NO IORG
نوچێن گرنگ

ئەڤرۆ:
ل ڤان نێزیکان پەرلەمانێ کوردستانێ دێ پرسا راستڤەکرن و لێکنێزیکرنا مووچێن فەرمانبەرێن حوکمەتا ھەرێما کوردستانێ گەنگەشەکەت، بۆ ڤێ مەرەمێ ژی دو پرۆژە قانوون ژ لایێ پەرلەمانتاران ڤە ھاتینە نڤیسین و بۆ سەرۆکاتیا پەرلەمانی ھاتینە بلندکرن ب مەرەما خواندنێ ل سەر.
ل دووڤ ھەردو پرۆژە قانوونێن ژلایێ پەرلەمانتاران ڤە ھاتینە نڤیسین و بلندکرن بۆ سەرۆکاتیا پەرلەمانێ کوردستانێ دێ بزاڤ ھێنە کرن مووچێن فەرمانبەران ل ھەرێما کوردستانێ بھێنە راستڤەکرن، پرۆژێ ئێکێ ژ لایێ ١٠ پەرلەمانتاران ڤە ژ لیستێن جودا جودا ھاتیە پێشکێشکرن و خواندنا ئێکێ ژی بۆ ھاتیە کرن. پشتی تێبینیێن لیژنا قانوونی پرۆژە قانوون ھاتیە رەوانەکرن بۆ سەرۆکاتیا پەرلەمانی و تێدا ب خشتەکێ تایبەت راستڤەکرنا مووچان ھاتیە دیارکرن.
ل دووڤ خشتەی نابیت مووچێ چو فەرمانبەرێن ھەرێمێ یێن بێ باوەرنامە ژ ٥٠٠ ھزار دیناران کێمتر بیت و ھەر فەرمانبەرەکێ ھەلگرێ بەکالوریوسێ دی پتر ژ ئێک ملیۆن وەرگریت وەکو ئێکەم دامەزراندن و بۆ خودان باوەرنامێن دکتورایێ ژی دێ ملیۆنەک و ٥٠٠ ھزار دیناربن.
پرۆژێ دوویێ ژی ژلایێ ٢٦ پەرلەمانتاران ڤە ھاتیە ئیمزاکرن و تێدا ب رەنگەکێ دی داخوازا راستڤەکرنا مووچان ھاتیە کرن و ل دووڤ ڤی پرۆژە قانوونێ فەرمانبەرێن ھەرێمێ دێ ل سەر دو گرۆپان ھێنە پارڤەکرن، گرۆپێ ئێکێ ب ناڤێ گرۆپێ پلێن بلند ھاتیە ب ناڤکرن و داخازا بڕِینا ٢٥% ژ مووچێن وان دکەت و گرۆپێ دوویێ ب ناڤێ فەرمانبەرێن مووچە نزم یان کێم دھێتە نیاسین و ئەڤ پەرلەمانتارە داخاز دکەن ئەو ٢٥% یا ژ گرۆپێ ئێکێ دھێتە بریِن ل دووڤ رێنمایێن وەزارەتا دارایی و ئابووری یا حوکمەتا ھەرێما کوردستانێ ل سەر گرۆپێ دوویێ بھێتە بەلاڤکرن، ل دووڤ ڤێ قانوونێ پەرلەمانتار ھزر دکەن ئێدی حوکمەتێ پێدڤی ب دابینکرنا پارێ زێدەتر نینە بۆ مووچێن فەرمانبەران.
دھێتە زانین پار سال پرۆژە قانوونەک ژ لایێ پەرلەمانێ عیراقێ ڤە ھاتبوو پەسەندکرن و تێدا دا مووچێن فەرمانبەرێن پلە ١٠ ھەتا پلە چار ب رێژێن جودا جودا ھێنە زێدەکرن، لێ ژ بەر قەیرانا دارایی و ئابووری یا عیراق گرتی نەشیان ڤێ قانوونێ وەکو ھەی ب جە بینن.

ئه‌ڤرۆ نیۆز، قائید میرۆ
ئه‌ڤ شه‌ڤه‌ هێزێن پێشمه‌رگه‌ی ل ناحیا گوێڕ، هێرشه‌كا تیرۆرستێن داعش تێكشاند و شیان زیانێن مه‌زن بگه‌هینن تیرۆرستێن داعش.

ژێده‌ره‌كی ژ هێزێن پێشمه‌رگه‌ی ب ئه‌ڤرۆ نیۆز راگه‌هاند” ئه‌ڤ شه‌ڤه‌ نێزیك ده‌مژمێر ده‌هی شه‌ڤێ، تیرۆرستێن داعش هێرش كره‌ سه‌ر ناحیا گوێڕ و شه‌ڕه‌كێ گران دناڤبه‌را پێشمه‌رگه‌ و داعش چێبوو، د شه‌ڕێ ئه‌ڤ شه‌ڤه‌دا چه‌كێن گران هاتنه‌ بكار ئینان.
ژێده‌ری گۆتژی” پێشمه‌رگه‌ی ب هه‌ڤكاریا فڕۆكه‌یێن هه‌ڤپه‌یمانان شیان هێرشا داعش بشكێنن و زیانێن مه‌زن بگه‌هینن تیرۆرستێن داعش، به‌لێ هێشتا زیانێن داعش نه‌هاتینه‌ زانین.

ئه‌ڤرۆ نیوز:

حه‌یده‌ر عه‌بادى سه‌رۆك وه‌زیرێن عیراقێ راگه‌هاند بۆ رزگاركرنا تمامیا ده‌ڤه‌رێ، شه‌رێ بهێت دێ ل ئه‌نبار بیت و رژدى ل سه‌ر وێ یه‌كێ كر كو رزگاركرنا ئه‌نبار وه‌ك چاوا هێزێن ئێمناهیێ یێن عیراقێ ل تكریتى ل سه‌ر داعش سه‌ركه‌فتن، وه‌سا ل ئه‌نبار ژى دێ سه‌ركه‌ڤن.

ئه‌ڤ گوتنێن عه‌بادى دده‌مێ سه‌ره‌دانا وى دا بۆ بنگه‌هێ حه‌بانیه‌ ل ئه‌نبار هاتن كو هێزێن عیراقى ل وێرێ دێ هێزێ بۆ رزگاركرنا ئه‌نبار هنێرن.

ئه‌ڤرۆ نیوز:

مه‌سعود بارزانى سه‌رۆكێ هه‌رێما كوردستانێ به‌رسڤا فراكسیونا ئێكه‌تیێ دا ل سه‌ر گرتنا حه‌یدر شه‌شو و راگه‌هاند : گرتنا حه‌یده‌ر شه‌شو پرسه‌كا سیاسى نینه‌ و په‌یوه‌ندى ب پارتى ڤه‌ ژى نینه‌ و ناهێلێن ده‌رڤه‌ى قانوونێ و وه‌زاره‌تا پێشمه‌رگه‌ى چ هێزه‌كا دى هه‌بیت.

ل دۆر پرسا گرتنا حه‌یده‌ر شه‌شو، 7 نیسانێ فراكسیونا ئێكه‌تیێ ل په‌رله‌مانێ كوردستانێ گرتنا حه‌یده‌ر شه‌شو ب ژدوارى شه‌رمزاركربوو و هێرش كربوونه‌ سه‌ر سه‌رۆكاتیا هه‌رێمێ و پارتى دیموكراتى كوردستان.

ئه‌ڤرۆ نيوز، قائيد ميرۆ:
بڕیاربوو شاندەکێ حوکمەتا ھەرێما کوردستانێ پشتی بھێنڤەدانا جەژنا نەورۆزێ سەرەدانا بەغدا بکەت، نوونەرەکێ کورد ژی دبێژیت، ھاتنا عەبادی گۆھۆڕین پەیداکرینە.
سیروان سیرینی، پەرلەمانتارێ پارتی ل بەغدا بۆ ئەڤرۆ نیۆز گۆت: “راستە بڕیار بوو شاندەکێ ھەرێما کوردستانێ بۆ ھووردەکاریێن رێکەفتنا د ناڤبەرا ھەولێر و بەغدا دا سەرەدانا بەغدا بکەن، بەلێ نوکە گۆھۆڕین پەیدابووینە و ژڤانێ چوونا ئەڤێ شاندی يێ دیار نینە”.
سیرینی گۆتژی: “سەرەدانا حەیدەر عەبادی سەرۆک وەزیرێن عيراقێ و ھنارتنا پارەيی ژ لایێ بەغداڤە، رەوش بەرەف باشتر بریە و کاریگەری کریە سەر ئالۆزبوونا پەیوەندیێن د ناڤبەرا ھەولێر و بەغدا دا”.

ئەڤرۆ نیۆز، قائید میرۆ:
ھەر نوکە پەرلەمانتارێن پارتی دیموکراتی کوردستان، ئیمزا ل سەر راپۆرتا پڕۆژێ قانوونا دستوورێ ھەرێما کوردستانێ کر.
ڤەمان فەیسەل، پەرلەمانتارێ پارتی دیموکراتی کوردستان بۆ ئەڤرۆ نیۆز راگەھاند: “پشتی پەرلەمانتارێن فڕاکسیۆنێن ناڤا پەرلەمانی ئیمزا ل سەر راپۆرتا پڕۆژێ قانوونا دستووری کرین، نوکە مەژی بڕیاردایە رازیببین و مە ئیمزا ل سەر راپۆرتێ کریە”.
ڤەمانی دیارکر كو راپۆرت دێ ھێتە بلند کرن بۆ سەرۆکایەتیا پەرلەمانی، ھەتا بکەڤیتە بەرنامێ کاری یێ کۆمبوونا داھاتیا پەرلەمانی ل حەفتیا بھێت.

ئه‌ڤرۆ نيوز:

فه‌رمانده‌كێ پێشمه‌رگێ كوردستانێ راگه‌هاند كو ئه‌ڤرۆ ل ده‌مژێر 11ى سپێده‌هيا 8ى نيسانا 2015ێ داعش هێرش كره‌ سه‌ر پێشمه‌رگه‌يى ل به‌رۆژێ شنگال و هێرشا وان پشتى دو ده‌مژمێران ب پشته‌ڤانيا فرۆكێن هه‌ڤپه‌يمانان هاته‌ تێكشاندن.

ئه‌ڤى فه‌رماندێ پێشمه‌رگه‌يى زێده‌تر گۆت: “زيانێن مه‌زن يێن گه‌هشتينه‌ چه‌كدارێن داعش كو ب ده‌هان ته‌رمێن وان كه‌فتينه‌ ده‌ستێ پێشمه‌رگه‌يى و هێزێن پێشمه‌رگه‌يى ژى ب سلامه‌تن”.

ئه‌ڤرۆ نيوز:

په‌رله‌مانتاره‌كێ ل سه‌ر فراكسيۆنا پارتى ديموكراتى كوردستان بۆ مالپه‌رێ فه‌رميێ وێ پارتێ راگه‌هاند كو په‌رله‌مانتاره‌كێ كوردستانێ بوو ئه‌گه‌ر توركيا وان 500 مليۆن ديناران ب قه‌ر نه‌ده‌ته‌ هه‌رێما كوردستانێ.

دلشاد شه‌عبان، جێگرێ سه‌رۆكێ لژنا سامانێن سرۆشتى ل په‌رله‌مانێ كوردستانێ گۆت: “سه‌رۆكێ لژنا سامانێن سرۆشتى ل په‌رله‌مانێ كوردستانێ ديداره‌ك ل گه‌ل رۆژناما توده‌ى زه‌مان يا توركى كو نێزيكێ فه‌تحولا گۆيله‌نه‌، ئه‌نجام دايه‌ و تێدا گۆتيه‌ كو په‌ترۆلا هه‌رێما كوردستانێ ژ لايێ هه‌نده‌ك كۆمپانيێن لايه‌نگر – مه‌ره‌م پێ توركيايه‌- مفايه‌كێ زۆر ژێ دبينن و كه‌سێ ژى نه‌ڤێت ئاشكه‌را بكه‌ن، حوكمه‌تا توركيا ژى دڤێت بزانيت كا ئه‌ڤه‌ بۆچوونا حوكمه‌تا هه‌رێمێ و په‌رله‌مانێ وێ يه‌ يان ژى بۆچوونا وى يا كه‌سى يه‌.

ئاماژه‌ ب وێ چه‌ندێ ژى كر كو بڕيار بوو توركيا 500 مليۆن دۆلاران بۆ هه‌رێمێ ره‌وانه‌ بكه‌ت، لێ ژ به‌ر وان داخۆيانيا ئه‌و پاره‌ گيرۆ بوويه‌ و نوكه‌ ديار نينه‌ كا دێ هێت يان نه‌.

ئه‌ڤرۆ نيوز، له‌زگين جۆقى:

نوكه‌ 216 ئێزديێن ناڤ ده‌ستێ داعش هاتنه‌ رزگاركرن كو پتريا وان ژن و زارۆ نه‌ و دێ ژ كه‌ركووك بۆ ناڤ كه‌سوكارێن وان هێنه‌ ڤه‌گوهاستن.

خه‌يرى بۆزانى، رێڤه‌به‌رێ گشتيێ كاروبارێن ئێزديان ل وه‌زاره‌تا ئه‌وقاف و كاروبارێن ئاينى ل هه‌رێما كوردستانێ بۆ ئه‌ڤرۆ نيوز گۆت: “نوكه‌ هه‌موو ئه‌و وه‌لاتيێن ژ ده‌ستێ داعش رزگار بووين كو 216 كه‌سن، گه‌هشتنه‌ كه‌ركووك”.

زێده‌تر گۆت: “ئه‌ڤه‌ هه‌موو ژن و پير و زارۆنه‌ و دێ پشتى ماوه‌كێ كێم ژ كه‌ركووك بۆ ناڤ كه‌سوكارێن وان هێنه‌ ره‌وانه‌ كرن”.

ئه‌ڤرۆ نيوز:

نڤيسينگه‌ها حه‌يده‌ر عه‌بادى، سه‌رۆكێ حوكمه‌تا عيراقێ ئاشكه‌را كر، ب مه‌ره‌ما ده‌ستنيشانكرنا خالێن سه‌ره‌كى يێن رزگاركرنا مووسل ل ژێر ده‌ستێ داعش، د دووماهيا ڤێ هه‌يڤێ دا لژنا هه‌ڤپشك يا له‌شكرى يا د ناڤبه‌را هه‌ولێر و به‌غدا دا كۆمبيت.

رافد جبۆرى، ئاخفتنكه‌رێ نڤيسينگه‌ها سه‌رۆكێ حوكمه‌تا عيراقێ د داخۆيانيه‌كا رۆژنامه‌ڤانى دا راگه‌هاند: كورد و عه‌ره‌ب د ئێك به‌ره‌يێ شه‌رى يێ دژى داعش دانه‌، بۆ وێ مه‌ره‌مێ ژى لژنه‌كا هه‌ڤپشكا بلند د ناڤبه‌را هه‌ولێر و به‌غدا دا ل دووماهيا ڤێ هه‌يڤێ دێ كۆم بن.

رافد جبۆرى گۆتژى: “هێزێن پێشمه‌رگه‌يى ل پارێزگه‌ها نه‌ينه‌وا يێن هه‌يى و پێشمه‌رگه‌ لايه‌نه‌كێ سه‌ره‌كيێ ئازادكرنا مووسله‌”.

ئاخفتنكه‌رێ ب ناڤێ نڤيسينگه‌ها حه‌يده‌ر عه‌بادى ئاماژه‌ ب گرنگ ژى زانى دانوستاندن ل سه‌ر رۆلێ خه‌لكێ مووسل بكه‌ن د رزگاركرنا باژێرێ وان دا، چونكو ب ديتنا وى، خه‌لكێ مووسل ژى دێ رۆله‌كێ سه‌ره‌كى د ئازادكرنا وه‌لاتى دا هه‌بيت.

website security
WP Facebook Auto Publish Powered By : XYZScripts.com