NO IORG
نوچێن گرنگ

 
ئەڤرۆ نیوز:

 
د کۆمبوونا ل گەل شاندێ هەرێمێ دا محەممەد توفیق عەلاوی پێ ڕاگەهاندیە، د پێكئینانا حوکمەتێ دا دێ وەک پارێزگەهێن دی یێن عێراقێ رەفتارێ ل گەل هەرێمێ کەین.

 

 

سەلیم شوشكەیی ئەندامێ پەرلەمانێ عێراقێ و ئەندامێ شاندێ دانوستانكارێ هەرێمێ بۆ بەغدا، ب ئاژانسا نووچەیا ئەلعێراقیە راگەهاندیە، د کۆمبوونا عەلاوی و شاندێ هەرێمێ بۆ پیكئینانا حكومەتێ، شاندێ كوردی داخواز ژ سەرۆك وەزیرێن نوو كریە د پێكئینانا كابینا خۆ دا هەرێمێ وەكو گەل تەماشە بکەت نە وەك حزب، د هەمبەر دا ژی عەلاوی ب شاندی ڕاگەهاندیە، هەرێم ژی وەك پارێزگەهێن دی یێن عێراقێ دێ رەفتار ل گەل دا هێتە کرن و پەسەندكرنا بەربژێرێن كورد ژی دێ ب هەمان وێ میكانیزمێ بیت کو بەربژارێن پاریزگەهێن دی یێن عێراقێ پێ دهێنە پەسەند كرن.

 

 

ناڤهاتی ئاشكرا كریە ژی ، عەلاوی ب ئەندامێن شاندێ هەرێمێ ڕاگەهاندیە، كو ئەو ب خوە دێ بەربژاران بۆ پۆستێن كابینا خوە دێ هەلبژێریت و ڕێ ژی نادەت چ ژ وەزیرێن نوکە د پۆستێن خوە دا بمینن.

 

ئەڤرۆ نیوز:

 

قائیمقامیا قەزا دهوکێ ب هەڤکاریا رێڤەبەریا نەفت و کانزایان ل دهوکێ یا بەردەوامە ل سەر بەلاڤکرنا گازا سپی ل سەنتەرێ باژێرێ دهوکێ.

 

 

مللەت زکری سەرپەرشتێ بەلاڤکرنا گازێ راگەهاند هەتا نوکە ل سەنتەرێ باژێرێ دهوکێ نێزیکی (۲۱) هزار پلێتێن گازا سپی ل سەر خێزانان هاتینە بەلاڤکرن وگوت ژی، رۆژانە ل دەمژمێر (۸) سپێدێ ل دەف مزگەفتا مەلا (شوکری ) ل تاخێ پێشەسازی دەست بەلاڤکرنا گازێ دهێتە کرن.

 

 

هەروەسا ئاشکرا کر ژی، هەتا ئەڤرۆ (۲۰۲۰/۲/۲۱) ل سەنتەرێ باژێرێ دهۆکێ پتر ژ (۱۷) هزار خێزانان گازا سپی وەرگرتیە.

 
ئەڤرۆ نیوز:

 

 

ژ ئەگەرێ بەلاڤبوونا ڤایرۆسێ کۆرۆنایێ ل ئیرانێ، ب بڕیارا حوکمەتا هەرێما کوردستانێ، هاتنوچوونا گەشتیاری ب ڕێیا دەروازێ نێڤدەولەتی یێ حاجی ئۆمەران هاتە داخستن.
ڕاگەهاندنا کۆمەلگەها دەراوازێ نێڤدەولەتی یێ حاجی ئۆمەران ڕاگەهاند، پشتی بڕیارا وەزارەتا ناڤخۆیا حکومەتا هەرێما کوردستانێ، ژ دەمژمێر ١٢ شەڤا دەربازبوویی ڤە هاتنوچوونا گەشتیاران ل عێراقێ بۆ ئیرانێ و بەرۆڤاژی هاتیە راگرتن.

 

د ڕاگەهاندنێ دا هاتیە، مە بڕیار دایە ب ڕاگرتنا پێدانا ڤیزەیا هاتنە ژوورا هەلگرێن پاسپۆرتا ولاتێ ئیرانێ ب ڕێیا دەروازێن سنوری و ڕاگرتنا گەشتێن وەلاتیێن هەرێما کوردستانێ و عێراقێ بۆ ولاتێ ئیرانێ هەتا دەمەکێ نەدیار، هەروەسا ئەو وەلاتیێن هەرێما کوردستان و عێراقێ کو ل ولاتێ ئیرانێ ڤەدگەڕن دهێنە جۆداکرن و پشکنیێن هوور بۆ وان دهێتە کرن، ب مەرەما پشتڕاستبوون ژ توشنەبوونا وان ب ڤایرۆسێ کۆرۆنایێ.
دەربارەی ڤەلڤینێن بازرگانی دیارکریە، پشتی شێورێ دگەل وەزارەتا ناڤخۆ و وەزارەتا دارایی و ئابووری دێ ئاگەهداریێ دەربارەی وێ چەندێ ژی بەلاڤ کەین.
هەروەسا گۆتیە، داخوازێ ژ وەلاتیێن هەرێما کوردستانێ دکەین ب مەرەما گەشتکرنێ بۆ ئیرانێ سەرەدانا دەروازێ نەکەن و وەلاتیێن ئیرانێ ژی ب مەرەما گەشتکرن بۆ هەرێما کوردستانێ سەرەدانا دەروازێ حاجی ئۆمەران نەکەن.

 

ئەڤرۆ نیوز:

 

 

ژ بۆ رێگریکرنێ ل بەلاڤبوونا ڤایرۆسێ کۆرۆنا، وەزارەتا ساخلەمیا هەرێما کوردستانێ، هژمارەکا پێشنیاران ئاراستەی وەزارەتا نافخۆ کریە، ئەو پێشنیار ژی ئەڤەنە:

 

– رێگریكرن ژ هاتنا وان هه‌موو وەلاتیێن کو ژ ئیرانێ دهێنە هەرێما کوردستانێ ل هەموو خالێن سنوری، چ راسته‌وخۆ و یان نەڕاسته‌وخۆ، هەتا دەمەکی نەدیار ژبلی شاندێن دیبلۆماسیی، كو پشكنینا نۆشداری بۆ بهێتەکرن.

 

– ئه‌ڤ رێگرییه‌ وەلاتیێن هه‌رێما كوردستانێ ناڤەگریت كو نوکە ل كۆمارا ئیسلامیا ئێرانێ نە، ب مه‌رجەكێ پێگیری ب رێكارێن وه‌زاره‌تا ساخەمیێ بکەن، كو بۆ گه‌ره‌نتی و چاڤدێریكردنێ بۆ دەما 14 رۆژان دێ ڤەکێشیت.

 

– رێگریكرن ژ هەموو وەلاتیێن هه‌رێما كوردستانێ و عێراقێ بۆ سه‌رەدانا كۆمارا ئیسلامیا ئیرانێ هەتا دەمەکێ نەدیار.

 

ئەڤرۆ نیوز:

 

 

وەزارەتا ڤەگوهاستن و گەهاندنا عیراقێ بۆ رێگریکرنێ ژ بەلاڤنەبوونا ڤایرۆسێ کۆرۆنا هەموو گەشتێن ئەسمانى د ناڤبەرا عیراق و ئیرانی دا راگرتن.

د بەیاننامەیەکی دا وەزارەتا ڤەگوهاستن و گەهاندنا عیراقێ راگەهاند، ئەڤرۆ ٢٠ شواتا ٢٠٢٠ و پشتى راگەهاندنا چەند حالەتێن کۆرۆنا یێ ل ولاتێ ئیرانێ، وەزارەتا ڤەگوهاستنا عیراقێ هەموو گەشتێن ئەسمانى و هێلێن ئەسمانى بۆ وى ولاتی راگرتن.

 

د وێ بەیاننامێ دا هاتیە ژى، بریارا راگرتنا گەشتێن ئەسمانى د ناڤبەرا ئیران و عیراقێ دا بەرسڤا داخوازیا وەزارەتا ساخلەمیا عیراقێ یە، کو داخوازا راگرتنا هەموو گەشتان کربوو.

 

ئەڤرۆ نیوز ، زنار تۆڤی:

 

موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویا کرن: د روودانەکا ترافیکێ دا وەلاتیەکێ گیانێ خوە ژ دەست دا.

 

ناڤهاتی زێدەتر دیار کر: ئەڤ شەڤە روودانەکا هاتنوچوونێ ل سەر جادا گشتی یا ناحیا مانگێشکێ بۆ کومەلگەها باگێرا و ل نێزیک گوندێ گوندک نەبی دناڤبەرا دو ترۆمبێلان دا هاتیە روودان، کو ترۆمبێلەک ژ وان هوندا ئەکسنت تایبەت دهۆک و ترۆمبێلا دیتر نیسان سەنی كرێ دهۆك بوویە، د ئەنجامدا کەسەکێ گیانێ خوە ژ دەست دایە و دو کەسێن دیتر بریندار بووینە و هاتینە رەوانەکرن بۆ نەخوشخانا تەنگاڤیا ل پارێزگەها دهــوکێ.

 
ئەڤرۆ نیوز:

 

راگه‌هاندنا كومه‌لگه‌ها ده‌روازێ نێڤده‌وله‌تى یێ ئیبراهیم خه‌لیل دیار کریە، کو ل رێكه‌فتى 2020/1/1 هه‌تاكو 2020/1/31 ژ لایێ تاقیگه‌ها كۆمه‌لگه‌ها ده‌روازێ نێڤده‌وله‌تى یێ ئیبراهیم خه‌لیل ڤه‌ 4008 تون و 796 كیلوگرامێن كه‌ل و په‌لێن جۆدا یێن وەکی (فێقى، گوشتێ مریشكێ، كه‌ره‌ستێن پاقژكرنێ و پێدڤیێن نۆشدار …هتد) هاتینه‌ زڤراندن، ژبه‌ركو لدووڤ رێنمایی یێن پێدڤى نه‌بوون.

 

ئەڤرۆ نیوز:

 

 

ل شەڤا بوری د دو هێرشان دا ل دەڤەرەکا سەر ب فرانکفۆرتا ئەڵمانیا ڤە نەهـ کەس هاتنە کوشتن و وی چەکداری دایکا خوە کوشتیە و پاشی خوە ژی کوشتیە، چار ژ وان کوشتیان کورد بوون، هەڤدەم ناڤێ وان سێ کوردان ژی هاتنە ئاشکرا کرن.

 

 

ئەو چار کوردێن د وان دو هێرشێن دا هاتینە کوشتن خەلکێ باکورێ کوردستانێ نە و ئێک ژ وان خەلکێ مێردینێ یە ل باکورێ کوردستانێ، هەرسێ کەس خەلکێ باکورێ کوردستانێ نە، ب ناڤێن گۆكھان گولتەكین، فەرھاد ئونڤار و بیلال گۆكچە، هەتا نوکە ناڤێ ئێکێ نەهاتیە زانین.

 

 

ل شەڤا بوری 19-2-2020 د دو هێرشان دا ل هانوو یا سەر ب فرانکفۆرت ڤە 11 کەس هاتنە کوشتن.

 

ئەڤرۆ نیوز:

 

 

پشتى تۆمارکرنا پێنج حالەتێن تووشبوون ب ڤایرۆسێ کۆرۆنایێ و گیان ژ دەستدانا دو کەسان ل باژێرێ قوم یێ ئیرانی، وەزارەتا نافخۆ یا عێراقێ بریارا پێدانا ڤیزا راستەوخۆ ل خالێن سنوری ب گەشتیاران بۆ وى ولاتی هەلوەشاند.

 

وەزراەتا نافخۆ یا عیراقێ راگەهاند، بریارا پێدانا ڤیزێ ب گەشتیاران کو ب ئاوایەکێ راستەوخۆ ل خالا سنوری ب گەشتیارێن ئیرانی ددان هەلوەشاند، ئێدی ب ئاوایەکێ راستەوخۆ ڤیزا گەشتیاری ل خالێن سنوری یێن وی ولاتی نادەن.
هەروەسا ب ئەگەرێ بەلاڤبوونا ڤایرۆسێ کۆرۆنا حوکمەتا عیراقێ بریار دا دەرگەهێ سنوری یێ شیب ل پارێزگەها میسان ل گەل یئرانێ بدائێخیت.

 

هەڤدەم وەزارەتا ساخلەمیا عێراقێ نڤیسارەکا فەرمى بۆ جڤاتا وەزیران هنارتیە، داخوازا قەدەغەکرن و هاتنا هەموو کەسان دکەت کو ژ ئیرانێ بهێنە عێراقێ، ژبلی شاندێن سیاسی کو پشکنین بۆ بهێتە کرن.

ئەڤرۆ نیوز، نەوزاد هلۆری:

ب بەرهەڤبوونا وەزیرێ باژێرڤانی و گەشتوگۆزار، رێڤەبەریا گشتی یا باژێرڤانیان ل پارێزگەها دهۆکێ و سەروکاتیا زاژێرڤانیا زاخۆ، کومبوونەکا بەفرەهـ ل هەولێرێ هاتەکرن ل بارا چارەسەکرنا ئاریشا گلێشی ل زاخۆ، ل داویێ چارەسەریا گلێشی زاخۆ هاتەکرن.

کوردۆ شابان، بەرپرسێ راگەهاندنا وەزارەتا باژێرڤانی و گەشتوگۆزار یا حوکمەتا هەرێما کوردستانێ بو ئەڤرۆ نیوز گۆت: (ئەڤرۆ ب ئامادەبوونا ساسان عەونی، وەزیرێ باژێرڤانی و گەشتوگۆزار یا حوکمەتا هەرێما کودستانێ، دیسان ب بەرهەڤبوونا رێڤەبەرێ گشتیێ باژێرڤانیان ل پارێزگەها دهۆکێ و سەروکێ باژێرڤانیا زاخۆ، کومپانیا پەیوەندیدار ب گلێشی ل زاخۆ، کومبوونەکا بەرفرەهـ ل بارا چارەسەرکرنا ئاریشا گلێشی ل زاخۆ هاتەکرن).

زیدەتر گۆت: (د کومبوونێ دا چارەسەریا ئاریشا گلێشی ل زاخۆ هاتەکرن، ب گورەی راسپاردێن وەزیرێ باژێرڤانی دڤێت جهەکێ پەیوەندیدار ل وەزارەتێ و جهێن شولەژێ ب زوترین دەم کارێن خوە تمام بکەن ژبەرکو چارەسەرکڕنا گلێشی ئێکە ژ کارێن بەراهیێ یێن کابینا نوو یا حوکمەتا هەرێما کوردستانێ).

website security
WP Facebook Auto Publish Powered By : XYZScripts.com