NO IORG
نووترين نووچه
هه‌لبژارتى3

ئه‌ڤرۆ، عه‌زیز هه‌ورامی:

بریاره‌ ل چه‌ند رۆژێن داهاتیدا ل سه‌ر ده‌ستپێشخه‌ریا نێچیرڤان بارزانی، سه‌رۆكێ هه‌رێما كوردستانێ، ل باره‌گایێ سه‌رۆكایه‌تیا هه‌رێمێ كۆمبوونا لایه‌نێن سیاسی بهێته‌ ئه‌نجامدان، سیاسه‌تمه‌داره‌كێ كورد ژی دبێژیت، ده‌ستپێشخه‌ریا سه‌رۆكێ هه‌رێمێ یا گرنگه‌ و پێدڤیه‌ حزب و لایه‌نێن سیاسی ئاخڤتنا راشكاوانه‌ بكه‌ن ، كێشان چاره‌سه‌ر بكه‌ن،  ژبه‌ركو چاڤێ كوردان یێ ل وان.

د. مه‌حموود عوسمان، سیاسه‌تمه‌دارێ كورد بۆ رۆژناما ئه‌ڤرۆ گۆت” گرنگه‌ لایه‌نێن سیاسی یێن هه‌رێما كوردستانێ كۆمبن ژ به‌ركو ئه‌ڤه‌ ده‌مێ ساله‌كێ كۆم نه‌بووینه‌، كۆم نه‌بوون ژی هه‌ست نه‌كرنه‌ ب به‌رپرسیاره‌تیێ ل به‌رامبه‌ر خه‌لكێ خوه‌، ده‌مێ ئه‌ڤ لایه‌نه‌ به‌حسێ ملله‌تی دكه‌ن، پێدڤیه‌  ل گه‌ل هه‌ڤدو رونن  ب راشكاوی ل سه‌ر كێشان باخڤن”.

سه‌رۆكێ هه‌رێما كوردستانێ د ده‌ستپێشخه‌ریه‌كا نوو دا داخوازا كۆمبوونا لایه‌نێن سیاسی كریه‌ ل سه‌رۆكایه‌تیا هه‌رێما كوردستانێ، مه‌حموود عوسمان ل دۆر ڤێ چه‌ندێ دبێژیت” دڤێت لایه‌نێن سیاسی به‌ر ب ده‌ستپێشخه‌ریا سه‌رۆكێ هه‌رێمێ بچن و كۆمبن، ده‌ستپێشخه‌ریه‌كا باشه‌ ژ لایێ سه‌رۆكێ هه‌رێمێ ڤه‌، ژ به‌ركو سه‌رۆكایه‌تیا هه‌رێمێ چه‌تره‌كه‌ كو هه‌موویان كۆم دكه‌ت”.

خویاكر ژی” ئه‌گه‌ر لایه‌نێن سیاسی بۆ كوردان كاردكه‌ن، به‌رژه‌وه‌ندیا خه‌لكێ كورد د وێ چه‌ندێ دایه‌ ئه‌و لایه‌نه‌ كۆمبن و به‌ره‌یه‌كی دروست بكه‌ن كو هه‌ڤشێوێ به‌ره‌یێ كوردستانی بیت ئه‌وێ ل ده‌مێ سه‌رهلدانێ هه‌ی، ب دیتنا من ئێكگرتن سه‌ركه‌فتنێ ب ده‌ستڤه‌ دئینیت، ئه‌و كێشێن نوكه‌ مه‌ ل گه‌ل به‌غدا هه‌ین، كێشێن سیاسی نه‌، نه‌كو كێشا بودجه‌یه‌، ئه‌ڤه‌ 18 سال پشتی ژناڤچوونا رژێما سه‌دامی بۆرین، به‌لێ هه‌ر كێشه‌ د به‌رده‌وامن، پێدڤیه‌ شانده‌كێ بلند یێ سیاسی بهێته‌ پێكئینان و ل گه‌ل به‌غدا ل سه‌ر پرسان ب تایبه‌تی چاره‌نڤیسێ گه‌لێ مه‌ دانوستاندنان بكه‌ت”.

ل هه‌یڤا نیسانا سالا بۆری ل سه‌ر داخوازا سه‌رۆكێ هه‌رێمێ كۆمبوونا لایه‌نێن سیاسی و پاشی كۆمبوونا هه‌رسێ سه‌رۆكایه‌تیێن هه‌رێمێ و كۆمبوونا فراكسیۆنێن كوردستانی ل به‌غدا هاته‌ ئه‌نجامدان و كۆده‌نگیه‌كا باش یا ناڤخوه‌یی لێ دیار بوو، ل جه‌ژنا نه‌ورۆزا ئه‌ڤ ساله‌ ژی سه‌رۆكێ هه‌رێمێ راگه‌هاندبوو، پشتی جه‌ژنا نه‌ورۆزێ دێ كۆمبوونا لایه‌نێن سیاسی ل سه‌رۆكایه‌تیا هه‌رێما كوردستانێ هێته‌ ئه‌نجامدان.

ئه‌ڤرۆ:

سه‌رۆكا فراكسیۆنا پارتی دیموكراتی كوردستان ل جڤاتا نوونه‌رێن عیراقێ راگه‌هاند، مه‌ رێگری ل مه‌ترسیه‌كا مه‌زن دناڤ بودجه‌ی دا كر كو ب نیاز بوون ئه‌رد بهێته‌ فرۆتن و ئه‌ڤ چه‌نده‌ ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ ژی ڤه‌گریت، به‌لێ مه‌ شیا برگه‌كێ زێده‌ بكه‌ین كو ئه‌و بابه‌ت ده‌ڤه‌رێن كوردستانی نه‌ ڤه‌گریت، ئه‌ڤه‌ ژی گاڤه‌كا ئه‌رێنی و باشه‌.

ڤیان سه‌بری، سه‌رۆكا فراكسیۆنا پارتی دیموكراتی كوردستان ل جڤاتا نوونه‌رێن عیراقێ، گۆت” د پرۆژێ قانوونا بودجێ گشتیێ عیراقێ بۆ سالا 2021 دا، مادا 41 تایبه‌ت كربوو ب فرۆتنا ئه‌ردی كو ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ ژی ڤه‌دگرت و نوكه‌ ژی ئه‌و ده‌ڤه‌رێن كوردستانی یێن دبن ده‌ستێ حه‌شدا شه‌عبی دا و ئه‌ردێ وان ده‌ڤه‌ران دا حه‌شد بۆ خوه‌ فرۆشیت، له‌وما مه‌ وه‌كو فراكسیۆنا پارتی برگه‌یه‌ك ل سه‌ر وێ مادێ زێده‌كر كو پێدڤیه‌ فرۆتنا ئه‌ردی، ده‌ڤه‌رێن كوردستانێ ڤه‌نه‌گریت”.

ڤیانێ گۆت ژی” ئه‌م د رژد بووین ل سه‌ر وێ چه‌ندێ كو ده‌نگ ب مادێ 41 نه‌ده‌ین هه‌تا ئه‌و برگه‌یه‌ نه‌هێته‌ زێده‌كرن و ل ده‌ستپێكێ ده‌نگدان ل سه‌ر وێ مادێ هاته‌ پاشخستن، به‌لێ ل دووماهیێ برگه‌یه‌ مه‌ هاته‌ زێده‌كرن و ده‌نگ ل سه‌ر هاته‌ دان، كو  نابیت ده‌ستكاری د ئه‌ردێ سنوورێ مادێ 140 یێ دستووری بهێته‌ كرن هه‌تا ئه‌و ماده‌ دهێته‌ په‌سه‌ندكرن”.

خویاكر” رێ ب هیچ بزاڤه‌كێ ناده‌ین دژی ده‌ڤه‌رێن كوردستانی بیت و هه‌ر تشته‌كێ مه‌ترسی بیت ل سه‌ر وان ده‌ڤه‌ران، دێ رێگریێ لێ كه‌ین و ب هه‌موو شێوه‌كی دێ پشته‌ڤانیێ ل ده‌ڤه‌رێن كوردستانی یێن ده‌رڤه‌ی ئیدارا هه‌رێمێ كه‌ین”.

ڤیانێ ئاشكراكر ژی كو ئه‌و ماده‌یه‌ ب مه‌ره‌م هاتبوو دانان، بۆ وێ چه‌ندێ ئه‌رد ل ده‌ڤه‌رێن كوردستانی بهێته‌ فرۆتن، به‌لێ خوه‌شبه‌ختانه‌ مه‌ شیا رێگریێ ل وێ بزاڤێ بكه‌ین”.

ھەولێر، قائید میرۆ:
وەزارەتا کارەبێ بۆ باشترکرنا رەوشا کارەبێ و کۆنتڕۆلکرنا ئەو کارەبا دھێتە بەرھەمئینان بڕیارە چەندین پلانان بجە بینیت و پەیڤدارێ وەزارەتا کارەبێ ژی ئاشکرا کر، کرێیا کارەبێ ل گورەی پیڤەرێ زیرەک دێ ھێتە ھژمارتن و کارەب ژی ژلایێ کەرتێ تایبەت ڤە دێ ھێتە برێڤەبرن.
ئەندازیار ئومێد ئەحمەد، پەیڤدارێ وەزارەتا کارەبێ بۆ رۆژناما ئەڤرۆ دیار کر، وەزارەتا کارەبێ پلانا دانا کارەبا نشتیمانی بۆ کەرتێ تایبەت بەرھەڤکریە و بڕیارە د ئەڤ سالە دا کارەبا نشتیمانی ژلایێ کەرتێ تایبەت ڤە بھێتە برێڤەبرن و گۆت: “مەرەم ژ ئەڤێ پێنگاڤێ باشترکرنا رەوشا کارەبێیە ل ھەرێما کوردستانێ، چونکو دێ کارەب ئیدی ب سیستەمەکێ نوو ھێتە برێڤەبرن و مینا زۆر وەلاتێن جیھانێ ژلایێ کەرتێ تایبەت ڤە دێ ئیدارەیا بەلاڤکرنا کارەبێ ھێتەکرن”.
ل دۆر سیستەمێ زیرەک ژی ئەندازیار ئومێد ئەحمەد گوت: “پڕۆسا گرێدانا پیڤەرێ زیرەک یا بەردەوامە و ھەتا نوکە پیڤەرێ زیرەک بۆ ٦٠٠ ھزار ھەڤپشکێن کارەبێ ھاتیە دانان و بڕیارە ل ھەموو ھەرێما کوردستانێ بھێتە ب جھئینان، کو ل گورەی بڕیارەکا وەزارەتێ ئێدی کرێیا کارەبێ ژی دێ ب رێیا پیڤەرێ زیرەک ھێتە وەرگرتن، ئانکو ڤەخواندنا کرێیا کارەبێ ل سەر پیڤەرێ مالان نابیت، بەلکو دێ ل سەر پیڤەرێ زیرەک ھێتە ڤەخواندن و پسۆلا کرێیا کارەبێ ل گورەی پیڤەرێ زیرەک بۆ وەلاتیان دێ ھێتە دەرکرن، کو ئەڤە ژی دێ بیتە ئەگەرەک بۆ کۆنتڕۆلکرنا رەوشا کۆمکرنا کرێیا کارەبێ و گازندە و ئاریشێن بەرێ ھەین نامینن”.

 

ئەڤرۆ:

رۆژناما (مەدا) یا عیراقی راپۆرتەک ل دۆر مەسیحیێن پارێزگەھا نەینەوا بەلاڤکر و تێدا ئاشکراکر کو ھندەک کەس ولایەن ل مووسلێ یێن ھەین ل ھیڤیا ب دووماھی ھاتنا رێورەسمێن سەرەدانا پاپایێ فاتیکانێ بۆ مووسلێ نە تاکو بزڤرن بۆ دەست ب سەرداگرتنا ئەردێ مەسیحیان و فرۆتنا خانیێن وان ل وی باژێری. دیارکر ژی کو گرۆپێن چەکدار یێن شیاین ھەتا نوکە ١٠ ھزار تاپۆیێن مۆلکێن عراقیان ل مووسلێ سەختە بکەن کو گەلەک ژ وان یێن مەسیحیان بوون.

ل دووڤ وێ راپۆرتێ، ھژمارا وەلاتیێن مەسیحی ل عیراقێ پشتی سالا ٢٠٠٣ بۆ ٥٠% کێمبوویە کو ژ ھینگێ وھەتا نوکە ١٢٠٠ وەلاتیێن مەسیحی ل عیراقێ ھاتینە کو ٧٠٠ کەس ژوان ژبەر ناسنامێ ھاتینە کوشتن.

وێ رۆژنامێ پشت بەستن ب ژێدەرێن ئاگەھدار ل مووسلێ بەلاڤکر کو ھندەک گرۆپێن چەکدار ل مووسلێ تاپۆیێن خەلکێ وێ باژێری سەختە دکەن، و ھەتا نوکە نێزیکی ١٠ ھزار تابۆیان، کو نیڤەکا وان یا وەلاتیێن مەسیحی یە یێن سەختە کرین”.

جێگرێ پارێزگارێ نەینەوا (حەسەن عەلاف) بەری نوکە راگەھاندبوو” ھندەک گرۆپ و حزب بووینە ئەگەرێ بەرزەبوونا پێنج ھزار دونەمێن ئەردێ حکومی ل مووسل، ژ ئەگەرێ سەختەکاریێ”.

رۆژناما (مەدا) ژ زاردەڤێ ھندەک لایەنێن مەسیحی ڤەگوھاست”بەرێ پەیدابوونا داعشێ ل ھاڤینا ٢٠١٤، نێزیکی ٢٠٠ ھزار وەلاتیێن مەسیحی ل مووسلێ و دەشتا نەینەوا ھەبوون، بەلێ د نوکە دا ھژمارا وەلاتیێن مەسیحی ل مووسلێ تنێ ٢٥ ھزار کەسن”.

رێکخستیا داعش یا تیرۆرستی ١٢٢٣ خانی ل دەشتا نەینەوا ژناڤبرن کو پتریا وان یێن وەلاتیێن مەسیحی بوون، ھەروەسا ٢٠ دێر ژ سەرجەمێ ٣٠ دێران ل پارێزگەھا نەینەوا ژناڤبربوون کو ژیێ ھندەک ژ وان دێران ھزار و ٥٠٠ سال بوون.

ل دووڤ وان لایەنان، ٨٠٠ ھزار وەلاتیێن مەسیحی عیراق بجە ھێلایە و ھژمارا مەسیحیان بەری سالا ٢٠٠٣ د گەھشتە ملیۆنەک و ٤٠٠ ھزار کەسان.

پشتی ئازادکرنا پارێزگەھا نەینەوا ژ داعشێ، ھژمارا مەسیحیان بەر ب زێدەبوونێ چو و گەھشتە ٥٠ ھزار کەسان، بەلێ دوبارە وێ ھژمارا وان ل کێمبوونێ دا ژبەر گەفێن میلیشیان و ھندەک لایەن وێ ئەو چەندا ل پارێزگەھا نەینەوا دھێتە روودان ب کارەکێ رێکخستی د ھەژمێرن ب مەرەما نەچارکرنا مەسیحیان و پێکھاتێن دی بۆ چۆلکرنا دەڤەرێن خوە ل پارێزگەھا نەینەوا و فرۆتنا خانیێن خوە بۆ ھندەک لایەنێن دیارکری”. بێ کو ناڤێ وان لایەنان بینن، وەکو ئاماژەک بۆ میلیشیێن شیعی.

ب، سەرجان مەحمود:

زێدەتر ژ ١٨٠ ئەندامێن جڤاتا نوونەرێن ئەمریکا نامەکا ھەڤپشک ژ بۆ دەستھەلاتا بایدن شاندن و تێدا داخواز ژ حوکمەتا بایدنی کرن کو ل ھەمبەر رەجەب تەیب ئەردۆگانێ سەرۆک کۆمارێ تورکیا ھەلویستێن جدی وەربگریت و ئەردۆگان ل ھەمبەر بنپێکرنێن مافێن مرۆڤی و نەمانا دیموکراسیێ ل تورکیا وەک بەرپرس بھێتە قەبوول کرن و ل ھەمبەر وی بریارێن جدی بھێنە وەرگرتن.

د ناما ئەندامێن جڤاتا نوونەران دا ھەروەسا ب گشتی ژ دەستھەلاتا بایدن و ب تایبەت ژ ئانتۆنی بلینکن وەزیرێ دەرڤە یێ ئەمریکا دھێتە خوا‌ستن کو ل ھەمبەر ئەردۆگانی دەست ب بزاڤێن پێدڤی بھێتە کرن و د نامێ دا دھێتە دیار کرن کو ئەردۆگان ئەڤ ٢٠ سالن ل دەستھەلاتێ یە و د ناڤا ڤان ٢٠ سالێن بۆری دا دادگەە لاواز کرینە و دادوەر وەک کارمەندێن وی کار دکەن و ئەندامێن پارتا خوە د ھەموو دەزگەھێن ستراتیژی دا بجە کریە و ھەر کەسێ دژبەریا ئەردۆگانی بکەت دھێتە گرتن و ب رەنگەکێ پیلانکری ل دژی ئۆپۆزسیۆنێ سیاسەتا زۆرداریێ دمەشینیت و د رەوشا نھا دا ب سەدان رۆژنامەڤان و نوونەرێن پێکھاتێن جودا جودا یێن تورکیا ھاتینە زیندان کرن و ئەردۆگان ب رەنگەکێ سیستەماتیک د ناڤ جڤاکێن تورکیا دا سیاسەتا پارچەکرنێ و توندوتیژیێ برێڤە دبەت.

د دووماھیا ناما بۆ حوکمەتا بایدنی دا ئەندامێن جڤاتا نوونەران ددەنە دیار کرن ژی کو د سیاسەتا دەرڤە یا ئەمریکا ل ھەمبەر تورکیا دا دڤێت ئەڤ راستی بھێنە دیار کرن و ھەڤپەیمانیا تورکیا ل گەل ئەمریکا ب مەرجێن باشکرنا رەوشا مافێن مرۆڤی، بلند کرنا ئاستێ دیموکراسیێ و سەرخوەبوونا دادگەە و دادوەران ڤە بھێتە گرێدان و ھەر دەمێ تورکیا د ڤان خالان دا رەوش باش کر وی دەمی تورکیا وەک ھەڤپەیمان بھێتە دیتن.

ئەو یەک د دەمەکێ دایە کو حەفتیا بۆری ژی ٥٤ ئەندامێن کۆنگرێسێ ئەمریکا نامەکا تایبەت بۆ سەرۆک بایدن شاندبوون و تێدا دیار کربون کو د ڤان سالێن دووماھیێ دا و د دەمێ دەستھەلاتا ئەردۆگانی دا نێزیکی سەد ھزار مرۆڤ ژ بەر ناسنامە، ھزر و کارێن خوە یێن سیاسی ھاتینە گرتن و ژ زێدەتر ژ ھزار سازیێن جڤاکێ سڤیل ھاتینە داخستن و رەوشا مافێن مرۆڤی گەلەک خراب بوویە،‌ سەرکردە و کەسێن ھەلبژارتی یێن ئۆپۆزسیۆنێ ھاتینە گرتن و ئەردۆگان ب گشتی سیاسەتا تاکەکەسی ل ھەمبەر ئۆپۆزسیۆنێ دمەشینیت و د ڤێ مژارێ دا ژ جۆ بایدن خوا‌ستبوون کو دڤێت سەرۆک بایدن ل ھەمبەر کریارێن ئەردۆگانی و دەستھەلاتا وی بێدەنگ نەمینیت و ھەلویستەکێ توند نیشا بدەت.

ئەڤرۆ:

ھەڤسەرۆکێ بەرێ یێ پارتا دیموکراتی یا گەلان کو نھا ل زیندانێ دایە راگەھاند کو چو بەرنامێن دەولەتا تورکیا بۆ ئاشتیێ نینن و ئەردۆگانی دڤێت ب رێیا شەری ژیێ دەستھەلاتا خوە درێژ بکەت، دڤێت ھێزێن ئۆپۆزسیۆنێ پێکڤە ل سەر پرۆژەکێ گشتی کار بکەن کو ئەو یەک د بەرژەوەندیا ھەموو گەلێن تورکیا دا بیت.

سەلاحەدین دەمیرتاش ھەڤسەرۆکێ بەرێ یێ ھەدەپێ کو ژ سالا ٢٠١٦ ھەتا نھا ل زیندانێ دایە د داخۆیانیەکێ دا بۆ ئاژانسا میدیا سکۆپ راگەھاند کو مخابن دەستھەلاتا نھا دڤێت ب رێیا شەری ژیێ خوە درێژ بکەت، یێن کو بەحسێ ئاشتی و چارەسەریێ دکەن ھەموو د زیندانان دانە و بزاڤێن بۆ ئاشتێ و چارەسەریێ ژی وەکو خیانەت دھێنە دیتن و دەستھەلاتێ نەڤێت چو کەسەک بۆ ئاشتیێ کار بکەت و گۆت: (ئۆپەراسیۆنا ڤێ دووماھیێ ل گارە ژی نیشا ددەت کو جارەکا دی دەستھەلاتێ دڤێت ب ھەموو رەنگەکێ شەری ل دژی کوردان بەرفرەە بکەت، بەحسێ کوشتنا ١٣ کەسێن سڤیل دھێتە کرن ئەو یەک کارەساتەک مەزنە، چونکو یێن ھاتینە کوشتن ھەموو زارۆیێن ڤی وەلاتی نە و دڤێت ئەم رێگریێ ل شەری بکەین، ژ بەر ھندێ ژی باشترین تشتێ نھا بھێتە کرن ئەوە کو ئەم جارەکا دی پێکڤە کار بۆ ئاشتیێ بکەین).

ھەڤسەرۆکێ بەرێ یێ ھەدەپێ ئەو یەک ژی دیار کر کو مخابن دەولەتا تورکیا چو بەرنامە بۆ ئاشتیێ و چارەسەریێ نینن، ئاکپارتی ل گەل ھەڤپەیمانا خوە ئانکۆ پارتا بزاڤا نەتەوەپەرست ب ھەموو رەنگەکێ کار بۆ ھندێ دکەن دا نەھێلن ھێزێن دیموکرات ل تورکیا ب ھێز کەڤن و دخوازن ب رێیا شەری ژیێ دەستھەلاتا خوە درێژ بکەن، مخابن ھێزێن ئۆپۆزسیۆنێ ژی د ناڤا خوە دا ئێکگرتی نینن و ژ بەر ھندەک ناکۆکیان ئۆپۆزسیۆن یا لاوازە و گۆت: (دەم یێ ھاتی ھێزێن ئۆپۆزسیۆنێ و ئالیێن دی یێن دیموکرات ل تورکیا پێکڤە ل سەر بەرنامەکێ کار بکەن کو ئەو یەک د بەرژەوەندیا ھەموو گەلێن تورکیا دا بیت، بەرنامەک بۆ ئاشتیێ و پێکڤەژیانێ بیت، چونکو ب سالانە ئەم دبێژین ب شەری چو پرسەک ناھێتە چارەسەرکرن و مخابن دیسان دەستھەلاتێ دڤێت ب رێیا شەری پرسا کوردی چارەسەر بکەت کو وەکو سالێن بۆری چو ئەنجامێن خوە نابن).

سەلاحەدین دەمیرتاش د پشکەکا دی یا ئاخڤتنا خوە دا ئەو یەک ژی دیار کر کو ژ بلی ئاشتی و پێکڤەژیانێ چو رێیێن دی ل پێشبەری تورکیا نینن، دڤێت ھێزێن ئۆپۆزسیۆنێ کار ل سەر ئاشتیێ بکەن، دەم یێ ھاتی کو چەک ب تەمامی بھێنە بێدەنگ کرن، ژ بۆ ھندێ ژی دڤێت کار ل سەر پێکڤەژیانێ و دیموکراسیێ بکەین، سالێن بۆری دەستھەلاتا ئەردۆگانی وەسا نیشا دا کو دڤێت شەر بھێتە راگرتن لێ د دووماھیێ دا بۆ ھەر کەسەکێ ئاشکرا بوو کو دەستھەلاتێ دڤێت ل گۆر بەرژەوەندیێن خوە سەرەدەریێ ل گەل روودانان بکەت و ژ بەر ھندێ ژی رەوش ئالۆزتر لێ ھات و گۆت: (ب گرتن و زیندانکرنا کەسایەتیێن سیاسی یێن کورد، رۆژنامەڤان و رەوشەنبیران دەستھەلاتا نھا نەشێت چو پرسەکێ چارەسەر بکەت، ژ بەر ھندێ ژی ئەز داخواز ژ ھێزێن ئۆپۆزسیۆنێ و ئالیێن دیموکرات ل تورکیا دکەم کو کار بۆ راگرتنا شەری و چارەسەریا سیاسی بکەن، ھەکە دەستھەلاتێ نەڤێت شەر بھێتە راگرتن ئالیێن ئۆپۆزسیۆنێ دشێن کار بۆ ھندێ بکەن، ئەو یەک بۆ پاشەرۆژا ھەموو تورکیا گرنگە).

ئەڤرۆ، عەزیز ھەورامی

ئەندامەکا مەکتەبا سیاسی یا حزبا سوشیالیستا دیموکراتا کوردستانێ بۆ رۆژناما ئەڤرۆ راگەھاند، پەکەکە بوویە ئەگەرێ دروستکرنا کێشا و ئاژاوی بۆ حوکمەت و خەلکێ ھەرێما کوردستانێ و ھەر پەکەکێ شەرێ تورکیا ئینایە دناڤ ئاخا ھەرێمێ دا کو د ئەنجامدا ب سەدان گوند وێران بوون و ب سەدان وەلاتیێن سڤیل شەھید و بریندار بووینە.

تەنیا تاھر، ئەنداما مەکتەبا سیاسی یا حزبا سوشیالیستا دیموکراتا کوردستانێ ب سەرۆکایەتیا حەمەی حاجی مەحموود بۆ رۆژناما ئەڤرۆ گۆت” ل سەر ئاستێ نێڤدەولەتی پەکەکە یا د لیستا تیرۆرێ دا، پێدڤیە پەکەکە رەوشا ھەرێما کوردستانێ ل بەرچاڤ وەربگریت و نەبیتە جھێ ئێکلاکرنا سیاسەت و ئەجندایێن دەولەتێن دەوروبەر کو رۆژانە خەلکێ سڤیل ژ ئەگەرێ چالاکیێن پەکەکێ یێن دبنە قوربانیێن توپبارانکرنێن تورکی”.

تەنیا گۆت ژی” ئەوا پەکەکە دکەت، دۆستایەتی نینە بۆ حوکمەت و گەلێ باشوورێ کوردستانێ، ھەکە مەرەما راستەقینە یا پەکەکێ خەباتا رزگاریا نیشتمانی و نەتەوی یە، بلا پێگەیێن خوە و چالاکی و بارەگایێن خوە بۆ ناڤ ئاخا باکوورێ کوردستانێ ب ڤەگوھێزیت بۆ ناڤ ئاخا باکوورێ کوردستانێ، بەلێ پەکەکە دخوازیت خوە ب حوکمران بزانیت ل باشوورێ کوردستانێ، چەندین دەڤەر و گۆند کرینە بن دەستێ خوە”.

دیارکر ژی” خەلکێ باشوورێ کوردستانێ یێن بێزار بووین ژ وان درووشمێن زیق یێن پەکەکە بلند دکەت و بۆ وان دیار بوو کو ئارمانجێن پەکەکێ ب وی شێوەی نەبوو کو پرۆپاگندە بۆ دکر و سیاسەتەکا ھەرێمایەتی ل پشت وان ھەیە کو دانپێدانێ ب حوکمەتا ھەرێمێ نەکەن کو ئەڤ چەندە ژی جھێ قەبوولکرنێ نینە ل دەف خەلکێ ھەرێمێ و سەرکردایەتیا سیاسی ل ھەرێما کوردستانێ”.

ئەڤرۆ:

ژێدەرێن میدیایی ل رۆژئاڤایێ کوردستانێ دیار دکەن کو چەند رۆژن روسیا بنگەھێ خوە یێ سەربازی ل عەین عیسا و ھەروەسا دو بنگەھێن دی ژی ل قامشلۆ چۆل کریە و ھێزێن خوە ل دەڤەرێن دی یێن سووریێ بجە کرینە و ئەو یەک بوویە جھێ دلگرانیا وەلاتیێن رۆژئاڤایێ کوردستانێ.

ژێدەرێن میدیایی یێن رۆژئاڤایێ کوردستانێ دیار دکەن کو روسیا بنگەھێ سەربازی یێ عەین عیسا چۆل کریە و ھەروەسا ل باژێرێ قامشلۆ ژی روسیا دو بنگەھێن خوە یێ سەربازی چۆل کرینە و ھێزێن خوە ل دەڤەرێن دی یێن سووریێ بجە دکەت، ھەتا نھا بەرپرسێن سەربازی یێن روسیا ل دۆر ھندێ چو داخۆیانیێن فەرمی بەلاڤ نەکرینە و بەرپرسەکێ ھێزێن سووریا دیموکرات ژی بۆ ئاژانسا فرات دیار کریە کو ئەو نزانن کا روسیا دڤێت ھێزێن نوو ل وان بنگەھان بجە بکەت یان ژی دێ ھەر وەسا مینن، لێ رەنگە ئەو یەک ژ بەر ناکۆکیێن نوو یێن د ناڤبەرا روسیا و ئەمریکا دا بن.

ئاژانسا سپوتینگ یا روسی ژی بەری دو رۆژان دیار کربوو کو داعش ل چەندین دەڤەرێن جودا جودا ل سووریێ ب ھێز بوویە و روسیا ژی بزاڤا ھندێ دکەت کو رێگریێ ل ب ھێزبوونا داعشێ بگریت و نەھێلیت کو داعش وەکو سالێن بۆری ھندەک دەڤەرێن گرنگ و ستراتیژی ل سووریێ کۆنترۆل بکەت و ژ بەر ھندێ ژی دبیت روسیا ھندەک ھێزێن خوە ل باکورێ سووریێ ببەتە دەڤەرێن دی یێن سووریێ.

چاڤدێرێن سیاسی ژی دیار دکەن کو ناکۆکیێن نوو د ناڤبەرا ئەمریکا و روسیا دا ل دۆر پاشەرۆژا سووریێ ھەنە و ھەروەسا نھا روسیا دەست ب بزاڤەکا مەزن کریە دا کو کورد و شام دەست ب گەرەکا دی یا دانوستاندنان بکەن و پرسێن د ناڤبەرا خوە دا چارەسەر بکەن، چونکو روسیا دڤێت ئاستەنگیان ل ھەمبەر ستراتیژیا نوو یا ئەمریکا ل سووریێ و رۆژئاڤایێ کوردستانێ دروست بکەت، روسیا نەڤێت ئەمریکا ھاریکاریا کوردان بکەت و حەفتیا بۆری ژی سیرگێی لاڤرۆڤ وەزیرێ دەرڤە یێ روسیا راگەھاند کو ھاریکاریێن ئەمریکا بۆ ھێزێن سووریا دیموکرات گەلەک زێدە بووینە و پشتی کو جۆ بایدن وەکو سەرۆکێ ئەمریکا دەست ب کار کری ئەمریکا پتر ھاریکاریا ھێزێن سووریا دیموکرات دکەت و ئەمریکا دڤێت ئاخا سووریێ پارچە بکەت، ھەکە تشەک وەسا ھەبیت ئەو یەک دێ بیتە ئەگەرێ ھندێ کو ئالۆزیێن نوو ل سووریێ دروست ببن و دڤێت ئەمریکا کار بۆ چارەسەریا سیاسی ل سووریێ بکەت.

ئەو یەک د دەمەکێ دایە کو بەری نھا مەزلوم عەبدی فەرماندارێ گشتی یێ ھێزێن سووریا دیموکرات راگەھاند کو وان دڤێت پەیوەندیێن خوە ل گەل ئەمریکا و روسیا باشتر لێ بکەن، چونکو ھەڤسەنگیەکا ھێزێ ل سووریێ دروست بوویە و ژ بەر ھندێ ژی دھێتە خواستن کو کورد پەیوەندیێن خوە ل گەل ھەر دو وەلاتان باشتر لێ بکەن.

فەرماندارێ گشتی یێ ھێزێن سووریا دیموکرات ھەروەسا راگەھاند کو ئەو وەکو ھێزێن سووریا دیموکرات نھا ل گەل ئەمریکا پێکڤە ل سەر بەرنامەکێ ھەڤپشک کار دکەن و ئەمریکا ژی دڤێت داعش و گرۆپێن دی یێن تیرۆرستی ل سووریێ نەمینن و د چارچۆڤێ شەرێ ل دژی داعشێ دا ژی ئەمریکا بریار دایە کو پتر ھاریکاریا کوردان و ھێزێن سووریا دیموکرات بکەت، ژ بەر ھندێ ژی دبیت ئەمریکا ھندەک بنگەھێن نوو یێن سەربازی ژی ل رۆژئاڤایێ کوردستانێ و باکورێ سووریێ ئاڤا بکەت.

ھەولێر، قائید میرۆ:-

بەلاڤ بوونا ڤایروسی َنوی یێ کورونایێ مەترسی  ل سەر ژیانا قوتابیان پەیداکریە و دەمێ نوکە دا پەروەردە و ساخلەمی مژۆلی پێداچوونێ نە ب رەوشا ساخلەمی و دەرکرنا بڕیار و رێنمایێن نوی لدور دەواما قوتابخانان، گورەی زانیاریێن ئەڤرۆ وەزارەتا ساخلەمی پێشنیاز داینە پەروەردێ دەوام بھێتە راگرتن بۆ دەمێ چەند رۆژان.

دکتۆر ئەحمەد میر ئاودەلی، بسپۆرێ ساخلەمی بۆ بەرپەرێ پەروەردە و زانکۆ یێ رۆژناما ئەڤرۆ دیارکر ڤایرۆسا نوی یێ کۆرۆنایێ گەھشتیە ھەرێما کوردستانێ و بەری نوکە ڤایرۆسێ نوی دناڤ زارۆیان دا کێمتر دھھێتە تۆمارکرن، بەلێ نوکە مەترسیەکا مەزن ل سەر زارۆکان ھەیە، ب تایبەتی ئەوێن دچنە قوتابخانێ، چونکە تێکەلی و قەلەبالغی ئەگەرەکێ سەرەکینە بۆ ڤەگوھاستنا کۆرۆنایێ، ب تایبەتی کۆرۆنایا نوی زوتر بەلاڤ دبیت، بێگومان نیشانێن ئەڤی ڤایرۆسێ نوکە ھەمان ڤایرۆسێ کۆرۆنایێ یە و ھەمان چارەسەری ژی بۆ دھێتە ب کارئینان، مخابن ژبەر کو بەرگریا لەشێ زارۆکی یا بھێز نینە دەمێ توشی کۆرۆنایا نوی دبن ب ھێز دکەت و پێدڤی ب چارەسەرکرنێ ھەیە ژلایێ نۆشدارێن تایبەت، ئەز باوەردکەم باشترین چارەسەر بۆ بەرھنگاربوونا ڤایرۆسا نویا کۆرۆنایێ دناڤ قوتابیان دا ب کار ئینانا ماسک و بجە ئینانا رێنمایێن خۆە پارێزیێ ھەیە، ژبەرکو قوتابی کێمتر پێگیرن ب رێنمایێن خۆە پارێزیێ پێدڤیە دایک و باب ھشیاری زارۆکێن خۆە بن.

ژێدەرەکێ ئاگەە-دار ل پەروەردێ بۆ رۆژناما ئەڤرۆ گۆت: دێ بڕیارەکا نوی لدۆر دەواما قوتابخانا ھێتەدان، چونکە مەترسیێن مەزن ل سەر ژیانا قوتابیان پەیدابووینە و دەمێ نوکە دا پەروەردە و ساخلەمی دخازن پێداچوونێ ب ڤێ رەوشێ دا بکەن و پشتی ھەلسەنگاندن بۆ رەوشا ساخلەمی دھێتەکرن دێ بڕیارێن گرنگ ھێنەدان، دوھی رۆژا دوشەمبی لیژنا بەرھنگاربوونا کۆرۆنایێ کۆمبوو و پارێزگەھێن ھەرێما کوردستانێ ژی دێ پشکداری کر.

ژلایێ یەکی دی ڤە حەسیبە گەردی، ئەنداما لیژنا پەروەردێ لپەرلەمانێ کوردستانێ گۆت: راستە مەترسی پەیدابوویە ل سەر قوتابیان، چونکە ل عێراقێ دو حالەتێن ڤایرۆسێ نوی یێن  مرنێ دناڤ زارۆیان ھاتینە تۆمارکرن و وەزارەتا ساخلەمی چەند پێشنیارەک بۆ وەزارەتا پەروەردێ بەرھەڤکرینە و ساخلەمی دگەل گرتنا دەرگەھێ قوتابخانانە دەمێ نوکە دا، بەلێ ئەم وەکی لیژنە دگەل ڤێ چەندێ داینە کو دەستپێکێ بتنێ بۆ دەمێ چەند رۆژان دەوام بھێتە راگرتن، پشتی پێداچوونێ و زانینا رێژا کۆرۆنایێ دوبارە بڕیار ل سەر دەواما قوتابخانان بھێتەدان، واتە بۆ نمونە ئێک ھەیڤێ یان بیست رۆژان دەوام بھێتە راگرتن و د ئەڤی ماوەیێ قوتابخانە گرتی دێ ئاشکەرا بیت و رەوشا ساخلەمی دێ بەرب بلندبوونێ چن ئامار یان نزم بیتە ڤە.

ئەڤرۆ:

پارتا ئازادی یا کوردستانێ ل باکورێ کوردستانێ داخۆیانیەک ب ھەلکەفتا رۆژا جیھانی یا زمانێ دایکێ بەلاڤکر و د داخۆیانیا خوە دا پارتا ئازادی دیار دکەت کو ل جیھانێ چو زمانەک وەکو زمانێ کوردی تووشی زۆلم و زۆرداریێ نەھاتیە و دەولەتێن دگیرکەرێن کوردستانێ ب ھەموو شیانێن خوە ب سالانە کار بۆ ھندێ دکەن دا کو زمانێ کوردی پێش نەکەڤیت و ژناڤ بچیت، ژ بەر ھندێ ژی ئەرکێ ھەموو کوردەکێ یە کو خوەدان ژ زمانێ خوە دەرکەڤیت و نھا پتر ژ ھەر دەمەکێ دڤێت کار بۆ خواندن، نڤیسین و ئاخڤتنا ب زمانێ کوردی ل ھەموو پارچێن کوردستانێ ب تایبەتی ژی ل باکورێ کوردستانێ بھێتە کرن.

پارتا ئازادی یا کوردستانێ دیار ژی دکەت کو ھەتا بەری چەند سالان ژی ل تورکیا کەسێ نەدشیا بەحسێ زمانێ کوردی بکەت و نھا ژی زۆلم و زۆرداریەکا گەلەک مەزن ل سەر زمانێ کوردی ھەیە و ب سەدان کەس ژ بەر ئاخڤتن و نڤیسینا ب کوردی نھا ژی د زیندانان دانە و دڤێت تورکیا دەستان ژ سیاسەتا خوە دژوار ل دژی کوردان و زمانێ کوردی بەردەت.

پارتا ئازادی یا کوردستانێ داخوازا ژ سازی و دەزگەھێن کوردی و ھەروەسا سەرمایەدارێن کورد ل تورکیا و باکورێ کوردستانێ ژی دکەت کو گرنگیەکا مەزن بدەنە زمانێ کوردی، خۆلێن فێربوونا زمانێ کوردی ڤەکەن و زارۆیێن خوە فێری زمانێ کوردی بکەن، چونکو زمان ھەبوونا ھەموو گەلێن جیھانێ یە و ب تایبەتی ژی بۆ کوردان ل تورکیا و باکورێ کوردستانێ فێربوونا زمانێ کوردی گەلەک گرنگە.

website security
WP Facebook Auto Publish Powered By : XYZScripts.com