NO IORG
نووترين نووچه
هه‌لبژارتى2

 

به‌رپرسێ ده‌زگه‌هێ هه‌لبژارتنێن پارتی راگه‌هاند، وه‌كو هه‌ر قه‌واره‌كێ سیاسی، پارتی ل رۆژا ئێكێ یا بریارا ئه‌نجامدانا هه‌لبژارتنان، ده‌ست ب به‌رهه‌ڤیان كریه‌، ل هه‌موو جهان ل كوردستانێ دێ پشكداریێ د هه‌لبژارتنان دا كه‌ین.
خسرۆ گۆران گۆت ژى:( نوكه‌ ئه‌م مژوولی دیاركرنا به‌ربژارێن خوه‌ینه‌، چونكی 17 ڤێ هه‌یڤێ دووماهی ژڤانه‌ بۆ هنارتنا ناڤێن به‌ربژاران و پاشی هه‌تا 1 گۆلانێ دووماهی ژڤانه‌ بۆ تۆماركرنا هه‌ڤپه‌یمانیان).

ئه‌ڤرۆ، سالار محه‌مه‌د دۆسكی:

ئه‌ندامه‌كێ‌ لژنا خواندنا بلند ل په‌رله‌مانێ‌ عیراقێ‌ ئاشكراكر كو حوكمه‌تا عیراقێ‌ دانپیدان ب هه‌شت زانكۆیێن كوردستانێ‌ كریه‌، ل داهاتی دا دێ‌ ل سه‌ر ئاستێ‌ عیراقێ‌ و ده‌رڤه‌ ڤێ‌ دانپیدانێ‌ ره‌نگڤه‌دان هه‌بن.

د.محه‌مه‌د شاكر محه‌مه‌د سالح، ئه‌ندامێ‌ لژنا خواندنا بلند ل په‌رله‌مانێ‌ عیراقێ‌ بۆ رۆژناما ئه‌ڤرۆ گۆت: حوكمه‌تا عیراقێ‌ دانپیدان ب حه‌فت زانكۆیێن هه‌رێما كوردستانێ‌ كرینه‌ و سالا داهاتی دێ‌ نافێ‌ قوتابیان چیته‌ درێبه‌ری دا، ئه‌و ژی زانكۆیێن (كوردستان، سوران، زاخۆ، راپه‌رین، هه‌له‌بجه‌، پولیته‌كنیك هه‌ولێر، پولیته‌كنیك سلێمانی) بتنێ‌ زانكۆیا پولیته‌كنیكا دهۆكێ‌ مایه‌ و پێدڤی یه‌ لژنه‌ك سه‌ره‌دانا كولیژ و په‌یمانگه‌هێن سه‌ر ب  وێ‌ زانكۆیێ‌ ڤه‌ بكه‌ت و ئه‌و ژی دێ‌ دانپیدان پێ‌ هێته‌كرن چنكو مه‌رج تێدا هه‌نه‌ و ئه‌م ئاگه‌هدارین، ژ سه‌رجه‌مێ‌ نه‌ه زانكۆیێن كوردستانێ‌ هه‌شتا دانپیدان پێ‌ هاته‌كرن و بتنێ‌ زانكۆیا گه‌رمیان چه‌ند تێبینی ل سه‌ر هه‌بوون دانپیدان پێ‌ نه‌هاته‌كرن.

هه‌مان ئه‌ندامێ‌ په‌رله‌مانی ئه‌و ژی گۆت: دانپیدانا حوكمه‌تا عیراقێ‌ دێ‌ گه‌له‌ك مفای گه‌هینته‌ قوتابیێن ئه‌ڤان زانكۆیان چنكو ده‌مێ‌ دچوونه‌ ده‌رڤه‌ی وه‌لاتی گه‌له‌ك كێشه‌ بۆ دروست بوون و ناڤێن ئه‌وان زانكۆیان د لیستا وه‌زاره‌تا ده‌رڤه‌ یا عیراقێ‌ دا نه‌بوون و مفا نه‌ وه‌رگرت و نه‌شیان بخوینن خواندنا ماسته‌ر و دكتور و هه‌تا نه‌شیان ل زانكۆیێن عیراقێ‌ ژی بخوینن، دشێن بێژین نوكه‌ باوه‌رناما وا بۆ باوه‌رنامه‌ ل عیراقێ‌ و ده‌رڤه‌ی عیراقێ‌ یا باوه‌رپێكریه‌.

د.محه‌مه‌د شاكر محه‌مه‌د سالح، ئه‌و ژی ئاشكراكر كو هنده‌ك زانكۆیێن عیراقێ‌ ژی ل ده‌ڤه‌رێن ناكوكی ل سه‌ر هه‌نه‌ و حوكمه‌تا هه‌رێما كوردستانێ‌ هێشتا دانپیدان پێ‌ نه‌كریه‌ وه‌ك زانكۆیێن (قه‌لم، نور، حه‌دبا، كتاب) هنده‌ك تێبینی ل سه‌ر هه‌نه‌ و گه‌له‌ك قوتابیێن هه‌ولێرێ‌ و دهۆكێ‌ سه‌ردانا ئه‌ڤان زانكۆیان دكه‌ن، وه‌زاره‌تا خواندنا بلند ل هه‌رێما كوردستانێ‌ ل سه‌ر كوالێتی و خواندنێ‌ ل هنده‌ك جهان تێبینی هه‌نه‌، هێدی هێدی هنده‌ك سالان حوكمه‌تا هه‌رێما كوردستانێ‌ یا دانپیدانێ‌ پێ‌ دكه‌ت، كێشه‌ ب دووماهی نه‌هاتیه‌ و ژ به‌ر په‌ژیكا كورونایێ‌ ژڤان بوو وه‌زیرێ‌ خواندنا بلند ل هه‌رێما كوردستانێ‌ سه‌ردانا به‌غدا بكه‌ت و ل گه‌ل وه‌زیرێ‌ خواندنا بلند ل عیراقێ‌ كومبوونه‌كێ‌ ئه‌نجام بده‌ت.

هه‌مان ئه‌ندامێ‌ په‌رله‌مانی گۆت: گه‌نگه‌شه‌ ل گه‌ل وه‌زیرا خواندنا بلند ل كابینا بوری هاتیه‌كرن كو هه‌ر ده‌مێ‌ قوتابیێن عیراقێ‌ بۆ خواندنا بلند بهێنه‌ ره‌وانه‌كرن بۆ ده‌رڤه‌ به‌هرا هه‌رێما كوردستانێ‌ 17% تێدا بیت و ژ به‌ر ڤی كاودانێ‌ به‌رته‌نگێ‌ ئابووری و په‌ژیكا كورونایێ‌ ئه‌و بابه‌ت هاتیه‌ نڤاندن.

د.محه‌مه‌د شاكر محه‌مه‌د سالح، ئه‌ندامێ‌ لژنا خواندنا بلند گۆت: نوكه‌ قانوونا خواندنا زانكۆیێن ئه‌هلی ل به‌ر ده‌ستێ‌ مه‌یه‌ و كارێ‌ ل سه‌ر راستڤه‌كرنا وێ‌ دهێته‌كرن و قانوونا هه‌رێما كوردستانێ‌ گه‌له‌ك ژ یا عیراقێ‌ باشتره‌، دیسا كارێ‌ ل سه‌ر راستڤه‌كرنا باوه‌رناما ژی دهێته‌كرن ئه‌وێن ده‌رڤه‌ دهینه‌ كوردستانێ‌.

د.محه‌مه‌د شاكر محه‌مه‌د سالح گۆتژی: گه‌له‌ك تێبینی مه‌ ل سه‌ر زانكۆیێن ئه‌هلی هه‌یه‌ و مه‌ راپورت پێشكێشی وه‌زاره‌تێ‌ كریه‌ و كولیژا پزیشكی هه‌یه‌ نه‌ستاف و نه‌ ئاڤاهیێ‌ باش هه‌یه‌، و به‌رده‌وام دیفچوونا دهێته‌كرن و هه‌كه‌ ل داهاتی خوه‌ دروست نه‌كه‌ن دێ‌ كا  ل سه‌ر گرتنا وان كه‌ین.

هه‌مان ئه‌ندامێ‌ په‌رله‌مانی گۆت: ل زانكۆیێن عیراقێ‌ ژی خواند ل هنده‌ك كولیژا كه‌مپێ‌ دایه‌ و هنده‌ك كولیژا ئونلاینه‌ و سه‌رۆكێ‌ زانكۆیێ‌ ده‌ست هه‌لات هه‌نه‌ لدووف بابه‌تان هه‌لبژێریت و زێده‌تر ئونلاین و هه‌تا تاقیكرن ژی ب هه‌ر دو شێوازان هه‌یه‌.

ناڤبری گۆت: ل سێ‌ زانكۆیێن عیراقێ‌ پشكێن كوردی هه‌نه‌ به‌لێ‌ ستافێ‌ كێمه‌،  ئه‌م ل گه‌ل ئاخفتینه‌ و هه‌كه‌ پێدڤی بوو دێ‌ ستافی ژ كوردستانێ‌ بۆ به‌ینه‌ به‌غدا و گه‌له‌ك هه‌لگرێن باوه‌رنامێن ماسته‌ر و دكتورایێ‌ خواستینه‌ ل زانكۆیێن به‌غدا ل پشكێن كوردی ده‌وامێ‌ بكه‌ن و پشكێن كوردی ل به‌غدا كێمبوونا میلاكی هه‌یه‌ و دێ‌ رۆژێن داهاتی دیفچوونێ‌ بۆ كه‌ین.

ئەڤرۆنیۆز، قائید میرۆ
پۆلیسێن هەولێرێ دو گونەهبار دەستەسەرکرن، کو شیابوون 100هزار دۆلاران ل وەلاتیەکی وەربگرن ب زۆری
پۆلیسێن هەولێرێ راگەهاند، پشکا پۆلیسێن ناڤاباژێڕی ل بنگەهێ تەیراوە دو گونەهبار بناڤێن (ر.ر.م) و (ج.ر.م) دەستەسەرکرینە، کو ب گەف و چەکی (100 هزار دۆلار) و (60 ملیۆن دینار) ل وەلاتیەکی ستاندینە.
پۆلیسێن هەولێرێ ئاماژەکریە، هەردوگونەهبار برانەو دانپێدان ب ئەنجامدانا تاوانێ کریە و ب بڕیارا دادوەرێ ڤەکۆلینێ و گورەی مادێ430 یا قانوونا سزادانێ هاتینە بەندکرن

ئه‌ڤرۆ:

شیره‌تكارێ به‌رێ یێ وه‌زاره‌تا سامانێن سروشتی ل هه‌رێما كوردستانێ راگه‌هاند، رێككه‌فتنا هه‌ولێرێ و به‌غدا سه‌نه‌ده‌ بۆ وێ چه‌ندێ هه‌رێما كوردستانێ ژ گرفتا قانوونی یا فرۆتنا په‌ترۆلێ یا دوور ببیت.

د. عه‌لی به‌لۆ، شیره‌تكارێ به‌رێ یێ وه‌زاره‌تا سامانێن سروشتی و ئه‌ندامێ به‌رێ یێ لژنا په‌ترۆلێ و غازێ ل جڤاتا نوونه‌رێن عیراقێ ژ فراكسیۆنا پارتی دیموكراتی كوردستان گۆت” مفایێ رێككه‌فتنا هه‌ولێرێ و به‌غدا د وێ چه‌ندێ دایه‌، كو بازار دێ هێته‌ ڤه‌ژاندن و بودجه‌ دێ بۆ هه‌رێما كوردستانێ هێت و سیاسه‌تا په‌ترۆلێ هه‌ر دێ ب ده‌ستێ هه‌رێمێ بیت و ژ ئه‌گه‌رێ ڤێ رێككه‌فتنێ بۆ جارا ئێكێ یه‌ حوكمه‌تا عیراقێ دانپێدانێ ب فرۆتنا په‌ترۆلا هه‌رێما كوردستانێ دكه‌ت، چاوان سۆمۆ ب فه‌رمی دشێت گرێبه‌ستان ئه‌نجام بده‌ت، ئه‌ڤ رێككه‌فتنه‌ دێ بیته‌ ئه‌گه‌ر كو هه‌رێما كوردستانێ ژی ب فه‌رمی گرێبه‌ستێن په‌ترۆلی ئه‌نجام بده‌ت و پاشی و ل بن روناهیا قانوونان دشێت كۆمپانیا په‌ترۆلا نیشتمانی ب دامه‌زرینیت و ئه‌و گازنده‌یێن به‌غدا ژی ژ هه‌رێمێ دكرن، نامینن”.

د. عه‌لی به‌لۆ زێده‌تر گۆت” پێدڤیه‌ كۆمپانیا په‌ترۆلا كوردستانێ (كۆمۆ) بهێته‌ دامه‌زراندن، چونكه‌ قانوون یا پێ ده‌رچووی، ئه‌ڤ رێككه‌فتنه‌ هاتیه‌ كرن ژی وه‌دكه‌ت كو هه‌رێما كوردستانێ ب فه‌رمی په‌ترۆلا خوه‌ بفرۆشیت و بۆ هه‌رێمێ هه‌یه‌ د ده‌مه‌كێ كورت دا وێ كۆمپانیێ دامه‌زرینیت”.

دیاركر ژی” پێدڤیه‌ رێكارێن قانوونی بهێنه‌ ئه‌نجامدان و به‌غدا ب فه‌رمی نه‌رازیبوون ل سه‌ر نه‌بیت، هه‌كه‌ بۆ هه‌رێما كوردستانێ هه‌بیت ب فه‌رمی په‌ترۆلێ بفرۆشیت و ب بهایێ 250 هزار به‌رمیلێن په‌ترۆلی پاره‌ی بده‌ته‌ به‌غدا ، پێدڤیه‌ ب وێ رێ كۆمپانیه‌ك هه‌بیت ب فه‌رمی وێ په‌ترۆلێ بفرۆشیت، ئه‌ڤه‌ ژی باشترین ده‌لیڤه‌یه‌ بۆ هه‌رێما كوردستانێ”.

هه‌روه‌سا ئاماژه‌ كر”عیراق و هه‌رێما كوردستانێ ژی په‌ترۆلێ دفرۆشنه‌ كۆمپانیان، ئه‌وژی دده‌نه‌ وه‌لاتێن دی، له‌وما ده‌ستێ هه‌رێما كوردستانێ یێ ڤه‌كریه‌ ب هه‌ر رێیه‌كێ بفرۆشیت وداهات ب ده‌ست بكه‌ڤیت، باشتره‌ وێ چه‌ندێ بكه‌ت”.

ل دۆر وێ چه‌ندێ ئایا ئه‌ڤ دانپێدانه‌ تنێ بۆ ساله‌كا بودجه‌یه‌، یان دانپێدانه‌كا هه‌میشه‌یی یه‌، د. عه‌لی به‌لۆ گۆت” بودجه‌ بۆ ساله‌كێ یه‌، به‌لێ ئڤ بودجه‌یه‌ ل سه‌ر بنه‌مایێ رێككه‌فتنه‌كێ یا دروست بووی، ئه‌ڤ رێككه‌فتنه‌ د ناڤبه‌را هه‌ولێرێ وبه‌غدا بوو، له‌وما ئه‌ڤ رێككه‌فتنه‌ دێ مینیت و سه‌نه‌ده‌كه‌ كو هه‌رێما كوردستانێ بۆ هه‌تا هه‌تایێ په‌ترۆلێ ب قانوونی بفرۆشیت”.

دھۆک، لەزگین جۆقی:
خودانآ ترشیێ خێزان ل دھۆکێ دیار کر، ٢٦ تەنێن ترشی ھەموو ژ بەرھەمێ خۆمالێ یێن جۆتیارێن پارێزگەھا دھۆکێ ھاتیە دروستکرن بۆ وەلاتی ئەلمانیا ھاتە رھنارتن.
سەردار عەبدولرەحمان ئەحمەد، خودانێ ترشیێ خێزان ل دھۆکی بۆ رۆژناما ئەڤرۆ راگەھاند: “ئەم دو کەسێن کوردین ل دھۆکێ ترشیێ خێزان بۆ باژێری ھانوڤەر ل وەلاتی ئەلمانیا دھنێرین، ل وی وەلات گەلەک داخوازی یا ل سەر ترشیێ کوردی ھەی، ب رێیا کۆمپانیا سولتان بەرھەمێ ترشیێ خۆمالی ل ئەلمانیا و چەندین دەولەتێن ئورۆپی دھێتە بەلاڤکرن”.
گۆتژی: “ئەڤە ژی پینگاڤەکا باشە بۆ ساخکرنا بەرھەمێ خۆمالی، چونکو ھەموو خیار و ترۆزی و زەیتون و کەرەستێن دی یێن بۆ ترشی دھێنە بکارئینان ناڤخەیی نە کو ساخلەمیا دھۆکێ بۆ ئەنجامدانا ڤی کاری گەلەک پشتەڤانیا مە دکەت”.
ئاشکرا ژی کر، پشتی وان دیتی دێ ل ئورۆپا داخوازی ل سەر بەرھەمێ ترشیێ کوردی ھەی، وان دەست بکارێ ھنارتنا ترشی بۆ ئەلمانیا کر، ئەڤ کارە ب ھەڤکاریا ھەڤپشکێ مە عیماد کو خەلکێ باشیکێ یە ل دھۆکێ کارگەھەکا ترشی دانایە؛ دھێتە کرن.
سەرداری زێدەتر گۆت: “ئەڤە چەندین جارا ئەم ترشی ژ دھۆکێ دبەینە ئورۆپا، ب راستی ژی خەلکێ وێ، ب تایبەتی ژی کوردێن مە گەلەک دخوازن ترشیێ مە بگەھیتە وان، چونکو ترشی و ھەموو جۆرێن دی یێن خوارنێن کوردی تایبەتمەندیا خوە یا ھەی، ترشیێ مە ژی ژ بەرھەمێ خۆمالی دھێتە دروستکرن و گەلەک داخوازی ژلایێ خەلکێ ئورۆپا ڤە ل سەر یا ھەی”.

ئەڤرۆ:

پشتی شاندێ ھەرێما کوردستانێ و لایەنێن شیعی ل سەردەقەکێ ھەڤپشک رێککەفتین، بەلێ پاشی لایەنێن شیعی گوھۆرین د دەقێ مادێ ١١ یێ پرۆژێ قانوونا بودجەیدا کر و چەند برگەک لێ زێدەکرن، ئەو برگەیێن لایەنێن شیعی د پرۆژێ قانوونا بودجەیدا زێدەکرین ئاماژێ ب وێ چەندێ دکەن ئەگەرھەرێما کوردستانێ پێگیرنەبیت ب رێککەفتنێ، ھیچ بودجەک ژ عیراقێ بۆھەرێمێ ناھێتە ھنارتن.

ئەحمەدسەفار، بریاردەرێ لژنا دارایی ل جڤاتا نوونەرێن عیراقێ گۆت” گیروبوونا پەسەندکرنا بودجا گشتی یا عیراقێ بۆ سالا ٢٠٢١ پەیوەندی ب ھەرێما کوردستانێڤە نینە، بەلکو پەیوەندی ب لایەنێن شیعی و حوکمەتا فیدرالڤەھەیە”.

گۆت ژی” لایەنێن شیعی ناخوازن بودجە بھێتە پەسەندکرن”.

ژلایێ خوەڤە، سامان سۆرانی، چاڤدێری سیاسی، دبێژیت” نێزیکی پێنج ھەیڤایە پرۆژێ قانوونا بودجەی ل جڤاتا نوونەرایە و ژبەر ململانێیا لایەنێن شیعی و چەندین ئەگەرێن دی، ناھێتە دەربازکرن”.

ل دۆرھۆکارەکێ پەسەندنەکرنا پرۆژێ قانوونا بودجەی، راگەھاند” لایەنێن عەرەبێن شیعی ب تایبەت ئەوێن میلیشیا ھەین، رێیێن جۆراوجۆر بۆ پاشخستن و دروستکرنا ئاستەنگان بۆ پەسەندکرنا پرۆژێقا نوونا بودجەی دگرنەبەر”.

ب دیتنا وی چاڤدێری، ئەولایەنێن شیعی ب پشتەڤانیا وەلاتەکێ جیران، دخوازن جڤاتا نوونەران ب پرۆژێ قانوونا بودجەی ڤە مژوولبکەن و رێ ل ھەلبژارتنێن پێشوەخت بگرن”.

دیارکر” شیعە ب مژوولکرنا گەلێ عیراقێ ب پشکا بودجێ ھەرێماکوردستانێ، شکەستنا خوە ل باشوور و ناڤەراستاعیراقێ ڤەدشێرن، د دەمەکیدا وان ب رێژا ھەرەزۆرینەیا بودجەی، نەشیاینە خزمەتا باژێرێن باشوورێ عیراقێ بکەن”.

ناڤبری ئەگەرەکێ دی یێ پەسەندنەکرنا پرۆژێ قانوونا بودجەی بۆرێک نەکەفتنا لایەنێن عەرەبێن شیعی ( ل سەرپشکێن خوە) د پرۆژێ قانوونێدا زڤراند، کوھەرئێک ژ وان لایەنان بزاڤان دکەت بەھراپتر بۆ خوە ببەت.

بریاربوو دوھی شەمبیێ ٢٧/٣/٢٠٢١ جڤاتا نوونەرێن عیراقێ بۆ دەنگدانێ ل سەرپرۆژێ قانوونا بودجەی کۆمببیت، بەلێ کۆمبوون بۆ ئەڤرۆ ئێکشەمبی ھاتەپاشخستن.

ھەولێر، قائید میرۆ

دگەل ئاریشێن نوکە ل عیراقێ ھەین گەفێن خوەپیشادانان ژی پەیدابووینە و چەند رۆژەکە کار بۆ ئەنجامدانا خوەنیشادانێن بەرفرەە ل عیراقێ دھێنەکرن، بسپۆرەکێ زانستێن سیاسی ژی رادگەھینیت، تنێ ھەلبژارتنێن پێشوەخت دێ کاریگەری ل سەر تەنابوونا نەرازیبوونا وەلاتیێن عیراقێ ھەبیت ھەروەسا گۆت، پشتی ھاتنا پاپای دێ گۆھۆرین ل عیراقێ ھێنەکرن و ئەمریکا پلان دانایە بۆ تەناکرنا رەوشا عیراقێ.

د. سەباح سوبحی،  چاڤدێری سیاسی و بسپۆر د زانستێن سیاسی دا،  بۆ رۆژناما ئەڤرۆ دیارکر”  گڤاشتنێن جادێ ل عیراقێ کاریگەری ل سەر رەوشا عیراقێ پەیداکرن و بۆ ئەگەر کو قانوونا ھەلبژارتنان بھێتە گۆھۆرین و بریارا ھەلبژارتنێن پێشوەخت بھێتە دەرکرن، ھەتا سەرۆک وەزیرێن بەرێ یێ عیراقێ ژی لبن گڤاشتنێن وەلاتیان دەست ژ کارێ خوە ڤەکێشا، لەورا ئەز باوەرم ئەگەر ھەلبژارتنێن پێشوەخت ئەڤسالە ل عیراقێ نەھێنە ئەنجامدان، دێ رەوشا عیراقێ بەر ب ئالۆزیێن زێدەتر چیت و جادا عیراقی جارەکادی دێ دەست ب لڤینان کەت، روودانێن رۆژھەلاتا ناڤین زۆر نێزیکی ئێکن، ھەتا چەند رۆژەکە ل پارێزگەھێن نەجەف و زیقار دەست ب خوەنیشادانان دھێتەکرن و پێشبینی دھێتەکرن ھێشتا خوەنیشادان بەرفرەھتر ببن کو ب ڤێ چەندێ دێ رەوش ژ دەستان دەرکەڤیت ھەروەکو بەری نوکە خوەنیشادەران گڤاشتن لسەر دەستھەلاتدارێن عیراقێ کری و بۆ ئەگەرێ گۆھۆرینا حوکمەتێ، رەوشا عیراقێ تنێ ب رێڤەچوونا ھەلبژارتنان دێ ھندەک تەناھیێ بخوەڤە بینیت، راستە ھەلبژارتن نابنە ئەگەرێ چارەسەرکرنا ئاریشێن عیراقێ، بەلێ دێ بەھرا خوە کاریگەری ھەبن، بتایبەتی ھندەک سەرکردە پشتی خوەنیشادانان پەیدابووینە و دێ شێن د ھەلبژارتنێن داھاتی دا ب سەرکەڤن”.

سەباحی ئاماژەکر” سەرەدانا پاپایێ فاتیکانێ بۆ عیراقێ ب دیتنا من، سەردانەک بوویە بەری بھێتە ئەنجامدان بەرھەڤی بۆ ھاتیەکرن، بتایبەتی ژلایێ ئەمریکا ڤە کار بۆ ھاتنا پاپای ھاتینەکرن، پشتی سەرەدانا پاپای دێ گۆھۆرین ل عیراقێ پەیدا بن و پلان وەسا ژی ھاتیە دانان ھەر گۆھۆرینەکا ل عیراقێ بھێتەکرن پشتی سەرەدانا پاپای دێ ھێتە گۆتن ئەگەر سەرەدانا پاپای بوویە، بەلێ د بنەرەتدا پلانا ئەمریکا بوویە و ئەمریکا ڤیایە ب رێیا ھاتنا پاپای ھندەک پلانێن خوە بجە بینیت، ئەڤەژی بۆ سیاسەتا سەرۆکێ ئەمریکی یێ نوو (جۆ بایدن)ی ڤەدگەریت، کو ئەز باوەرم بایدن دخوازیت رەوشا عیراقێ ژلایێ ئابوری و سیاسی ڤە سەقامگیریێ بخوەڤە ببینیت”.

ل دۆر پشکا ھەرێما کوردستانی ژی، دبێژیت” ھەتا رادەکی نیەتەک پەیدا بوویە بۆ رێککەفتنێ ل سەر پشکا ھەرێما کوردستانێ، بەلێ لایەنێن شیعی ژی مەرجێن خوە یێن ھەین ژوان ژی دەربازکرنا قانوونا دادگەھا فیدرالی، بێگومان کۆتلەیێن پەرلەمانێ عیراقێ دشێن بێی کوردان ژی پرۆژێ قانوونا بودجەی دەرباز بکەن و ب زۆرینە بێخن دەنگدانێ، لێ خویایە بابەتێ بودجەی چەند بابەتەکێ ئابوری بیت، دو جار ھند ژی بابەتەکێ سیاسی یە و دەربازکرنا قانوونا بودجەی بێی کوردان دێ پرۆسا سیاسی ل عیراقێ ئالۆزکەت و کورد پشکەکا گرنگن ل عیراقێ، لەوما پشتگوھاڤێتنا کوردان و دەربازکرنا بودجەی بێی کوردان دێ کاریگەریێن خراپ لسەر رەوشا عیراقێ ھەبن”.

ھەولێر، قائید میرۆ

ئێک ژ ئەگەرێن زێدەبوونا لڤینێن چەکدارێن داعشێ ھەبوونا ھاریکاریێ یە ژلایێ خەلکی ڤە و فەرماندەکێ پێشمەرگەی ژی ئاشکراکر، داعش وەک بەرێ نەمایە ل عیراقێ و گەلەک یا لاوازبووی، بەلێ ژبەر ھاریکاریا خەلکەکی بەردەوام داعش دخوازیت لڤینان بکەت ھەروەسا دبێژیت، دناڤا ھێزێن عیراقی دا داعش یا ھەی و چەندین ئەندام و لایەنگرێن داعشێ نوکە دناڤا رێزێن ھێزێن عیراقی دانە.

لیوا حەمە رێگر، فەرماندێ پێشمەرگەی ل کەرکووکێ بۆ رۆژناما ئەڤرۆ گۆت” چەند رۆژەکە چەکدارێن داعشێ ل ھندەک دەڤەرێن عیراقێ دەست ب لڤینان کریە وپتریا وان چەکدارێن داعشێ یێن نوکە کریارێن تیرۆرستی ئەنجام ددەن خەلکێ عیراقێ نە و داعشێن بیانی ژی ماینە، بەلێ قەبارێ وان گەلەک  نینە، دگەل ڤان کریارێن چەکدارێن داعشێ، بەلێ نوکە گروپا تیرۆرستی یا داعشێ چو مەترسیێن وەسا مەزن ل سەر عیراقێ و کوردستانێ نەماینە، چونکە ئەگەر ئەم داعشا دەستپێکێ دگەل نوکە بەراورد بکەین، دێ بۆمە دیار بیت ئەو ھێز نینە وەکو بەرێ بشێت گورزێن کۆژەک دانیت و دەستێ خوە دانیت سەر چ دەڤەرێن عیراقێ، بەلێ بۆ سەلماندنا ھەبوونا خوە ھەر بزاڤان دکەت لڤینان بکەت و بێژیتە خەلکێ عیراقێ ھێشتا ئەم ماینە و دێ ڤەگەریت، ب دیتنا من ئەڤە ژی راست نینە و داعش چو جارەکێ نەشێت وەکی بەرێ بھێز بکەڤیت”.

لیوا حەمە گۆت ژی” ئەگەر ئەم سنورێ پارێزگەھا کەرکووکێ وەکو نموونە وەربگرین تنێ ھژمارەکا چەکدارێن داعشێ ل دەڤەرێن دووری دەست خوە  حەشاردایە وخەلکی د ترسینن، بتایبەتی بۆ وەرگرتنا ھاریکاریان و پەیداکرنا نانی مەفرەزەیێن وان دھێنە دیتن”.

ئاماژەکر” ئەو چەکدارێن داعشێ یێن نوکە ماینە ل عیراقێ زێدەتر ھاریکاریا وان دھێتەکرن ژلایێ خەلکێ ھەڤسۆزێ داعشێ، چونکە پشتی شکەستنا داعشێ، حوکمەتا عیراقێ چەندین ھێز بناڤێن حەشدێ پێک ئیناینە و ھندەک ئەندام و لایەنگرێن داعشێ تێدا ھاتینە تۆمارکرن و ب چەکێ حوکمەتێ و نانێ حوکمەتێ ھاریکاریا چەکدارێن داعشێ دکەن، نەخاسمە دەڤەرێن سونە نشین ھاریکارن دگەل چەکدارێن داعشێ، شاشیا حوکمەتا عیراقێ بۆ ئەگەرێ مانا داعشێ ل ھندەک دەڤەران، ژ بەر کو تۆمارکرن و چەکدارکرنا خەلکەکی زیان گەھاندیە عیراقێ و نەکو خزمەتا رەوشا ئەمنی ناکەن، بەلکو ھاریکارن دگەل تیرۆرستان و نوکە داعشێ خوە ب ھەڤسۆزێن خوە گرتیە”.

ئەڤرۆ:

رێکخراوا چاڤدێریا مافێن مرۆڤان راپۆرتەک ل دۆر رەوشا کوردان ل سووریێ بەلاڤ کر و د راپۆرتێ دا ھاتیە دیار کرن کو ھەتا نھا ل عەفرینێ ٦٠٤ وەلاتیێن کورد ھاتینە کوشتن و ٣٠٠ ھزار کورد ل عەفرینێ کۆچبەر بووینە و چارەنڤیسێ پتر ژ حەفت ھزار کوردێن عەفرینێ ژی دیار نینە و ب گشتی کورد ل سووریێ د رەوشەکا خراب دا دژین.

رێکخراوا چاڤدێریا مافێن مرۆڤی راپۆرتەکا بەرفرەە سەبارەت ب رەوشا کوردان ل سووریێ بەلاڤ کر و د راپۆرتێ دا ھاتیە دیار کرن کو کورد ل رۆژئاڤایێ کوردستانێ و باکورێ سووریێ د رەوشەکا گەلەک خراب دا دژین، چونکو تورکیا وان وەکو تیرۆرست دبینیت و ھێزێن سەر ب تورکیا بەردەوام ھێرشی باژێر و گوندێن کوردان ل باکورێ سووریێ دکەن، د دەمێ ھێرشا تورکیا بۆ سەر عەفرینێ ھەتا نھا ل عەفرینێ ب گشتی ٦٠٤ وەلاتیێن کورد ھاتینە کوشتن، پتر ژ حەفت ھزار وەلاتیێن کورد ھاتینە رەڤاندن و ھەتا نھا ژی چارەنڤیسێ وان دیار نینە و ھەروەسا ب گشتی ٣٠٠ ھزار کورد ل عەفرینێ کۆچبەری دەڤەرێن دی یێن سووریێ و رۆژئاڤایێ کوردستانێ بووینە.

د راپۆرتێ دا ئەو یەک ژی ھاتیە دیار کرن کو د دەمێ شەرێ ل دژی داعشێ دا ژێرخانا ئابووری یا گەلەک دەڤەرێن کوردی ل باکورێ سووریێ وێران بوویە، نھا ژی حوکمەتا سووریێ دڤێت جارەکا دی وان دەڤەران بکەتە ژێر کۆنترۆلا خوە، ئانکۆ ل ئالیەکێ تورکیا، ل ئالیێ دی رژێما سووریێ کار بۆ لاوازکرن و ژناڤبرنا دەستھەلاتا کوردی دکەن، زێدەباری گەفێن داعشێ و ھێرشێن ھێزێن دی یێن کو تورکیا ھاریکاریا وان دکەت، ژ بەر ڤان ھەموو خالان ژی نھا کورد ل باکورێ سووریێ د رەوشەکا گەلەک خراب دا دژین و بارێ ئابووری یێ خەلکی گەلەک خرابە، دۆرپێچەکا مەزن ل سەر دەڤەرێن کوردی ھەیە.

رێکخراوا چاڤدێریا مافێن مرۆڤی ھەروەسا دیار دکەت کو ژ بەر ھێرشێن تورکیا و ھێزێن سەر ب وێ ڤە گەلەک ژێدەرێن ئابووری ل دەڤەرێن کوردی ھاتنە ژاناڤبرن ل عەفرینێ و دەوروبەرێن وێ گەلەک کارگەە ھاتنە ژناڤبرن، ب ھزاران دارێن زەیتوونێ ھاتنە سوتن و ژناڤبرن، تورکیا نھا ژی دڤێت ژێرخانا ئابووری یا دەڤەرێن دی یێن کوردی ل سووریێ ژناڤ ببەت و نەھێلیت کورد خوە برێڤە ببەن، ژ بەر ڤان ھەموو ئەگەران ژی نھا رەوشا ئابووری یا باکورێ سووریێ و دەڤەرێن کوردی گەلەک خرابە و رێژا ھەژاری و بێکاریێ ژی رۆژ ب رۆژێ زێدەتر لێ دھێت.

چاڤدێرێن سیاسی ژی دیار دکەن کو ژ بەر ناکۆکیێن د ناڤبەرا ئەمریکا، روسیا و تورکیا دا رەوشا سووریێ وەسا زوو ئارام نابیت و قەیرانا نھا ل سووریێ دێ بۆ دەمەکێ درێژ بەردەوام بیت، بەردەوامبوونا قەیرانا نھا ل سووریێ ژی بێگومان دێ کارتێکرنا خوە یا خراب ل سەر کوردان ل رۆژئاڤایێ کوردستانێ ژی کەت، ژ بەر ھندێ ژی گرنگە کورد ل باکورێ سووریێ و رۆژئاڤایێ کوردستانێ دەست ب بزاڤەکا مەزن یا دبلۆماسی بکەن و بزاڤا ھندێ بکەن کو پەیوەندیێن خوە ل گەل تورکیا باش بکەن و ھەروەسا باشترە پەیوەندیێن رۆژئاڤایێ کوردستانێ ل گەل ھەرێما کوردستانێ ب ھێزتر لێ بھێت و نابیت کورد ب چو رەنگەکێ خوە ژ ئەمریکا و وەلاتێن دی یێن رۆژئاڤا دوور بکەن، چونکو پشتەڤانیا وان وەلاتان دێ بیتە ئەگەرێ ب ھێزبوونا پێگەھێ کوردان ل سووریێ.

ئەڤرۆ، ھۆشەنگ تاجر:

چالاکڤانێن رۆژھەلاتێ کوردستانێ دیار دکەن کو گرتن و سێدارەدانا چالاکڤانێن مەدەنی و سیاسی ل ئیرانێ و رۆژھەلاتێ کوردستانێ بەردەوامە و دڤێت سنورەک بۆ کریارێن ئیرانێ بھێتە دانان و داخواز ژ جڤاکێ نێڤدەولەتی دکەن کو فشارێن خوە ل سەر ئیرانێ زێدە بکەن.

ئەحمەد وەلی زادە ئەندامێ رێکخراوا مافێن مرۆڤی یا رۆژھەلاتێ کوردستانێ بۆ ئەڤرۆ دیار کر کو نھا ھەموو رۆژەڤ بوویە بابەتێ بەرنامێ ئەتۆمی یێ ئیرانێ لێ مخابن بابەتێ مافێن مرۆڤی و سێدارەدانا چالاکڤانان ژ ئالیێ دەستھەلاتا ئیرانێ ڤە ھاتیە ژبیر کرن، ئەمریکا و وەلاتێن ئێکەتیا ئورۆپا ژ بەر بەرژەوەندیێن خوە بەحسێ کریارێن ئیرانێ ناکەن و د دەمەکێ وەسا دا ھەر رێککەفتنەک ل گەل ئیرانێ بھێتە کرن دێ وەسا کەت کو کۆمارا ئیسلامێ زێدەتر ل ھەمبەر داخوازیێن رەوا یێن خەلکی توند بیت و گۆت: (دڤێت بابەتێ مافێن مرۆڤی، ھەبوونا ئازادیان و ب تایبەتی ژی مافێ پێکھاتێن دی یێن ئیرانێ ژی ببیتە پشکەک ژ بابەتێن دانوستاندنێن ل گەل ئیرانێ، تشتێ ئەمریکا و وەلاتێن ئێکەتیا ئورۆپا دخوازن تنێ د بەرژەوەندیا وان دایە و ئەو ھزرا رەوشا ژیانا وەلاتیان ناکەن، چونکو رەوشەکا گەلەک خراب ل ئیرانێ و رۆژھەلاتێ کوردستانێ ھەیە و دڤێت جڤاکێ نێڤدەولەتی ل ھەمبەر دەستەسەرکرن، سێدارەدان و ئەشکەنجەدانا چالاکڤانێن مەدەنی بێدەنگ نەبیت).

بەھمەن مورادی چالاکڤانێ رۆژھەلاتێ کوردستانێ ژی راگەھاند کو مخابن سیاسەتا ئەمریکا و وەلاتێن ئێکەتیا ئورۆپا د چەندین سالێن بۆری دا وەسا کریە کو دەستھەلاتا کۆمارا ئیسلامی یا ئیرانێ پتر پێگەھێ خوە ب ھێز کریە، رۆژانە ئیران خەلکی ل سێدارە ددەت و ئەمریکا و وەلاتێن ئێکەتیا ئورۆپا بەحسێ وان تشتان ناکەن، ئەو یەک ژی کارتێکرنا خوە یا خراب ل خەلکی کریە و گۆت: (ب ھزاران چالاکڤان، نڤیسەر، رۆژنامەڤان ل زیندان دانە و کەس بەحسێ وان ناکەت، ئازادیا رادەربرینێ ل ئیرانێ نینە و تشتێ ئەمریکا و وەلاتێن ئێکەتیا ئورۆپا ھەتا نھا کرینە تنێ داخۆیانی بوویە و نەرازیبوونا خوە دیار کرینە، ئەو یەک ژی بێگومان نابیتە کارتەکا فشارێ ل دژی ئیرانێ).

ل گۆر دووماھی ئامارا کو ژ ئالیێ رێکخراوا مافێن مرۆڤی یا رۆژھەلاتێ کوردستانێ ھاتیە بەلاڤکرن ژ سەرێ سالێ ھەتا نھا رێژا دەستەسەر کرن و سێدارەدانا چالاکڤانان ب تایبەتی ژی یێن کورد ل گۆر سالا بۆری زێدەتر لێ ھاتیە و د ئاستێ نێڤدەولەتی دا وەکو پێدڤی بەحسێ ھندێ نەھاتیە کرن، چالاکڤانێن ئیرانێ و رۆژھەلاتێ کوردستانێ ژ ھندێ دترسن کو ژ بەر بابەتێ بەرنامێ ئەتۆمی یێ ئیرانێ ھەموو بابەتێن دی بھێنە پشتگوە ھاڤێتن و وی دەمی دێ ئیران د ناڤخوە دا پتر خەلکی بێدەنگ کەت.

website security
WP Facebook Auto Publish Powered By : XYZScripts.com