NO IORG
Email

ئه‌ڤرۆ نيوز، نيوار محه‌مه‌د سه‌ليم:

په‌يڤدارێ وه‌زاره‌تا كاره‌بێ ل حوكمه‌تا هه‌رێما كوردستانێ راگه‌هاند كو رێژا به‌رهه‌مئينانا كاره‌بێ ل هه‌رێما كوردستانێ د نها دا، هه‌شت بۆ نه‌هـ ده‌مژمێرانه‌ د رۆژێ دا و ئه‌گه‌رێ سه‌ره‌كى ژى بۆ هه‌بوونا وه‌رزێ زڤستانێ و داخوازايا ل سه‌ر كاره‌بێ دڤه‌گه‌ريت و ئاريشا كاره‌با دهۆكێ ژى ئاشكه‌را دكه‌ت.

محه‌مه‌د ئه‌مين هه‌ورامى، په‌يڤدارێ وه‌زاره‌تا كاره‌بێ ل هه‌رێما كوردستانێ د داخۆيانيه‌كێ دا بۆ ئه‌ڤرۆ نيوز ئاشكه‌را كر كو چو كێشێن ده‌مى د كاره‌با هه‌رێمێ دا دروست نه‌بووينه‌، ژبلى وێ چه‌ندێ كو وه‌رزێ زڤستانێ يه‌ و خواست ل سه‌ر كاره‌بێ يا زێده‌يه‌ و گۆت: “نها رۆژانه‌ هه‌شت بۆ نه‌هـ ده‌مژمێران كاره‌ب بۆ هه‌رێمێ هێته‌ دابينكرن”.

زێده‌تر گۆت: “ره‌وشا سه‌قايى گه‌له‌ك كارتێكرنێ ل سه‌ر رێژا به‌رهه‌مئينانا كاره‌بێ دكه‌ت و گه‌له‌ك جاران ژى ئاريشێن ته‌كنيكى دروست بن و جارنا ژى كێڤل دكه‌ڤن يان ژ پێگوهۆڕ ژ كار دكه‌ڤن و ئه‌ڤه‌ ژى ئاريشه‌ نه‌”.

په‌يڤدارێ وه‌زاره‌تا كاره‌بێ ل حوكمه‌تا هه‌رێما كوردستانێ ده‌رباره‌ى وێ جوداهيا كێميا كاره‌با پارێزگه‌ها دهۆكێ ل گه‌ل پارێزگه‌هێن دى يێن هه‌رێمێ گۆت: “ئاريشا سه‌ره‌كى يا پارێزگه‌ها دهۆكێ ئه‌وه‌ هێشتا پرۆژێن به‌رهه‌مئينانا كاره‌بێ ل وێ پارێزگه‌هێ ب گازئويلێ كار دكه‌ن و يێن پارێزگه‌هێن دى نها ب غازێ كار دكه‌ن”.

محه‌مه‌د ئه‌مين هه‌روامى دا زانين ژى كو شيانێن به‌رهه‌مئينانا كاره‌بێ ب غازێ گه‌له‌ك باشترن ژ يێن به‌رهه‌مئينانا وێ ب گازئۆيلێ و گۆت: “ژ دوهى وه‌ره‌ 50 مێگاواتێن دى ژى يێن كاره‌بێ بۆ دهۆكێ هاتينه‌ زێده‌كرن و دهێته‌ پێشبينيكرن ڤان رۆژان پيچه‌ك ره‌وش باشتر بيت”.

خۆيا ژى كر كو ب تنێ دو حه‌فيێن ب زه‌حمه‌ت ئه‌ڤ ساله‌ يێ ل سه‌ر سينگێ وان مايى و پلێن گه‌رمێ دێ هێنه‌ خوار و ره‌وشا كاره‌بێ ژى دێ باشتر لێ هێت.

ده‌رباره‌ى وێ چه‌ندێ كا دێ ل دهۆكێ ژى پرۆژێن به‌رهه‌مئينانا كاره‌بێ بنه‌ غاز، په‌يڤدارێ وه‌زاره‌تا كاره‌بێ ل حوكمه‌تا هه‌رێما كوردستانێ گۆت: “نها كار ژ لايێ وه‌زاره‌تا سامانێن سرۆشتى ڤه‌ ل سه‌ر ڤێ چه‌ندێ دهێته‌ كرن بۆريێن غازێ دێ هێنه‌ دانان و ل دهۆكێ ژى به‌رهه‌مئينانا كاره‌بێ دێ بيته‌ غاز”.

ل دۆر وێ چه‌ندێ ژى كو دهۆك هاتيه‌ پشت گوهـ هاڤێتن و به‌هرا وێ يا كاره‌بێ كێم دهێت، محه‌مه‌د ئه‌مين هه‌ورامى گۆت: “دهۆك نه‌هاتيه‌ پشت گوهـ هاڤێتن و ب رژدى ل سه‌ر ڤێ ئاريشێ كار دكه‌ين و سه‌رۆكێ حوكمه‌تێ و وه‌زاره‌تێن په‌يوه‌نديدار و پارێزگارێ دهۆكێ ژى گه‌له‌ك ب گرنگى ل سه‌ر ڤى بابه‌تى كار دكه‌ن”.

ئه‌ڤرۆ نيوز:

پشكا پێشبينيان ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو ژ ئه‌نجامێ درێژبوونا كارتێكرنا فشارێن ده‌ريا ناڤه‌راست بۆ سه‌ر ده‌ڤه‌رێ، ئه‌ڤرۆ رۆژا پێنجشه‌مبى ل دانێ ئێڤارى فشارێن نزمێن ده‌ريا ناڤه‌راست  ده‌ڤه‌رێ دێ زێده‌ بن و باران بارين ل ئێڤاريا رۆژا پێنجشه‌مبى ل هنده‌ك ده‌ڤه‌ران دێ هه‌بيت و ب شه‌ڤ ئاستێ باران بارينێ دێ زێده‌تر بيت.

ئاشكه‌را ژى كريه‌ كو ل رۆژا ئه‌ينى كارتێ:رنا فشارێن نزمێن ده‌ريا ناڤه‌راست دێ زێده‌تر لێ هێن و باران ل هه‌موو ده‌ڤه‌ران باريت و ل هنده‌ك ده‌ڤه‌رێن چيايى باران دێ ب دژوارى باريت.

هه‌ر ب گۆره‌ى ڤێ راپۆرتا كه‌شناسيێ باران بارين ل سه‌نته‌رێ پارێزگه‌هان “دهۆك، هه‌ولێر، سلێمانى و هه‌له‌بچه‌” دێ د سه‌ر 18ملم دا بيت و ل ده‌ڤه‌رێن چيايى ژى زێده‌ترى 40ملم ب تايبه‌ت ئامێدى و ئاكرێ و زاخۆ و رانيه‌ و ره‌واندوز و چومان و سوران. ده‌ليڤا به‌فر بارينێ ژى ل گه‌ل ڤێ پێلێ ل ده‌ڤه‌رێن چيايى يا هه‌ى.

پشكا پێشبينيان خۆيا ژى كريه‌ كو ل ده‌مێ هاتنا ڤێ پێلێ، پلێن گه‌رمێ دێ نزم بن و ل ده‌مێ باران بارينێ دێ هنده‌ك بريسى ژى ل گه‌ل بن، “رۆژا ئێكشه‌مبى دێ كارتێكرنا ڤێ شه‌پۆلێ ب دووماهى هێت”.

ئه‌ڤرۆ نيوز:

ئه‌ندامه‌كا فراكسيۆنا پارتى ديموكراتى كوردستان ل جڤاتا نوونه‌رێن عيراقێ ئه‌و خالێن ئه‌رێنى ئاشكه‌را كرن كو د بوودجێ 2019ێ يێ عيراقێ دا ب خوه‌ ڤه‌ گرتينه‌ و به‌رژه‌وه‌نديا خه‌لكێ كوردستانێ تێدايه‌.

هه‌دار بارزانى، ئه‌نداما فراكسۆنا پارتى ديموكراتى كوردستان ل جڤاتا نوونه‌رێن عيراقێ ل پێگه‌هێ خوه‌ يێ تايبه‌ت ل تۆڕا جڤاكيا فه‌يسبۆكى به‌لاڤ كريه‌ كو بوودجێ 2019ێ يێ عيراقێ كو شڤێدى ده‌نگ ل سه‌ر دا، د چه‌ند خالان دا د به‌رژه‌وه‌نديا خه‌لكێ كوردستانێ دايه‌.

هه‌دار بارزانى دده‌ت ئاشكه‌را كر كو هنارتنا مووچێ فه‌رمانبه‌ران و هێزێن پێشمه‌رگه‌ى بێ پاشكه‌فت، د سه‌ر هندێ دا هه‌كه‌ كێشه‌ ژى بكه‌ڤنه‌ ناڤبه‌را هه‌ولێر و به‌غدا، ئه‌ڤه‌ ژى ب گۆره‌ى برگا (ج) ژ ماددێ 10 يێ قانوونا بوودجێ.

دايه‌ زانين ژى كو مه‌زاختنا شايسێن جوتيارێن هه‌رێما كوردستانێ يێ سالێن ناڤبه‌را 2014ێ هه‌تا 2016ێ ب گۆره‌يى ماددێ 30 يێ قانوونێ.

ئه‌نداما فراكسيۆنا پارتى ديموكراتى كوردستان ل جڤاتا نوونه‌رێن عيراقێ دبێژيت: “كه‌سوكارێن شه‌هيدان دێ هێنه‌ قه‌ره‌بووكرن و بێسه‌رشوون بوويێن شه‌رێ داعش كو ئه‌و ژى ب گۆره‌ى ماددێ ژماره‌ 20 يێ سالا 2009ێ و قانوونا ژماره‌ 16 يا سالا 2010ێ و ماددێ (3، 5 و 7) يێن قانوونا بوودجا 2019ێ.

هه‌دار بارزانى ئاماژه‌ ب وێ چه‌ندێ ژى كريه‌ كو د بوودجا عيراقێ دا چه‌ندين پرۆژێن دى ژى بۆ باژارێن هه‌رێما كوردستانێ دێ هێنه‌ ئه‌نجام دان.

هه‌ر ب گۆره‌ى پێزانينێن ئه‌ڤرۆ نيوز بڕياره‌ ژ دەرڤەی بوودجەیێ شەش ملیار دینار بۆ هندەک باژێرێن کوردستانێ ب دەست ڤە هاتينه‌ كو ئه‌وى پارەى چ پەیوەندی ب بووجەدیا گشتی یا عيراقێ ڤه‌ نینە ب تنێ دێ تایبەت بن بۆ پڕۆژێن جودا یێن ئاڤەدانکرنێ ب ره‌نگه‌كى هەڵەبجە دو ملیار دینار و قەڵادزێ دو ملیار دینار و دهۆک ئێک ملیار دینار و سۆران ژی ئێك ملیار دینار.

 

ئه‌ڤرۆ نيوز:

فراكسيۆنا پارتى ديموكراتى كوردستان ئيدانا بۆردۆمانا توركيا ل ده‌ڤه‌را دێرالۆك ل قه‌زا ئامێديێ دكه‌ت و رادگه‌هينيت كو بۆردۆمانا خه‌لكێ سڤيل ل هه‌رێما كوردستانێ چو به‌هانه‌ نينن.

ده‌قێ راگه‌هاندنێ:

ب مخابنى ڤه‌ جاره‌كا دى ژ ئه‌گه‌رێ بۆردۆمانا توركيا ل ده‌ڤه‌رێن سنورى يێن نێزيك باژێركێ دێرالۆك يا سه‌ر ب قه‌زا ئامێديێ دو وه‌لاتى شه‌هيدبوون و دو كه‌س ژى دبێ سه‌روشوونن.
سه‌ره‌راى سه‌ره‌خۆشيا فراكسيۆنا پارتى بۆ بنه‌مالا شه‌هيدان، هيڤيا دياربوونا چاره‌نڤيسێ بێسه‌روشوون بوويان دخوازين، جاره‌كا دى ته‌كتس ل سه‌ر هه‌لويستێ خوه‌ يێ نه‌گۆڕ دكه‌ين كو بۆردۆمانا خه‌لكێ سڤيلێ هه‌رێما كوردستانێ چو به‌هانه‌ نينن و ب دژوار ئيدانه‌ دكه‌ين و پێدڤيه‌ ئه‌و هێزێن بووينه‌ ئه‌گه‌رێ بۆردۆمانێ ململانێ يا خوه‌ نه‌كه‌ن دا كو خه‌لكێ سڤيل و گۆندێن هه‌رێما كوردستانێ نه‌بنه‌ قوربانى.

فراكسيۆنا پارتى

ل په‌رله‌مانێ كوردستانێ

23ى كانوونا دويێ 2019

 

ئه‌ڤرۆ نيوز:

سه‌رۆكێ جڤاتا پارێزگه‌ها كه‌ركووك راگه‌هاند كو پۆستێ پارێزگارێ كه‌ركووك به‌ركه‌فتێ ليستا برايه‌تى يا كه‌ركووكێ يه‌ و ئه‌و ماف ژى ده‌ستكه‌فتێ پارتى ديموكراتى كوردستانه‌.

رێبوار ته‌له‌بانى، سه‌رۆكێ جڤاتا پارێزگه‌ها كه‌ركووكێ د داخۆيانيه‌كێ دا بۆ ده‌نگێ ئه‌مريكا راگه‌هاند كو پێدڤيه‌ هه‌تا كاودانێن پارێزگه‌ها كه‌ركووك ئاسايى نه‌بن، چو پارێزگاران بۆ كه‌ركووك نه‌دانن، چونكو هه‌كه‌ ب دانن ژى چو ده‌سته‌لات نابيت، “نابيت پارێزگاره‌ك بهێته‌ دانان ل ژێر پۆستالا له‌شكرى كار بكه‌ت”.

رێبوار ته‌له‌بانى گۆت: “كۆمبوونا جڤاتا پارێزگه‌هێ بێ سه‌رۆكێ جڤاتێ ناهێته‌ كرن، به‌لێ ژ به‌ر كو نها ره‌وش نه‌يا ئاسايى يه‌ و مه‌ترسى ل سه‌ر ژيانا من هه‌يه‌، نه‌شێم ڤه‌گه‌رمه‌ كه‌ركووك هه‌تا لايه‌نه‌ك گه‌ره‌نتيا ژيانا من نه‌كه‌ت، به‌لێ هه‌كه‌ لايه‌نێن سياسى گه‌هشتنه‌ رێكه‌فتنێ، دشيان دايه‌ ب گۆره‌ى په‌يره‌وى روونشتنێن جڤاتێ ژ ده‌رڤه‌ى كه‌ركووك ژى بهێنه‌ ئه‌نجام دان و يێ ئاماده‌مه‌ وێ روونشتنێ ب رێڤه‌ ببه‌م”.

ده‌رباره‌ى پۆستێ پارێزگارێ كه‌ركووك ژى گۆت: “هه‌كه‌ ب گۆره‌ى ده‌ستكه‌فتێ هه‌لبژارتنان بيت ئه‌و پۆست به‌هرا ليستا برايه‌تى يه‌ و د ناڤ ليستا برايه‌تى ژى دا پارتى پترينه‌ و به‌ر ب وێ حزبێ دكه‌ڤيت، به‌لێ هه‌كه‌ ب گۆره‌ى ده‌ستكه‌فتێ سياسى بيت، وێ چه‌ندێ رێكه‌فتن دڤێت”.

ئەڤرۆ نیوز:

رێڤەبەریا گشتی یا سەقاناسی و بیڤەلەرزێ ل هەرێما کوردستانێ راگەهاند کو پێلەکا بەفر و بارانێ ل هەرێما کوردستانێ دێ باریت. ل ناڤ باژێران ژی بەفر دێ باریت.

د نڤیسارەکێ دا کو دانەک ب دەست ئەڤرۆ نیوز کەفتیە، پشکا پێشبینیان ل رێڤەبەریا گشتی یا سەقاناسی و بیڤەلەرزێ ل هەرێما کوردستانێ ئاشکەرا کر کو ئەڤ شەڤە، درەنگ پارستە هەوایەکێ سار دێ ژ ناڤەراستا ئورۆپا روو ل دەڤەرێ کەت.

ئاشکەرا ژی کریە کو سوبەهی رۆژا پێنجشەمبی رێکەفتی 17ی کانوونا دویێ 2019 ل هەموو سەنتەرێن قەزا و ناحیێن دەڤەرێن چیای یێن هەرێما کوردستانێ بەفر دێ باریت، هەروەسا پێشبینی دهێتەکرن ل سەنتەرێ پارێزگەهێن سلێمانی، دهۆک و هەلەبچە بەفر بباریت و ئەگەر ژی هەیە ل سەنتەرێ پارێزگەهێن هەولێر و کەرکووک ژی بەفر تێکەلی بارانێ ببیت و بباریت.

ئاماژە ب وێ چەندێ ژی کریە کو پلێن گەرمێ دێ روو ل نزمبوونەکا بەرچاڤ کەن و ل دەڤەرێن چیایی ژی دێ پلێن گەرمێ چنە دبن سفرێ دا.

پشکا پێشبینیان ل رێڤەبەریا گشتی یا سەقاناسی و بیڤەلەرزێ ل هەرێما کوردستانێ دا دیارکرن کو کارتێکرنا ڤێ پێلێ هەتا سپێدەهیا رۆژا ئەینی ل سەر هەرێما کوردستانێ هەبیت.

3812

ئه‌ڤرۆ نيوز، نيوار محه‌مه‌د سه‌ليم:

ژێده‌ره‌كێ هايدار ژ پارێزگه‌ها دهۆكێ راگه‌هاند كو سوبه‌هى ده‌واما فه‌رمى يه‌ و بهێنڤه‌دان نينه‌، ئه‌ڤه‌ و دو رێڤه‌به‌رێن پارێزگه‌ها دهۆكێ ژى ئه‌ڤ چه‌نده‌ پشت راست كر.

ژێده‌ره‌كى ژ كوچكا پارێزگه‌ها دهۆكێ كو نه‌ڤيا ناڤێ خوه‌ ئاشكه‌را كه‌ت بۆ ئه‌ڤرۆ نيوز ئاشكه‌را كر كو سوبه‌هى ده‌واما فه‌رمى يه‌ ل سه‌رانسه‌رى پارێزگه‌ها دهۆكێ و رێڤه‌به‌ريێن ميرى ژى ل سه‌ر ڤێ چه‌ندێ هاتينه‌ هايداركرن.

ژ لايه‌كێ دى ڤه‌، ئه‌ڤرۆ نيوز په‌يوه‌ندى ب دو رێڤه‌به‌رێن ميرى يێن پارێزگه‌ها دهۆكێ كر كو ئه‌و هاتينه‌ ئاگه‌هداركرن كو سوبه‌هى ده‌واما فه‌رمى يه‌ و پێدڤيه‌ هه‌موو فه‌رمانبه‌ر پێگريێ ب بڕيارێ بكه‌ن.

هه‌ر چه‌نده‌ ب گۆره‌ى په‌رله‌مانێ كوردستانێ 6ى كانوونا ئێكێ ب ره‌نگه‌كى فه‌رمى وه‌كو بهێنڤه‌دان هاتينه‌ نياسين، به‌لێ بۆ ماوێ چه‌ند سالايه‌، ژماره‌كا زۆر ژ رێكخراوێن جڤاكێ سڤيل داخواز دكه‌ن كو ئه‌ڤ بهێنڤه‌دانه‌ بهێته‌ ره‌تكرن ب به‌هانه‌يا وێ چه‌ندێ كو جه‌ژنا له‌شكرێ عيراقێ يه‌ و وى له‌شكرى ب ده‌هان هزار كوڕێن كورد كوشتينه‌.

ئه‌ڤرۆ نيوز، نيوار محه‌مه‌د سه‌ليم:

زه‌لامه‌كێ پير، ده‌سته‌كێ جلكێن سۆر يێن ل به‌ر، ريهـ و سمبێلێن وى د سپى نه‌، گوونيه‌ك يێ ل سه‌ر ملێ وى و يێ پڕه‌ ژ دياريان، مه‌زن و بچووك ل دره‌نگيا دووماهى شه‌ڤ ژ سالێ، دا كو دياريان بۆ وان ببه‌ت و پێكڤه‌ بخێرهاتنا سالا نوو بكه‌ن، ل هنده‌ك وه‌لاتان ب “بابا نوێل” و ل هنده‌ك جهان ژى ب “سانتا كلۆز” دهێته‌ هژمارتن، به‌لێ ناڤێ وى يێ دروست “قه‌شه‌ نيكولاس”ه‌. هنده‌ك وه‌سان باوه‌ر ناكه‌ن كو ئه‌و راستيه‌ و چيرۆك يا هه‌ى و نه‌ چيرۆكه‌كه‌ هاتينه‌ چێكرن وه‌كو سه‌رهاتى و چيرۆك و فلم.

ل خوارێ مه‌ بۆ هه‌وه‌يێن هێژا 8 راستى ل سه‌ر بابا نوێل يێ راستى يێن به‌رچاڤ كرين:

  • يێ ل باژێرێ “مۆڕا” ل ئاسيا بچووك”ناڤێ پشكا ئاسيايه‌ ژ وه‌لاتێ توركيا”، ژ بابه‌كى ب ناڤێ “ئه‌بيڤانيوس” و دايكه‌كێ ب ناڤێ “تۆنا” ژ دايك بوويه‌ و ب ره‌نگه‌كێ گه‌له‌ك باش هاتيه‌ بخودانكرن و ل ژيێ پێنج ساليێ فێرى زانستێن كه‌نيسێ بوويه‌ و دلێ وى ب خودێ ڤه‌ هاتيه‌ گرێدان.
  • د ژيێ 19 ساليێ دا بوويه‌‌ ره‌به‌ن و ل وێرێ مايه‌ هه‌تا كو بوويه‌ قه‌شه.
  • بابێ وى مال و مولكێ خوه‌ بۆ وى هێلايه‌، وى ژى هه‌موو بۆ كارێن خێرێ ته‌رخان كريه‌، هه‌كه‌ زانيبا كو خێزانه‌ك پێدڤى ب پارايه‌، دا چيت و پێدڤيا وان قه‌تينيت بێ كو كه‌سه‌ك بزانيت ئه‌وه‌ و چو شوونوار ژى ل پشت خوه‌ نه‌دهێلان.
  • چيرۆكا وى ب له‌ز ل ئاسيا به‌لاڤ بوو، ده‌ما زه‌لامه‌كێ 50 سالى پاره‌ نه‌يى، هه‌رسێ كچێن خوه‌ بده‌ته‌ شوو، بڕيار داى كو بدانيته‌ جهێ له‌شفرۆشيێ، به‌لێ نيكولاس ئه‌و بابه‌ت زانى و وه‌كو سرۆشتێ خوه‌ يێ هه‌رجار ب شه‌ڤ 100 دينار د ناڤ كيسه‌كى دا د په‌نجه‌را خانيێ وى ڤه‌ هاڤێتنه‌ ژوور، سپێدێ ئه‌و زه‌لامێ پێنجى سالى رابوو و پاره‌ ديتن و كه‌يفا وى گه‌له‌ك هات و كچا خوه‌ يا مه‌زن دا شوو، رابوو ل گه‌ل كچا ناڤێ ژى هه‌مان هه‌لويست وه‌رگرت، به‌لێ ڤێ جارێ ل پشت په‌رده‌ى ته‌ماشه‌كر چونكو وى دزانى دێ ئه‌و كه‌س هێته‌ڤه‌، ب راستى ژى وه‌سان بوو ده‌ما ره‌به‌ن نيكولاس ديتى.
  • وه‌كو “مه‌تران” بۆ باژێرێ “مۆڕا” و بۆ چه‌ندين سالان ژى هاته‌ زيندانكرن ژ به‌ره‌ڤانيكرنا وى ژى كرستيانيه‌تێ ل سه‌ر ده‌مێ پادشاهـ “دقلديانوس”.
  • پشتى وه‌غه‌ركرى، گه‌له‌ك كه‌سان ب ناڤێ وى ديارى ل جه‌ژنان لێك گۆهاڕتن.
  • ناڤێ بابا نوێل ژ په‌يڤه‌كا فره‌نسى هاتيه‌ ب رامانا “بابێ ژدايكبوونێ” ل سالا 1881 وێنه‌گرێ ئه‌مريكى تۆماس نيست ل رۆژناما “هاربرس” وێنێ ئێكێ يێ بابا نوێل چێكر، ئه‌وێ ئه‌م ئه‌ڤرۆ دنياسين، وه‌كو هه‌وه‌كا بانگه‌شێ بۆ كۆمپانيه‌كا مه‌زن، ژ وى ده‌مى وه‌ره‌ قه‌شه‌ نيكولاس ب بابا نوێل يێ خودانێ جلكێن سۆر هاتيه‌ نياسين.

ئه‌ڤرۆ نيوز، نيوار محه‌مه‌د سه‌ليم:

پشتى هاتنا به‌فرێ ل ده‌ڤه‌رێن بلند و چيايى ب ره‌نگه‌كێ گه‌له‌ك به‌فره‌هـ ژ قوتابى و وه‌لاتيان به‌ر ب سه‌يرانێن به‌فرێ چووينه‌ ل وان ده‌ڤه‌ران هه‌ر وه‌كو د ڤان ديمه‌نان دا ب دروستى ديار دبيت.

وێنه‌:

سه‌يران سه‌يران سه‌يران سه‌يران سه‌يران سه‌يران سه‌يران سه‌يران سه‌يران سه‌يران سه‌يران سه‌يران سه‌يران سه‌يران سه‌يران سه‌يران سه‌يران

ڤيديۆ:

ئه‌ڤرۆ نيوز:

ئاخفتنكه‌رێ ب ناڤێ حوكمه‌تا هه‌رێما كوردستانێ راگه‌هاند كو رۆژێن 30 و 31ى كانوونا ئێكێ و 1ى كانوونا دويێ ب ره‌نگه‌كێ فه‌رمى ل هه‌رێما كوردستانێ بهێنڤه‌دانا فه‌رمى نه‌.

ده‌قێ داخۆيانيا ئاخفتنكه‌رێ ب ناڤێ حوكمه‌تا هه‌رێما كوردستانێ:

ب هه‌لكه‌فتا سه‌رێ سالا نوو يا زاينى پيرۆزباهيه‌كا گه‌رم ل خێزانێن شه‌هيدان و پێشمه‌رگه‌هێن قاره‌مانێن كوردستانێ و هه‌موو كورێن گه‌لێ خوه‌ دكه‌ين، ب هيڤيا وێ چه‌ندێ ئه‌ڤ ساله‌ ببيته‌ جهێ خوشگوزه‌رانى و سه‌قامگيريێ و ده‌ركه‌فتن ژ گرفت و قه‌يرانان و دووپاتكرنا مۆكمكرنا گيانێ برايه‌تيێ د ناڤبه‌را هه‌موو رۆلێن گه‌لێ كوردستانێ دا.

ب ڤێ هه‌لكه‌فتێ ژى وه‌لاتيێن خوشتڤى يێن هه‌رێما كوردستانێ رادگه‌هينن رۆژێن 30 و 31ى كانوونا ئێكێ 2018 و 1ى كانوونا دويێ 2019 ئانكو ئێكشه‌مبى و دوشه‌مبى و سێشه‌مبى ل هه‌موو داموده‌زگه‌هێن حوكمه‌تا هه‌رێما كوردستانێ دێ بنه‌ بهێنڤه‌دانا فه‌رمى و رۆژا چارشه‌مبى 2ى كانوونا دويێ 2019 ده‌وامى فه‌رمى دێ ده‌ست پێ كه‌ته‌ڤه‌.

سەفین محسین دزەیی

 ‎ئاخفتنكه‌رێ فەرمی يێ حوكمەتا هەرێما كوردستانێ
2018/12/24

website security
WP Facebook Auto Publish Powered By : XYZScripts.com