NO IORG
نووترين نووچه
هه‌لبژارتى4

ئه‌ڤرۆ:

نوونه‌رێ به‌رێ یێ ئه‌مریكا بۆ كاروبارێن سووریێ راگه‌هاند كو بابه‌تێ موشه‌كێن روسی و هاریكاریا ئه‌مریكا بۆ یه‌په‌گێ بوویه‌ ئاریشه‌كا مه‌زن د ناڤبه‌را ئه‌مریكا و توركیا دا، لێ ئه‌مریكا بۆ شه‌رێ دژی داعشێ هاریكاریا یه‌په‌گێ و هێزێن سووریا دیموكرات كریه‌ و هاریكاریا ئه‌مریكا بۆ هێزێن كوردی دێ به‌رده‌وام بیت.

جێمز جێفری نوونه‌رێ به‌رێ یێ ئه‌مریكا بۆ كاروبارێن سووریێ راگه‌هاند كو ئیدارا جۆ بایدن گه‌هشتیه‌ ڤێ باوه‌ریێ كو ئێدی نه‌شێت توركیا نه‌چار بكه‌ت كو ده‌ستان ژ موشه‌كێن روسی به‌رده‌ت، لێ ئه‌مریكا داخواز ژ توركیا كریه‌ كو ژ بلی موشه‌كێن روسی چو چه‌كێن دی ژ روسیا نه‌كڕیت چونكو ئه‌مریكا نه‌ڤێت توركیا زێده‌تر خوه‌ نێزیكی روسیا بكه‌ت، ئه‌و یه‌ك دشێت مه‌ترسیێن خوه‌ یێن مه‌زن بۆ به‌رژه‌وه‌ندیێن ئه‌مریكا ل ده‌ڤه‌رێ هه‌بیت و گۆت: (نها ب ره‌نگه‌كێ نه‌راسته‌وخوه‌ تێگه‌هشتنه‌ك د ناڤبه‌را ئه‌مریكا و توركیا دا دروست بوویه‌، لێ ئه‌و یه‌ك رامانا هندێ ژی ناده‌ت كو دێ ئه‌مریكا ل هه‌مبه‌ر زێده‌گاڤیێن توركیا بێده‌نگ بیت، ب تایبه‌تی ژی ئیدارا جۆ بایدن ل هه‌مبه‌ر زێده‌گاڤیێن توركیا ل سووریێ بێده‌نگ نابیت، ئه‌مریكا دڤێت ب رێیا ستراتیژیه‌كا نوو ل گه‌ل روسیا دووماهیێ ب هه‌بوونا هێزێن ئیرانێ و توركیا ل سووریێ بینیت و نها كار ل سه‌ر هندێ دهێته‌ كرن).

جێفری ئه‌و یه‌ك ژی دیار كر كو بابه‌تێ یه‌په‌گێ بوویه‌ ئاریشه‌كا مه‌زن د ناڤبه‌را ئه‌مریكا و توركیا دا، لێ ئه‌مریكا ب چو ره‌نگه‌كێ ده‌ستان ژ پشته‌ڤانیكرنا یه‌په‌گێ به‌رناده‌ت، ئێدی ئه‌مریكا یه‌په‌گێ و هێزێن سووریا دیموكرات وه‌كو هه‌ڤپه‌یمانێن خوه‌ ل سووریێ دبینیت و هاریكاریا ئه‌مریكا بۆ وان دێ یا به‌رده‌وام بیت، ئه‌مریكا دڤێت توركیا ژی راستیا هه‌ی قه‌بوول بكه‌ت، چونكو بێی هه‌بوونا یه‌په‌گێ و هێزێن سووریا دیموكرات ئه‌مریكا نه‌شێت ل سووریێ داعشێ لاواز بكه‌ت و شه‌رێ ل دژی داعشێ ژی گه‌له‌ك ب زه‌حمه‌ت بوو، وی ده‌می توركیا ژی چو به‌رنامه‌ك بۆ شه‌رێ ل دژی داعشێ نه‌بوو، داعش ببوو مه‌ترسیه‌كا گه‌له‌ك مه‌زن بۆ سه‌ر به‌رژه‌وه‌ندیێن ئه‌مریكا و وه‌لاتێن رۆژئاڤایی و ژ به‌ر هندێ ژی ئه‌مریكا پشته‌ڤانیا یه‌په‌گێ كر و پشته‌ڤانیا ئه‌مریكا بۆ یه‌په‌گێ و هێزێن سووریا دیموكرات دێ به‌رده‌وام بیت و گۆت: (دڤێت توركیا ژی راستیا هه‌ی قه‌بوول بكه‌ت، ئه‌مریكا دڤێت پرسا سووریێ دوور ژ شه‌ری بهێته‌ چاره‌سه‌ركرن و بێگومان هه‌بوونا هێزێن سه‌ر ب توركیا مه‌ترسیه‌كا مه‌زن بۆ پاشه‌رۆژا سووریێ دروست دكه‌ت، راسته‌ نها روسیا ل هه‌مبه‌ر زێده‌گاڤیێن توركیا بێده‌نگه‌ لێ ئه‌و یه‌ك رامانا هندێ ناده‌ت كو دێ روسیا هه‌تا هه‌تای ل هه‌مبه‌ر توركیا بێده‌نگ بیت، هه‌كه‌ ئه‌مریكا ده‌ست ب قۆناغه‌كا نوو یا چاره‌سه‌ریا سیاسی ل سووریێ بكه‌ت دێ هه‌لویستێ روسیا ژی ل هه‌مبه‌ر توركیا هێته‌ گوهۆرین).

نوونه‌رێ به‌رێ یێ ئه‌مریكا بۆ كاروبارێن سووریێ ئه‌و یه‌ك ژی دیار كر كو ئه‌مریكا ل سووریێ پشته‌ڤانیێ ل مافێن كوردان دكه‌ت و ئه‌و یه‌ك رامانا هندێ ناده‌ت كو دێ ئه‌مریكا كار بۆ ئاڤاكرنا ده‌وله‌ته‌كا كوردی ل سووریێ كه‌ت، به‌لكو به‌ری نها ژی گه‌له‌ك جاران مه‌ دیار كریه‌ كو دڤێت خه‌لكێ سووریێ ب خوه‌ بریارێ ل دۆر پاشه‌رۆژا خوه‌ بده‌ن، مخابن روسیا هنده‌ك تشتان ژ بۆ به‌رژه‌وه‌ندیێن خوه‌ ب ره‌نگه‌كێ شاش بكار دئینیت و هنده‌ك بزاڤێن روسیا ژی وه‌سا كرینه‌ كو ره‌وشا سووریێ پتر ئالۆز ببیت، د راستی دا نها روسیا ژ بۆ به‌رژه‌وه‌ندیێن خوه‌ توركیا بكار دئینیت.

هه‌ولێر، قائید میرۆ:

به‌رپرسه‌كێ وه‌زاره‌تا ئاڤه‌دانكرنێ ئاشكرا كر، وه‌زاره‌تا ئاڤه‌دانكرنێ داخواز ژ سێ كۆمپانیێن جیهانی كریه‌ هێلا شه‌مه‌نده‌فڕێ ل هه‌رێما كوردستانێ‌ دروست بكه‌ن و بڕیاره‌ ژلایێ حوكمه‌تا هه‌رێما كوردستانێ ڤه‌ بهێته‌ ب جهئینان و هه‌موو پارێزگه‌هان پێكڤه‌ گرێ بده‌ت.

ئاگرین عه‌بدوللا، بریكارێ وه‌زاره‌تا ئاڤه‌دانكرنێ بۆ رۆژناما ئه‌ڤرۆ دیار كر، پڕۆژێ هێلا شه‌مه‌نده‌فڕێ دێ ل سه‌رانسه‌ری هه‌رێما كوردستانێ هێته‌ ب جهئینان و هه‌موو پارێزگه‌هێن هه‌رێمێ دێ پێكڤه‌ هێنه‌ گرێدان و گۆت: “هێشتا پرۆژه‌ د قۆناغا ده‌ستپێكی دایه‌ و بڕیاره‌ پشتی پێداچوونێ پڕۆژه‌ بهێته‌ ب جهئینان، ئه‌و ژی ب چه‌ند قۆناغه‌كان، له‌وڕا ژی وه‌زاره‌تێ داخواز ژ سێ كۆمپانیێن جیهانی كریه‌ بۆ به‌رهه‌ڤكرنا پڕۆژه‌ی هه‌تا بزانین دێ چه‌ند پاره‌ بۆ هێته‌ مه‌زاختن”.

ئاگرین عه‌بدوللا گۆتژی: “پرۆژێ‌ هێلا ئاسنی، پڕۆژه‌كێ ستراتیژیه‌ و بڕیاره‌ هه‌یڤا داهاتی به‌رسڤا وه‌زاره‌تێ بهێته‌دان، كو ئه‌م پشتڕاستین دێ مفایه‌كێ زۆر بۆ كه‌رتێ هاتنوچوونێ هه‌بیت و وه‌لاتی دشێن ب بهایه‌كێ زۆرێ ئه‌رزان د ناڤبه‌را پارێزگه‌هان دا هاتنوچوونێ بكه‌ن، ئه‌ڤه‌ ژی ئێكه‌ ژ پڕۆژێن هه‌ره‌ مه‌زن یێن حوكمه‌تا هه‌رێما كوردستانێ و چێكرنا هێلا ئاسنی دێ پێشكه‌فتنه‌كا دی ده‌ته‌ هه‌رێما كوردستانێ”.

ئه‌ڤرۆ، كه‌ركووك، عه‌زیز هه‌ورامی

سكرتێرێ گشتیێ پارتا گه‌ل یا توركمانی و ئه‌ندامێ جڤاتا پارێزگه‌ها كه‌ركووكێ بۆ رۆژناما ئه‌ڤرۆ راگه‌هاند، ئه‌وا نوكه‌ ل كه‌ركووكێ دهێته‌ ئه‌نجامدان پشتی 16 ئوكتۆبه‌را 2017، سنوورێ گه‌نده‌لیێ ده‌رباز كریه‌، پارێزگه‌رێ سه‌پاندی ل سه‌ر خه‌لكێ كه‌ركووكێ ب حه‌ز و خواستا خوه‌ كار و كریاران دكه‌ت و ل سه‌ر داخواز و پێشنیازێن خه‌لكێ كه‌ركووكێ كار ناكه‌ت، له‌وما خه‌لكێ كه‌ركووكێ هه‌موو یێ نه‌رازیه‌ ژ وێ ره‌وشێ كو نوكه‌ كاره‌با نینه‌ و گاز ژی ب دادپه‌روه‌ری ل سه‌ر وه‌لاتیاندا ناهێته‌ به‌لاڤكرن، هه‌روه‌سا بهایێ كاره‌با موه‌لیدان ژی گه‌له‌ك یێ بلنده‌.

عرفان كه‌ركووكێ، سكرتێرێ گشتیێ پارتا گه‌ل یا توركمانی و ئه‌ندامێ جڤاتا پارێزگه‌ها كه‌ركووكێ، زێده‌تر گۆت” گه‌نده‌لیا كارگێری ل داموده‌زگه‌هێن حكومی ل  كه‌ركووكێ گه‌له‌ك یا زێده‌بووی، پارێزگه‌رێ سه‌پاندی و چه‌ندین به‌رپرسێن ئیداری ژلایێ ده‌سته‌یا ده‌ستپاكیێ ل كه‌ركووكێ چه‌ندین جاران هاتینه‌ داخوازكرن بۆ دادگه‌ها تایبه‌تمه‌ند و گه‌نده‌لیه‌كا مه‌زن هاتیه‌ ئاشكراكرن، به‌لێ ئه‌وا مه‌ دیتی ئه‌و ب كه‌فاله‌ت هاتنه‌ ئازادكرن”.

عرفنی گۆت ژی” هه‌كه‌ سه‌حكه‌ینه‌ داموده‌زگه‌هێن حوكمه‌تێ ل كه‌كووكێ، هیچ دادپه‌روه‌ریه‌ك تێدا نینه‌، گلێشه‌كێ مه‌زن ل جاده‌ و تاخێن كه‌ركووكێ یێ به‌لاڤ بووی و ب ناڤێ سه‌رپێچیان ده‌ست ب روخاندنا خانیێن كه‌سێن هه‌ژار كریه‌ و بۆ مه‌ره‌مێن ئیمتیازاتێن كه‌سایه‌تی ئه‌و چه‌نده‌ دهێته‌ بكارئینان”.

دیاركر ژی كو كه‌ركووك یا پێدڤی زڤراندنا باوه‌ریێ و شه‌رعیه‌تێ یه‌، هه‌ر ژ رۆژا 16 ئوكتۆبه‌رێ باوه‌ری و شه‌رعیه‌ت ب ئیدارا كه‌ركووكێ نه‌مایه‌ و دڤێت شه‌رعیه‌ت بۆ كه‌ركووكیان بزڤریت.

18

دھۆک، ھەیفا دۆسکی:

کەسانێن بو ئەڤرو ئاخفتین دبێژن: دەرکەفتن و سەیرانێن ب کوم پەیوەندیێن جڤاکی راستڤە دکەن و ئێدی ھەر دلمانەکا ھەی خێزان ب رێیا کومبونێن خێزانی ناھێلن و دلێن وان پتر ل ھەڤ راست دبن و حەزژێکرنا وان بو ئێک نوژەن دبیتەڤە، ژنێن چالاکڤان ژی دبێژن: ھەیڤا بھارێ پتر بیرەوەری تێدا ھەنە لێ تەخا ژنان بکار دئینن بو پتر ئارامیا خێزانێ و پەیدا کرنا کەیف و گرنژینێ بو خێزانێ و بلند کرنا ھەستێ نەتەوەیی ل دەڤ خێزانێ و جڤاکی.

بارین عەلی کچەکە و سەمیان و  رێڤەبەرا خێزانێ یە دبێژیت: خێزان بنچینەیا ب ھێزا جڤاکیە و ژن بنیات و سەروەرەکا مەزنە بو ھەر خێزانەکێ ئەو دشێت ژ ھەر لایەکێ کاودانێ خێزانێ ب گۆھوریت و بکەتە میرگەکا گۆلان بو ژیانا ئەندامێن خێزانێ، تایبەت ژی ھەیڤا بھارێ کوما بیرەوەریانە و نەمازە ژی ئەڤ کاودانێ کوردستان و جڤاکێ مە تێدا دبوریت خێزانا مە گەلەک یا نەخوش و بێزارە و من ل بەرە ئەوان ھەموویا بکەمە  درەوشەکا ئارام دا ژ ئالیێ کەیف و ئارامیێ ڤە.

کامیران موسا ژی بابێ شەش زارویایە و ل دووڤ گۆتنا وی ئەو یێن تۆشی نەئارامیا خێزانێ بوین و ھەتا ژ ئالیێ ئابوریڤە ئەو یێن تووشی کەفتنێ بوین بەلێ ئەڤ رۆژە ھەموو یێ دچن ھێشتا مە تاما ژیانێ نەزانیە بەلێ ھەڤژینا من ب کێمترین پارە و ئارامیا خێزانێ پاراستیە و رەوشەکا مەزن و ئارام یا ئێخستیە دناڤ مەدا و ئەم یێ د بەختەوەریا خێزانێ دا دژین ھەتا ئەو یا بزاڤێ دکەن سەیرانەکا خێزانێ رێک بێخیت و ژیانەکا سەردەم دایە بەر زارویێن من.

ئەڤین نعمت دایکە و بەحسێ ھندێ کر کو ئەو ھەیڤا بھارێ و ئەڤان رۆژێن بھێنڤەدانێ ب جوانترین شێوە بەختەوەر دکەت و ژیانەکا ئارام ددەتە بەر زارویێن خوە و ھەتا ھەڤژینێ خوە و گۆت: مە گەلەک کەس د ڤان شەرێن ڤێ دووماھیێ دا ژ دەستدان و بویە ئەگەر کو ئەم ژ گەلەک خوشیا بێ بەھر بین گرنگە ھەموو بزاڤاربکەم ڤێ ھەیڤێ بکەمە خوشی و ئارامیا ژیانێ بو خێزانا خوە و ھەکە دایک یا شارەزا بیت دشێت ئەنجام بدەت.

بەیان سالح ژنەکا چالاکڤانە سەبارەت بابەتی دیار کر یا ئاشکەرایە کو ئەم د ڤان کاودانان دا تووشی ئاریشە و گرفتێن ئابوری و یێن دراڤی بوینە، لەورا دایک یان ژن پێدڤی ب ھندێ یە کو پتر رۆلێ خوە د ڤێ یەکێ دا بینین و ئەڤان رۆژێن بیرەوەریان بکەینە ئارامیا خێزانێ ب کێمترین دراڤ و ئابور و گۆت: چونکی ژ گەلەک ئاریشە و ناکوکیێن سیاسی کاریگەری کریە سەر خێزانێن مە ژی، لێ ئەڤە باشترین قوناغە کو ئەم خوە ژ ڤێ چەندا ئالوز بدەینە پاش، چونکی ھەر گۆھورینەکا بیت خێزان قوربانا ئێکێ یە دکەڤیتە دبن وان فشاران ڤە، ژبەر ھندێ کاریگەریێن جڤاکی پتر ب بزاڤێن سەیران و گەریان و تشتێ ھەمەرەنگ و(تەرفیھیی) دھێتە گۆھورین، ئانکو زارو و گەنج و سنێلە پێدڤی ب ھەڤ نێزیکیا خێزانێ نە د ڤان کاودانان دا و ئەڤ ھەیڤا کو ئەم تێدا پتر ھەست ب ھەر تشتەکێ خوش و نەخوش بکەین، لێ بێگۆمان ئەم پێدڤی ب تشتێ خوشین د ژیانێ دا.

بەھیجا رەشید ژی چالاکڤانە سەبارەت بابەتی دیار کر کو دبیت ھەر کەس ھەست ب ئارامیا خێزانێ نەکەت و تایبەت ئەڤان کاودانێن کوردستان و جڤاکێ مە تێدا دەرباز دبیت، بەلێ رۆلێ دایکێ و ئافرەتێ ب گشتی گەلەکێ ئەکتێفە و ئەو دشێت ب رێیا سەیرانێن ب کومی و گەریان و گۆتنێن خوەش د ڤێ بھارێ ھەستا خێزانێ ب گۆھوریت بەر ب خوشیێ و گۆت: چونکی مە گەلەک ئاستەنگێن ژیانێ دەرباز کرینە و بوینە قوربانی یێن سیاسەتێ، لێ ئەڤە باشترین دەلیڤەیە دایک بزاڤێ بکەت خێزانا خوە ژ ھەر ھزرەکا نەخوش و گرفتەکا دەروونی بدەتە پاش و پتر ھەستێ دلڤەکەر و ئارامی و خوشیا خێزانێ تێدا پەیدا بکەت، بەھیجایێ د بەردەوامیا ئاخفتنا خوە دا گۆتژی: ئەڤە ژی ھندا ب زەحمەت نینە لێ زیانێن ژ ھەر تشتێ چوی یێن ماینە دناڤ جڤاکێ مەدا و ئەم پێدڤی گۆھورینێن ھزری و دەروونی و جڤاکی نە و دا خوە ژ ھزر کرن د پارەیی و قەیرانێ دا بدەینە پاش و نە ئیلا ھەبوونا دراڤی بیتە بەرامبەری ئەڤێ چەندێ، بەلکو شارەزیا دایکێ دشێت ھەڤ پشکا نەخوشیێن ھەڤژین و زارویێن خوە ژی بیت و پتر بزاڤێ بکەت بھارەکا ئارام دوور ژ مایتێکرنەکا سیاسی ببەنە سەر و ھەتا ھەستێ نەتەوەیی ل دەڤ وان پەیدا بکەت.

ئەڤرۆ:

ئەندامێ سەرکردایەتیا کەرکووک – گەرمیان یا پارتی، لوقمان حسێن، راگەھاند، جارەکادی عەرەبێن ھاوردە ب پشتەڤانیا ھێزێن عیراقی بزاڤێ دکەن گوندێن کوردان ل دەڤەرا سەرگەران ل کەرکووکێ داگیر بکەن و کورد ژی ڤێ چەندێ رەت دکەن.

لوقمان حسێن، گۆت ژی” جارەکادی عەرەبێن ھاوردە ژ دەڤەرێن دی یێن عیراقێ ژ بەر نێزیکبوونا ھەلبژارتنان ھاتینە دناڤ ئەردیچن کوردان دا ل سەرگەران و چادر ڤەداینە و داخواز دکەن حوکمەتا عیراقێ گوندێن کوردان بۆ وان ڤەگەرینن و بریارێن رژێما بەعس بجھبینیت، لەوما بریاربوو دوھی سوپاسالارێ عیراقێ و فەرماندێ ئۆپەراسیۆنێن کەرکووکێ سەرەدانا وان بکەن و چارەسەریا کێشێن وان بکەن”.

گۆت ژی” ل سنوورێ ناحیا سەرگەران ٢٤ گوند یێن ھەین کوپ ێشتر عەرەبا دەستێ خوە دانابوو سەر و پاشی ئەو گوند بۆ خودانێن وان یێن رەسەن یێن کورد ھاتبوونە زڤراندن، بەلێ نوکە جارەکادی ئەو عەرەبێن ھاوردە یێن داخوازا ڤەگەراندنا وان گوندان دکەن کو ل وی دەمی ب زۆری داگیرکربوون و نوکە ژی دخوازن ب ھەمان شێوە داگیر بکەن”.

دیارکر” کورد  ب ھەموو شێوەکی وی کاری رەت دکەن و رێ نادەن گوندێن وان ژێ بھێنە ستاندن و عەرەبێن ھاوردە ژی دخوازن ب رێیا لەشکری دەستێ خوە داننە سەر، لەوما ئەگەر ئەو کارە بھێتە کرن، دبیت کارڤەدان ھەبیت و کێشە دروست ببن، چونکی کورد قەبوول ناکەن گوند و ئەردێن وان بھێنە داگیرکرن”.

ھەولێر، قائید میرۆ:

بڕیارە ل چەند رۆژێن داھاتی ڤاکسینا کۆرۆنایێ بگەھیتە ھەرێما کوردستانێ و سەرۆکێ حوکمەتێ ژی وەزارەتا ساخلەمیێ راسپاردیە بۆ کڕینا ڤاکسینا کۆرۆنایێ ھەکە پێدڤی کر و پەیڤدارێ وەزارەتێ ژی دبێژیت: تیمێن تایبەت ھاتینە بەرھەڤکرن بۆ لێدانا ڤاکسینێ.

دکتۆر ئاسۆ حەوێزی، پەیڤدارێ وەزارەتا ساخلەمی بۆ رۆژنا مائەڤرۆ گۆت: “ھەموو بەرھەڤی ژلایێ ساخلەمیا ھەرێما کوردستانێ بۆ گەھشتنا ڤاکسینا کۆرۆنایێ ھاتینەکرن و تیمێن تایبەت ژی ھاتینە بەرھەڤکرن بۆ لێدانا ڤاکسینێ، چونکو پێدڤی ب راھێنانان ھەیە و نابیت ھەر کەسەک بکاربینیت، لەوڕا ناڤەندێن تایبەت بۆ بکارئینانا ڤاکسینا کۆرۆنایێ ل ھەموو دەڤەران ھاتینە بەرھەڤکرن و بڕیارە د چەند رۆژێن داھاتی دا ژی ڤاکسین بگەھیتە ھەرێما کوردستانێ، بێگومان پشتی گەھشتنێ دێ بڕیار ل سەر بەلاڤکرنا وێ ژی ھێتەدان”.

دکتۆر ئاسۆ حەوێزی ئاماژە ب وێ چەندێ ژی کر، ئەو گرێبەستا ژلایێ حوکمەتا عیراقێ ڤە ھاتیە ئەنجامدان بۆ کڕینا ڤاکسینێ بەھرا ھەرێما کوردستانێ ژی تێدایە و گۆت: “نوکە ٥٠ ھزار ڤاکسین گەھشتینە بەغدا، ھەروەسا حوکمەتا چینێ پێنج ھزار ڤاکسین وەکی دیاری داینە ھەرێما کوردستانێ، ژلایێ خوەڤە ژی سەرۆکێ جڤاتا وەزیرێن ھەرێما کوردستانێ وەزارەتا ساخلەمیێ سەرپشک کریە بۆ کڕینا ڤاکسینا کۆرۆنایێ و ھەردەمێ پێدڤی پێ ھەبیت، بێگومان دێ وەزارەت ژبلی بەھرا خوە ژ بەغدا راستەوخۆ ژی ڤاکسینێ کڕیت”.

 

ھەولێر، قائید میرۆ:

بەرپرسەکێ سەندیکا پارێزەرێن کوردستانێ ئاشکرا کر، پرسا سزادانا چالاکڤانێن بەھدینان ژ پرسەکا قانوونی بوویە بابەتەکێ سیاسی و گەف ل دەستەکا دادوەرێن ئەڤێ بادەکێ دھێنە کرن و گۆت، دەستەک ل پشت سۆشیال میدیایێ و رۆژنامەڤانان ھەیە و پێدڤیە بڕیار بۆ دادگەھا تەمیز بمینیت نەک ھەر کەسەک بڕیارێ بدەت بێی بەلگە.

ئەیاد کاکەیی، سەرۆکێ لقێ ھەولێرا سەندیکا پارێزەرێن کوردستانێ بۆ ئەڤرۆ گۆت:” مە ژی وەک سەندیکا پارێزەرێن کوردستانێ تێبینی ل سەر ھندەک دادوەر و داگەھان ھەنە، بەلێ مە دادوەرێن زۆر باش ژی ھەنە، بەلێ ل گەل ڤێ چەندێ ژی دادوەر ھەنە پێدڤیە پلەیەکا حزبی ھەبیت نەک ببنە دادوەر، بەلێ دادوەرێن جوامێر ھەنە و ل بادەکا چالاکڤانێن دەڤەرا بەھدینان ژی چو کێماسی نەبووینە، چونکی بەلگە ل سەر ھەبووینە و دادوەری ژی ل گورەی بەلگەیێن بەردەست حوکمێ ئەڤان شەش کەسان دەر کریە، خاک ل ھەموو کەسی پیرۆزترە و سزایێ بۆ چالاکڤانێن بەھدینان ھاتیە دەر کرن کێمترین سزایە ژلایێ قانوونی ڤە، ژبەرکو سیخۆری ھەبوویە، ھەکە بھێتە تەمیز کرن ئەڤە دێ سزایێ وان دژوارتر بیت، چونکی سزایێ وان کەسێن تۆمەتێن وەسا ل سەر دھێنە پشتڕاست کرن ھەتا پازدە سالان دھێنە حوکم کرن.

کاکەیی گۆتژی: مخابن ل ھەرێما کوردستانێ بابەتێ سزادانا تاوانباران بوویە پرسەکا سیاسی نەک قانوونی، ئەو سێ دادوەرێن سزایێن چالاکڤانێن بەھدینان دەرکری گڤاشتنێن زۆر ل سەر ھەنە و ھەتا تەلەفۆنێن خێزانێن وان ژی ھاتینە گرتن ژبەر وان ھێرشێن ل سەر دھێنە کرن، کارێ ئەندامێ پەرلەمانتاری ئەو نینە بێژیت فلان بەلگە درستە و فلان بەلگە درست نینە.

شارەزایێ قانوونی ئەو چەندە ژی گۆت:” ھەر کەس و لایەنەکێ تێبینی ھەبن ل سەر دادگەھێ دشێت ب رێکێن قانوونی گازندێن خوە بگەھینیت و بەری نوکە ژی مە چەندین جاران تێبینی داینە لایەنێن قانوونی و کار ل سەر ھاتیە کرن، ئەڤا نوکە ب رێیا سۆشیال میدیایێ و بناڤێ رۆژنامەڤانیێ دھێتە رێڤە برن دەستەک لپشت ھەیە، ئارمانج تێدا بەڕەڤانی کرن نینە ژ مافێن مرۆڤی .

پارێزەر ئەیاد کاکەیی ئاماژە پێ کر کو ھێشتا بادەک نەھاتیە ئێکلا کرن خەلکەک بڕیارێ ل سەر ددەت ئێ باشە ھەکە بەلگە نەبن بڕیارا سزادانا وان شەش کەسێن بەھدینان دێ ھێتە راستڤە کرن و بەرۆڤاژی بەلگە ھەبن دێ سزایێ خوە وەرگرن و گۆت: زۆر ھێرش ل سەر سەرۆکێ دادگەھێ و دادوەر زرار دھێنە کرن، ددەمەکی دا بوویە سەرۆکێ دادگەھێ ل گورەی قانوونێ ئەو پۆست رێڤە بریە و بەرھەڤ بوویە بۆ رۆژەکا دی پاش بێخیت، بەلێ ھەر وانا داخواز کریە بادەک بھێتە ئێکلا کرن و چو گونەھا دادوەری تێدا نینە، لەوڕا ھێرش و گڤاشتنێن ل سەر دادگەھێ و دەستەکا دادوەران بێ بنەمانە و پێدڤیە سنورەک بۆ بھێتە دانان، چونکی ئیدی چو دادوەر د بەرھەڤ نینن بادەکێن وەسا ب ڕێڤە ببەن ژبەرکو ھەکە ھەر بادەکەک ھاتە پێش و بڕیارا دادگەھێ ل سەر بھێتە دان ببیتە بابەتەکێ سیاسی و ھێرشی سەر دەزگەھێن قانوونی بکەن.

107

ئەڤرۆ:

سەرۆک وەزیرێن ئیسرائیلێ راگەھاند کو بۆ وان دیار بوویە ئیرانێ ھێرشی گەمیا وان کریە و ئەو یەک ژی نیشا ددەت کو ئیران ل سەر ھەلویستێ خوە یێ خراب بۆ تێکدانا رەوشا دەڤەرێ بەردەوامە و پێگیریێ ب رێککەفتنێن جیھانی بۆ ئارامیا دەڤەرێ ناکەت و گۆت: (وەکو ئیسرائیل ئەم خوە بۆ قۆناغەکا نوو بەرھەڤ دکەین و دێ ل ھەر جھەکێ ھێرشی ئیرانێ کەین، دێ ب توندی بەرسڤا ھێرشا ل سەر گەمیا خوە دەین، ئەم ھێڤیدارین کو ئەمریکا و وەلاتێن دی یێن دەڤەرێ ژی ل ھەمبەر ھەلویستێ خرابکار یێ ئیرانێ بێدەنگ نەمینن).

بنیامین نەتانیاھۆ سەرۆک وەزیرێن ئیسرائیلێ د پشکەکا دی یا ئاخڤتنا خوە دا ئەو یەک ژی دیار کر کو ئیسرائیل ب چو رەنگەکێ رێ نادەت کو ئیران چەکێن ئەتۆمی دروست بکەت، چونکو ھەکە ئیران ببیتە خوەدانا چەکێن ئەتۆمی دێ مەترسیێن گەلەک مەزن ل سەر دەڤەرێ و جیھانێ دروست کەت، ژ بەر ھندێ ژی گرنگە ب ھەموو رەنگەکێ رێگری ل ئیرانێ بھێتە کرن.

نەتانیاھۆ ئەو یەک ژی دیار کر کو بەری نھا وان ل گەل وەلاتێن عەرەبی بەرەیەک بۆ ئاشتیێ و ئارامیا ئاڤا کرینە و ئیران ب ھەموو رەنگەکێ کار دکەت دا ئاستەنگیان ل ھەمبەر بزاڤێن ئیسرائیلێ بۆ ئاشتیێ دروست کەت، لێ بۆ ھەر کەسەکێ ئاشکرا بوویە کو ئیسرائیل بۆ ئارامیێ کار دکەت و ئیرانێ دڤێت رەوشا دەڤەرێ زێدەتر ئالۆز بکەت.

ب، سەرجان مەحمود:

سەرۆک کۆمارێ تورکیا راگەھاند کو دەمێ داعشێ ب ھەموو رەنگەکێ ھێرشی کۆبانێ کری وی دەمی رەوش گەلەک ئالۆز بوو، سەرۆکێ وی دەمی یێ ئەمریکا باراک ئۆباما داخواز ژ من کر کو ھاریکاریا کوردێن سووریێ بکەین، لێ من ئەو یەک رەت کر و پاشی ژی شەر دژوارتر لێ ھات و ب ھزاران وەلاتیێن کۆبانێ دەربازی تورکیا بوون و نھا ژی ل تورکیا دژین.

رەجەب تەیب ئەردۆگان سەرۆک کۆمارێ تورکیا ل زانکۆیا نەھێ ئیلۆنێ ل باژێرێ ئیزمیرێ د کۆنفرانسەکێ دا ل دۆر رەوشا پەنابەران ئاخڤتنەک پێشکێش کر و راگەھاند کو نھا ل تورکیا زێدەتر ژ چار ملیۆن  پەنابەرێن سووریێ ھەنە و گۆت: (ل جیھانێ چو دەولەتەکێ وەکو تورکیا خوەدان ل پەنابەران دەرنەکەڤتیە و ئەم زێدەتر ژ چار ملیۆن  پەنابەران ل وەلاتێ خوە خوەدان دکەین و وەک وەلاتیێن خوە خزمەتا وان دکەین لێ نە ئورۆپا و نە ژی وەلاتێن جیران دەریێن خوە بۆ پەنابەران ڤەنەکرن و ھەموو بارێ پەنابەران ئاڤێتنە سەر مە،‌ لێ مە شیا ب سەرکەڤتی ھاریکاریا وان بکەین و برینێن وان سارێژ بکەین).

سەرۆک کۆمارێ تورکیا ھەروەسا د ئاخڤتنا خوە دا سەرنج راکێشا سەر ئاخڤتنا د ناڤبەرا خوە و باراک ئۆبامای دا کو د وی دەمی دا سەرۆکێ ئەمریکا بوو و دیار کر داعشێ ژ ھەموو ئالیان ڤە ھێرشی کۆبانێ دکر و شەرەکی دژوار ل وێرێ ھەبوو و گۆت: (د رەوشەکا وەسا دا بەرێز ئۆباما تەلەفۆنا من کر و ژ من خوا‌ست کو ھاریکاریا کوردان ل کۆبانێ بکەم لێ من ژی گۆتە وی ل کۆبانێ شەرەکی دژوار ھەیە و ئەم نەشێین دەستێوەردانێ بکەین و ھاریکاریێ بدەینە کوردان و من داخوازا ئۆباما رەت کر و د ئەنجام دا گەلەک کەس ھاتنە کوشتن و ب دەە ھزاران کەس ژی سنور دەرباز کرن و ھاتنە وەلاتێ مە و دەمێ ھاتن ژی ب ئەرێنی پێشوازی ل وان ھاتە کرن و ھەتا نھا ژی ب ھزاران کوردێن کۆبانێ ل وەلاتێ مە دژین).

د دووماھیا ئاخڤتنا خوە دا ژی ئەردۆگانێ سەرۆک کۆمارێ تورکیا راگەھاند کو سیاسەتا ئەمریکا ل ھەمبەر تورکیا نە زەلالە و ب ئاشکرا ھاریکاریا پەکەکێ و یەپەگێ دکەن و گۆت: (جەنەرالەکێ ئەمریکا دبێژیت ئەم ھاریکاریا یەپەگێ دکەین، ھەکە ئەمریکا ل گەل یەپەگێ کار بکەت ئەم دێ چاوا بینە ھەڤپەیمانێ وێ و پێکڤە ل گەل ئەمریکا کار کەین، نھا ل ھەموو جھەکێ شەرێ مە ل دژی دژی پەکەکێ و یەپەگێ بەردەوام دکەت و ئەم دەستان ژ تێکۆشینا ل دژی وان بەرنادەین، دیارە ئەمریکا ئارمانجێن جودا ھەنە، ھەکە ئەمریکا بڤێت پەیوەندیێن خوە ل گەل مە باش بکەت ئەم بەرھەڤین، ھەکە وان دڤێت بزانن کا ھەتا نھا مە ل باکورێ سووریێ چ کریە بێگومان یا مە کری دیارە و ژ ئەڤرۆ پێڤە ژی دێ خەباتا مە و شەرێ مە ل دژی تیرۆرستان ل باکورێ سووریێ بەردەوام بیت).

ل ئالیێ دی حەسەن جەمال نڤیسەر و رۆژنامەڤانێ ناڤدار یێ تورکیا ژی راگەھاند کو ھەکە وی دەمی تورکیا ھاریکاریا کوردێن سووریێ کربا دا نھا پەیوەندیێن تورکیا ل گەل کوردێن سووریێ گەلەک باش بیت، تورکیا شاشیەکا گەلەک مەزن کر ب جھێ کو ھاریکاریا کوردان بکەت ھاریکاریا گرۆپێن توندرەو کر و ژ بەر ھندێ ژی پەیوەندیێن تورکیا ل گەل ئەمریکا، ئورۆپا و گەلەک وەلاتێن دی یێن جیھانێ تێک چوون.

ئەڤرۆ:

محەمەد جەواد زەریف وەزیرێ دەرڤە یێ ئیرانێ دوھی راگەھاند ھەکە ئەمریکا سزایێن کو د سەردەمێ دەستھەلاتا ترامپی دا ل سەر ئیرانێ ھاتینە سەپاندن راکەت وی دەمی ئیران ژی بەرھەڤە ھەموو خالێن رێککەفتنا ئەتۆمی یا سالا ٢٠١٥ بجە بکەت و بێگومان دێ قۆناغەکا نوو دەستپێ کەت کو ئەو یەک د بەرژوەندیا ھەر دو ئالیان دایە.

وەزیرێ دەرڤە یێ ئیرانێ داخواز ژ وەلاتێن ئورۆپی یێن کو رێککەفتنا ئەتۆمی ئیمزا کری ژی کر کو رۆلەکێ باش بگێرن دا ئەمریکا سزایێن ل سەر ئیرانێ راکەت.

ل ھەمبەر داخوازا وەزیرێ دەرڤە یێ ئیرانێ بەرپرسەکێ کۆچکا سپی راگەھاند کو ھەلویستێ ئەمریکا ل دۆر بەرنامێ ئەتۆمی یێ ئیرانێ گەلەک ئاشکرایە و دڤێت ئیران دەستان ژ پیتاندنا یۆرانیۆمێ بەردەت و ھەروەسا دەستێوەردانێ د کاروبارێن وەلاتێن رۆژھەلاتا ناڤین دا نەکەت و نەبیتە ئەگەرێ ئالۆزیان و وی دەمی ئەمریکا دێ پێداچوونێ د ھەلویستێ خوە دا کەت، لێ جارێ ئەمریکا نەڤێت سزایێن ل سەر ئیرانێ سڤک بکەت و داخوازا وەزیرێ دەرڤە یێ ئیرانێ ژی د جھێ خوە دا نینە.

چاڤدێرێن سیاسی ژی دیار دکەن کو ئەمریکا نەڤێت ب تنێ بریارەکا ئێکلاکەر ل دۆر بەرنامێ ئەتۆمی یێ ئیرانێ بدەت، چونکو ھەر بریارەکا ئەمریکا دێ بیتە ئەگەر کو ئیسرائیل و وەلاتێن دی یێن ھەڤپەیمانێن ئەمریکا ب تایبەتی ژی سعوودیێ دلگران ببن، ژ بەر ھندێ ژی ئەمریکا دڤێت رۆلێ ئیرانێ ل دەڤەرێ لاواز بکەت و ھەر رێککەفتنەکا نوو د ناڤبەرا ئەمریکا و ئیرانێ دا بھێتە کرن ژی دێ ب رازیبوونا ئیسرائیلێ بیت، چونکو ئەمریکا نەڤێت ب چو رەنگەکێ ئیسرائیلێ  ژ خوە دوور بکەت، بایدن ژی نەڤێت شاشیێن د سەردەمێ ئیدارا ئۆبامای دا ل ھەمبەر ئیرانێ دوبارە بکەت.

website security
WP Facebook Auto Publish Powered By : XYZScripts.com