ بهتر ژ 27 سالانه‌، ده‌نگێ خه‌لكه‌كى یێ بلند دبت و دخوازن گوهۆڕین ل ڤێ هه‌رێما بچووك بهێنكرن، لێ ژ به‌رسڤا ده‌ستهه‌لاتێ دیاره‌، ده‌نگێ وى خه‌لكى ژ سیبه‌را وى ده‌رباز نابت. خالا بالكێش ئه‌وه‌ كو ده‌ستهه‌لات ژى گه‌له‌ك جاران ده‌نگێ خوه‌ دده‌ته‌ ل گه‌ل ده‌نگێ وى خه‌لكى و سۆز و په‌یمانان ژى دده‌ت كو ل ڤێ كابنه‌یێ نه‌ یا دى كو ده‌ست ب گوهۆرینان بكه‌ت و ل پێشیێ دێ ده‌ست ب نه‌هێلانا گه‌نده‌لیێ و دزیان هێته‌كرن. واته‌ هه‌ر كه‌سه‌ك تاوانبار ل دووڤ قانوونێ دێ گه‌هت مافێ خوه‌ و كه‌س ژ وێ قانوونێ مه‌زنتر نینه‌. لێ راستیا ژیوارى تشته‌ك جودایه‌. واته‌ به‌ره‌ڤاژى، دزى و گه‌نده‌لى رۆژ بۆ رۆژێ زێده‌تر لێدهێن. دیاره‌ ئه‌و گوهۆڕینێن دهێنه‌كرن ژى، ره‌نگه‌ ل هه‌ڤ گوهه‌ڕتنن و دوورن ژ راستیێ و تنێ مژداركرنا ژیوارێ تلۆڤه‌یه‌ ژ ئاڕیشه‌ و كێموكاسیان.
هه‌لبه‌ت پرانیا مه‌ وه‌سا دبینن كو دڤێت گوهۆڕین ژ مرۆڤى ده‌ست پێ بكه‌ن. پرسیار ئه‌وه‌: ماهه‌كه‌ مرۆڤێ كول بت، دێ چاوا شێت بته‌ نۆشدارێ خه‌لكه‌ك دى و ئه‌نجامێن ئه‌رێنى ب ده‌ستڤه‌ هینت. وه‌ك مه‌نتق ئه‌ڤه‌ نابت، واته‌ ئه‌و ئالیێ گوهه‌ڕتنان دكه‌ت دڤێت ژبلى كو خودان ده‌ستێن پاقژ بت، دڤێت ئیراده‌ هه‌بت گوهۆڕینان بكه‌ت. واته‌ باوه‌ریه‌ك مكوم ب گوهۆرینان هه‌بت كو ئه‌و ده‌ستپێشخه‌رى، دێ خزمه‌تا گشتى و پره‌نسیپێن نه‌ته‌وه‌یا وى كه‌ت و دڤێت ستوخواهریێ بۆ بكه‌ت، هه‌كه‌ خوه‌دیێ وى بت، داكو بشێت گوهۆڕینێن ره‌هوریشالى ل سه‌ر خه‌لكه‌ك دى بكه‌ت.
مخابن ئه‌ڤا ئه‌م هه‌رده‌م دكه‌ین و دبێژین، هه‌كه‌ هه‌بت ژى ژ حاله‌تێن ده‌گمه‌نه‌ د ده‌ستهه‌لاتا هه‌رێما كوردستانێ دا. ژ به‌ر كو چو ئالیێن سیاسى ل هه‌رێمێ به‌رهه‌ڤ نینن ده‌سپێشخه‌ربن و كه‌سانێن دز و گه‌نده‌لێن حزبا خوه‌ ده‌ستنیشانبكه‌ن و ناڤێن وان بۆ رایا گشتى رابگه‌هینن داكو باوه‌ریا خه‌لكه‌كى ب ده‌ستهه‌لاتا هه‌رێمێ بزڤڕت. به‌ره‌ڤاژى هندى حزبێن كوردستانێ هێز هه‌یه‌ دز و گه‌نده‌ل و تاوانبارێن خوه‌ یێن مه‌زن ب به‌هانه‌یا وێ پارێزبه‌ندیا دایێ دپارێزن و ناهێلن بچنه‌ به‌رامبه‌ر ته‌رازوویا دادگه‌هێ، تنێ ئه‌و ته‌رازوو بۆ هه‌ژار و نه‌دارێن بێپشت و بێپارێزمه‌ندى دمینت، دادوه‌ر پێرابوونێن قانوونى هنبه‌ر وى بستینت. ل ڤێره‌ تنێ رۆلێ راگه‌هاندنێ و رێكخراوێن جڤاكێ مه‌ده‌نى دمینت، ئه‌و ژى پشكا شێرى ژ وان سازیان هه‌كه‌ نه‌بێژین هه‌موو، یان ئۆرگانێن حزبێن هه‌رێمینه‌ یان سیبه‌رێن وانن، هه‌كه‌ هات و جاره‌كێ ده‌نگه‌كى كفنێ خوه‌ كره‌ سه‌رێ خوه‌ و دز و گه‌نده‌ل ب ناڤ ده‌ستنیشانكرن، هینگێ دڤێت ئه‌و ده‌نگ ژ هه‌رێمێ باركه‌ت یان چاره‌نڤیسێ وى كه‌ته‌ د هاتوباتێ دا؛ مینا هنده‌ك ژ وان ره‌ڤین و هنده‌ك ژى بووینه‌ قوربانێن په‌یڤا ئازاد و هێشتا یێن دچن و باده‌كێن وان ل بن تۆزێ ماینه‌.
ره‌نگه‌ براده‌ره‌ك وه‌ها ئاماژه‌یێ بده‌تێ كو ده‌مۆكراسیه‌ و ئازادیه‌ و ئه‌ڤا تو دنڤیسى پارچه‌یه‌ك ژ وێ پرۆسێسا ژیێ وێ نێزیكى 28 سالان. ئه‌ز هه‌ر ل ڤێره‌ دێ به‌رسڤێ ده‌م كو ئه‌ڤا نها ئه‌ز د ڤان رێزكان دا دبێژم، هه‌كه‌ نها ناڤێ دزه‌كى یان گه‌نده‌له‌كى ئه‌ز دگه‌ل دیار بكم، هه‌كه‌ خوه‌ به‌لاڤۆكه‌كا مه‌ وێ وێره‌كیێ بده‌ته‌ خوه، هینگێ ڤێ نڤیسارێ به‌لاڤ ژى كه‌ت، دێ هه‌ر د سه‌رێ مه‌ڕا ژ كێت؛ ژ به‌ر كو هه‌ر تشته‌كى دز و گه‌نده‌لان ژ ڤى وه‌لاتى تالانكرى فه‌رمى و قانوونى ئێخستیه‌ سه‌رناڤێ خوه‌ یان مرۆڤه‌كێ خوه‌ و تۆمار كریه‌. یان ژێر به‌ژێر ئه‌و سامانێ دزى سپیكریه‌ و نها دپانقێن جیهانى دانه‌؛ هینگێ دێ ئه‌م هێینه‌ تاوانباركرن ب ناڤزڕاندن و شكاندنا وان كه‌سانێن دز و گه‌نده‌ل و مافێ وانه‌ سكالایا تۆماركه‌ن؛ وه‌ك گه‌له‌ك جاران تۆماركرین. واته‌ ئه‌ڤ گازنده‌ و ره‌خنه‌یێن گشتى ئه‌م هه‌موو بۆ خوه‌ دكه‌ین هه‌مان ئه‌و دز و گه‌نده‌لن ژى دكه‌ن و كه‌س پرسا چاره‌كرنێ ناكه‌ت!
كه‌واته‌ ل دووڤ گۆتنا پێشیان: ((ئه‌ز چیا و تو چیا…..)) هندى كو چو حزبێن هه‌رێمێ ده‌ستپێشخه‌ریێ نه‌كه‌ن و دز و گه‌نده‌لێن خوه‌ ده‌ستنیشانكه‌ن و ل دووڤ قانوونێن هه‌ولێرێ و به‌غدایێ سزانه‌ده‌ن و نه‌گه‌هیننه‌ مافێ گه‌ل، ره‌وش دێ رۆژ بۆ رۆژێ كامباختر لێهێت و قه‌یران دێ زێده‌بن. هه‌لبه‌ت ئه‌ڤه‌ ژى دمینته‌ ل سه‌ر ئیراده‌یا رابه‌رێن حزبان برێڤه‌دبه‌ن، هه‌كه‌ ئه‌و ئیراده‌ هه‌بت و خوه‌دیێ وان خالێن ره‌ش ل سه‌ر بن دانپێدانێ پێبكه‌ن؛ هینگێ دێ شێن ره‌شه‌ خالێن خه‌لكه‌ك دن ژى ده‌ستنیشانكه‌ن و گه‌هیننه‌ مافێ گه‌ل؛ لێ هه‌كه‌ ئه‌ڤ ئیراده‌ نه‌بت، نه‌هه‌لبژارتنێن دهێنه‌كرن و نه‌ لێكگوهه‌ڕتنا به‌رپرسێ ڤێ لیژنێ یان ڤێ كۆمیتێ مفادكه‌ت و نه‌گوهه‌ڕتنا به‌رپرسێ ڤێ سازیێ ب به‌رپرسێ سازیا دى مفا دكه‌ت. ئه‌ڤه‌ هنده‌ ساله‌ ئه‌مێ به‌رهه‌مێ ڤى سیسته‌مى دبینین، تنێ ده‌مبۆهراندنه‌ و رۆژ بۆ رۆژێ ره‌وشا كامباختر لێدهێت.

21

ته‌حسین ناڤشكى
هه‌كه‌ ئه‌م ب گۆشه‌یه‌ك به‌ره‌فره‌ه ل مژارێ ته‌ماشه‌ بكه‌ین، دێ بینین بزاڤێن خودان ئایدیولۆژیێن رادیكالێن ناڤدار، مینا ئیسلامخوازێن توندره‌و و ره‌وتێن ماركسى ل سه‌رانسه‌رى جیهانێ، وه‌سا دبینن كو هه‌ر گوهاڕتنه‌كا د سیسته‌مێن ده‌ستهه‌لاتێن سه‌رمایدار دا بهێته‌كرن، بێمفایه‌ ژ به‌ر كو تنێ ئه‌و خوه‌ دبینن ده‌ستهه‌لاتێ وه‌ربگرن، دا كو دستوورێ خوه‌ پراكتیزه‌ بكه‌ن. واته‌ ئیسلامخواز وه‌سا دبینن تنێ دستوور و شه‌ریعه‌تێ ئیسلامێ چاره‌یا دروسته‌ و ئه‌ڤێن دى هه‌مى گاور و نه‌راسته‌رێنه‌. چه‌پره‌وه‌ ژ ئالیێ خوه‌ دبینن، دبنى دا مفا ژ سیسته‌مێ سه‌ره‌مایه‌دارى و سیسته‌مێن دن ناهێته‌كرن، تنێ رابوونا چینێن زه‌حمه‌تكێشان كو دكه‌ڤنه‌ بن درووشمێ (شالۆكێ و چاكۆچى) چاره‌نه‌ ئاگرێ شۆڕه‌شێ هه‌لكه‌ن و ده‌ستهه‌لاته‌ك نوو ل دووڤ سیسته‌مێ ماركسى بدامه‌زرینن. د ناڤبه‌را شه‌ره‌نیخا هه‌موو تیۆرێن چاكسازى و گوهه‌ڕتنێن ده‌ستهه‌لاتێ ده‌، ژ رۆخسار و ناڤه‌رۆكێ خویادبت كو ده‌ستهه‌لاتا هه‌رێمێ جودایه‌ و ناسنامه‌یه‌كا نه‌وه‌ك چو ناسنامه‌یێن ده‌ستهه‌لاتێن جیهانێ وه‌رناگرت. واته‌ ناسنامه‌یه‌ك ب شێوه‌یه‌ك مژدار هه‌یه‌ و نه‌شێت ژ چارچووڤێ وێ ناسنامه‌یێ ده‌ركه‌ڤت و چاڤخشاندنه‌كێ ل گۆتنا پێشیان ((هه‌كه‌ نه‌زانى گوهبده‌ جیرانى)) بكه‌ت و مفاى ژ ئه‌زموونێن خه‌لكه‌ك دى ببینت.
واته‌ هه‌كه‌ دیتنێن خوه‌دى ئایدیۆلۆژێن رادیكالى یێن وه‌ك ئیسلاما توندره‌و و ماركسیێ وه‌سا ببینن كو چاكسازیێن ده‌ستهه‌لاتێن دن ژبلى وان، تنێ مكیاجكرن و جوانكاریه‌ و چو جاران نابنه‌ گوهۆڕین و چاكسازیێن راسته‌قیه‌، ئه‌ڤه‌ پتر ژ 27 سالانه‌ ده‌ستهه‌لاتا خومالى ده‌هۆلا گوهۆڕینان ل ده‌ڤه‌ره‌كا ب ناڤێ هه‌رێما كوردستانێ لێدده‌ت و ده‌زگه‌هه‌كێ مه‌زن ب ناڤێ (نه‌زاهێ) ژی هاتیه‌ دانان دا كو گه‌نده‌لیێ نه‌هێلت و دزیان بنبڕبكه‌ت، لێ هه‌تا نها حزبێن هه‌رێمێ و ده‌ستهه‌لاتا هه‌ر ژ وان حزبان پێكهاتی نه‌كو نه‌شیانه‌ دزه‌كی یان گه‌نده‌له‌كی بگرن و ل دووڤ قانوونێ سزابده‌ن، به‌لكی حزبێن ده‌ستهه‌لاتدار نه‌شیاینه‌ جامێن ره‌شێن ترومبێلان نه‌هێلن. پرسیارا ل ڤێره‌ دهێت: ئه‌رێ ته‌ حوكمه‌ته‌ك هه‌بت و نه‌شێت بچووكترین گوهۆڕین بكه‌ت، دێ چاوا باوه‌ریا خه‌لكێ وێ پێهێت كو ژ خه‌ته‌ریێن ناڤخوه‌یی و ده‌رانی بپارێزت؟
ئه‌زموونا حوكمداریا هه‌رێمێ بۆ مه‌ دیاردكت كو گوهۆڕین پرۆسێسه‌كا كۆمی شارستانیه‌ و ب ئیراده‌ و هشیاریا هه‌موو ئالیان گه‌شه‌ دكه‌ت و دبته‌ كولتۆرێ تاكێ هه‌ر جڤاكه‌كی گوهۆڕینان دكته‌ پلان و به‌رنامه‌یێ پاشه‌رۆژێ. هه‌لبه‌ت لاوازی و پشكدرانه‌بوونا هه‌ر ئالیه‌كی د ڤێ پرۆسێسێ دا، به‌رهه‌مێ وێ دێ یێ له‌نگ بت، هه‌كه‌ نه‌ یێ مری بت. ژ به‌ر كو گوهۆڕینێن جڤاكان ل دووڤ تیۆریا ده‌روونناسیا گشتالتی، چارچۆڤه‌یه‌ك ته‌ڤاییه‌، كێمبوونا هه‌ر ئه‌ندامه‌كی، چوارچۆڤه‌ هه‌می ژ كار دكه‌ڤت.

website security
WP Facebook Auto Publish Powered By : XYZScripts.com