NO IORG
هه‌لبژارتى4

 

ئەڤرۆ نیوز، زنار تۆڤی:

موقەدەمێ مافپەروەر ئازاد تاها بەرپرسێ راگەهاندنا رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: ل چیایێ پیرس یێ گرێدایی قەزا ئاکرێ ڤە، ئاگر بەربوو ترۆمبێلەکێ و ب تەمامی سۆت.

ناڤهاتی گۆت ژی: ئەڤرۆ ئەینیێ، ٢٣ چریا ئێکێ ٢٠٢٠، ل چیایێ پیرس ل ناحیا دینارتە یا گرێدایی قەزا ئاکرێ، ئاگر بەربوو ترۆمبێلەکێ ژ جۆرێ جێب تایبەت و ب تەمامی سۆتیە.

ئەو ژی دیار کریە: د وێ روودانێ دا چ زیانێن گیانی نەبووینە و لێ زیانێن مادی هەبووینە.

 

ئەڤرۆ نیوز، زنار تۆڤى:
ده‌ڤه‌را به‌روارى بالا یا ناڤداره‌ ب به‌رهه‌مئینانا چه‌ندین جۆرێن سێڤان، ژ وان ژى سێڤا به‌رواریا ناڤوده‌نگیا خوه‌ ل سه‌رانسه‌رى كوردستانێ هه‌یه‌، ئه‌ڤ ساله‌ رێژه‌كا باش یا سێڤان ل ڤێ ده‌ڤه‌رێ هه‌یه‌، ده‌وله‌مه‌نده‌كێ دهۆكێ ژى سێڤێن چه‌ندین گوندان كرینه‌، ژ وان ژى گوندێن دوورێ و شمایلا و دێریشكێ و ئیاتێ و هنده‌ك گوندێن دیتر، ڤێ چه‌ندێ دلخۆشیه‌ك ل ده‌ف جۆتیارێن ڤێ ده‌ڤه‌رێ په‌یدا كریه‌.
عزه‌ت دێریشكى جۆتیاره‌كێ ده‌ڤه‌را به‌روارى بالایه‌، بۆ ئه‌ڤرۆ نیوز دبێژیت: ده‌وله‌مه‌نده‌كێ دهۆكێ ب ناڤێ ئیسماعیل به‌رهه‌مێ چه‌ندین جۆتیاران كریه‌، نوكه‌ چنینا سێڤان بوویه‌ ده‌لیڤه‌كا كارى بۆ هژماره‌كا گه‌نجێن ده‌ڤه‌رێ یێن بێكار و رۆژانه‌ پترى 30 گه‌نجان سندۆقێن سێڤا دادگرن و رۆژانه‌ ب 25 هزار دیناران كار دكه‌ن، ئه‌و گه‌نجه‌ رۆژانه‌ دهێنه‌ كارێ چنینا سێڤان و شیاینه‌ ب ڤێ رێكێ بۆ خوه‌ داهاته‌كێ په‌یدا بكه‌ن، چونكى به‌رى نوكه‌ چو ده‌لیڤێن كارى نه‌بوون و نێزیكى دو هه‌یڤێن دیتر دێ كارێ چنینا سێڤان هه‌بیت، هه‌روه‌سا رۆژانه‌ ئه‌و ده‌وله‌مه‌نده‌ لۆریه‌كا سێڤان ژ ڤێ ده‌ڤه‌رێ دبه‌ت، ل گه‌ل چه‌ندین بارێن دیتر یێن ترۆمبێلێن دو ته‌نى، ل گه‌ل هندێ تریێ جۆتیاران ژى دكریت، ئێدى سێڤێن جۆتیاران ل بنێ سێڤان نارزن.

مسته‌فا ئه‌حمه‌د، به‌رپرسێ پاراستنا رووه‌كى ل هۆبا چاندنا كانى ماسێ، بۆ ئه‌ڤرۆ نیوز دبێژیت: هه‌بوونا ده‌وله‌مه‌ندان بۆ كرینا سێڤان د ئه‌ڤ ساله‌ دا پالده‌ره‌كێ باشه‌ بۆ جۆتیارێن ده‌ڤه‌را به‌روارى بالا و ئه‌ڤ ساله‌ به‌رهه‌مێ وان ب هه‌روه‌ ناچیت، هه‌روه‌سا ئه‌و سالێن به‌رهه‌مێ سێڤان یێ باش بیت ب هزاران ته‌نێن سێڤان ل ڤێ ده‌ڤه‌رێ به‌رهه‌م دهێن، ئه‌ڤ ساله‌ سێڤ پتر ل گوندێن ده‌ردورا ناحیا كانى ماسێ هه‌نه‌، رێژا سێڤان ل وان گوندان باشتره‌، هه‌ر چه‌نده‌ ره‌وشا ئێمناهیێ ژى كاریگه‌رى ل سه‌ر كارێ جۆتیاران كریه‌، ژ ئه‌گه‌رێ ململانا په‌كه‌كێ و سۆپایێ توركیا جۆتیارێن ڤێ ده‌ڤه‌رێ نه‌شێن وه‌كو پێدڤى كارێ چاندنێ و جۆتیاریێ و سه‌خبێریا زه‌ڤیێن خوه‌ بكه‌ن.

ناڤهاتى گۆت ژى: ئه‌ڤ ساله‌ سێڤ ل گوندێن تروانش و مێركاجیا و ئیاتێ و شمایلا و دوورێ و بێدۆهێ و دێریشكێ و مایێ ب رێژه‌كا گه‌له‌ك باش هه‌نه‌، ئه‌ڤ ساله‌ بكرێن سێڤان مشه‌ یێن هه‌ین، هه‌موو ژى كه‌رتێ تایبه‌ته‌ و حوكمه‌تێ بازار بۆ جۆتیاران په‌یدا نه‌كریه‌.

سه‌ربه‌ست سه‌برى ئاكره‌یى رێڤه‌به‌رێ ناحیا كانى ماسێ دیار كر: كرینا به‌رهه‌مێ جۆتیاران پێنگاڤه‌كا گه‌له‌ك باش و سه‌ركه‌فتیه‌ بۆ جۆتیارێن ناحیا كانى ماسێ، وى ده‌وله‌مه‌ندى جهێن ته‌زاندنا فێقى هه‌یه‌ ل دهۆكێ و دیسان كارگه‌هه‌كا شه‌ربه‌تێ ژى هه‌یه‌، هه‌روه‌سا سێڤێن ڤێ ده‌ڤه‌رێ دبه‌ته‌ ژێریا عیراقێ و ب تایبه‌تى باژێرێن نه‌جه‌ف و به‌غدا و میسان، ل سالا بهێت ئه‌و سه‌رمایه‌داره‌ دێ هاریكاریا جۆتیارێن ڤێ ده‌ڤه‌رێ كه‌ت د وارێ ره‌شاندنا داروبارێ سێڤان و كه‌زاختن و پاقژكرنا وان بێى به‌رامبه‌ر، ئه‌ڤه‌ ژى هاریكاریه‌كا باشه‌ بۆ جۆتیاران، دیسان وى كه‌سى عه‌لوه‌ ژى ل دهۆكێ هه‌یه‌ و ئه‌ڤه‌ ژى دێ ڤه‌ژاندنه‌كا دیتر ئێخیته‌ ڤێ ده‌ڤه‌رێ، ئه‌ڤه‌ پترى 20 رۆژانه‌ بارێن سێڤان و ترى دبه‌ته‌ بازارى.

 

ئەڤرۆ نیوز:

وەزیرێ کارەبا هەرێمێ راگەهاند: پێدانا کارەبێ ب کەرتێ تایبەت ب مەرەما باشترکرنا دەمژمێرێن پێدانا کارەبێ و کێمکرنا تێچوویێ یە ل سەر حوکمەتا هەرێمێ.

کەمال محەمەدی د کۆنفرانسەکێ رۆژنامەڤانی دا دیار کر: ئارمانجا سەرەکی ژ پێدانا کارەبێ ب کەرتێ تایبەت ب مەرەما باشترکرنا رەوشا کارەبێ و زێدەکرنا دەمژمێرێن پێدانا کارەبێ و کێمکرنا تێچوویێ یە ل سەر حوکمەتا هەرێمێ، دێ هەمان بها هەبیت ل گەل کارەبا حکومی و گوهۆرین ب سەر بهایی دا ناهێت.

وەزیرێ کارەێ گۆت ژی: هەتا دووماهیا ئەڤ سالە دێ تەندەر بەرهەڤبیت و دێ چیتە د وارێ جێزەجێکرنێ دا،
هەروەسا ٪٧٠ یێ ستافێ حکومی دێ چیتە سەر ستافێ کەرتێ تایبەت، دیسان ئەو حەز دکەن وەلاتی ب تنێ ئێک بهایی بدەتە کرێیا کارەبێ و وەکو نوکە نەبیت، کو پارێ کارەبا گشتی و مووەلیدێن ئەهلی ژی بدەت.

 

ئه‌ڤرۆ نیوز، زنار تۆڤی:

 

جڤاتا وه‌زیرێن هه‌رێما كوردستانێ راپۆرتا سێ هه‌یڤێن قانوونا چاكسازیێ ره‌وانه‌ى په‌رله‌مانێ كوردستانێ كر، ئه‌ڤرۆ دێ رێكارێن قانوونى هێنه‌ ته‌مام كرن، پاشى ئه‌و راپۆرته‌ دێ كه‌ڤیته‌ به‌رده‌ستێ په‌رله‌مانتاران.

عه‌بدولحه‌كیم خه‌سرۆ، سكرتێرێ لژنا بلند یێ چاكسازیێ ل هه‌رێما كوردستانێ راگه‌هاند: سه‌رۆكێ جڤاتا وه‌زیران ل ده‌مێ هاتنا وى بۆ په‌رله‌مانێ كوردستانێ راپۆرته‌ك پێشكێش كریه‌ و دێ وێ راپۆرتێ ب هووركاریان ڤه‌ بۆ په‌رله‌مانى هنێریت، راپۆرتا چاكسازیێ راپۆرته‌كا گشتگیره‌ و هه‌موو واران ب خوه‌ڤه‌ دگریت، وه‌كو قانوونا چاكسازیێ ژ ده‌رماله‌ و مووچێ خانه‌نشینیێ و هه‌موو وان مینحه‌ و ئیمتیازاتێن د بوودجێ گشتى یێ هه‌رێما كوردستانێ دا دهێنه‌ دان.
ناڤهاتی گۆت ژی: ئه‌و راپۆرته‌ ژ ئالیێ جڤاتا وه‌زیران ڤه‌ هاتیه‌ په‌سه‌ند كرن، هاتیه‌ ره‌وانه‌كرن بۆ په‌رله‌مانى و تێدا هووركاریێن وان برگه‌ و مادان و ئه‌و پێنگاڤێن خستینه‌ به‌رچاڤ یێن بۆ چاكسازیێ هاتینه‌ هاڤێتن، چونكى ل 1/7/2020 قانوونا چاكسازیێ كه‌فتیه‌ وارێ جێبه‌جێكرنێ، پشكه‌ك ژ برگه‌ و مادان ب ته‌مامى هاتینه‌ جێبه‌جێ كرن، ب تایبه‌تى د وارێ خانه‌نشینیێ دا، هه‌روه‌سا قه‌رێن بازرگانى و هه‌موو مامه‌لێن وێ به‌ره‌ف دووماهیێ ڤه‌ دچن، بابه‌تێ دیتر پێداچوونه‌ ب مه‌له‌فێ فه‌رمانبه‌ران كو تایبه‌ته‌ ب دوباره‌كرنا هژمارتنا خزمه‌تێ، ڤێ پرۆسێ قۆناغه‌كا باش برییه‌، هه‌تا نوكه‌ پێداچوون د مه‌له‌فێ زێده‌تر د 207 هزار فه‌رمانبه‌ران دا هاتیه‌ كرن، ده‌رباه‌رى چاكسازیا خانه‌نشینیێ پێنگاڤێن باش هاتینه‌ هاڤێتن، ب تایبه‌تى ل ده‌ركرنا په‌یره‌وێ سندۆقا خانه‌نشینیێ و ئاماده‌كرنا رێنمایێن ئارمانجا سندۆقا خانه‌نشینیێ، هه‌روه‌سا دوباره‌ پێداچوون ب هه‌یكه‌لبه‌ندیا رێڤه‌به‌ریا خانه‌نشینیێ، كو دێ بیته‌ رێڤه‌به‌ریا گشتى بۆ سه‌رجه‌م خانه‌نشینێن شارستانى و سه‌ربازى و ئه‌منى.
سه‌باره‌ت پلێن بلند، عه‌بدولحه‌كیم خه‌سرۆ دبێژیت: د دووماهى كۆمبوونا جڤاتا وه‌زیران دا، پرۆژه‌ بریاره‌ك ده‌رچوویه‌، بۆ راگرتنا مووچێن وان هه‌موو پلێن بلند یێن هاتینه‌ خانه‌نشین كرن و پۆستێن خوه‌ نه‌دیتین، پشكه‌ك ژ وان خه‌لكێ تێكۆشه‌رن و خه‌بات كریه‌، وه‌كو رێزگرتن پۆست پێ هاتیه‌ دان، ئه‌و رێزلێنانه‌ دێ یا به‌رده‌وام بیت، به‌لێ ب ره‌نگه‌كێ دیتر، چونكى مه‌ قانوونا به‌ركار هه‌یه‌ و لدووڤ وێ قانونێ دێ رێز لێ هێته‌ گرتن.

 

 

ئەڤرۆ نیوز:

 

 

ژێدەرەکێ ژ وەزارەتا دارایی یا هەرێما کوردستانێ دیار کریە: 320 ملیار دینار ژ بەغدا گەهشتنە بانکا ناڤەندی یا هەرێما کوردستانێ و چێدبیت سوبەهی دەست ب دابەشکرنا مووچەی بهێتە کرن.

 

لدووڤ نڤیسارەکا حوکمەتا عیراقێ، کو ئیمزا عەلی عەللاوی، وەزیرێ دارایی یێ عیراقێ ل سەرە و ل رۆژا 13-10-2020 دەرچوویە، ئاماژە ب هنارتنا 320 ملیار دینارێن هەرێما کوردستانێ کریە، تێدا هاتیە کو ئەو پارە بۆ مووچێ هەیڤا 9 یێ فەرمانبەرێن هەرێما کوردستانێ یە.

 

ئەڤرۆ نیوز:

 

 

هەموو سەرێن دەمژمێران عیراق ب بهایێ 290 هزار دۆلاران گازێ دسوژیت و ب هەروە دچیت، ئانکو رۆژانە 6.9 ملیۆن دۆلار و سالانە ژی دگەهیتە زێدەتر ژ 2.5 ملیار دۆلاران، ئەڤە رەوشا وەلاتەکێ یە، کو یەدەکێ گازا وی یا سرۆشتی ب 126.7 تریلیۆن پی یێن سێجا دهێتە خەملاندن و سالانە 700 ملیۆن مەترێن سێجا یێن گازێ دهێنە سۆتن و ب هەروە دچن.

بانکا جیهانی د راپۆرتەکێدا راگەهاند: ئەڤە دەمێ چار سالانە ل سەر ئێک عیراق ل پلا دویێ یا وان وەلاتان دهێت، کو زۆرترین گازا سرۆشتی لێ دهێتە سۆتن، چارێن ئێکێ پێکهاتینە ژ رووسیا، عیراق، ئەمریکا و ئیران، ب تنێ ئەڤ چار وەلاتە 45٪ یا سەرجەمێ گازا دهێته سۆتن ل جیهانێ پێکدئینن، ئەو سالانە 150 ملیار مەترێن سێجا یێن گازێ دسوژن.

هەروەسا گۆتیە: ل سالا 2016 دا عیراقێ زێدەتر ژ 17.5 ملیار مەترێن سێجا و ل سالا 2019 دا ، 18 ملیار مەترێن سێجا یێن گازێ سۆتینە.

لدووڤ زانیاریێن وەزارەتا کارەبا عیراقێ، ئەو وەلاتە 40 ملیۆن پێ یێن سێجا یێ گازێ بۆ کارپێکرنا وێستگەهێن کارەبێ و راستەوخۆ 1200 مێگاوات کارەبێ ژ ئیرانێ هاوردە دکەت، هەروەسا راپۆرتەکا پەیمانگەها واشنتۆن بۆ سیاسەتا رۆژهەلاتا ناڤین، عیراقێ دەهـ هندی وێ گازا هاوردە دکەت، دسوژینیت.

ئیران ب نرخەکێ گران گازێ دەتە عیراقێ، کۆمپانیا بریتش پترۆلیۆم دیارکریە، عیراق بۆ هەر ئێک پێیێ سێجا یێ گازێ 11.23 دۆلاران ددەتە ئیرانێ، ئەڤە د دەمەکێ دایە، کو ئەلمانیا ب 5.42 دۆلاران گازێ ژ رووسیا دکریت و کوێت ژ ئەمریکا دکریت ب 6.49 دۆلاران.

 

ئەڤرۆ نیوز، زنار تۆڤی:

کامی کەمال بەرپرسێ پەیوەندی و ڕاگەھاندنا کۆمەلگەھا دەروازێ نێڤدەولەتی یێ ئیبراھیم خەلیل بۆ ئەڤرۆ نیوز دیار کر: لدووڤ رێنمایی یێن رێڤەبەریا گشتی یا گومرکان یێن ژمارە ٩٨ و ٩٩ ل رێکەفتی ٦\١٠\٢٠٢٠، ژ بۆ ئینانا ترۆمبێلان بۆ وان وەلاتیێن ب ترومبێلێن خوە یێن تایبه‌ت دهێنه‌ دناڤ هه‌رێما كوردستانێدا:

. ئه‌و وەلاتیێن كو ئاكنجى یێن هه‌رێمێنه‌ و ل ده‌رڤه‌ دژین و ب ترومبێلێن خوە یێن تایبه‌ت‌ دهێنه‌ هه‌رێما كوردستانێ، ل سه‌ر وان پێدڤیه‌ ئێك ژڤان رێكارێن ل خوارێ جێبەجێ بكه‌ن :-

. كه‌فاله‌ت دێ لێ هێته‌ وه‌رگرتن ب مه‌رجه‌كێ كه‌فیل ئاكنجیێ هه‌رێما كوردستانێ بیت.
. دەمێ دھێت پاسپۆرت دێ ژێ هێته‌ وه‌رگرتن هه‌تا ب ترۆمبێلڤه‌ ڤه‌دگه‌ریته‌ڤه،‌ ئه‌ڤجا دێ پاسپۆرت هێته‌ راده‌ست كرن بۆ ده‌ستێ خودانى.
. ته‌ئمینات دێ ب دوقاتیا ته‌ئمیناتێن ره‌سمى ژێ هێنه‌ وه‌رگرتن.

. دێ ترۆمبێلێ ل گوره‌پانا گومركێ راوه‌ستینیت هه‌تا ڤه‌دگه‌ریته‌ڤه‌.
هه‌روه‌سا ژبلى خالا (ئێكێ) هه‌مان مه‌رج و رێنمایی وان وەلاتییان ژى دگرن یێن كو ئاكنجى یێن هه‌رێما كوردستانێ نینن و ل ده‌رڤه‌ى ولاتى دژین و ب ترومبێلێن تایبه‌تێن خوه‌ دهێنه‌ هه‌رێما كوردستانێ.

هەروەسا گۆتیە: هەکە وەلاتیه‌ك ترۆمبێلا خوه‌ ل گوره‌پانا گومركێ رابگریت هه‌تا ڤه‌دگه‌ریته‌ڤه‌، چ پاره‌ مینا كرێیا گوره‌پانێ ژێ ناهێنه‌ وه‌رگرتن.

 

ئەڤرۆ نیوز:
وەلاتێ فرەنسا دێ ب کۆژمێ 15 ملیۆن یۆرۆیان بۆ پرۆژەکێ سەخبێریا ئاڤ و ئاڤرێژان ل پارێزگەها دهۆکێ تەرخان کەت، نێزیکی 500 هزار کەسان دێ ژ وی پرۆژەی مفادار بن.

ئەڤرۆ ئێکشەمبی، 11.10.2020 عەلی تەتەر پارێزگارێ دهۆکێ، پێشوازی ل ئۆلیڤی دیکۆتینی، کونسۆلێ گشتی یێ فرەنسا کری، پارێزگەها دهۆکی راگەهاندنەک بەلاڤ کریە و دیارکریە، فرەنسا دێ ب کۆژمێ 15 ملیۆن یۆرۆیان بۆ پرۆژەکێ سەخبێریا ئاڤ و ئاڤرێژان ل دهۆکێ تەرخان کەت و نێزیکی 500 هزار کەسان دێ ژ وی پرۆژێ ئاڤێ مفادار بن.

هەروەسا د وێ راگەهاندنێ دا هاتیە، د دناڤا وی پرۆژەی دا چاککرن و سەخبێرکرنا ئاڤا چەندین خواندنگەهان ژی هەیە، کو 60 هزار دێ ژێ مفادار بن، پارێ سەخبێریێ ژ ئالیێ وەلاتێ فرەنسا هاتیە دان و ئەلمانیا دێ بجهـ ئینیت، دەمێ بجهئینانێ ژی 3 سالن.

 

ئەڤرۆ نیوز، عەلی حاجی:
بەرپرسێ راگەهاندنا ساخلەمیا زاخۆ، بۆ ئەڤرۆ نیوز گۆت: ئەڤرۆ ل زاخۆ زارۆیەکێ د ژیێ سال و نیڤان دا ژ قاتێ حەفتێ دکەڤیت و وەغەر کر.
زێدەتر گۆت ژی: ئەو روودان ئەڤرۆ ل شوقێن نیو زاخۆ دروست بوویە، ئەو زارۆیێ د ژیێ سال و نیڤان دا ژ قاتێ حەفتێ یێ شوقەکێ کەفتیە و ئێکسەر وەغەر کریه و تەرمێ وی زارۆکی بۆ نۆشداریا داد ل زاخۆ هاتیە ڤەگۆهاستن.

ئه‌ڤرۆ نیوز:

وه‌زاره‌تا خاندنا بلند و ڤه‌كۆلێنێ زانستی سه‌ركه‌فتیێن قوناغا دوازدێ یا ئاماده‌ی ئاگه‌هدار دكه‌ن، كۆ دڤێ هه‌فتیی دا په‌یڤا تێپه‌ر و نهێنی و یوزه‌رنیمی ژ خاندنگه‌هێن خوه‌ وه‌ربگرن.

عه‌باس ئه‌كره‌م په‌یڤدارێ وه‌زاره‌تا خاندنا بلند و ڤه‌كۆلینێن زانستی راگه‌هاند پشتی بزاڤێن رێڤه‌به‌راتیا گشتی یا خاندن و پلاندانان و دووڤچوونێ ل وه‌زاره‌تێ و ناڤه‌ندا وه‌رگرتنا قوتابیان، په‌یڤا تێپه‌ر و پاسوه‌رد و یوزه‌رنێم بۆ ته‌ڤایا سه‌ركه‌فتیێن دوازدێ ئاماده‌یی هاتینه‌ به‌رهه‌ڤكرن و ره‌وانه‌ی وه‌زاره‌تا په‌روه‌ردێ ژی هاتینه‌كرن.

په‌یڤدارێ وه‌زاره‌تا خاندنا بلند و ڤه‌كۆلیننێن زانستی راگه‌هاند د ئه‌ڤێ هه‌فتیێ دا دشێن سه‌ره‌دانا خاندنگه‌هێن خو بكه‌ن بۆ وه‌رگرتنا په‌یڤا تێپه‌ر و پاسوه‌رد و یوزه‌رنێمی ژبوی بشێن زانكۆلاینێ تژی بكه‌ت.

عه‌باس ئه‌كره‌م په‌یڤدارێ وه‌زاره‌تا خاندنا بلند و ڤه‌كۆلینێن زانستی ئه‌و چه‌نده‌ ژی دازانین ل چه‌ند رۆژێن بهێت زانكۆلاین بۆ سه‌ركه‌فتیان دێ كارا بیت و به‌ری كاراكرنێ ژی راگه‌هاندنه‌كێ ل سه‌ر هیرده‌كاریێن وێ بۆ سه‌ركه‌فتیان دیار كه‌ین.

 

website security
WP Facebook Auto Publish Powered By : XYZScripts.com