NO IORG
Facebook

656

ئه‌ڤرۆ نيوز:

بۆ دەمێ چەند ھەیڤانە گرۆپەکێ نۆشدارێن ئەمریکی مژوولی ئەنجامدانا ڤەکولینەکێ نە ل دۆر ئاڤ ڤەخوارنێ و ل دووماھیێ گەھشتینە وی ئەنجامی کو ‏ڤەخوارنا ئاڤا زێدە باشی و خرابیێن خوە ھەنە.‏

د. تولۆس، کو سەرۆکێ وی گرۆپی یە دبێژیت: بەری نوکە چەندین ڤەکولەران ل سەر ڤێ چەندێ کار کرینە و ھندەک ژوان دیارکرینە ڤەخارنا ئاڤا زێدە ‏مرۆڤی زەعیف دکەت، و ھندەک ژی دبێژن بەرۆڤاژی دروستە، ئانکو مرۆڤی قەلەو دکەن، لێ ئەم گەھشتینە وێ باوەریێ کو ھەردو د دروستن ئانکو ڤەخوارنا ئاڤا ‏زێدە باشی و خرابیێن خوە بۆ مرۆڤان ھەنە.‏

ل دووماھیێ ھاتیە: ھەردو بۆچوون د دروستن، چونکو دەمێ ڤەخوارنا ئاڤێ نەیێ دەستنیشانکری یە، لەورا یا ھاریکارە بۆ زەعیفۆنی، ھەروەسا بۆ قەلەوبوونێ ‏ژی، ئانکو ھەکە بەری خوارنێ ب نیڤ دەمژمێری ئاڤێ ڤەخۆی و زکێ برسی بیت ل وی دەمی دێ یا ھاریکار بیت بۆ زەعیفۆنێ، لێ ھەکە ل گەل خوارنێ بھێتە ‏ڤەخوارن دێ یا ھاریکاربیت بۆ قەلەوبوونێ.‏

837

ئه‌ڤرۆ نيوز:

بەری دو رۆژان ھونەرمەندا بەرنیاسا لوبنانی (ئەلیسا) یێ وێنەکێ خوە یێ نوو ل گەل (لیۆنیل مێسی) یاریکەرێ ئەرجەنتینی و یانا بەرشەلۆنە، د ‏ئینستیگرامێ خوە دا بەلاڤکریە و ئەوی وێنەی دەنگڤەدانەکا باش ل سەرئاستێ جیھانێ ب دەستڤە ئینا. ‏

ناڤھاتی، بێی کو ئاماژە ب نووترین بەرھەمێ خوە بدەت، دیارکریە ئەو وێنە ل شەھیانا ( سیسک فابریگاس) یاریکەرێ ئیسپانی و یانا چێلسی یا ئنگلیزی کو ‏بەری چەند رۆژان ھاتبوو کرن ھاتیە گرتن.‏

ئەلیسا، ژ دایکبوویا سالا (1977) یە، ئێکە ژ ھونەرمەندێن بەرنیاسێن لوبنانی، ھەروەسا ل سەر ئاستێ رۆژھەلاتا ناڤەراست ژی یا بەرنیاسە و خودانا ستایلەکێ ‏تایبەتە، ھەتا نوکە چەندین ئەلبۆم و ڤیدیۆ کلیپ بەلاڤکرینە.‏

Image result for ‫اليسا وميسي‬‎

357

ئه‌ڤرۆ نيوز:

رێڤەبەرێ گشتیێ پلاندانانێ ل وەزارەتا ئاڤەدانکرن و ئاکنجیبوونێ ل ھەرێما ‏کوردستانێ راگەھاند، ماوێ ھەشت سالانە حۆکمەتا ھەرێما کوردستانێ ماستەرپلان ‏بۆ دانانا ھژمارەکا زۆر یا جۆتساید و پران ل ھەرێما کوردستانێ دانایە و ھندەک ژ ‏وان پرۆژان ژی ھاتینە چێکرن، بەلێ ژ ئەگەرێ قەیرانا دارایی ژی ھندەک ھاتینە ‏راگرتن و گۆت: ژ ڤی سەرجەمێ پرۆژەیان 97 پرۆژە د ستراتیژی نە و ھەتا نھا تمام ‏نەبووینە نھا حۆکمەت پێدڤی ب ملیارەک و 400 ملیۆن دۆلاران ھەیە بۆ تماماکرنا ‏ڤان پرۆژەیان و ل گۆەری ماستەر پلانێ پێدڤی بوو ل سالا 2018 ئەڤ پرۆژەیە ‏ھەموو تمامبانە، بەلێ ژ بەر قەیرانا دارایی تمام نەبووینە

حۆکمەتا ھەرێما کوردستانێ ماستەرپلانا جۆتسایدکرنا رێک و پرێن ھەموو ‏پارێزگەھێن ھەرێما کوردستانێ دانایە و ئەڤە ژی پێدڤی ب دوو ملیار و 500 ملیۆن ‏دۆلاران ھەیە و پێدڤیە ئەو رێک و پرە ھەموو بھێنە چێکرن.‏

ئەندازیار زانا مستەفا، رێڤەبەرێ گشتیێ پلاندانانێ ل وەزارەتا ئاڤەدانکرن و ‏ئاکنجیبوونێ ل ھەرێما کوردستانێ بۆ ئەڤرۆ دیار کر، ل سالا 2010 حۆکمەتا ‏ھەرێمێ ماستەری پلانەک بۆ چێکرنا وان رێک و پرە دانایە یێن کو جادەیان پێدڤی ‏پێ ھەی بۆ ھندێ ھەموو ببنە جۆتساید و رێ خۆشتر لێ بھێن و ترافیک ژی ل ھەرێمێ ‏کێمتر لێ بھێن و سالانە کۆژمەکێ پارەی بۆ چێکرنا ھندەک ژ وان جۆتساید و پران ژ ‏بۆدجەیا گەشەپێدانا ھەرێمان دھێتە مەزاختن.‏

ئاشکرا ژی کر، ژ ئەگەرێ قەیرانا دارایی ھەتا نھا ھژمارەکا زۆر یا پرۆژەیێن ‏جۆتساید و پران ھاتینە راگرتن و گۆت: ژ بەر ڤێ چەندێ مە ب نڤیسارەکا فەرمی ‏داخواز ژ ھەموو وەبەرھێنەرێن ھەرێما کوردستانێ کریە دەست ب چێکرنا پر و ‏جۆتسایدان ل ھەرێما کوردستانێ ب شێوەیەکێ قەر بکەن، ھەتا حۆکمەتا ھەرێما ‏کوردستانێ بشێت وی پارەی دابین بکەت و بدەتە وان.‏

خویاژی کر کو وەزارەتا وان ژ سەرجەمێ 218 پرۆژەیێن ب ڤی رەنگێ دیارکری، ‏ھەتا نھا 56 پرۆژە ب دووماھی ئیناینە و 162 پرۆژە ژی ھاتینە راگرتن و ھندەک ‏ژی د ئەنجامدانێ دانە، لەوما مە ئەڤ داخوازە ژ سەرمایەدار و وەبەرھێنەران کریە بۆ ‏ئاڤەدانکرنا کوردستانێ و گۆت: ژ ڤی سەرجەمێ پرۆژەیان 97 پرۆژە د ستراتیژی نە ‏و ھەتا نھا تمام نەبووینە نھا حۆکمەت پێدڤی ب ملیارەک و 400 ملیۆن دۆلاران ھەیە ‏بۆ تماماکرنا ڤان پرۆژەیان و ل گۆەری ماستەر پلانێ پێدڤی بوو ل سالا 2018 ئەڤ ‏پرۆژەیە ھەموو تمامبانە، بەلێ ژ بەر قەیرانا دارایی تمام نەبووینە.‏

ئەندازیار زانا مستەفا، رێڤەبەرێ گشتیێ پلاندانانێ ل وەزارەتا ئاڤەدانکرن و ‏ئاکنجیبوونێ ئەو یەک ژی دا زانین، ئەگەر ب گشتی بەرێخوە بدەینە رێ و پرێن ‏ھەرێما کوردستانێ، مە پێدڤی ب 5 ملیار دۆلارێن دیتر ھەیە بۆ ھندێ کوردستانێ ژ ‏ڤی بواری ڤە ب تمامی بھێتە ئاڤەدانکرن.‏

ئەڤرۆ نیوز، باسم قاسم شنگالی:

سپێدەھیا ئەڤرۆ ل گوندەکێ سەر ب قەزا زاخۆ د ناڤبەرا باکوورێ کوردستانێ و قەزا زاخۆ ژ ئەنجامێ گولەیەکا سوپایێ تورکیا گەنجەکێ ئێزدی ھاتە کوشتن.

سه‌عد سەعدۆ کەسوکارێ وی گەنجی يه‌ بۆ ئەڤرۆ نیوز گۆت: (ئەڤرۆ سپێدێ ئەم ھژمارەکا کەسان د ناڤ بیستانەکێ دا بووین و مژوولێ کارکرنێ بووین کو ئەڤ گونده‌ دکەڤیتە سەر سنوورێ قەزا زاخۆ و باکوورێ کوردستانێ، ژ نیشکەکێ ڤە گوله‌یەک ل ئاسمانێ تورکیا بەر ب بیستانی ڤە ھات و ب سەرێ ئێک ژ وان کەسان کەفت کو ل گەل مە کار دکر و ئێکسەر گیانێ خوە ژ دەست دا).

زێدەتر گۆت: (گەنجێ ھاتیە کوشتن ناڤێ وی ماھر عەلی یە و خەلکێ گرعزێرە و ژیێ وی 12 سالە، و نھا تەرمێ وی بەر ب دھۆکێ دھێتە ئینان و رەنگە تەرمێ وی ببەنه‌ شنگالێ بو ڤەشارتنێ).

ئه‌ڤرۆ نيوز:

رێڤەبەرێ گشتیێ وەبەرئینانێ ل ھەرێما کوردستانێ ئاشکرا کر کو بڕیارە ھەموو ‏پڕۆژێن وەبەرئینانێ ل ھەرێما کوردستانێ بھێنە تەمامکرن و حوکمەتێ ل دۆر ڤێ ‏چەندێ ھۆشداری دایە وەبەرئینەران و گۆت: “ھژمارەکا وەبەرئینەران ھاتینە ‏دەستەسەرکرن ژوان ژی وەبەرئینەرێ دھۆکێ خالد حەمکۆ ھاتیە دەستەسەرکرن ژ ‏ئەگەرێ ئاریشان د ناڤ پڕۆژێن ناڤھاتی دا”.‏

دکتۆر نووری عوسمان، سەرۆکێ دەستیەیا گشتیا وەبەرئینانێ ب وەکالەت بۆ رۆژناما ‏ئەڤرۆ دیار کر کو حوکمەتێ ھۆشداری دایە خودانێن پڕۆژێن وەبەرئینانێ ل ‏ھەرێما کوردستانێ دەست ب پڕۆژێن خوە بکەن یێن ھاتینە راگرتن و بڕیارە ھەموو ‏پڕۆژێن وەبەرئینانێ بھێنە تەمام کرن، بەلێ ھێشتا بڕیار نینە مۆلەت ب پڕۆژێن ‏نوو بھێتە دان و ھاتینە راگرتن و بڕیارە پێداچوون بۆ بھێتەکرن دووڤ دا دەست ب ‏دانا مۆلەتا بھێتەکرن.‏

ل رۆژێن بۆری ب فەرمانا دادوەری ھژمارەک وەبەرئینەران ل ھەرێما کوردستانێ ‏ھاتنە دەستەسەرکرن و ل دۆر ڤێ چەندێ دکتۆر نووری عوسمان دیارکر کو بەلێ ‏ھژمارەکا وەبەرئینەرێن خەمساری د پڕۆژێن خوە دا کری ھاتینە دەستەسەرکرن ل ‏ھەولێرێ و ل دھۆکێ ژی (خالد حەمکۆ) ھاتیە دەستەسەرکرن، ئەگەرێ گرتنا ‏وەبەرئینەر خالد حەمکۆی بۆ ڤێ چەندێ ڤەدگەڕیت پڕۆژێن وی وەبەرئینەری ‏ئاریشە تێدا ھەبوون لەوڕا ھاتیە دەستەسەرکرن.‏

ئه‌ڤرۆ نيوز:

رێڤەبەرێ گشتیێ پرۆگرام و چاپەمەنیێ ل وەزارەتا پەروەردێ ئاشکرا کر کو ل سالا بھێت ‏دێ پڕۆگرامێن خواندنێ ب تەمامی ھێنە گوھۆرێن و گۆت: “وەزارەتێ پرتووکێن قوتابخانان ‏بۆ ھەموو قووناغان چاپکرینە و ئەڤ سالە باشترین سال دبیت ددەمێ خوە دا پرتووک بھێنە ‏بەلاڤکرن”.‏

کاوە عومەر، رێڤەبەرێ گشتیێ پرۆگرام و چاپەمەنیێ ل وەزارەتا پەروەردێ بۆ رۆژناما ‏ئەڤرۆ دیار کر کو ئەڤ سالە چو گوھۆڕین ب سەر پرۆگرامێن خواندنێ دا ناھێن، چونکی ‏سالا خواندنێ نێزیک بوویە و د ڤی دەمی دا گوھۆڕینا پرۆگرامان چو مفایێ خوە نابیت، ‏بەلێ وان پلانەکا مەزن ل بەردەستە کو سالا داھاتی گوھۆڕینێن مەزن و تەمام بسەر ‏پڕۆگرامێن خواندنێ دا بھێن و دێ بۆ سالا خواندنێ 2019 – 2020ێ گوھۆڕینێن بەرچاڤ ‏ھێنەکرن و گۆت: “نوکە کار یێ ل سەر گوھۆڕینا پڕۆگرامان دھێتەکرن و سەرۆکاتیا جڤاتا ‏وەزیران ژی رەزامەندی ل سەر ھندەک گوھۆڕینان کریە و ھەکە چو ئاستەنگ نەھێنە پێش ‏پلانا وەزارەتێ ئەوە ھەموو پڕۆگرامێن خواندنێ بھێنە گوھۆڕین”.‏

ناڤھاتی ئاماژە دا وێ چەندێ کو پرتووک بۆ ھەموو پۆلێن قووناغێن بنەڕەتی و ئامادەیی ‏ھاتینە چاپکرن و پشکەک ژ وان گەھشتینە کۆگەھێن وەزارەتێ و گۆت: “ئەم پێشبینی ‏دکەین ئەڤ سالە باشترین سال بیت بۆ بەلاڤکرنا پرتووکا، چونکی مە ل بەرە ل دەستپێکا ‏ڤەبوونا دەواما قوتابخانا پرتووک ئێکسەر ل سەر ھەموو قوتابیان بھێنە بەلاڤکرن، ھەتا ‏رێژەیەکا زۆر زێدەتر ل سالێن بۆری ھاتینە چاپکرن و چو ئاریشە نابن ل دۆر پرتووکێن ‏قوتابخانێ”.‏

72
فۆتۆ: نێت

ئەڤرۆ نيوز:‏

ب مەرەما خزمەتکرنا جۆتیار و مێشەڤانان، کارگەھەکا تایبەت ب دروستکرنا ‏ھنگڤینی ل دەڤەرا بارزان ھاتە دانان و زێدەباری ھنگڤینێ دەڤەرێ، د شیان دایە ‏ھنگڤینی ل دەڤەرێن دی ژی وەربگریت.‏

محەمە‌د مێرگە‌سووری، رێڤەبەرێ چاندنا مێرگەسوور بۆ ئەڤرۆ گۆت: “بۆ جارا ‏ئێکێ یە ل سنوورێ قەزا مێرگەسوور و دەڤەرا بارزان، کارگەھەکا تایبەت ب ‏چێکرنا ھنگڤینی ڤە دھێتە دانان کو دکەڤیتە شانەدەر”.‏

خویا ژی کر، ل سنوورێ دەڤەرا بارزان پتری 15 ھزار مێشێن ھنگڤینی ھەنە و ‏شیانێن بەرھەمئینانا پتری 150 تەنێن ھنگڤینی ھەنە، دەڤەرا بارزان ژی ب ‏ئێک ژ دەڤەرێن چیایی و سروشتی دھێتە نیاسین و یا تەژیە ژ کۆلیک و گۆل و ‏کەسکاتی، دەڤەرەکا باشە بۆ ب خودانکرنا مێشێن ھنگڤینی، ھەموو مێشەڤانێن ‏دەڤەرا بارزان دێ مفای ژ وێ کارگەھێ بینن بۆ داگرتنا ھنگڤینێ خوە بۆ ناڤا ‏قودیان و ھنارتنا وان بۆ بازاری وەرگرن.‏
رێڤەبەرێ چاندنا مێرگەسوورێ ئاشکرا ژی کر، خودانێ کارگەھێ ب خوە ژی ‏پرۆژەکێ زانستیێ بخودانکرنا مێشان کو پتری 400 مێشان بخوەڤە دگریت دانایە ‏و گۆت: “ژ ئەگەرێ گورانکاریێن کەشوھەوای و کێم بارینابارانێ و سۆتناپووش و ‏پاوانی ل دەڤەرێن سنووری و بەردوامبوونا بوردۆمانا فڕۆکێن تورکیا، رێژا ‏بەرھەمئینانا ھنگڤینی ل دەڤەرا بارزان کێمکریە”.‏

ل گورەی ئاخڤتنێن مێرگەسووری کیلۆیا ھنگڤینی ل دەڤەرا بارزان د ناڤبەرا 20 ‏بۆ 70 ھزار دیناران دا دھێتە فرۆتن و گۆت: “ھنگڤینێ دەڤەرا بارزان پشکداری ‏د بەریکانێن نیڤدەولەتی و ھەریمی دا کریە و ل رێزا پێشیێ دھێت”.‏

ئه‌ڤرۆ نيوز:‏

سەرۆکێ دەستەیا بلندا بنگەھێ لالش یێ رەوشەنبیری و جڤاکی ل دھۆکێ دیار ‏کر کو پشتی بۆرینا چار سالان ل سەر جینۆسایدا شنگالێ، رەوشا شنگالێ ب ڤی ‏رەنگی نامینیت و سەرکردایەتیا کوردستانێ دەستبەرداری شنگالێ نابیت و ‏دبێژیت: ئەڤە چار سالا ل سەر جینۆسایدا شنگالێ بۆرین و ھێشتا دۆرێن سێ ‏ھزار ئێزدیان ژ زارۆ، زەلام و ژنان د بێ سەروشوونن، پتری (200) ھزار ئێزدی ‏ھێشتا د کەمپان دا دژین و ئاوارەنە.‏

شێخ شامۆ، سەرۆکێ دەستەیا بلندا بنگەھێ لالش یێ رەوشەنبیری و کۆمەلایەتی ‏ل دھۆکێ دیار کر کو ئەڤ سالە کارگێڕیا پارێزگەھا دھۆکێ ل گەل دام و ‏دەزگەھێن پەیوەندیدار و بنگەھێ لالش ل سەر ئاستەکێ بلند ل پارێزگەھا ‏دھۆکێ، سالڤەگەڕا چارێ یا جینۆسایدا شنگالێ دێ ھێتە ساخکرن و گۆت: ‏‏”بڕیارە ل ئێڤاریا ئەڤرۆ 2/8/2018 سالڤەگەڕا چارێ یا جینۆسایدا شنگالێ ب ‏چەند چالاکیان و ب پشکداریا رزگاربوویێن ئێزدی بھێتە ساخکرن”. ‏

گۆتژی: “ھەکە ھەوێن قرکرنێ یێن ل بەرێ تووشی ئێزدیان بووین ژ بەر ئایینی ‏بن، ئەگەرێن نەدیار ل پشت ڤێ کارەساتا داویێ نە، ل پێشیێ ھێرشکرنا سەر ‏ھەبوونا ئێزدیان ژ بال گرۆپێن ئیسلامی یێن رادیکالێن توندرەو ڤە یێن کوشتن ‏و سەرژێکرن و کەنیزێ دکەن، دیسا کۆنترۆلکرنا پێگەھێ شنگالێ یێ ستراتیژی ب ‏پشتەڤانیا ھەوالگێریا ھەرێمی کو ئەڤ روودانێن ڤێ داویێ سەلماندن پیلانەکا ‏ھەوالگیریا ھەرێمی دڤیا چەند ئارمانجان ب دەستڤە بینیت، ژ وانا کێمکرنا رێژا ‏ئاکنجیێن ئێزدی و گرتنا ئالیێ رۆژائاڤایێ باشوورێ ھەرێما کوردستانێ، ھەموو ‏دزانن کو دەڤەرێن ئێزدیان پشکەکا دیرۆکی نە و ژ کوردستانا دەیک نائێنە ‏ڤەقەتاندن، پاشی کوردستان یا ئارمانج کری بوو پشتی ئێزدیێن بێ گونەهـ”.

شامۆی ئاشکرا ژی کر کو ئەو جوگرافیا کوردێن ئێزدی تێدا دژین وەکر، ئەو ‏باجەکا مەزن د درێژاھیا چەرخێن بۆری دا بدەن، بەلێ خەلکێ شنگالێ ئەڤ ‏ھەموو بارێ گران ھەلگرت و گۆت: “ب مخابنی ڤە ل دەمێ رزگارکرنا شنگالێ ژ ‏دەستێ گرۆپێ داعش ل سەر دەستێ ھێزێن پێشمەرگێ قارەمان و ب پشتەڤانیا ‏ئاسمانی یا فڕۆکێن ھەڤپەیمانیا نێڤدەولەتی، پیلانێن ھەوالگێری یێن ھەرێمی ژ ‏ناڤبرن، پاشی شنگال بوو گۆڕەپانا بەرھنگاربوون و ھەڤڕکیێ ل سەر دەستھەلاتێ ‏د ناڤبەرا پڕانیا ھێز و گرۆپێن ھەرێمی دا، ئەوێن کو بۆ چاڤێن تاری یێن ‏خەلکێ شنگالێ و خزمەتکرنا وێ ھاتبن، بەلێ ب تنێ ژ بۆ پێگەھێ وێ یێ ‏جوگرافی ھاتینە”.‏

شێخ شامۆ گۆتژی: “رەوش ل شنگالێ وەکو خۆ نامینیت، چنکو سەرکردایەتیا ‏سیاسی یا کوردستانێ گرنگیەکا زۆر ددەتە شنگالێ، د سەر ھەر کاودانەکی ڕا ‏دەستان ژێ بەرنادەت، سەرۆک مەسعود بارزانی گرنگیەکا تایبەت ددەتە شنگالێ و ‏خەلکێ وێ، دیسا مە ھەڤال ل ئورۆپا و ئەمریکا ھەنە، ئەو باش ئاگەھدارن ل ‏سەر رەوشێ، ئەم دبینین پرۆژێن ئاڤەدانیێ و سەقامگیریێ بۆ شنگالێ ھەنە، بەلێ ‏ئەڤ چەندە گرێدای پێشھات و رێککەفتنێن د ناڤبەرا ھەولێر و بەغدا دا دھێنە ‏کرن”.‏

خویا ژی کر کو ل سەر مە ئێزدیان پێدڤیە ھەدارێ بکێشین و خودان ئیرادەکا ‏بھێز بین، شاشیان دوبارە نەکەینە ڤە، ب بێھنفرەھی پێشدا بچین، باش بزانین ‏ھندەک ھەنە پلانان بۆ ب دەستڤەئینانا ئارمانجێن خوە ل سەر کیستێ مە و ‏برینێن خەلکێ مە ددانن، ب بەلگەڤە پرسا سۆتنا دەنگێن ب ھزاران دەنگدەرێن ‏خەلکێ مە د کەمپێن ئاوارەبوونێ دا وەکو جینۆسایدەکا ھەلبژارتنان بوو ھات ‏پشتی جینۆسایدا ئەردی و مرۆڤی، ئەو ژی ژ بۆ کێمکرنا پێگەھێ پارتی ‏دیموکراتی کوردستان بوویە کو دەڤەرێن ئێزدیان ژ گرنگترین پێگەھێ پارتی نە.‏

شێخ شامۆ ل دووماھیێ دیار کر کو بابەتێ گرتیێن ئێزدی ناھێتە ژبیرکرن و ‏گۆت: ” ئەم دوپات دکەین کو ل سەر جڤاکێ ئێزدی ب بۆچوونێن خوە یێن ‏جوداڤە رێزێ ل رەڤاندیان بگرن، ئەو شەرەفا مەنە، شانازیێ پێ دبەین، دوپات ‏دکەین کو دیرۆک دلۆڤانیێ ب کەسێ نابەت یێن دەستدرێژی کرینە سەر ‏رەڤاندیێن ئێزدی،‎ ‎ژ بەرکو ئەڤ کارێن ھۆڤانە و دڕندانە دقانوونا جیھانا سەردەم ‏دا نەماینە، بەلێ ئەو ژ دەمەکی بۆ دەمەکێ دی ل نک گەل و چینێن جودا دیار ‏دبنە ڤە”. ‏

ئه‌ڤرۆ نيوز:‏

ژ ئەگەرێ جینۆسایدا شنگالێ، ئێزدیان رێورەسمێن ئولی، ل پەرستگەھا لالش ‏نەدکرن، د کۆمبوونەکێ دا جڤاتا رۆحانی یا ئێزدیان بڕیار دا، ئێدی ھەموو جەژن و ‏ھەلکەفت ل پەرستگەھێ بھێنە کرن و ل 31-7-2018 دەست ب رێورەسمێن ‏ئولی یێن جەژنا چلێ ھاڤینێ ھاتە کرن.‏

بابە چاویش، ئولدارێ ئێزدیان ل پەرستگەھا لالش بۆ ئەڤرۆ دیار کر کو پشتی 40 ‏رۆژێن چلێ ھاڤینێ ب دووماھی دھێن، ئێزدی رۆژا دووماھیێ دکەنە جەژن، ل ‏‏31-7-2018 رێورەسمێن ئولی یێن جەژنا چلێ ھاڤینێ ل پەرستگەھا لالش ‏دەستپێکرن و گۆت: “ل رۆژا 2-8-2018 رێورەسمێن جەژنا چلێ ھاڤینێ ھاتنە ‏گێڕان، سەردەری و دێدارێن ئایینی رێورەسمان دگێڕن، ئێزدی قەستا پەرستگەھا ‏لالش دکەن و د سەر پرا سەلاتێڕا دەرباز دبن، دچنە سەر حەودا کانیا سپی و دەست ‏و چاڤێن خوە پێ پاقژ دکەن، ھەر ئێزدیەکێ بچیتە پەرستگەھا لالش پێدڤیە ل ‏کانیا سپی و دەریێ قاپیێ و زمزمێ و بەرێ شباکێ و نیشانگەھێن خاس و ‏مەزارگەھێن ئایینی زیارەت بکەت”.‏

بابە چاویشی ئاماژە دا وێ چەندێ ژی کو ل ھەموو ئێڤاریان ژی سەما دھێتە کێشان ‏و چرایێن ئاقد و نیشانگەھێن خاسا دھێنە ھەلکرن، رێورەسمێن قنتارێ دھێنە ‏گێڕان، کەسێن نە مۆرکری ژی ب ئاڤا کانیا سپی دھێنە مۆرکرن ،ھەموو ئێڤاریان ‏ژی بەیت و قەسیدە دھێنە گۆتن و سمات دھێتە چێکرن، ب ڤان رێورەسمێن ئایینێ ‏رێورەسمێن رۆژانێن جەژنا چلێ ھاڤینێ دھێنە گێڕان. ‏

چەندێن رێورەسمێن جەژنێن ئێزدیان ل پەرستگەھا لالش دھێنە گێڕان، وەکو ‏جەژنا چلێ زڤستانێ، جەژنا چلێ ھاڤینێ، جەژنا جەمایێ کو جەژنا چلێ ھاڤینێ ‏ئێک ژ وان جەژنێن ئێزدیانە ل پەرستگەھا لالش دھێتە کرن.‏

لوقمان سلێمان، بەرپرسێ نڤیسینگەھا پەرستگەھا لالش یا راگەھاندنێ بۆ رۆژناما ‏ئەڤرۆ خویا کر کو جەژنا چلێ ھاڤینێ ل 24 حوزەیرانێ دەست پێ دکەت حەتا ‏‏2/8 بۆ ماوێ سێ رۆژا رێورەسمێن جەژنێ ل پەرستگەھا لالش دھێنە گێڕان و گۆت: ‏‏”د ڤێ جەژنێ دا، ئەو کەسێن نەھاتینە مۆرکرن ب ئاڤا کانیا سپی دھێنە مۆرکرن، ژ ‏بەرکو ل نک ئاینێ ئێزدیان ئەڤە فەرزە، دیسا د ڤێ جەژنێ دا پتری 300 زارۆ دێ ‏ھێنە مۆرکرن، ئەڤە بڕیارا میری بوو کو ئەڤ رێورەسمە بھێتە گێڕان، داکو ئێزدیاتی ‏نەھێتە ونداکرن و پێشبینی دھێتە کرن د ڤێ جەژنێ دا 300 ھزار کەس سەرەدانا ‏پەرستگەھا لالش بکەن”.‏

ئه‌ڤرۆ نيوز:

چاڤدێرێن سیاسی ئاماژە بوێ چەندێ دکەن، حوکمەتا عیراقێ ‏حوکمەتەکا فاشلە و نەشیایە ب ئەرکێ خوە رابیت، ‏مامۆستایەکێ زانکۆیێ ژی دبێژیت، خوەنیشادانێن باشوورَ ‏عیراقێ کاریگەری ل سەر پڕۆسا پێکئینانا حوکمەتا نوو ‏پەیداکریە، و دێ زێدەتر گیرووبیت، شرۆڤەکارەکی ژی دیارکر، ‏خوەنیشادان دێ بەردەوامبن ھەتا دگەھنە ئەنجامەکی.‏

دکتۆر سەباح بەرزنجی، شرۆڤەکارێ سیاسی بۆ رۆژناما ئەڤرۆ ‏گۆت: ب دیتنامن سیاسەتمەدارێن عیراقێ شکەستن ئینایە ل ‏رێڤەبرنا وەلاتی، چونکی نزمترین ئاستێ خزمەتگوزاری و ژیانێ ‏بەرچاڤێن مرۆڤی ناکەڤن پێکەشی مللەتێ عیراقێ ھاتبنە کرن، ‏ژلایێ حوکمەتا ل بەغدا، ئەم وەکی ھەرێما کوردستانێ زۆر ل ‏پێشیا عیراقێ داینە ل پڕۆسا ئاڤاکرن و پێشکەشکرنا ‏خزمەتگوزاریان، نابیت ئەم خوە تێکەلی ئەڤێ رەوشێ بکەین، ‏پێدڤیە کورد بۆ قۆناغا بھێت ئێکڕێزی و ئێکگرتن ڤە بچنە ‏بەغدا و دێ سەرکەڤن ژی ھەگەر کورد ڤێجارێ بەس ئێک بگرن، ‏ھەرچەندە من بخوە چو باوەری ب عیراقێ نەماینە ددەمێ ‏نوکەدا، ھەتا وی دەمێ گەندەلی و رەوشا عیراق نوکە تێدا دەرباز ‏دبیت یا بەردەوامبیت، بەلێ خوەنیشادان دێ بەردەوامبن ھەتا ‏دگەھنە بەرسڤەکێ، ژبەر کو ھەموو بابەتەک ل سەبر و ھەدارا ‏خەلکی دەربازبویە ئیدی کورد دبێژن ھەگە جەڕێ ئاڤێ تژی ‏بوو ئیدی دێ بسەردا چیت چو چارە نینن.‏

ژ لایێ خۆڤەژی دکتۆر کاوان گەردی، راگرێ کۆلیژا زانستێن ‏سیاسی یا زانکۆیا سەلاحەدین بۆ رۆژناما ئەڤرۆ گۆت: راستە ل ‏عیراقێ حوکمەتەک ھەیە بۆ رێڤەبرنا عیراقێ، بەلێ دگەل ڤێ ‏چەندێ حوکمەتەکا سیبەرژی ھەیە و زێدەتر ئەو حوکمەتا ‏سیبەر دەستھەلات ل عیراقێ ھەنە و کاریگەری پەیداکریە، ‏چەندین وەلاتێن بیانی دەست ئێخستیە ناڤا کاروبارێن عیراقێن ‏ئەجێندایێن خوە جێ بەجێ دکەن ئەڤەژی بۆ یە ئەگەرێ ‏زێدەتر تێکچوونا رەوشا عیراقێ، بەلێ ھەگەر ئەف دەستێن ‏دەرەکی ژی نەبن گورەی پیڤەرێن سیاسی عیراق وەلاتەکێ فاشلە ‏و حوکمەتێ شکەستن ئینایە، مخابن ئەڤان خۆنیشادان و ‏ئالۆزیێن رۆژێن بۆری عێراق ڤەگرتی کاریگەری ل سەر پڕۆسا ‏پێکئینانا حوکمەتا نوو پەیداکریە و دبیتە ئەگەرێ زێدەتر ‏پاشکەفتنا پڕۆسا پێک ئینانا کابینا نوویا حوکمەتێ، بەلێ ‏بێگومان ل دووماھیێ دێ حوکمەت ھەر ھێتە پێکئینان و ‏پەرلەمان دێ کۆمبیت، بتایبەتی نوکە ئەمریکا یا بزاڤان دکەت ‏دوماھی ب خۆنیشادانێن باشوورێ عیراقێ بھێن و رەوش بھێتە ‏ئاسایی کرن وەک بەرێ.‏

website security
WP Facebook Auto Publish Powered By : XYZScripts.com