NO IORG
نووترين نووچه

به‌رپرسێ ده‌زگه‌هێ هه‌لبژارتن یێ پارتی دیموكراتی كوردستان راگه‌هاند، د هه‌لبژارتنێن ئه‌ڤ ساله‌ یێن جڤاتا نوونه‌رێن عیراقێ، هژمارا كورسیێن پارتی دیموكراتی كوردستان دێ زێده‌ بن و هژمارا كورسیێن كوردان ژی ل كه‌ركووكێ دێ 6 هه‌تا 8 كورسیان بن.

خسرۆ گۆران، به‌رپرسێ ده‌زگه‌هێ هه‌لبژارتن یێ پارتی دیموكراتی كوردستان، گۆت” پارتی دخوازیت د هه‌لبژارتنێن داهاتی یێن جڤاتا نوونه‌رێن عیراقێ كو ل هه‌یڤا تشرینا ئێكێ دێ هێنه‌ ئه‌نجامدان، هژمارا كورسیێن خوه‌ بپارێزیت، ل گه‌ل وێ چه‌ندێ ژی دا ئه‌م دزانین هژمارا كورسیێن مه‌، بۆ نموونه‌ ل نه‌ینه‌وا دێ زێده‌ بن”.

ل دۆر پێشبینیێن وان بۆ پارێزگه‌ها كه‌ركووكێ، خسرۆی گۆت” ب دیتنا مه‌ د هه‌لبژارتنێن ئه‌ڤ ساله‌ دا هژمارا كورسیێن كوردان ب گشتی ل پارێزگه‌ها كه‌ركووكێ دێ د ناڤبه‌را شه‌ش هه‌تا هه‌شت كورسیان دا مینن، وه‌كو پارتی دیموكراتی كوردستان ژی چاڤێ ل وێ چه‌ندێ یه‌ كورسیان ببه‌ین”.

بریاره‌ هه‌لبژارتنێن پێشوه‌خت یێن جڤاتا نوونه‌رێن عیراقێ ل 10/10/2021 بهێنه‌  ئه‌نجدامدان، پارتی دیموكراتی كوردستان ب تنێ دێ پشكداریێ د هه‌لبژارتنان دا كه‌ت و ناچیته‌ د چ هه‌ڤپه‌یمانیێن هه‌لبژارتنان دا، خسرۆ گۆران ل دۆر وێ چه‌ندێ ئایا لێكتێگه‌هشتنه‌ك د ناڤبه‌را پارتی و ره‌وتێ سه‌دری دا هه‌یه‌ وه‌كو ده‌ستپێكه‌ك بۆ رێككه‌فتنێ ل سه‌ر بده‌ستڤه‌ئینانا پۆستێ سه‌رۆكایه‌تیا كۆمارێ، وه‌كو هنده‌ك ناڤه‌ندێن میدیایی یێن عیراقی ئاماژه‌ بۆ كری، به‌رپرسێ ده‌زگه‌هێ هه‌لبژارتن یێ پارتی گۆت” هه‌كه‌ مه‌ رێككه‌فتن هه‌با، دا راگه‌هینین”.

عه‌زیز هه‌ورامی

 

ئه‌ندامه‌كێ لژنا ئاسییكرنا ره‌وشا كه‌ركووكێ راگه‌هاند، زێده‌تر ژ سێ سالانه‌ كار ل سه‌ر ئاساییكرنا ره‌وشا كه‌ركووكێ دهێته‌ كرن، ب رێیا دو لژنان كو ئێك ژ وان یا حكومی یه‌ د ناڤبه‌را حوكمه‌تا هه‌رێمێ و به‌غدا، یا دی لژنا پێكهاتانه‌، دووماهی كۆمبوونا ئاساییكرنا ره‌وشا كه‌ركووكێ ژی ل به‌ری جه‌ژنا ره‌مه‌زانێ هاتیه‌ ئه‌نجامدان.

شاخه‌وان عه‌بدوللا، ئه‌ندامه‌كێ لژنا ئاسییكرنا ره‌وشا كه‌ركووكێ بۆ رۆژناما ئه‌ڤرۆ گۆت” كۆمبوون د به‌رده‌وامن و گاڤێن باش یێن هاتینه‌ هاڤێتن، به‌لێ به‌ربه‌ست یێن هه‌ین، بزاڤ ب وی ئاراسته‌ی نه‌ كو دووماهی ب هه‌موو به‌ربه‌ستان بهێته‌ كرن، ب تایبه‌تی د بابه‌تێ ئه‌ردێن چاندنێ دا ل گه‌ل چه‌ند بابه‌ته‌كێن دی و بزاڤێن ناڤبه‌ریێ ژلایێ نه‌ته‌وێن ئێكگرتی ڤه‌ یێن هه‌ین”.

شاخه‌وانی گۆت ژی” ئه‌و ره‌وشا نوكه‌ ل كه‌ركووكێ حاله‌ته‌كێ نه‌ ئاسایی یێ سه‌پاندی و له‌شكری یه‌ و پێكهاتێ سه‌ره‌كی ژی (كورد) نه‌ پۆستێ پاریزگاری و نه‌ پۆستێ فه‌رماندێ ئۆپه‌راسیۆنان هه‌یه‌ و ژ هه‌موو پۆستێن دی ژی هاتیه‌ بێ به‌هركرن، ئه‌و ره‌وشا نوكه‌ ل كه‌ركووكێ هه‌ی هه‌مان ره‌وشا سه‌رده‌مێ رژێما به‌عسه‌، ئه‌ڤه‌ ژی جهێ قه‌بوولكرنێ نینه‌ و ئه‌م یێن به‌ر ب هه‌لبژارتنان دچین و باژێره‌كێ سه‌ربازخانه‌ هه‌لبژارتن تێدا ناهێنه‌ ئه‌نجامدان، قانوون ژی تێدا سه‌روه‌ر نابیت و پێدڤیه‌ هێزێن بیانی ژێ ده‌ركه‌ڤن و باره‌گایێن حزبی و خانیێن داگیركری پشتی 16 ئوكتۆبه‌رێ راده‌ستی خودانێن وان بهێنه‌ كرن”.

ئاماژه‌كر” ئومێدا مه‌ ئه‌وه‌ چه‌ند هه‌یڤێن به‌ری هه‌لبژارتنان ره‌وشا كه‌ركووكێ بهێته‌ ئاساییكرن، بۆ نموونه‌  پارتی بریارا پشكداریێ د هه‌لبژارتنان ل كه‌ركووكێ دایه‌، به‌لێ باره‌گایێن پارتی ل وی باژێرێ یێن هاتینه‌ داگیركرن، چاوان پارته‌كا سیاسی یا مۆله‌تدای، میلیشیا باره‌گایێن وی داگیربكه‌ن، ئه‌ڤه‌ جهێ شه‌رمزاریێ یه‌ بۆ حوكمه‌تا عیراقێ كو نه‌شێت باره‌گایێن حزبان ژ میلیشیان چۆل بكه‌ت، چاوان به‌ربژارێن حزبان د ڤێ ره‌وشێ دا دێ شێن ب ئازادنه‌ بانگه‌شا هه‌لبژارتنان بكه‌ن كو ب ده‌هان گرۆپێن مافیا چه‌كدار ل وی باژێری یێن هه‌ین”.

ئه‌ندامێ لژنا ئاساییكرنا ره‌وشا كه‌ركووكێ خویاكر” بزاڤ یێن هاتینه‌ بله‌زكرن تاكو ره‌وشا كه‌ركووكێ وه‌كو نوكه‌ نه‌مینیت و هه‌كه‌ ب رێیێن دبلۆماسی نه‌هاته‌ چاره‌سه‌ركرن، پێدڤیه‌ ب هه‌ر رێیه‌كا دی وێ ره‌وشا سه‌پاندی بهێته‌ ب دووماهی ئینان، و حوكمه‌تا عیراقێ سۆز دایه‌ پارتی و حوكمه‌تا هه‌رێما كوردستانێ ره‌وشا كه‌ركووكێ ئاسایی بكه‌ت”.

رۆژناما (دیلی ستار) یا بریتانی ژ زارده‌ڤێ شاره‌زایه‌كا به‌رهنگاربوونا تیرۆرێ، به‌لاڤكر، رێكخستیا داعش یا تیرۆرستی ب بێ ده‌نگی ده‌ست ب پێكئینانا خیلافه‌ته‌كا نوو كریه‌ ب رێیا رێكخستنا ب هزاران چه‌كدارێن نوو ل عیراقێ و سووریێ و یه‌كه‌یه‌كا شه‌رێ یا نوو پێكئینایه‌ بۆ بجهئینانا هێرشان كو دژی وه‌لاتێن رۆژئاڤا ژی بهێنه‌ ئه‌نجامدان.

ئه‌ڤ هوشداریه‌ د ده‌مه‌كی دا دهێن كو هنده‌ك به‌رپرسێن ئیدارا ئه‌مریكی دیاردكه‌ن كو داعش پاره‌ی بۆ چه‌كدارێن خوه‌ یێن توندره‌و ل زێندانێن سووریێ دهنێریت و سه‌ركردێ نوویێ وێ رێكخستیا تیرۆرستی (ئه‌میر محه‌مه‌د عه‌بدولره‌حمان مه‌ولی) زێده‌تر ژ 10 هزار كه‌سێن نوو د ناڤ رێكخستیا داعش یا تیرۆرستی رێكخستینه‌ د ده‌مه‌كی دا داعش بزاڤا ئه‌نجامدانا كریارێن تیرۆرستی دكه‌ت كو جیهان نوكه‌ مژوولی به‌رهنگاریا ڤایرۆسێ كورۆنایێ یه‌.

دیڤید ئۆتۆ، شاره‌زا د به‌رهنگاریا تیرۆرێ دا ل په‌یمانگه‌ها (گلۆپال رسك یا نێڤده‌وله‌تی بۆ شیره‌تكاریێن ئه‌منی) بۆ وێ رۆژناما بریتانی گۆت” شێوازێ داعشێ یێ نوو یێ هاتیه‌ گوهارتن ب (یه‌كه‌یه‌كا ستراتیژی) كو ئه‌ركێ وێ دانانا پلانێن هێرشایه‌ كو هنده‌ك ژوان هێرشان بگه‌هنه‌ ل وه‌لاتێن رۆژئاڤایی بهێنه‌ ئه‌نجامدان”.

ئۆتۆی بۆ رۆژناما (دیلی ستار) گۆت ژی” داعش به‌رده‌وام گوهۆرینان د هه‌ر یه‌كه‌یه‌كا خوه‌ یا ستراتیژی دا دكه‌ت، و شێوازه‌كێ دیار د وێ رێكخستیێ دا یێ هه‌ی د پرسا شوونگرتنا پۆستێ هه‌ر سه‌ركرده‌كێ وێ یێ دهێته‌ كوشتن و سه‌رۆكێ نووی یێ داعشێ دخوازیت یه‌كه‌ یا دوور بیت ل به‌رچاڤان د ده‌مه‌كی دا چه‌كدارێن نوو ژی دئینیته‌ دناڤ رێكخستیا خوه‌ دا، لێ نوكه‌ ئه‌و به‌حسێ خیلافه‌تێ ناكه‌ن، به‌لكو ب بێ ده‌نگی یێ كارێ پێكئینانا وێ دكه‌ن”.

وی شاره‌زایێ د وارێ به‌رهنگاریا تیرۆرێ دا گۆت ژی كو ناڤێ سه‌ركردێ داعشێ د چ ده‌زگه‌هێن پرۆپاگندێ یێن ب سه‌ر وێ رێكخستیێ ڤه‌ ناهێته‌ گۆتن و ئه‌ڤه‌ بزاڤه‌كه‌ ژ داعشێ تاكو یێ پاراستی بیت و نه‌هێته‌ كوشتن و ئه‌وا نوكه‌ دهێته‌ كرن هه‌بوونا سه‌ركردایه‌تیه‌كا داعشێ یه‌ كو ب نهێنی كار دكه‌ت و چ داخۆیانیان بۆ جیهانا ده‌رڤه‌ ناده‌ت، ژ به‌ر كو هه‌كه‌ سه‌رۆكێ وان گه‌له‌ك باخڤیت دێ بیته‌ ئارمانج وه‌كو یێ به‌ری وی ئه‌بو به‌كر به‌غدادی.

به‌رپرسێن ئیدارا ئه‌مریكی ل واشنتۆن ئاماژێ ب به‌رفره‌هبوونا تۆرا داعشی یا دارایی دكه‌ن ل جیهانێ، ل دووڤ وه‌زاره‌تا گه‌نجینا ئه‌مریكی، رێكخستیا داعش یا تیرۆرستی هنده‌ك ویستگه‌هێن لوژستی ل توركیا بكاردئینیت بۆ ڤه‌گوهاستنا پاره‌ی دناڤبه‌را وه‌لاتان دا و ئاشكراكر ژی كو ڤه‌گوهاستنا پاری د ناڤبه‌را عیراقێ و سووریێ دا ژی په‌یدا دبیت ب رێیا هنده‌ك كه‌سان كو پشكه‌ك ژ وان پاران دچنه‌ كه‌مپا هۆل ل رۆژهه‌لاتا سووریێ كو هنده‌ك ئه‌ندامێن به‌رێ یێن داعشێ تێدا د ئاكنجی نه‌ و ئیدارا ئه‌مریكی ناڤێ زێده‌تر ژ 100 كه‌س و و ئه‌وێن پاران ڤه‌دگوهێزن كریه‌ د لیستا تیرۆرێ دا وه‌كو بزاڤه‌ك بۆ ژناڤبرانا تۆرا دارایی یا داعشێ.

سازیه‌كا ئه‌مریكی راگه‌هاند كو دڤێت ئه‌مریكا پتر پشته‌ڤانیێ ل كوردێن سووریێ بكه‌ت و د بیاڤێ سیاسی دا پشته‌ڤانیا وان بكه‌ت، چونكو ژ به‌ر ره‌وشا ئالۆز یا ل سووریێ و ئالۆزیێن ل رۆژهه‌لاتا ناڤین مه‌ترسیه‌كا گه‌له‌ك مه‌زن ل سه‌ر كوردێن سووریێ هه‌یه‌ و ئه‌ركێ ئه‌مریكا یه‌ كو كوردان ب تنێ نه‌هێلیت.

سازیا نێڤده‌وله‌تی یا ئازادیا ئایینان ل ئه‌مریكا راگه‌هاند كو كوردێن سووریێ د شه‌رێ ل دژی داعشێ دا شیان رۆله‌كێ سه‌ره‌كی بگێرن و گه‌له‌ك قوربانی دان، لێ مخابن د سه‌رده‌مێ ئیدارا ترامپی دا وه‌كو پێدڤی پشته‌ڤانی ل كوردان نه‌هاته‌ كرن و ژ به‌ر هندێ ژی توركیا شیا پشكه‌ك ژ ئاخا كوردان داگیر بكه‌ت و زیانێن مه‌زن ژی گه‌هشته‌ وه‌لاتیێن كورد ل باكورێ سووریێ، ژ به‌ر هندێ ژی دڤێت ئیدارا نوو یا ئه‌مریكا هه‌لویستێ خوه‌ ل هه‌مبه‌ر كوردان ل سووریێ ئاشكرا بكه‌ت و ب فه‌رمی پشته‌ڤانیێ ل كوردان بكه‌ت و ل هه‌مبه‌ر هێرشێن توركیا و رژێما سووریێ وان ب پارێزیت و ب تنێ نه‌هێلیت.

سازیا ئه‌مریكی هه‌روه‌سا دیار ژی دكه‌ت كو رژێما سووریێ دڤێت ب پشته‌ڤانیا ئیرانێ و روسیا رێڤه‌به‌ریا كوردان ل باكورێ سووریێ ژناڤ ببه‌ت، هه‌كه‌ تشته‌ك وه‌سا روو بده‌ت دێ رژێما سووریێ ده‌ست ب ژناڤبرنا كوردان كه‌ت و ئه‌و یه‌ك ژی شه‌رمه‌كا مه‌زنه‌ بۆ ئه‌مریكا، ژ به‌ر هندێ ژی گرنگه‌ ئه‌مریكا ب فه‌رمی هه‌بوونا رێڤه‌به‌ریا كوردان ل باكورێ سووریێ قه‌بوول بكه‌ت و پشته‌ڤانیێ ل كوردان بكه‌ت، چونكو وی ده‌می دێ د ئاستێ نێڤده‌وله‌تی دا ژی گه‌له‌ك وه‌لات پشته‌ڤانیێ ل هه‌رێما كوردی ل باكورێ سووریێ كه‌ن، لێ د ره‌وشا نها دا مه‌ترسیه‌كا گه‌له‌ك مه‌زن ل سه‌ر كوردان ل سووریێ هه‌یه‌ و كورد چاڤه‌رێی پشته‌ڤانیا زێده‌ یا ئیدارا نوو یا ئه‌مریكا نه‌.

ئه‌و یه‌ك د ده‌مه‌كێ دایه‌ كو به‌ری نها جه‌نه‌رال مه‌زلوم عه‌بدی فه‌رماندارێ گشتی یێ هێزێن سووریا دیموكرات دیار كربوو كو ئه‌و ل گه‌ل ئه‌مریكا پێكڤه‌ ل سه‌ر به‌رنامه‌كێ هه‌ڤپشك بۆ پاشه‌رۆژا سووریێ و رۆژئاڤایێ كوردستانێ كار دكه‌ن، و هه‌روه‌سا ناڤهاتی داخواز ژ ئه‌مریكا ژی كربوو كو شاشیێن سه‌رده‌مێ ترامپی ل دۆر كوردان نه‌هێنه‌ دوباره‌ كرن.

چاڤدێرێن سیاسی ژی دیار دكه‌ن كو ئیدارا نوو یا ئه‌مریكا دڤێت پتر هاریكاریا كوردان بكه‌ت، ژ به‌ر هندێ ژی د ڤان چه‌ند مه‌هێن دووماهیێ دا ئه‌مریكا چه‌ندین كاروانێن چه‌ك و هاریكاریێن سه‌ربازی ره‌وانه‌ی رۆژئاڤایێ كوردستانێ كرن و هه‌روه‌سا ئه‌مریكا چه‌ندین بنگه‌هێن نوو یێن سه‌ربازی ژی ل رۆژئاڤایێ كوردستانێ ئاڤا كرینه‌ و به‌رپرسێن ئه‌مریكا چه‌ندین جاران ژی دیار كرن كو ئه‌و رێ ناده‌ن توركیا ده‌ست ب ئۆپه‌راسیۆنه‌كا نوو ل دژی كوردان ل سووریێ بكه‌ت.

ئه‌و یه‌ك د ده‌مه‌كێ دایه‌ كو نها روسیا ب ته‌مامی ل دژی ئاڤابوونا هه‌رێمه‌كا كوردی یه‌ ل سووریێ و به‌ری دو حه‌فتیان سیرگێی لاڤرۆڤ وه‌زیرێ ده‌رڤه‌ یێ روسیا ب ره‌نگه‌كێ ئاشكرا دیار كر كو ئه‌مریكا كار بۆ پارچه‌كرنا ئاخا سووریێ دكه‌ت و ئه‌و یه‌ك ژی ب چو ره‌نگه‌كێ ناهێته‌ قه‌بوول كرن و دڤێت ئه‌مریكا رێزێ ل ئیرادا خه‌لكێ سووریێ بگریت، هه‌روه‌سا حه‌فتیا بۆری وه‌زاره‌تا به‌ره‌ڤانیا ئه‌مریكا ژی راپۆرته‌ك ل دۆر ره‌وشا دووماهیێ یا رۆژئاڤایێ كوردستانێ به‌لاڤ كربوو و د راپۆرتێ دا ئاماژه‌ ب هندێ هاتبوو كرن كو كوردێن سووریێ ژ سیاسه‌تا روسیا دلگرانن و خوه‌ ژ روسیا دوور دكه‌ن و كورد داخواز دكه‌ن كو ئیدارا بایدن وان ل هه‌مبه‌ر هێرشێن توركیا و رژێما سووریێ ب پارێزیت.

هه‌ولێر، قائید میرۆ

بزاف دهێنه‌كرن بۆ ڤێ قۆناغێ لایه‌نێن هه‌رێما كوردستانێ ئێك هه‌لویست هه‌مبه‌ری به‌غدا هه‌بیت و بۆ ڤێ مه‌ره‌مێ ژی لسه‌ر ئاستێن بلند كار بۆ ئێكرێزیا لایه‌نێن كوردی دهێته‌كرن، شرۆڤه‌كاره‌كێ سیاسی ژی دبێژیت، سه‌رده‌مێ به‌رێ دیكاتاتۆره‌كی حوكم ل به‌غدا دكر، به‌لێ ده‌ستهه‌لات و بریار ژی هه‌بوو. لێ نوكه‌ به‌رۆڤاژی ئه‌م نزانین بریار ل به‌غدا دده‌ستێ كێ دانه‌.

موئه‌یه‌د ته‌یب، شرۆڤه‌كارێ سیاسی و ئه‌ندامێ به‌رێ یێ جڤاتا نوونه‌رێن عیراقێ ل سه‌ر فراكسیۆنا پارتی دیموكراتی كوردستان، بۆ رۆژناما ئه‌ڤرۆ گۆت” هه‌موو ده‌مان ئێكرێزی و ئێك ده‌نگیا كوردان هه‌مبه‌ری به‌غدا كارته‌كا فشارێ یه‌ ئه‌م ب ده‌ست خوه‌ڤه‌ بینین، ده‌مێ ئه‌م پرت و به‌لاڤ د چینه‌ به‌غدا، هیچ گومانه‌ك تێدا نینه‌، كو ئه‌م هه‌موو دێ لاوازبین، هه‌كه‌ ل هه‌رێما كوردستانێ بۆچوونێن جودا هه‌بن و كیش لایه‌ن بچیته‌ دناڤا حوكمه‌تێ دا و كیش لایه‌ن نه‌چیت، په‌رله‌مان هه‌ر په‌رله‌مانێ هه‌رێما كوردستانێ یه‌ و كوردن و خه‌لكێ كوردستانێ نه‌، به‌لێ ل به‌غدا ده‌مێ ئه‌م دانوستاندنان دگه‌ل لایه‌نێن دی دكه‌ین پێدڤیه‌ ئێكرێزیه‌ك هه‌بیت د ناڤبه‌را لایه‌نێن سیاسی یێن هه‌رێما كوردستانێ دا، ئانكو ل هه‌مبه‌ری به‌غدا دڤێت ب ئێك هه‌لویست و ده‌نگ به‌رگری ژ مافێن خه‌لكێ كوردستانێ بهێته‌كرن، چونكه‌ مه‌ یێ دیتی ژ ئه‌ڤێ سه‌ربورو ئه‌زموونا مه‌ دگه‌ل به‌غدا هه‌ی، ئاشكرایه‌ ده‌مێ كورد ئێك لیست بناڤێ (هه‌ڤپه‌یمانیا كوردستانی) شیان پتر ده‌ستكه‌فتان بده‌ستڤه‌ بینن، ده‌مێ كورد ل به‌غدا پرت و به‌لاڤبووین و بووینه‌ سێ چار لیست و چو هه‌ماهه‌نگی د ناڤبه‌را وان دا نه‌بوو، خێرا كه‌سێ تێدا نه‌بوو چ وه‌ك تاكه‌ هێز یان ژی وه‌كی هه‌رێما كوردستانێ”.

موئه‌یه‌دی دیاركر” مخابن ناكۆكیێن ناڤخوه‌ ل هه‌رێما كوردستانێ یێن هه‌ین ووان ناكۆكیان  ل به‌غدا ژی ره‌نگڤه‌دان یا هه‌ی و تنێ زیانێ ب هه‌رێما كوردستانێ دگه‌هینن كو د دوڤدا زیان بۆ وان لایه‌نێن سیاسی یا هه‌ی، هندی ئه‌م ئێكرێز بین زێده‌تر دێ مه‌ وه‌كی هه‌رێما كوردستانێ سه‌نگا خوه‌ ل به‌غدا هه‌بیت و بێی ئێكرێزی ئه‌زموونا سالێن بۆری ده‌رخستیه‌ دێ ئه‌م لاوازبین”.

ناڤبری ئاماژه‌كر” ئاریشا مه‌زن یا هه‌رێما كوردستانێ ئه‌وه‌ ل به‌غدا ئه‌م نزانین بریار دده‌ستێ كێ دایه‌، به‌رێ ده‌مێ دیكتاتۆره‌كی حوكم دكر ل به‌غدا ئیدی هه‌رده‌مێ رێككه‌فتنه‌ك د ناڤبه‌را شۆره‌شا كوردی و حوكمه‌تا به‌غدا هاتباكرن، هه‌موو لایه‌كی پێگیری ب رێككه‌فتنێ دكر، ئه‌وا نوكه‌ ل به‌غدا چێ دبیت هه‌رێما كوردستانێ دێ دگه‌ل حوكمه‌تێ و سه‌رۆكێ حوكمه‌تێ رێككه‌ڤیت، لێ ل جڤاتا نوونه‌رێن عیراقێ دێ دژایه‌تیا رێككه‌فتنێ هێته‌كرن، هه‌روه‌سا دێ ل جڤاتا نوونه‌ران ده‌ربازبیت، لێ هێزه‌كا دی یا هه‌ی ئه‌م نزانین كیه‌ ئه‌و هێز دێ بێژیته‌ حوكمه‌تێ رێككه‌فتنێ بجه نه‌ئینه‌، گه‌له‌ك جاران مه‌ رێككه‌فتن دگه‌ل به‌غدا كرینه‌ به‌لێ نه‌هاتینه‌ بجهئینان، ئه‌ركێ نوونه‌رێن كورده‌ ل جڤاتا نوونه‌رێن عیراقێ كار بۆ بجهئینانا رێككه‌فتنا د ناڤبه‌را هه‌رێما كوردستانێ و به‌غدا بكه‌ن بۆ هنارتنا پشكا بودجێ هه‌رێما كوردستانێ، پێكڤه‌ و ئێك ده‌نگ كار بۆ مافێن خه‌لكێ كوردستانێ بكه‌ن، ژ به‌ر كو نانێ خه‌لكێ كوردستانێ یه‌ و تنێ یێ چ حزبا نینه‌، ب دیتنا من پێدڤیه‌ ئه‌ندامێن جڤاتا نوونه‌رێن عیراقێ چالاكتر داخوازا بجهئینانا رێككه‌فتنا ڤێ دوماهیێ بكه‌ن، ژ لایه‌كێ دیڤه‌ ژی هه‌رێما كوردستانێ ب هه‌موو هێزڤه‌ خوه‌ به‌رپرسیار بزانن به‌رامبه‌ری نه‌هنارتنا پشكا هه‌رێما كوردستانێ ژ بودجه‌ی”.

ئه‌میندارێ گشتیێ وه‌زاره‌تا پێشمه‌رگه‌ ل هه‌رێما كوردستانێ، راگه‌هاند، سه‌رۆك وه‌زیرێن عیراقێ مسته‌فا كازمی فه‌رمان دایه‌ كو رێككه‌فتنا ئه‌منی د ناڤبه‌را پێشمه‌رگه‌ی و له‌شكرێ عیراقێ ل ده‌ڤه‌رێن ده‌رڤه‌ی ئیدارا هه‌رێما كوردستانێ بهێته‌ بجهئینان.

فه‌ریق (جه‌بار یاوه‌ر) ئه‌میندارێ گشتیێ وه‌زاره‌تا پێشمه‌رگه‌، گۆت” د كۆمبوونێن پێشتر د ناڤبه‌را پێشمه‌رگه‌ی و له‌شكرێ عیراقێ دا، بریار هاتبوو دان سه‌نته‌رێن هه‌ماهه‌نگیا ئه‌منی یێ هه‌ڤپشك ل ده‌ڤه‌رێن( خانه‌قین، كه‌ركووك، مووسل و مه‌خموور) بهێنه‌ دروستكرن.

گۆت ژی” ئه‌و رێككه‌فتنه‌ ل سه‌ر بنه‌مایێ وان پێشنیازان هاته‌ كرن كو كازمی ب خوه‌ پێشكێش كربوون”.

رێككه‌فتنا ئه‌منی د ناڤبه‌را لژنا بلند یا هه‌ماهه‌نگیێ یا ب سه‌ر وه‌زاره‌تا پێشمه‌رگه‌ و لژنا هه‌ڤشێوه‌ ل فه‌رمانده‌یا ئۆپه‌راسیۆنێن هه‌ڤپشك هاتبوو ئیمزاكرن.

پشتی وێ رێككه‌فتنێ و هه‌تا نوكه‌ بریاربوو ئه‌و سه‌نته‌ره‌ بهێنه‌ دامه‌زراندن، لێ نه‌هاتبوونه‌ دامه‌زراندن و هیچ هێزه‌كا هه‌ڤپشك ژی د ناڤبه‌را پێشمه‌رگه‌ی و له‌شكرێ عیراقێ داب ۆ ده‌ڤه‌رێن دابرای نه‌هاتبوو دروستكرن.

د نووترین پێشهات دا، سه‌رۆك وه‌زیرێن عیراقێ د كڤانێ كۆمبوونه‌كا ئه‌منی دا، لژنا بلند یا هه‌ماهه‌نگیا ئه‌منی ل فه‌رمانده‌یا ئۆپه‌راسیۆنێن هه‌ڤپشك راسپارد سه‌ره‌دانا هه‌رێما كوردستانێ بكه‌ت بۆ كاراكرنا رێكه‌فتنێن پێشتر.

جه‌بار یاوه‌ر، ئاماژه‌ كر” شاندێ عیراقی ل رۆژا نه‌هێ ڤێ هه‌یڤێ ب سه‌رۆكایه‌تیا قاسم ئه‌عره‌جی، شیره‌تكارێ ئاسایشا نه‌ته‌وی یا عیراقێ، سه‌ره‌دانا هه‌ولێرێ كربوو و هه‌ردو لا رێككه‌فتن پشتی جه‌ژنێ ده‌ست ب بجهئینانا رێككه‌فتنان بهێته‌ كرن”.

ئه‌میندارێ گشتیێ وه‌زاره‌تا پێشمه‌رگه‌ دوپاتكر” چاره‌سه‌ریا نموونه‌یی بۆ بده‌ستڤه‌ئینانا سه‌قامگیریێ ل ده‌ڤه‌رێن كوردستانی یێن ده‌رڤه‌ی ئیدارا هه‌رێمێ، هه‌ماهه‌نگی و كارێ پێكڤه‌ یێ پێشمه‌رگه‌ی و له‌شكرێ عیراقێ یه‌ بۆ پاراستنا ئاسایشێ ل وان ده‌ڤه‌ران”.

سایتێ تۆرا ده‌نگوباسێن عیراقێ ئاشكراكر كو ره‌وتێ سه‌دری چه‌ندین ناڤ بۆ وه‌رگرتنا پۆستێ سه‌رۆكایه‌تیا حوكمه‌تا عیراقێ پشتی هه‌لبژارتنێن داهاتی، دیاركرنا و ئێك ژ وان ناڤان چانسێ بده‌ستڤه‌ئینانا وی پۆستێ زێده‌تر یێ هه‌ی.

وێ سایتی دیاركر كو سیاسه‌تمه‌دار و شاره‌زایێ ئابووری (مازن ئه‌لئه‌شیقر) ئێك ژ به‌ربژارێن ب هێزه‌ یێ ره‌وتێ سه‌دری بۆ وه‌رگرتنا پۆستێ سه‌رۆكایه‌تیا حوكمه‌تا عیراقێ پشتی ئه‌نجامدانا هه‌لبژارتنان.

دیاركر ژی كو به‌ری نوكه‌ ژی ناڤێ وی هاتبوو بۆ وه‌رگرتنا پۆستێ سه‌رۆكایه‌تیا حوكمه‌تێ پشتی شكه‌ستنا به‌ربژاركرنا محه‌مه‌د توفیق عه‌لاوی و عه‌دنان زه‌رفی ل سالا 2019.

به‌لاڤكر ژی كو ره‌وتێ سه‌دری مازن ئه‌لئه‌شیقر و چه‌ندین كه‌سایه‌تیێن دی وه‌كو (د. عه‌لی شه‌كری سه‌رۆكێ ده‌سته‌یا شیره‌تكاران ل سه‌رۆكایه‌تیا كۆمارا عیراقێ و نه‌سار روبه‌یعی سه‌رۆكێ فه‌رمانگه‌ها سیاسی یا ره‌وتێ سه‌دری و وه‌لید كرێماوی شیره‌تكارێ سیاسی یێ موقته‌دا سه‌در و محه‌مه‌د جه‌عفه‌ر سه‌در بالیۆزێ عیراقێ ل له‌نده‌ن) بۆ پۆستێ سه‌رۆكایه‌تیا حوكمه‌تا عیراقێ دێ به‌ربژار كه‌ت و هه‌ڤركی بۆ بده‌ستڤه‌ئینانا وی پۆستی دێ د ناڤبه‌را مازن ئه‌لئه‌شیقه‌ر و د. عه‌لی شه‌كری دا بیت، به‌لێ چانسێ ئه‌لئه‌شیقه‌ری یێ زێده‌تره‌.

به‌رپرسه‌كێ هێزێن سووریا دیموكرات راگه‌هاند كو د ماوه‌یێ چه‌ندین رۆژێن بۆری دا ب هه‌ماهه‌نگی ل گه‌ل هێزێن هه‌ڤپه‌یمانیا نێڤده‌وله‌تی وان شیاینه‌ ده‌ست ب ئۆپه‌راسیۆنه‌كا مه‌زن ل دێرازۆرێ بكه‌ن كو د ئه‌نجام دا ٤٠ چه‌كدارێن رێكخراوا تیرۆرستی یا داعشێ هاتنه‌ ده‌سته‌سه‌ر كرن.

هه‌مان به‌رپرسی ئه‌و یه‌ك ژی دیار كر كو د ناڤ كه‌سێن كو هاتنه‌ ده‌سته‌سه‌ر كرن دا چه‌ندین فه‌رماندارێن داعشێ ژی هه‌نه‌ و هه‌روه‌سا د ئه‌نجاما ئۆپه‌راسیۆنێ‌ دا گه‌له‌ك چه‌ك و ته‌قه‌مه‌نیێن داعشێ ژی هاتنه‌ ژناڤبرن.

ئەڤرۆ رۆژا ئێک شەمبی رێکەفتی ٢٠٢١/٥/١٦ ل کۆچکا پارێزگەها دهۆکێ ب سەرپەرشتیا “د.عەلی تەتەر” پارێزگارێ دهۆکێ و ب ئامادەبوونا رێڤەبەرێ گشتی یێ رەگەزنامێ ل هەرێما کوردستانێ و سەرۆکێ دیوانا وەزارەتا ناڤخو درێورەسمەکیدا رێڤەبەرێ نوی یێ رێڤەبەریا ئاکنجیکرنێ عەمید”بەهزاد عەلی” ل جهێ عەمید”رێبەر عەبدولعەزیز”پشتی بوویە رێڤەبەرێ رێڤەبەریا رەگەزنامێ هاتەدانان.
دپەیڤەکێدا پارێزگارێ دهۆکێ دا دیارکرن: دچوارچووڤێ گوهرانکاریێن بەردەوامێن ل سنۆرێ پارێزگەها دهۆکێ دهێنە ئەنجامدان ئەڤرۆ رێڤەبەرێ نویی یێ ئاکنجیکرنێ ل سنورێ پارێزگەها دهۆکێ دێ دەستکاربیت و داخواز سەرکەفتنێ بو هەردوو رێڤەبەرێن ئاکنجیبوونێ و رێڤەبەرێ رەگەزنامێ خواست، دپەیڤا خۆدا دۆپاتی ل کێمکرنا رۆتینێ و خزمەتکرنا هاولاتیان ب باشترین شێوەکر.
پاشان رێورەسمێن دەستبکاربوون و پێدانا فەرمانا کارگێری هاتنە گێران.

دهۆك، له‌زگین جوقى
به‌رپرسێ راگه‌هاندنێ ل رێڤه‌به‌ریا گشتى یا ساخله‌میا پارێزگه‌ها دهۆكێ دیاركر:” رۆژێن جه‌ژنێ 230 زارۆك ژدایكبووینه‌ و 49 روودانێن هاتن وچوونێ رووداینه‌ د ئه‌نجامدا كه‌سه‌كێ گیانى خوه‌ ژده‌ستدایه‌.
حه‌مزه‌ ره‌زیكى، به‌رپرسێ راگه‌هاندنێ ل رێڤه‌به‌ریا گشتى ساخله‌میا پارێزگه‌ها دهۆكێ دكونگره‌كى رۆژنامه‌ڤانێدا راگه‌هاند:” د هه‌ر سێ رۆژێن جه‌ژنێدا چوار هزار و 863 كه‌سان سه‌ره‌دانا ده‌زگه‌هێن ساخله‌میێ كرینه‌ و427 كه‌س ل نه‌خۆشخانه‌یان هاتینه‌ نڤاندن بۆ وه‌رگرتنا چاره‌سه‌ریێ و 64 نشته‌رگه‌ریێ هاتینه‌ ئه‌نجامدان وشه‌ش روودانێن وه‌رگه‌ریانا ماتورسكلا هاتینه‌ تۆماركرن و 22 روودانێن شه‌رچوونێ چێبووینه‌ و كه‌تن ژ بلنداهیان ژى 11 روودان بووینه‌ وگوله‌یێن ئاگرى وهه‌ولا خوه‌كوشتنى هه‌ر ئیك ژوان ئێك حاله‌ت بوویه‌ و قه‌سته‌رێن دلى یێن بله‌ز ژى شه‌ش قه‌سته‌ر هاتینه‌ كرن.
ئاشكه‌راكر:” 27 حاله‌تێن سۆتنى هاتینه‌ تۆماركرن و47 حاله‌تێن شووشتنا گولچیسكا و چه‌ند حاله‌تێن بێهنته‌نگیێ و ئێشانێن سێنگى و زكى ل 122 هاتینه‌ تۆماركرن كو مرن ب گشتى 20 حاله‌ت بووینه‌ دوو سۆتن وئێك ب هاتن وچونێ مریه‌ ویێن دى جۆره‌ وجۆر بووینه‌”.
گۆتژى: ل رۆژێن جه‌ژنێدا سێ هزار و 763 پشكنینێن كۆرۆنایێ هاتینه‌ ئه‌نجامدان و 360 تووشبوو هاتینه‌ تۆماركرن و حه‌فت كه‌سان گیانى خۆ ژده‌ستداینه‌.

website security
WP Facebook Auto Publish Powered By : XYZScripts.com