NO IORG
هه‌لبژارتى2

 
ئەڤرۆ نیوز:

 

 

وەزیرێ پەروەردێ پایامەک بەلاڤکریە و دبێژیت: ب پێدڤی دزانین ب رێیا ڤێ پەیامێ جەختێ ل سەر هندێ بکەین:
. جڤاتا وەزیران ،ب سەرۆکاتیا مەسرور بارزانی و ئامادەبوونا قوباد تالەبانی و ئەندامێن جڤاتا وەزیران پشتی گوتۆبێژکرنا پلانێن وەزارەتا پەروەردێ بریار هاتە دان، کو پێدڤیە قوتابی دلنیابن ژ هندێ کو سالا وان یا خواندنێ نافەوتیت.

 

 

. هەکە کۆنترۆلکرنا ڤایرۆسێ کۆرۆنا یێ رێکێ بدەت، هەموو بزاڤێن مه بۆ هندێ نە کو ل ۲ گولانێ ناڤەندێن خواندنێ ڤەکەین و بۆ ڤێ مەبەستی ژی پلان وخشتێن مە دێ ب ڤی جۆری بیت:
ـ ل ۱۲ گۆلانا ۲۰۲۰ هەتا ۲۱ گۆلانا ۲۰۲۰ ، دێ ئەزموونێن وەرزێ دویێ یێن پۆلا ۱۲ ئامادەیی، ب هەموو پشکێن خوە ڤە هێنە ئەنجام دان.

 

 

ـ ب تنێ بۆ ئەڤ سالا خواندنێ ئەزموونێن نیشتیمانی یێن قۆناغا ۹ بنەرەت ناهێنە ئەنجامدان و ل گەل پۆلێن نە یێن دووماهی دێ ئەزموونان کەن، بەلێ لدووڤ رێنمایان پێدڤیە بۆردێ نمرێن قوتابیان ڤەگەریت بۆ رێڤەبەریا گشتی یا ئەزموونێن وەزارەتێ.
ـ ئەزموواێن وەرزێ دویێ یێن پۆلێن نە دووماهیێ، ب قۆناغا ۹ بنەرەتی ژی، هەروەسا پەیمانگەهـ و خواندنا ئیسلامی ، ل ۱ خزیرانا ۲۰۲۰ دێ دەست پێکەت هەتا ۱۰ خزیرانا ۲۰۲۰.

 

 

ـ ئەزموونێن خولا ئێکێ یێن ئەزموونێن گشتی( ویزاری ) بۆ قۆناغا ۱۲ ئامادەیی ، ب هەموو پشکێن خوەڤە، دێ ل ۲٨ خزیرانا ۲۰۲۰ هەتا ۲۳ / ۷ /۲۰۲۰ هێنە ئەنجام دان، ب رەنگەکێ د حەفتیەکێ دا ب تنێ دێ دو ئەزموون هێنە ئەنجام دان.
ـ ئەزموونێن خولا دویێ یێن قۆناغا 12 ئامادەیی، ب هەموو پشکێن خوە ڤە دێ ل ۱٦ / ٨ / ۲۰۲۰ هەتا ۲٤ / ٨ / ۲۰۲۰ هێنە ئەنجام دان.

 

 

. بۆ هەموو قۆناغان ئەزموون ب تنێ دێ ژ وان بابەتان هێتە ئەنجام دان یێن کو وان خواندین یان یێن هاتینە خواندن ل ناڤا قوتابخانێ، واتە چ بابەتەک بۆ ئەزموونان داخا نابیت، هەکە قوتابیان نەخواندبیت.
. وەزارەتا پەروەردێ، پشتی رەزامەندیا جڤاتا وەزیران، خواندنا ئەلکترۆنی وەک پشتەڤانەک و هاریکاریەک و نە ئیلزامی دێ ل ناڤەراستا هەیڤا چار بۆ قوتابیان فەراهەم کەت، داکو ژ خواندنێ نەهێنە دابرین، هەموو قوتابخانە و پەیمانگەهێن نە حکومی دشێن ب سیستمەمێ ئەلکترۆنی یان ئۆنلاین یێ تایبەت ب خوەڤە ، ب هەمان شێوێ قوتابخانێن حکومی ڤی جۆرێ خواندنی فەراهەم بکەن، هەر قوتابخانەکا نە حکومی یا کو ب سیستەمێ وەزارەتا پەروەردێ دخوینیت ، ب کوردی ، ئینگلیزی ، عەرەبی ، دشێن مفای ژ پرۆسا خواندنا ئەلیکترۆنی یا وەزارەتێ وەربگریت.

 

 

. مامۆستایێن وانەبێژ یێن قوتابخانێن حکومی، کو ب ئەگەرێ بهێنڤەدانا خوە پارێزیێ ل ناڤەندێن خواندنێ ژ وانەگۆتنێ هاتینە دابرین، دێ ل بەرچاڤ وەرگرین و دێ شایستێن وان یێن دارایی د بەردەوام بن.
. پێدڤیە ناڤەندێن خواندنا نە حکومی ، د ڤێ رەوشێ دا پابەندبن ب گرێبەستێن خوە ل گەل مامۆستایێن خوە و شایستێن دارایی وەک د گرێبەستێن وان دا هاتویە بۆ وان خەرج بکەن.

 

 

ئالان حەمە سەعید
وەزیرێ پەروەردێ

ئه‌ڤرۆ نیوز:

یه‌حیا ره‌سول په‌یڤدارێ وه‌زاره‌تا به‌ره‌ڤانیا عیراقێ راگه‌هاند ڤه‌كێشانا هێزێن ئه‌مریكا ژ بنگه‌هێن سه‌ربازی چ كارتێكرن ل سه‌ر ئاسایشا وه‌لاتی نه‌كریه‌، چ حاله‌تێن توشبوونێ ب كورونایێ دناڤ هێزێن سوپایی عیراقێ دا نه‌هاتینه‌ تورماركرن.

په‌یڤداری وه‌زاره‌تا به‌ره‌ڤانیا عیراقێ ئه‌و چه‌نده‌ ژی راگه‌هاند ئه‌و ڤه‌كێشانا هێزێن ئه‌مریكا چ كارتێكرن ل سه‌ر ئاسایشا وه‌لاتی نه‌كریه‌، ب وێ چه‌ندێ سوپایێ عیراقێ ئاخا وه‌لاتی كۆنترۆلكریه‌ و شیان و به‌رهه‌ڤی یێن زۆر كرینه‌ بۆ ژناڤبرنا پاشڤه‌مایێن چه‌كدارێن داعشێ .

یه‌حیا ره‌سول په‌یڤدارێ وه‌زاره‌تا به‌ره‌ڤانیا عیراقێ ل سه‌ر ڤایرۆسێ كورونایی دیاركر تانوكه‌ چ سه‌رباز دناڤ رێزێن سوپایی تووشی كورونای نه‌بوینه‌، رێكارێن دروست ژی هاتینه‌ بكار ئینان، زێده‌باری ئه‌وێ چه‌ندێ كورونایێ كارتێكرن ل سه‌ر پاشڤه‌مایێن چه‌كدارێن داعشێ كر و ژماره‌یا هێرشان كێمكریه‌، ئه‌ڤێ ژی په‌یوه‌ندی ب ئوپراسیونێن پێش وه‌خین عیراقێ ڤه‌ هه‌یه‌.

ئه‌ڤرۆ نیۆز، سالار دۆسكى:

ئه‌ندامه‌كێ په‌رله‌مانێ عیراقێ ژ فراكسیوونا ئێكگرتوویا ئیسلامى یا كوردستانێ، ئاشكراكر كو هه‌كه‌ به‌ربژارێ پوستێ سه‌رۆك وه‌زیرێن عیراقێ یێ نوكه‌ نه‌شیا دماوێ دیاركرى دا حوكمه‌تێ دورست بكه‌ت، سێ بژاردێن دى دێ هێنه‌ پێش، یان دێ بابه‌تێ به‌ربژێره‌كێ نوو هێت، یان شه‌ره‌كێ نافخوه‌، یان كوده‌تا له‌شكه‌رى دێ په‌یدابیت، چنكو كاوادن زێده‌تر نه‌شێن به‌رده‌وام بن و هه‌ر ئالیه‌كێ سیاسى بوویه‌ ته‌فشیێ به‌روكا خوه‌.
د. جه‌مال كوچه‌ر، زێده‌تر بۆ ئه‌ڤرۆ نیۆز گۆت: كوردان و عه‌ره‌بێن سونه‌ گۆتیه‌ به‌ربژێرێ پوستێ سه‌رۆك وه‌زیران، هه‌ره‌ ببه‌ به‌ربژێرێ مالا شیعى، مه‌ هه‌ر دو ئالیان نه‌رازیبوون ل سه‌ر ته‌ نینه‌، چنكو هه‌تا نوكه‌ ئالیێن شیعى ب وى درازینینن و ئه‌ڤه‌ كێشا وى یه‌، لژنه‌ك ژ ئالیێن سیاسى ل كوردستانێ هاتیه‌ دروستكرن و ئالیێن شیعى دزانن كا مه‌رجێن كوردان چنه‌.
هه‌مان ئه‌ندامێ په‌رله‌مانى ئه‌و ژى گۆت: پشتى ڤه‌كێشانا هێزێن ئه‌مریكى ژ عیراقێ، دێ كاودانێن ئێمناهیێ به‌ر ب نه‌باشیێ ڤه‌ چن، چنكو فرۆكێن هه‌فپه‌یمانان نارابن، هه‌كه‌ جاره‌كا دى هه‌فپه‌یمان بزڤرن ژى دێ ب مه‌رج زڤریت و ئێدى به‌غدا نه‌شێت بێژیتێ ده‌ركه‌ڤه‌، ل گه‌ل ده‌ركه‌فتنا هێزێن هه‌فپه‌یمانان كه‌سه‌ك نه‌شێت ئه‌سمانێ عیراقێ ب پارێزیت، ل گه‌ل هندێ دێ كاودانێن ئابوورى پتر تێكچن و دێ ئالووزى دناڤبه‌را ئالیێن سیاسى یا دروست بن.

ئه‌ڤرۆ نیوز:

وه‌زیرێ پترۆلا عیراقێ راگه‌هاند ڤایرۆسێ كورونایێ كۆڤید 19 چ كارتێكرن  نه‌ كریه‌ سه‌ر به‌رهه‌م ئینانا پترۆلێ، ته‌ئكید كر ژی هنارتنا پترۆلێ ب شیوه‌یه‌كی باش برێڤه‌ دچیت و به‌رده‌وامه‌.

سامر غه‌زبان وه‌زیری پترۆلا عیراقێ راگه‌هاند زێده‌باری به‌ربه‌لاڤبوونا ڤایرۆسێ كورونایێ، به‌لێ ده‌رئینانا پترۆلێ ل ته‌ڤایا زه‌ڤیێن پترۆلی به‌رده‌وامه‌ و كار تێدا نه‌ هاتیه‌ راوه‌ستاندن.

وه‌زیرێ پترۆلا عیراقێ ئه‌و چه‌نده‌ ژی دیاركر هنارتنا پترۆلێ ب شیوه‌یه‌كێ باش ل به‌نده‌رێن باشوورێ عیراقی به‌رده‌وامه‌، ژبلی ئه‌وێ چه‌ندێ ژی عومبارێن مه‌زنێن سوته‌مه‌نیێ ژی مه‌ هه‌نه‌.

نوكه‌ عیراق سێ ملیۆن و 600 هزار به‌رمیلێن پترۆلێ رۆژی به‌رهه‌م دئینیت و ره‌وانه‌ی بازارێن جیهانێ دكه‌ت.

ئه‌ڤرۆ نیوز:

وه‌زاره‌تا پترۆلا عیراقێ راگه‌هاند د ده‌مه‌كی دا وه‌زاره‌تا ساخله‌می و ژینگه‌هێ داخازا پێنج ملیۆن دۆلاران كربوو، لێ ئه‌وان حه‌فت ملیۆن دۆلار پێشكیشی ئه‌وێ وه‌زاره‌تێ كرینه‌ ب مه‌به‌ستا به‌رهنگاربوونا ڤایرۆسێ كورونایێ.

عاسم جیهاد په‌یڤدارێ وه‌زاره‌تا پترۆلا عیراقێ راگه‌هاند وه‌زاره‌تا پترۆلێ حه‌فت ملیۆن دۆلار پێشكیشی وه‌زاره‌تا ساخله‌میێ كریه‌ ب مه‌به‌ستا به‌رهنگاربوونا ڤایرۆسێ كورونایێ د ده‌مه‌كی دا به‌ریا نها وه‌زیرێ ساخله‌میێ داخازا پێنج ملیۆن دۆلاران كربوو، دانا ئه‌وی پاره‌یی ب وه‌زاره‌تا ساخله‌میێ د چارچوڤه‌یێ هه‌وه‌كا نیشتمانی بۆ به‌رهنگاربوونا ڤایرۆسێ كورونایێ بوویه‌.

عاسم جیهاد په‌یڤدارێ وه‌زاره‌تا پترۆلا عیراقێ ئه‌و چه‌نده‌ ژی دیاركر كۆ پاره‌ ب سه‌ر چه‌ند جهه‌كان دا پاره‌ڤه‌كرینه‌ كۆ 2.4 ملیۆن دۆلار بۆ هوتێله‌كا تایبه‌ت ب توشبوویێن ڤایرۆسێ كورونایێ، دو ملیۆن دۆلار بۆ پشته‌ڤانیكرنا كه‌رتێ ساخله‌میێ ل پاریزگه‌ها میسان ، دۆ ملیۆن دۆلار بۆ سندوقا پشته‌ڤانیكرنا كه‌رتێ ساخله‌میێ ل پارێزگه‌ها زیقار هاتینه‌ ته‌رخانكرن، ژبلی 200 ملیۆن دینار بۆ پارێزگه‌ها كه‌ركوكێ كۆ 50 ملیۆن دینار بۆ به‌ره‌ڤانیا باژێرێ كه‌ركوكێ.

ئه‌ڤرۆ نیوز:

وه‌زیرێ بازرگانی و پیشه‌سازیێ یا حكومه‌تا هه‌رێما كوردستانێ راگه‌هاند حكومه‌ت برێكا پرۆژه‌یه‌كی دێ خوارنێ بۆ خێزانێن كێم ده‌ر‌امه‌ت دابین كه‌ت، كۆ ب ئه‌گه‌رێ قه‌ده‌غه‌یا هاتنوچونێ ژین و ژیارا وان ل سه‌ر كارێ رۆژانه‌ بوو.

كه‌مال مسلم وه‌زیرێ بازرگانی و پیشه‌سازیێ یا حكومه‌تا هه‌رێما كوردستانێ راگه‌هاند: حكومه‌تا ب رێكا پرۆژه‌یه‌كی دێ خوارنێ بۆ خێزانێن كێم ده‌ره‌امه‌ت دابین كه‌ت، كۆ ب ئه‌گه‌رێ قه‌ده‌غه‌یا هاتنوچونێ  ژیانا وان ل سه‌ر كارێ رۆژانه‌ بوویه‌، دێ ئه‌وی پرۆژه‌ی‌  ئیخنه‌ ته‌نده‌ری دا و ل گه‌ل چه‌ند كۆمپانیه‌كان ژی مه‌ ئاخڤتیه‌.

وه‌زیرێ بازرگانی و پیشه‌سازیا حكومه‌تا هه‌رێما كوردستانێ ئه‌و چه‌نده‌ ژی راگه‌هاند: 30 هزار ته‌نێن برنج و شه‌ش ملیۆن زه‌یت چه‌ندین ته‌نین نیسك و نوكان دێ هێنه‌ كرین و برێكا ئه‌ڤی به‌رنامه‌یی پارڤه‌كه‌ین ل سه‌ر وه‌لاتیێن كێم ده‌رامه‌ت، مه‌رجێ پرۆژه‌یی ئه‌وه‌ كو خوارن ژ ده‌ره‌ بهێته‌كرین نه‌ك ل ناڤخۆ بكرن داكۆ بازار ل ناڤخۆ ب خوارنێ كێم نه‌بیت.

ناڤبری دیاركر پشكا هه‌یڤانه‌ یا ئاهێن خوارنێ دێ به‌رده‌وام بیت نوكه‌ ده‌ست ب پارڤه‌كرنا پشكا هه‌یڤه‌كا دی هاتیه‌كرن.

ئه‌ڤرۆ نیوز:

ریڤه‌به‌رێ ناحیا خه‌لیفان راگه‌هاند باژێركێ خه‌لیفان دێ هێته‌‌ كه‌ره‌نتینه‌كرن ئه‌و ژی پشتی تووماركرنا شه‌ش حاله‌تێن كورونایێ ل ئه‌ڤێ ناحیێ.

كاروان كه‌ریم خان رێڤه‌به‌رێ ناحیا خه‌لیفان راگه‌هاند ل گه‌ل قائیمقامیا قه‌زا سوران و لایه‌نێن په‌یوه‌ندیدار مژوولی دانان و چه‌وانیا بجهكرنا بریارا كه‌ره‌نتینه‌كرنا ناحیا خه‌لیفان داینه‌ و بكار ئینانا رێكارێن پێدڤی.

 

 

 

ئەڤرۆ نیوز:

 

 

ئه‌ڤرو ئێڤارى 29-3-2020 فه‌رهاد ئه‌مین ئه‌تروشى پارێزگه‌رێ دهۆكێ و ب ئاماده‌بوونا د.نزار عسمەت رێڤه‌به‌رێ گشتى یێ ساخله‌میا پارێزگه‌ها دهۆکێ و زكرى به‌شیر خودانێ كومپانیا كاڤین گروپ نه‌خوشخانا كاڤین یا گومانێلكریێن ڤایروسێ كورونا ڤه‌كر.

 

پارێزگا‌رێ دهوكێ گه‌ریانه‌ك لناڤ ژوور وكارگێریا نه‌خوشخانێ كر و ژنێزیك سه‌حكره‌ به‌رهه‌ڤیا نه‌خوشخانێ بۆ پێشوازیكرنا گومانلێكریێن ڤایروسێ كۆرۆنا.
پارێزگا‌رێ دهوكێ ده‌ست خوشى وسوپاسیا وه‌به‌رهێنه‌ر و خێرخواز زكرى به‌شیر كر ل دور ڤێ ده‌ست پێشخه‌ریێ كو ئه‌ڤ نه‌خوشخانه‌ خستیه‌ دخزمه‌تا ساخله‌میێ دا.

هه‌روه‌سا سوپاسیا هه‌موو سه‌رمایه‌دار وخێر خوازا تایبه‌تى ده‌زگه‌هێ وه‌به‌رهێنانێ یێ پارتى كر كو وه‌كو خو به‌خش هه‌ڤكارى ل گه‌ل ژوورا ئوپه‌راسیونا كرییه‌ بۆ هاریكاریكرنا نه‌خوشێن ڤایروسێ كۆرۆنا و سوپاسیا وان خێر خواز و سازیان ژى كر یێن هاریكاریا ده‌ست كورتێن پارێزگه‌هێ كرین و سوپاسیا خه‌لكێ پارێزگه‌هێ كر كو هه‌تا نوكه‌ زور دهاریكار بووینه‌ ل گه‌ل ژوورا عه‌مه‌لیاتا بۆ بجهئینانا رێنما و بریارێن حكومه‌تا كوردستانێ و ژوورا ئوپه‌راسیونا، داخواز ژ خه‌لكێ پارێزگه‌هێ كر كو پتر د هشیار و هاریكار بن ل گه‌ل لایه‌نێن په‌یوه‌ندیدار ژبۆ بجهئینانا هه‌موو رێنما و بریارێن حوکمه‌تا كوردستانێ و ژوورا عه‌مه‌لیاتا بۆ وێ یه‌كێ ئه‌ڤ نه‌خوشیه‌ ژ هه‌موو خه‌لكێ پارێزگه‌هێ بهێته‌ دووركرن.
هه‌روه‌سا سوپاسیا تیمێن ساخله‌میێ و؛ده‌زگه‌هێن ئێمناهیێ كر كو پلانا ژوورا ئوپه‌راسیونا یا به‌رهنگاربوونا ڤایروسێ كۆرۆنا ب ره‌نگه‌كێ رێك و پێك بجهـ دئینن.

 

 

پارێزگا‌رێ دهۆكێ گوت ژی: ئه‌م داخوازا لێبورینێ ژ هه‌موو خه‌لكێ پارێزگه‌هێ دكه‌ین كو ژ سه‌ر كار و كاسبكاریا رۆژانه‌ هاتینه‌ دووركرن و زه‌ره‌رمه‌ند بووینه‌، لێ ئه‌ڤ بریاره‌ هه‌موو ژبۆ به‌رژه‌وه‌ندیا گشتى بووینه‌ كو خه‌لكێ مه‌ ژ ڤایروسێ كۆرۆنا بهێنه‌ پاراستن و،ئه‌م یێ كار دكه‌ین كو وه‌جبه‌كا ئاهێن خوارنێ یا بله‌ز ل سه‌ر هه‌موو خه‌لكێ پارێزگه‌هێ به‌لاڤكه‌ین، هه‌روه‌سا ده‌زگه‌هێ خێر خوازێ بارزانى ژى (50) هزار به‌هرە ئاماده‌ كرینه‌ ل سه‌ر خه‌لكێ هه‌موو پارێزگه‌هێ ب هه‌موو قه‌زا ڤه‌ به‌لاڤكه‌ت.

 

گۆت ژی: مه‌ هزر ل هه‌موو تشته‌كێ كریه‌ كو د به‌رژه‌وه‌ندا خه‌لكێ مه‌ دابن و رۆژانه‌ كومبوونێن به‌رده‌وام دهێنه‌ سازكرن و هه‌موو بابه‌تێن گرێداى ب ره‌وشا وه‌لاتیان ڤه‌ دهێنه‌ به‌حسكرن و دڤێت ئه‌م خوە ب پارێزین دا ئه‌ڤ په‌تایه‌ بهێته‌ دووركرن.

ژلایێ خوڤه‌ رێڤه‌به‌رێ گشتى یێ ساخله‌میا دهۆکێ د. نزار عسمەتی گۆت: ڤەکرنا ڤێ نه‌خۆشخانێ دێ بیته‌ هاریكار بۆ حه‌واندنا گومانلێكریێن نه‌خۆشیا ڤایروسێ كۆرۆنا و هه‌ر گومانلێكریه‌ك ژ 24- 48 ده‌م ژمێرا دێ ل ڤێ نه‌خوشخانێ مینیت هه‌تا ئه‌نجامێن پشكنینێ بۆ ده‌ردكه‌ڤن، هه‌روه‌سا بارێ نه‌خوشخانێن دى دێ هێته‌ سڤكرن و سوپاسیا خێرخواز زكرى به‌شیری كر بۆ ئاڤاكرنا ڤێ نه‌خوشخانێ وته‌رخانكرنا جهێن دى بۆ كه‌ره‌نتیكرنا وه‌لاتیان.

 

 

سه‌رپه‌رشتێ ئاڤاكرنا نه‌خوشخانێ ئه‌ندازیار كامیران عەبدوللا گوت: ئەڤ نه‌خوشخانه‌ ژ ( 45) ته‌ختان پێك دهێت و هه‌موو پێدڤیێن نۆشدارى وه‌كو ته‌خت و ته‌له‌فزیون و هێلا ئنترنێتێ و یه‌كه‌یێن كارگێرى دناڤدا هه‌نه‌ پرۆژه‌ دماوێ 7 هه‌تا نه‌هـ رۆژان دا هاتیه‌ دورستكرن.

ئەڤرۆ نیۆز، قائید میرۆ:

ب ئەگەرێ بەلافبوونا ڤایرۆسا کورونا چەندین بڕیارێن گرنگ ل ھەرێما کوردستانێ ھاتینە بەلاڤکرن و بسپۆرەکێ دەروونی ژی ئاشکراکر، وەلاتیێن پێگریێ ب رێنمایان دکەن کێمتر مەترسیا کورونایێ لسەرە.

دکتۆر کەریم قەرەچەتانی، بسپۆرێ دەروونی بۆ ئەڤرۆ نیۆز دیارکر” راستە بەلاڤبوونا ڤایرۆسا کورونا مەترسی بۆسەر ژیانا مرۆڤان ل سەرانسەری جیھانێ پەیداکریە، بەلێ ژلایێ زانستێ دەروونی ڤە نابیت مرۆڤ ھند خوە بترسینیت ئەڤە نەک تنێ بۆ ڤایرۆسا کورونا بەلکۆ بۆ ھەموو نەساخیێن دیژی راستە، ژبەرکو ترسا بێ سنور بخوە دبیتە ئەگەرێ پەیداکرنا چەندین نەساخیان د لەشێ مرۆڤی دا، ئەز نابێژم بلا کەس نەترسیت، بەلێ ھندەک ترسیانا زۆرژی بخوە نەساخیە.

ئەڤی بسپۆرێ دەروونی گۆت” دەزگەھێن راگەھاندنێ و تۆڕێن کۆمەلایەتی رۆلەکێ بەرچاف ھەیە ل بەلافکرنا ترسێ دناڤا جڤاکی دا و نابیت ب چو شێوەیەکی ھەموو کەس لدۆر ڤایرۆسا کۆرۆنایێ زانیاریان بەلاف بکەن، چونکە ژ قەبارێ خوە زێدەتر دھێتە مەزنکرن، بەرۆڤاژی وەک خوە ب ھشیاری سەرەدەری دگەل کۆرۆنایێ بھێتەکرن، بۆ نموونە بابەتێ ڤایرۆسا کۆرۆنایێ ھند یێ مەترسی نینە ھندی ئەم وەک مەترسی دبینین، ل حەفتیا بۆری د ئێک دەقیقەکێ کەسەکی ل سلێمانیێ چوار ئەندامێن خێزانا خوە کوشتن، ئەڤە ھەیڤەکە ڤایرۆسا کۆرۆنا لھەرێما کوردستانێ ھەیە و تنێ دو کەس ب کۆرۆنایێ گیانێ خوە ژدەستدایە.

دکتۆر کەریم قەرەچەتانی ئەویەکژی ئاشکراکر” شیرەتا من بۆ وەلاتیان ئەڤە گڤاشتنێن زۆر نە ئێخن سەر مەژیێ خوە، زێدەتر بزاڤان بکەن رێنمایێن ساخلەمیێ بجە بینن و گوھێ خوە بدەن کەسێن بسپۆر و شارەزا، ژبەرکو دوماھیێ تنێ ئەو دێ مفادار و پاراستی بن یێن پێگریێ ب رێنمایان دکەن، کێمتر ڤایرۆسا کۆرۆنا مەترسی لسەر وان ھەیە.

 
ئەڤرۆ نیوز:

 

وەزارەتا ساخلەمیا حکومەتا هەرێما کوردستانێ داخوازێ ژ وەلاتیان دکەت، ئەوێن وەلاتیێن ژ 01/03 هەتا 14/03 ژ ئورۆپا ڤەگەریاین، ب لەز پەیوەندیێ ب ژمارە 122 بکەن.
دەقێ بانگەوازیێ.

 

دلنیایێ ددەت، کو ب تنێ دێ پشکنین بۆ وان کەسان هێتە کرن.

 

بۆ هەموو وان وەلاتیێن ژ وەلاتێن ئورۆپا ژ 3/1 هەتا 3/14 ڤەگەریاین، بۆ بەرژەوەندیا خوە و خێزانێن خوە و وەلاتیێن کوردستانێ، ب لەز پەیوەندیێ ب ژمارە 122 بکەن، یان سەرەدانا سەنتەرێن کۆڕۆنا یێ ل ناڤا باژێر و قەزا و ناحیان بکەن بۆ پشکنینا تاقیگەهێ بۆ ڤایرۆسل کۆڕۆنا، ژ بۆ دلنیابوونێ ژ هەبوون و نەبوونا ڤایرۆسێ کۆڕۆنا یێ، ئەم هەوە دلنیا دکەین، ب تنێ دێ نموونا پشکنینێ هێتە وەردەگرتن بۆ بەرژەوەندیا وان.

website security
WP Facebook Auto Publish Powered By : XYZScripts.com